¿Hanja handi rä ngo de rä Paskua nuꞌu̱ xa mäjuäni yä kristianu?

12:5-7, 12, 13, 24-27

Pa hinxä zu̱di yä israelita näꞌä rä rꞌe̱tꞌa plaga bi me̱hni Jeoba pa yä me Egipto, yä israelita mi debe dä me̱fi gatꞌho näꞌä xki mändabi Jeoba (Éx 12:28). Yä israelita bi tꞌembäbi ge näꞌä xui de rä 14 de nisán, mi debe dä muntsꞌi ha yä nguu, dä hyo nꞌa rä tꞌu̱kä de̱ti o nꞌa rä tꞌu̱kä tꞌäxi näꞌä di pe̱ꞌtsi nꞌa nje̱ya ꞌne di ja rä nzaki, ꞌnepu̱ rä ji dä gotsꞌi ha nthetsꞌi de yä goxthi nguu. Mꞌe̱fa, mi pe̱ꞌtsi te dä hñäxi xo̱ge ꞌne ngu̱tꞌä dä zi. Näꞌä xuiꞌä hinto mi debe dä bo̱ni de rä nguu asta xti hyatsꞌi (Éx 12:9-11, 22).

Mäpaya, ¿de te di ñängägihu̱ rä Zi Dada Jeoba ora di o̱tehu̱ yä mhända?