Fatsꞌi nuꞌu̱ ri estudiante pa dä tedese̱ yä ntsitsꞌi ko Äjuä

Mu̱ gi ne ge nuꞌu̱ yä zi jäꞌi gi uti de rä Biblia dä zo̱ho̱ dä mädi Jeoba ꞌne dä huahni yä hogä desision, hingä kombasta dä hñäni nꞌa rä curso de rä Mäkä Tꞌofo. Pa dä tedese̱ yä ntsitsꞌi ko Äjuä, mähyoni dä nxadise̱ ꞌne dä imbestigase̱ (Mt 5:3; Heb 5:12–6:2).

Dende nuꞌu̱ yä mu̱di mꞌiki ma gi uni nꞌa rä curso, ꞌñuti ri estudiante hanja dä ñhoki dende änte ko näꞌä rä imformäsio ꞌne nupäbi rä mfeni pa njabu̱ nzäntho dä nxadise̱ änte de kada nꞌa rä curso (mwb18.03 rä nxii 8). Xipäbi por hanja debe dä xatuäbi Äjuä änte de dä nxadise̱. Fatsꞌi pa dä bädi hanja dä usa nuꞌu̱ yä erramienta di pe̱ꞌtsihu̱ ꞌne mbitabi dä hyandi nuꞌu̱ yä rꞌayꞌo imformäsio po̱ni ha jw.org/ote ꞌne JW Broadcasting^®. Dä hogi ge rꞌamätsꞌu̱ gi fatsꞌi pa dä nzäi dä hñeti hyaxtho rä Mäkä Tꞌofo ꞌne dä ñhoki ko näꞌä rä imformäsio di nxadihu̱ ha yä mhuntsꞌi. Pe tobe jabu̱ mä nꞌa rä tꞌo̱tꞌe xa mähyoni, ꞌñuti hanja debe dä ntso̱ꞌmi.

HYANDIHU̱ RÄ BIDEO TINI RÄ JOHYA DE GI FATSꞌI MÄRꞌA DÄ ME̱PÄBI ÄJUÄ: FATSꞌI NUꞌU̱ RI ESTUDIANTE PA DÄ TEDESE̱ YÄ NTSITSꞌI KO ÄJUÄ. MꞌE̱FA THÄDIHU̱ NUYA YÄ NTꞌANI:

• 

  ¿Te bi me̱fi Coral pa bi ꞌñuti Rita por hanja hingä kombasta dä hyombäbi yä mpengi yä ntꞌani?

• 

  ¿Hanja bi japi Coral pa bi matsꞌi Rita dä ntiende por hanja Jeoba di proibi gä o̱tꞌehu̱ yä pekado ko mä ndoyꞌohu̱?

• 

  ¿Te mi debe dä me̱fi Coral mientra mi ntso̱ꞌmi?