Hanja dä za gä usahu̱ rä foyeto Yꞌo̱te Äjuä

Rä foyeto Yꞌo̱te Äjuä xä thoki pa gä utihu̱ de rä Mäkä Tꞌofo nuꞌu̱ yä jäꞌi hingi pädi dä hñeti rä he̱ꞌmi. Kada nꞌa rä ntheke pe̱ꞌtsi yoho yä nxii ꞌne xä thahni xä ñho nuꞌu̱ yä dibujo xä thutsꞌi. Kada nꞌa rä dibujo pe̱ꞌtsi nꞌa rä zi flecha näꞌä udi te mä dibujo di sigi.

Rä foyeto Yꞌo̱te Äjuä pa dä za gi ꞌmu̱i pa nzäntho xä thoki pa nuꞌu̱ yä jäꞌi pädi dä hñeti nꞌa tu̱i rä he̱ꞌmi. Nunä foyeto mänꞌa pe̱ꞌtsi yä letra ke rä foyeto Yꞌo̱te Äjuä, pe nuꞌu̱ yä dibujo mähye̱githo. Kasi ha gatꞌho yä ntheke de nunä foyeto pe̱ꞌtsi nꞌaa o yoho yä rekuadro habu̱ ehe mä nꞌa tu̱i rä imformasion. Dä za gi nxadihu̱ nuꞌu̱ yä rekuadro mu̱ gi handi ge hingi japi xä ñhei ri estudio. Nuꞌi dä za gi usa rä foyeto Yꞌo̱te Äjuä pa dä za gi ꞌmu̱i pa nzäntho, mäske ri estudio go di usa rä foyeto Yꞌo̱te Äjuä.

Nuꞌi dä za gi ofrese nzäntho nuya yoho yä foyeto, mäske ha näꞌä zänä di toka gä ofresehu̱ märꞌa yä he̱ꞌmi. Ora gi uni nꞌa rä estudio, usa nuꞌu̱ yä dibujo pa gi esplika te udi rä Mäkä Tꞌofo. Yꞌo̱tꞌe yä ntꞌani pa njabu̱ dä partisipa ri estudio ꞌne pa gi hyandi mu̱ hää di ntiende näꞌä gi uti. Hñeti ꞌne mäñhu̱ te udi nuꞌu̱ yä testo hutsꞌi hai de kada nꞌa rä nxii. Xti uadi nꞌa rä jäꞌi dä nxadi nꞌa de nuya yä foyeto, umbäbi rä estudio ko rä mfistꞌofo ¿Te xa mäjuäni udi rä Mäkä Tꞌofo? pa gi fatsꞌi ri estudio dä zo̱ho̱ dä nku̱ꞌmdehe o nxixtehe.