¿Gi ne gi mfaxte de gä siervo ministerial?

1. ¿Te mi senti rä apostol Pablo po nuꞌu̱ yä siervo ministerial mi faxte ha yä mhuntsꞌi?

YÄ SIERVO ministerial faxte ndunthi ko nuꞌu̱ yä ꞌme̱fi ja ha yä mhuntsꞌi. Ha yä pa nuꞌu̱ yä mu̱di kristianu, rä apostol Pablo xa mi numäñho ꞌne mi mädi nuyu̱ yä zi ku. ¿Por hanja di pädihu̱? Ngeꞌä nuꞌmu̱ bi yꞌofo nꞌa rä karta pa nuꞌu̱ yä kristianu mi ꞌmu̱i ha Filipos, mꞌe̱tꞌo bi ze̱njua nuꞌu̱ yä siervo ministerial ꞌne yä anciano de rä mhuntsꞌi (Filip. 1:1).

2. ¿Te di senti rä zi ku Luis po näꞌä rä mäkä nsu pe̱ꞌtsi de dä mfaxte de gä siervo ministerial ha rä mhuntsꞌi?

² Hindi mporta ua yä bäsjäꞌi o ya yä zi däta jäꞌi, nuꞌu̱ yä zi ku faxte de gä siervo ministerial ha yä mhuntsꞌi mää hängu rä johya pe̱ꞌtsi. Por ejemplo rä zi ku Devan, mi pe̱ꞌtsi 18 nje̱ya nuꞌmu̱ bi thutsꞌi de gä siervo ministerial. Pe rä zi ku Luis mi pe̱ꞌtsi thogi nꞌa tu̱i de 50 yä je̱ya. Nuni zi ku enä: «Hängu rä johya di pe̱ꞌtsi de gä mfaxte ha rä mhuntsꞌi de gä siervo ministerial pa gä pe̱päbi mä zi ku ꞌne mä zi nju. Gatꞌho yä zi ku xä ꞌñutkägi ndunthi rä mhäte ꞌne nubye̱ dä za gä uti ꞌnehe hängu di mädi ora di honi hanja gä umbäbi rä mfatsꞌi». Hää, ndunthi yä zi ku nuꞌu̱ faxte de gä siervo ministerial di senti njabu̱ ꞌnehe.

3. ¿Te mä ntꞌani ma gä thädihu̱?

³ Zi ku, mu̱ nuꞌi ya gä nxixtehe, ¿dä za gi mfaxte de gä siervo ministerial? ¿Te mä raso o te mä mfeni gi pe̱ꞌtsi de por hanja gi ne gi nsiervo ministerial? ¿Te mä rekisito adi rä Mäkä Tꞌofo pa dä za gi mfaxte de gä siervo ministerial? Ha nunä ntꞌudi di nxadihu̱ ma gä thädihu̱ nuya yä ntꞌani. Pe mꞌe̱tꞌo ma gä handihu̱ te pe̱fi nꞌa rä siervo ministerial.

NÄꞌÄ PE̱FI NꞌA RÄ SIERVO MINISTERIAL

4. ¿Te pe̱fi yä siervo ministerial? (Hyandi ꞌnehe yä kꞌoi).

