Hanja dä za gä uñhu̱ ntꞌo̱de mänꞌa xä ñho: ꞌñuti nuꞌu̱ ri estudio dä nzäi dä nxadise̱

Por hanja mähyoni. Ngeꞌä pa dä te rä mhäte po Jeoba, nuꞌu̱ yä zi jäꞌi häni nꞌa estudio, hingä ho̱nse̱ di japäbi mꞌe̱di dä ñuꞌtsi yä mfeni ꞌne yä koraso ko nuꞌu̱ yä ntꞌudi mähyoni de Äjuä (Heb. 5:12–6:1). Nuꞌmu̱ di nxadihu̱ mähyoni gä handihu̱ hanja di nthe̱e̱ näꞌä ya di pädihu̱ ko näꞌä ja di nxadihu̱, ꞌne hanja dä za gä pe̱fihu̱ näꞌä xtä pädihu̱, pe pa geꞌä mähyoni gä o̱tꞌehu̱ ntsꞌe̱di (Prov. 2:1-6). Pa nuꞌu̱ mä estudiohu̱ dä bädi dä dimbäbi yä mpengi nuꞌu̱ yä ntꞌani pe̱ꞌtsi, mähyoni dä bädi dä inbestiga, pa njabu̱ dä bädi te dä me̱fi xti thogi yä xuñha (Luc. 6:47, 48).

Te dä za gä pe̱fihu̱:

ꞌÑuti ge xa mähyoni gä apäbihu̱ rä mfatsꞌi Jeoba kada gä nxadihu̱ rä Mäkä Tꞌofo (Juan 14:26; 1 Cor. 2:10).
Dende ri mu̱di xipäbi ge änte de gi nxadihu̱ rä Mäkä Tꞌofo, mähyoni dä ñhokise̱ ko näꞌä imformasion ma gi hyandihu̱. ꞌÑuti hanja xkä märka ri mfistꞌofo, ꞌne xipi hanja dä za dä dini ꞌne dä märka nuꞌu̱ yä noya mähyoni.
Xipäbi ri estudio ge mähyoni dä dädi nuꞌu̱ yä ntꞌani ko yä noyase̱. Ogi hopi dä hñetitho näꞌä hutsꞌi ha yä parrafo.
Mbitabi näꞌä ri estudio dä hñeti rä Mäkä Tꞌofo hyaxtho. Xipäbi näꞌä ri estudio ge ha jw.org, dä za dä dini nꞌa programä pa dä hñeti rä Mäkä Tꞌofo. ꞌÑembi ge dä yꞌo̱tꞌe ntsꞌe̱di po dä de̱ni näꞌä programä mäske rꞌabu̱ ma dä japäbi xä ñhei (Sal. 1:2, 3).
ꞌÑuti ri estudio hanja dä usa rä Watchtower Library o rä BIBLIOTEKA HA INTERNET Watchtower, pa dä dimbäbi rä pengi nꞌa rä ntꞌani de rä Mäkä Tꞌofo. ꞌÑuti te mä simbolo pe̱ꞌtsi nuꞌu̱ yä he̱ꞌmi di usahu̱ ha rä mhuntsꞌi.

Pe̱fi nuya yä tsꞌofo nunä zänä:

Xki huadi gi nxadihu̱ nꞌa subtitulo o nꞌa ntheke, yꞌapäbi näꞌä ri estudio dä xiꞌi te bi bädi. Mu̱ hingi pe̱ꞌtsi nꞌa ri estudio, nuꞌmu̱ ora gi hñeti rꞌa yä ꞌmede de rä Mäkä Tꞌofo o xki huadi gi hñeti nꞌa parrafo de La Atalaya, mänse̱ näꞌä gä pädi de näꞌä ja huadi gä hñeti.