Ma gä fatsꞌihu̱ nuꞌu̱ yä zi goda dä bädi Jeoba
1. ¿Hanja bi ꞌñudi rä nhuekäte rä Hesu po nuꞌu̱ yä zi goda?
1 Nuꞌmu̱ rä Hesu ya ma xä gu̱ rä ꞌñuu pa dä bo̱ni de Jeriko, bi yꞌo̱de ge yoho yä zi jäꞌi nuꞌu̱ mi goda bi ꞌñembäbi: «[¡Zi Hmuu!] ¡Huegägihe!». Mäske rä Hesu xa mi turämu̱i ngeꞌä mi pädi ge ya mi ꞌme̱di nꞌa hängutho yä pa pa dä tho, näꞌä bi mꞌai ꞌne bi yꞌo̱the nuꞌu̱ yä zi goda (Mat. 20:29-34). ¿Hanja dä za gä udihu̱ rä nhuekäte po nuꞌu̱ yä zi goda ja ngu bi ja rä Hesu?
2. ¿Hanja dä za gä umbäbihu̱ ntꞌo̱de nꞌa rä zi jäꞌi näꞌä goda?
2 Hanja gä fatsꞌihu̱. Mu̱ gi tini nꞌa rä zi goda ha rä ꞌñuu o ha rä tai, ze̱njua, xipi toꞌoꞌi ꞌne ꞌñembi ge gi ne gi fatsꞌi. Rꞌabu̱ di tꞌo̱ꞌtuäbi yä ntsꞌomꞌu̱i nuꞌu̱ yä zi goda jäꞌi, hänge nuyu̱ di deskomfia toꞌo dä ñäui. Pe mu̱ dä da ngue̱nda ge xa mäjuäni di ne gä faxu̱, nuꞌmu̱ ma dä me̱ꞌskägihu̱ rä komfiansa. Beni ge rꞌa yä zi goda handi nꞌa zi tu̱i, pe märꞌaa xa hinte handi. Hänge mähyoni gi pädi hanja gi fatsꞌi. Mꞌe̱fa de gi fatsꞌi, dä hogi gi xipi ge nuꞌi gi uti yä jäꞌi de rä Mäkä Tꞌofo. ꞌÑembi ge gi ne gi hñeti nꞌa rä testo de rä Mäkä Tꞌofo, ngu Salmo 146:8 o Isaías 35:5, 6. ꞌNehe dä za gä xipäbihu̱ hanja dä descarga rꞌa yä audio de jw.org. Mu̱ pädi dä hñeti rä he̱ꞌmi de gä braille, xipäbi ge gi ne gi hñäꞌspäbi rꞌa de nuꞌu̱ yä he̱ꞌmi di pe̱ꞌtsihu̱ de gä braille pa dä bädi mä nꞌa tu̱i de rä Mäkä Tꞌofo. Yꞌambäbi mu̱ ha rä computadora pe̱ꞌtsi nꞌa rä programä näꞌä heti rä texto en pantalla, pa njabu̱ dä za dä usa nuꞌu̱ yä mfatsꞌi ja ha jw.org ꞌne dä za dä descarga nuꞌu̱ yä he̱ꞌmi ja de gä formato RTF (Formato de Texto Enriquecido). Yä he̱ꞌmi ha nuya yä formato, ho̱nse̱ ja de gä ñhämfo̱ ꞌne ha nuꞌu̱ yä idioma mänꞌa fädi ha rä Xiꞌmhai. (Hyandi näꞌä rekuadro habu̱ enä «Ora gi fatsꞌi nꞌa rä zi goda...».)
3. ¿Hanja dä za gä tinihu̱ nuꞌu̱ yä zi goda ha rä territorio?
