Ma gä umbäbihu̱ nꞌa rä hogä ꞌñehe yä zi jäꞌi

¿Toꞌo ma gä umbäbihu̱ nꞌa rä hogä ꞌñehe? Gatꞌho nuꞌu̱ yä jäꞌi di ntini ha mä mhuntsꞌihu̱, hindi mporta mu̱ di ntini po rä mu̱di mꞌiki o ya pe̱ꞌtsi ndunthi rä tiempo de di ntini kongekhu̱ (Ro 15:7; Heb 13:2). Ngu ora tso̱ngägihu̱ nꞌa rä ku näꞌä bi ehe de mä nꞌa rä dähni o nꞌa rä ku näꞌä xä hye̱gi de dä me̱päbi Äjuä po rꞌa yä je̱ya. Mu̱ go di geꞌi, ¿te ma gi senti mu̱ dä tꞌaꞌi nꞌa rä hogä ꞌñehe? ¿Hänge ma gi johya? (Mt 7:12.) Hänge änte ꞌne mꞌe̱fa de yä mhuntsꞌi dä hogi gä ze̱njuahu̱ nuꞌu̱ xä ntini. Njabu̱ ma gä eꞌspäbihu̱ rä nsu Jeoba, ma dä nja rä johya ꞌne nꞌa rä hogä ntsitsꞌi ha rä mhuntsꞌi (Mt 5:16). Rꞌabu̱ hindä za gä ñähu̱ ko ngatꞌho, pe kada nꞌa de gekhu̱ dä za gä mfaxtehu̱ pa njabu̱ nuꞌu̱ xä ntini dä senti xä ñho.a

Nzäntho mähyoni gä unihu̱ nꞌa rä hogä ꞌñehe, hingä ho̱nse̱ rꞌabu̱ ngu nuꞌmu̱ tagi rä Fenäte de rä du rä Hesu. Ora nuꞌu̱ yä jäꞌi di ntini po rä mu̱di mꞌiki ꞌne handi hängu rä mhäte di pe̱ꞌtsihu̱, rꞌabu̱ geꞌä jäpi dä nsunda Äjuä ꞌne dä ne dä me̱päbi ꞌnehe (Jn 13:35).