⁴ Nuꞌu̱ yä ku yä ñꞌo̱ho̱ ꞌne ya xä nxixtehe, geꞌu̱ dä za dä thutsꞌi de gä siervo ministerial pa dä matsꞌi yä anciano dä ja rꞌa de nuꞌu̱ yä ꞌme̱fi ja ha rä mhuntsꞌi. ¿Ngu te mä ꞌme̱fiꞌu̱? Rꞌa yä siervo ministerial di tokabi dä hyandi te mä territorio habu̱ ma dä ungä ntꞌo̱de rä mhuntsꞌi ꞌne di nkargo de dä hyandi ge nzäntho di ja nuꞌu̱ yä he̱ꞌmi japäbi mꞌe̱di yä ku pa yä mhuntsꞌi ꞌne rä tꞌungä ntꞌo̱de. Rꞌa yä siervo ministerial faxte pa dä su̱ki rä Ngu de gä Mhuntsꞌi o dä thoki habu̱ xä tsꞌoki. Märꞌaa di nkargo de dä umbäbi rä hogä ꞌñehe yä ku ꞌne hoki rä sonido pa dä ntꞌo̱de xä ñho yä jähñä ꞌne yä bideo durante yä mhuntsꞌi. Ja ngu di handihu̱, yä siervo ministerial faxte ko ndunthi yä ꞌme̱fi ha rä mhuntsꞌi. Pe jabu̱ nꞌa rä tꞌo̱tꞌe näꞌä xa mähyoni ꞌne hindi debe dä mꞌe̱päbi. Mähyoni dä me̱ꞌtsi nꞌa rä hogä ntsitsꞌi ko rä Zi Dada Jeoba, dä ꞌñudi hängu di mädi ꞌne ge ꞌmu̱i ja ngu di mändaꞌä. ꞌNehe, xa mähyoni dä mädi yä ku (Mat. 22:​37-39). ¿Te mähyoni dä me̱fi nꞌa rä ku näꞌä ya xä nxixtehe pa dä za dä mfaxte de gä siervo ministerial?

5. Mu̱ nꞌa rä ku ne dä nsiervo ministerial, ¿te mähyoni dä me̱fi?

⁵ Rä Mäkä Tꞌofo udi te mä rekisito debe dä kumpli nuꞌu̱ ne dä mfaxte de gä siervo ministerial (1 Tim. 3:​8-10, 12, 13). Hänge pa dä za gi mfaxte de gä siervo ministerial, nxadi rä Mäkä Tꞌofo ꞌne hyandi te mä rekisitoꞌu̱ ꞌne fu̱di gi jamäsu kada nꞌa de geꞌu̱. ¿Pe gi pädi? Dä hogi ge mꞌe̱tꞌo gi ñꞌanise̱ te mä mfeni o te mä raso gi pe̱ꞌtsi de por hanja gi ne gi nsiervo ministerial.

TE MÄ RASO GI PE̱ꞌTSI

6. ¿Te mä raso di debe dä me̱ꞌtsi nuꞌu̱ yä zi ku ne dä mfaxte de gä siervo ministerial? (Mateo 20:28; hyandi ꞌnehe rä kꞌoi).

⁶ Ñhesukristo geꞌä xa nꞌa rä däta kꞌoi de te di debe dä me̱fi nuꞌu̱ yä zi ku ne dä mfaxte de gä siervo ministerial. Po näꞌä rä mhäte mi pe̱ꞌtsuäbi rä Zi Dada Jeoba ꞌne yä jäꞌi, bi uni gatꞌho de näꞌä mi pe̱ꞌtsi ꞌne bi ꞌmu̱i dispuesto dä ja nuꞌu̱ yä ꞌme̱fi mi pe̱fi yä zi hyoya o yä ꞌme̱go (hñeti Mateo 20:28; Juan 13:​5, 14, 15). Mu̱ nuꞌi ꞌnehe gi senti näꞌä mhäteꞌä, rä Zi Dada Jeoba ma dä jäpi gatꞌho näꞌä gi pe̱fi pa dä za gi mfaxte de gä siervo ministerial (1 Cor. 16:14; 1 Ped. 5:5).

7. ¿Por hanja rä Zi Dada Jeoba hingä ma dä jäpi nꞌa rä ku näꞌä ne dä nsiervo ministerial ho̱nse̱ pa dä tꞌespäbi rä nsu?

