ꞌÑudi ngu rä Hesu

Näꞌä bi me̱fi rä Hesu

RÄ BIDEO: Ko nꞌa rä ejemplo, rä Hesu bi ꞌñudi hanja sugägihu̱ Jeoba

1. Hyandi rä BIDEO o hñeti Mateo 6:​25-27. ꞌNepu̱ thädi nuya yä ntꞌani:

1. ¿Te ma ejemplo bi hñutsꞌi rä Hesu pa bi ꞌñudi ge rä Zi Dada Jeoba sugägihu̱?

2. Mäske rä Hesu mi konose xä ñho yä tsꞌintsꞌu̱, ¿por hanja himbi ne bi uni mä ndunthi rä imformäsio? ¿Por hanja xa bi hogi näꞌä rä ejemplo bi usa?

¿Te utkägihu̱ rä ejemplo rä Hesu?

2. Mu̱ gä udihu̱ ngu rä Hesu, ma gä tso̱mbäbihu̱ ha rä koraso yä zi jäꞌi ꞌne hingä ma dä japäbi xä ñhei dä beni näꞌä di utihu̱.

De̱mbäbi rä ejemplo rä Hesu

3. Ogi ñä ndunthi. Ogi xipäbi ri estudiante gatꞌho näꞌä gi pädi. Dä hogi ge ho̱nse̱ gi ñähu̱ de näꞌä rä imformäsio ehe ha näꞌä rä he̱ꞌmi gi nxadihu̱. Ora gi o̱tuäbi nꞌa rä ntꞌani, pe̱ꞌspäbi rä pasensia ꞌne to̱ꞌmi dä dädi. ¿Pe xi te ma gi pe̱fi mu̱ näꞌä bi dädi hingä geꞌä rä mpengi o hindi nthe̱ ko näꞌä udi rä Mäkä Tꞌofo? Dä hogi gi usa märꞌa yä ntꞌani pa gi gu̱hni ꞌne njabu̱ dä zo̱ho̱ dä ntiende rä imformäsio. Mu̱ gi handi ge yä bi ntiende xä ñho, thogi ko mä nꞌa rä punto.

4. Usa näꞌä rä imformäsio ya pädi pa gi fatsꞌi dä ntiende mä nꞌa rä ntꞌudi. Por ejemplo, mu̱ ma gi nxadihu̱ nꞌa rä lección habu̱ mää te mä humu̱i pe̱ꞌtsi nuꞌu̱ yä jäꞌi xä du, dä hogi gi yꞌambäbi mꞌe̱tꞌo mu̱ beni te thogi ora tu nꞌa rä jäꞌi.

5. Huahni xä ñho te mä ejemplo ma gi usa. Änte de gi hñutsꞌi nꞌa rä ejemplo, dä hogi gi ñꞌanise̱:

1. «¿Konose nunä ejemplo di ne gä usa?».

2. «¿Ma dä ntiende te di ne gä uti?».

3. «¿Ma dä beni te di ne gä uti o ho̱nse̱ ma dä beni nunä ejemplo?».