Hanja dä za gä uñhu̱ ntꞌo̱de mänꞌa xä ñho: nuꞌmu̱ yä jäꞌi thädi dende mbo ha yä nguu o po rä interfon

Por hanja xa mähyoni. Rꞌabu̱ dä za gä ntsuhu̱ gä umbäbihu̱ ntꞌo̱de nuꞌu̱ yä jäꞌi hingi po̱ni ꞌne bi thädi dende mbo ha yä nguu o po mäde de rä interfon. ¡Pe hingä hopäbihu̱ ge nunä ntsu dä däkägihu̱! Beni ge ndunthi yä mꞌiki, ho̱nse̱ dende thi o po rä interfon dä za gä umbäbihu̱ ntꞌo̱de nuꞌu̱ yä zi jäꞌi hingi po̱ni (Rom. 10:14). Ndunthi yä esperiensia udi ge rꞌa yä zi jäꞌi xä bädi de Äjuä nuꞌmu̱ xä tꞌumbäbi ntꞌo̱de dende thi de yä nguu (hyandi rä Anuario 2011, rä nxii 65 ꞌne 66, ꞌne rä Anuario 2000, rä nxii 54, rä parrafo 3). Ma gä handihu̱ rꞌa yä tsꞌofo.

Te dä za gä pe̱fihu̱:

Yꞌofo xä ñho nꞌa zi tꞌu̱kä presentasion, pa nuꞌmu̱ yä zi jäꞌi dä dädi dende mbo ha yä nguu o po mäde de rä interfon, nuꞌi dä za gi hñetitho näꞌä presentasion ya xkä yꞌofo. Geꞌä ma dä maxꞌäꞌi pa hingi ntsu gi umbäbi ntꞌo̱de. Ngu xti dädi näꞌä jäꞌi, xipäbi pa te xki ma. Mu̱ dä xiꞌi rä thuhu, nzofo po rä thuhu. Pa ri uadi, xipäbi ge gi ne gi umbäbi o gi ne gi tsokuäbi ha rä goxthi nꞌa rä tratado o nꞌa rä rebista habu̱ ma dä dini mä nꞌa tu̱i rä imformasion.
Ogi ꞌme̱di rä johya. Nuꞌmu̱ gi ñä, ꞌñudi rä johya ꞌñenä ge gi handi näꞌä jäꞌi.
Ogi tsu, ꞌne hyopi dä ñä ꞌnehe näꞌä jäꞌi. Ñä xä ñho, ogi ñä xa ntsꞌe̱di nixi zi njante. O xa gi ñä nguntꞌä ha nixi gi nkꞌu̱ne.
Ogi kopu̱ ndunthi. Ha yä to̱nꞌgu, ja ndunthi yä timbre o yä interfon. Hänge mu̱ gi kopu̱ ndunthi thi de nꞌa rä nguu, nuꞌu̱ yä zi jäꞌi dä za dä nkue̱ o dä ntsu. Pa hindä thogi njabu̱, dä hogi ge gi huahni ho̱nse̱ ngu hñuu yä timbre o yä interfon pa gi nzote, ꞌne beni gi yꞌofo te mä timbreꞌu̱ pa nuꞌmu̱ xki pengi mä nꞌa rä pa.

Pe̱fi nuya yä tsꞌofo nunä zänä:

Ha ri Mhuntsꞌi de gä Familia, nsayahu̱ hanja gi umbäbihu̱ ntꞌo̱de nꞌa rä zi jäꞌi näꞌä ma dä dädi dende mbo rä nguu o po rä interfon.