⁷ Mäpaya di handihu̱ hanja yä jäꞌi eꞌtsuäbi yä nsu nuꞌu̱ yä jäꞌi pe̱ꞌtsi rä tsꞌe̱di, rä autorida o märꞌa yä däta nsu. Pe hingi njabu̱ ko nuꞌu̱ yä ku honi dä mfaxte ha rä mhuntsꞌi. Ngeꞌä nꞌa rä ku näꞌä senti rä mhäte po rä Zi Dada Jeoba ꞌne po gatꞌho yä ku, geꞌä japäbi dä hyoni hanja dä mfaxte, hingä ngeꞌä honi dä me̱ꞌtsi rä autorida o dä tꞌespäbi rä nsu. Mu̱ nꞌa rä ku ne dä mfaxte de gä siervo ministerial o de gä anciano ho̱nse̱ ngeꞌä honi dä tꞌespäbi rä nsu, hingä ma dä ne dä ja rꞌa yä ꞌme̱fi ha rä mhuntsꞌi pa dä supäbi rä taxo rä Zi Dada Jeoba. ¿Por hanja? Ngeꞌä ma dä mbeni ge ma dä dagi rä nsu o ge ma dä ꞌme̱di rä tsa (Juan 10:12). Rä Zi Dada Jeoba hingä ma dä umbäbi rä jäpi nuꞌu̱ honi dä tꞌespäbi yä nsu, nixi nuꞌu̱ yä orgulloso nixi nuꞌu̱ honi yä ñhose̱ (1 Cor. 10:​24, 33; 13:​4, 5).

8. ¿Te bi xipäbi rä Hesu nuꞌu̱ yä apostol ꞌne por hanja?

⁸ Rä Mäkä Tꞌofo mää ge asta rꞌa de nuꞌu̱ yä de̱ni rä Hesu bi hyoni dä me̱ꞌtsi rä autorida ho̱nse̱ pa dä tꞌespäbi yä nsu. Geꞌä bi thogi ko nuꞌu̱ yoho yä apostol rä Hesu myä thuhu Santiago ꞌne Juan. Nuyu̱ bi yꞌapäbi rä Hesu ge dä umbäbi nꞌa rä hogä puesto xti mända ha rä Tsꞌu̱tꞌhui. Pe koꞌmu̱ rä Hesu bi hyandi ge nuyu̱ myä ambisioso, rä Hesu bi umbäbi nunä tsꞌofo gatꞌho yä apostol ꞌne bi ꞌñembäbi: «Mu̱ nꞌa de geꞌähu̱ gi ne gi ndängihu̱, mähyoni go gi pe̱phu̱ nuyu̱ märꞌaa. ꞌNe nuꞌmu̱ nꞌa de geꞌähu̱ gi ne gi ndähu̱ de nuyu̱ märꞌaa, mähyoni go gi mꞌe̱gohu̱» (Mar. 10:​35-37, 43, 44). Nuꞌu̱ yä ku honi dä me̱ꞌtsi märꞌa yä responsabilida ngeꞌä di mädi rä Zi Dada Jeoba ꞌne yä ku, ma dä zo̱ho̱ dä nja nꞌa rä däta jäpi ha rä mhuntsꞌi (1 Tes. 2:8).

TE MA DÄ MAXꞌÄꞌI PA GI NE GI PE̱PÄBI MÄRꞌAA

9. ¿Te ma dä maxꞌäꞌi pa gi ne gi nsiervo ministerial?

⁹ ¡Hinte mä duda ja ge nuꞌi gi mädi rä Zi Dada Jeoba ꞌne ge gi ho gi fatsꞌi yä ku! Pe mäske njabu̱, zäi ge rꞌabu̱ ngu gi tsu gi ndude näꞌä rä responsabilida de gä siervo ministerial. ¿Pe te dä za dä maxꞌäꞌi pa gi ne gi mfaxte de gä siervo ministerial? Hyandi hängu rä johya tini nuꞌu̱ yä zi ku pe̱päbi märꞌaa. Rä Hesu bi ꞌñenä: «Mänꞌa ja rä johya gä unihu̱ ke gä hänihu̱» (Hech. 20:​35, TNM). Ñhesukristo mismo bi jamäsu nunä konseho bi uni ꞌne bi dini ndunthi rä johya. Mu̱ gi jamäsu ꞌnehe nunä konseho, gi nuhmä ma gi hyandi hängu rä johya ma gi tini.

10. ¿Hanja bi ꞌñudi rä Hesu ge mi umbäbi ndunthi rä johya ora mi pe̱päbi märꞌaa? (Marcos 6:​31-34).