3 Hanja gä tinihu̱. Xä ñhei gä tinihu̱ nuꞌu̱ yä zi goda nuꞌmu̱ di uñhu̱ ntꞌo̱de ha yä nguu, ngeꞌä nuyu̱ kasi hingi ho dä ñäui nuꞌu̱ yä jäꞌi hingi pädi. Hänge mähyoni gä o̱tꞌehu̱ ntsꞌe̱di po gä tinihu̱ nuya yä zi jäꞌi pa gä umbäbihu̱ ntꞌo̱de (Mat. 10:11). ¿Xkä handi ha ri skuela o ha ri ꞌme̱fi nꞌa rä zi jäꞌi näꞌä goda? ¿Ha ri territorio gi pädi habu̱ ꞌmu̱i nꞌa zi jäꞌi näꞌä goda? ¿Ja nꞌa rä skuela o nguu habu̱ ꞌmu̱i o tꞌumbäbi rä mfatsꞌi? Hyoni hanja dä za gi ꞌñuti de Äjuä. Xipäbi yä familia, rä director o toꞌo di su, ge yä testigo rä Jeoba di ne gä fatsꞌihu̱ nuꞌu̱ yä zi jäꞌi goda, ꞌne xipäbi ge di pe̱ꞌtsihu̱ yä he̱ꞌmi de gä braille ꞌne yä grabasio pa geꞌu̱. ꞌÑuti näꞌä promesa uni rä Mäkä Tꞌofo habu̱ enä ge mänꞌitꞌho Äjuä ma dä yꞌo̱the gatꞌho nuꞌu̱ yä zi jäꞌi hingi handi. ꞌNehe dä za gi ꞌñuti näꞌä bideo rä thuhu No sé qué haría sin ella ja ha jw.org. Ha nunä bideo po̱ni nꞌa rä ku näꞌä goda ꞌne mää hanja xä matsꞌi ndunthi dä me̱ꞌtsi rä Mäkä Tꞌofo de gä braille. Mu̱ gä xipäbihu̱ nuꞌu̱ yä zi goda, yä familia o nuꞌu̱ toꞌo di su, pa te di ne gä tso̱nihu̱, nuꞌu̱ dä za dä rꞌakägihu̱ nse̱ki gä fatsꞌihu̱ dä bädi de Äjuä.
4. ¿Te utkägihu̱ näꞌä esperiensia bi me̱ꞌtsi Janet?
4 Nꞌa rä zi nju rä goda rä thuhu Janet bi ma ha nꞌa rä ngu habu̱ mi ꞌmu̱i yä zi goda jäꞌi. Näꞌä nju bi ñäui nꞌa rä nxutsi, ꞌne bi ꞌñembäbi: «Rä Hesu bi yꞌo̱the yä zi goda jäꞌi pa njabu̱ bi ꞌñudi näꞌä ma dä ꞌme̱fi po gatꞌho nuꞌu̱ yä zi jäꞌi goda». Janet bi ꞌñuti te mää Apocalipsis 21:3, 4, ꞌne bi xipäbi hanja nunä promesa ma dä kumpli xti zo̱ho̱ rä Tsꞌu̱tꞌhui Äjuä. Näꞌä nxutsi bi ꞌñenä: «Nunka xti o̱de dä mängä njabu̱ nꞌa rä goda. Kasi gatꞌho yä jäꞌi kamfri ge nuꞌu̱ goda, xä thogi njabu̱ ngeꞌä bi me̱fi nꞌa rä tsꞌoki nuꞌu̱ yä dada o yä xita». Nubye̱, Janet umbäbi nꞌa rä ntꞌudi de rä Mäkä Tꞌofo näꞌä nxutsi yꞌo mꞌiki tatꞌä semänä ko rä mfistꞌofo Enseña.
5. Mäske nuju̱ hingi tsa gä o̱thehu̱ yä zi goda ngu bi ja rä Hesu, ¿te mä mfatsꞌi dä za gä umbäbihu̱?
5 Di pädihu̱ ge nuju̱ hingi tsa gä o̱thehu̱ nuꞌu̱ yä zi goda ngu bi ja rä Hesu, pe hää dä za gä fatsꞌihu̱ dä bädi de Äjuä, ꞌne asta dä za gä fatsꞌihu̱ nuꞌu̱ yä jäꞌi xä goꞌtuäbi yä mfeni rä tsꞌondähi (2 Cor. 4:4). Rä Hesu bi yꞌo̱the nuꞌu̱ yoho yä zi ñꞌo̱ho̱ getbu̱ de Jeriko ngeꞌä “xa bi hueki” (Mat. 20:34). Mu̱ gä udihu̱ ꞌnehe rä mhäte ꞌne rä nhuekäte po nuꞌu̱ yä zi goda, dä za gä pe̱ꞌtsihu̱ rä johya de gä fatsꞌihu̱ dä bädi de Jeoba, näꞌä rä Zi Dada toꞌo ma dä xokuäbi yä da nuꞌu̱ yä zi goda ꞌne ma dä umbäbi nꞌa rä te pa nzäntho.