Hanja dä za gä uñhu̱ ntꞌo̱de mänꞌa xä ñho: Ora di predikahu̱ ha nꞌa rä nguu habu̱ ja nꞌa rä interfono o nꞌa rä cámara

POR HANJA XA MÄHYONI. Mäpaya xä ꞌmu̱i ndunthi yä be ꞌne xa ja ndunthi yä peligro. Hänge ndunthi yä jäꞌi xä to̱te ha yä nguu yä cámara o yä interfono pa njabu̱ bi ñä dende mbo ha yä nguu nsinke dä xoki yä goxthi. Pe zäi ge nuju̱ di jakhu̱ xä ñhei gä ñäuihu̱ nꞌa rä jäꞌi näꞌä hanꞌgägihu̱ pe nuju̱ hingo di handihu̱. Hänge ma gä handihu̱ te ma dä maxkägihu̱ pa gä täpäbihu̱ rä ntsa ꞌne rä ntsu ora di predikahu̱ ha nuꞌu̱ yä nguu habu̱ ja yä cámara o yä interfono.

TE DÄ ZA GÄ PE̱FIHU̱

• Beni ge ha nuꞌu̱ yä nguu habu̱ ja yä cámara o yä interfono, ꞌmu̱i yä zi jäꞌi nuꞌu̱ hää ꞌmu̱i dispuesto dä ñä kongekhu̱.

• Beni ge rꞌa yä cámara nguntꞌä fu̱di di graba änte de gi toka rä timbre, ꞌne ge nuꞌu̱ yä jäꞌi tsa dä hyandi ꞌne dä yꞌo̱de gatꞌho dende mboo ha yä nguu.

• Mu̱ toꞌo dä dädi, nu̱ꞌti rä cámara o rä interfono ꞌñenä go gi handi näꞌä jäꞌi bi thädi dende mboo. ꞌÑudi nꞌa rä thede, rä tꞌekꞌei ꞌne ñä ja ngu ora gi ñäui nuꞌu̱ toꞌo gi pädi. Xipäbi näꞌä gi xipäbi nuꞌu̱ yä zi jäꞌi ora xoki yä goxthi. O xa gi kuatꞌi getbu̱ de rä cámara. Mu̱ näꞌä jäꞌi himbi dädi, ogi tsogi yä mensaje.

• Beni xä ñho ge ora xki huadi gi ñäui näꞌä jäꞌi, näꞌä bi sigi bi handi ꞌne bi o̱de gatꞌho näꞌä gi mää.