¹⁰ Ma gä benihu̱ hängu rä johya mi pe̱ꞌtsi rä Hesu ora mi pe̱päbi märꞌaa (hñeti Marcos 6:​31-34, TNM). Nꞌa rä pa, nuꞌmu̱ rä Hesu ko nuꞌu̱ yä apostol ya xa xki zabi, bi ma ha nꞌa rä luga tsꞌu̱ zi yabu̱ pa xä za xä ntsayahmä nꞌa tu̱i. Pe mi bädi yä jäꞌi habu̱ ma xä ma rä Hesu ko yä apostol, bi mꞌe̱tꞌo ꞌne mäntꞌä bi tso̱niꞌu̱ ngeꞌä mi ne dä yꞌo̱de nuꞌu̱ yä ntꞌudi rä Hesu. Koꞌmu̱ «nixi xki zu̱ rä ora pa dä ñuni» rä Hesu ꞌne nuꞌu̱ yä apostol, xä za xä ꞌñembäbi yä jäꞌi ge xä hyopäbi xä ntsaya nꞌa tu̱i o ꞌnehe xä za xä ꞌñuti ho̱nse̱ nꞌa zi tu̱i ꞌne xä ꞌñedi gatꞌho. Pe koꞌmu̱ rä Hesu xa mi mädi yä jäꞌi, näꞌä bi ꞌñuti ndunthi yä tꞌo̱tꞌe de Äjuä asta mi ndee (Mar. 6:​35, TNM). ¿Por hanja rä Hesu bi sigi bi ꞌñuti nuꞌu̱ yä zi jäꞌi mäske xa mi tsabi ꞌne tobe hixki ñuni? Hingä ngeꞌä mi senti ge mi pe̱ꞌtsi rä obligasio dä sigi dä ꞌñuti nuꞌu̱ yä zi jäꞌi, sino ke ngeꞌä «xa bi hueki» ꞌne mi ne dä sigi dä ꞌñuti de rä Zi Dada Jeoba ngeꞌä xa mi mädi nuꞌu̱ yä zi jäꞌi. Hää, dä me̱päbi märꞌaa geꞌä mi umbäbi ndunthi rä johya.

11. ¿De te mä forma rä Hesu bi me̱päbi yä jäꞌi? (Hyandi ꞌnehe rä kꞌoi).

¹¹ Mi mꞌu̱kua rä Hesu ha rä Xiꞌmhai, hingä ho̱nse̱ bi ꞌñuti yä jäꞌi de rä Noya Äjuä, sino ke ꞌnehe bi hyoni rä modo hanja dä matsꞌi ko näꞌä mi japäbi mꞌe̱di. Nꞌa rä pa, bi ja nꞌa rä milagro pa bi japäbi bi xu rä ñhuni ꞌne bi nkargobi nuꞌu̱ yä de̱ni pa dä matsꞌi dä umbäbi yä jäꞌi näꞌä ñhuniꞌä (Mar. 6:​41, TNM). Ko näꞌä bi me̱fi rä Hesu, bi ꞌñuti nuꞌu̱ yä de̱ni ge xa mähyoni dä me̱päbi märꞌaa ꞌne dä hyoni rä modo hanja dä matsꞌi ko näꞌä japäbi mꞌe̱di. Geꞌä pe̱fi mäpaya yä siervo ministerial ha yä mhuntsꞌi. ¿Dä za gi imäjinä hängu rä johya bi senti nuꞌu̱ yä apostol ora rä Hesu bi ꞌñembäbi ge dä matsꞌi pa dä umbäbi yä jäꞌi näꞌä ñhuni? Rä Mäkä Tꞌofo enä ge «gatꞌho yä jäꞌi bi ñuni ꞌne bi niñä» (Mar. 6:​42, TNM). Pe hingä ho̱nse̱nä bi me̱fi rä Hesu po yä jäꞌi. Durante näꞌä rä tiempo bi mꞌu̱kua ha rä Xiