Hanja dä za gä uñhu̱ ntꞌo̱de mänꞌa xä ñho: Predikabi nuꞌu̱ yä zi goda

POR HANJA XA MÄHYONI. Rꞌa yä zi jäꞌi nuꞌu̱ goda hingi ho dä ñäui nuꞌu̱ yä jäꞌi hingi pädi. Hänge mähyoni gä o̱thu̱ ntsꞌe̱di po gä tinihu̱ nuꞌu̱ yä zi goda pa gä predikabihu̱. Rä Zi Dada Jeoba turämu̱i po nuꞌu̱ yä zi goda (Le 19:14). Ma gä de̱mbäbihu̱ rä ejemplo rä Zi Dada Jeoba ꞌne ma gä honihu̱ nuꞌu̱ yä zi goda pa gä fatsꞌihu̱ dä bädi de geꞌä.

TE DÄ ZA GÄ PE̱FIHU̱

• Hyoni nuꞌu̱ yä zi goda (Mt 10:11). ¿Gi pädi nꞌa rä jäꞌi näꞌä pe̱ꞌtsi nꞌa rä familia näꞌä goda? Ha rä territorio rä mhuntsꞌi, ¿ja nꞌa rä ngunsadi o nꞌa rä luga habu̱ tsꞌitsꞌi nuꞌu̱ yä zi goda ꞌne japäbi mꞌe̱di gä häꞌspäbi nuꞌu̱ yä he̱ꞌmi di pe̱ꞌtsihu̱ pa geꞌu̱?

• ꞌÑudi ge gi ne gi fatsꞌi. Mu̱ gi ꞌñudi rä ñhojäꞌi ko nuꞌu̱ yä zi goda ꞌne gi hyoni hanja gi fatsꞌi, nuꞌu̱ ma dä ho dä ñä kongeꞌi, ngeꞌä ma dä senti ge xa mäjuäni gi turimu̱i po geꞌu̱. Fu̱di gi ñäui de nꞌa rä tema näꞌä tupäbi yä mu̱i nuꞌu̱ yä jäꞌi de näꞌä lugaꞌä.

• Fatsꞌi dä bädi Äjuä. Pa gä fatsꞌihu̱ nuꞌu̱ yä zi goda dä bädi de Äjuä, rä hnini Äjuä xä hyoki yä publicación pa geꞌu̱. Xipäbi näꞌä zi goda te mä publicación di pe̱ꞌtsihu̱ ꞌne hyopäbi dä huahni nꞌa de geꞌu̱. Rä superintendente de servicio ma dä bembäbi näꞌä ku di nkargo dä yꞌadi yä publicación ha rä mhuntsꞌi, ge dä yꞌadi ꞌnehe yä publicación pa yä zi goda.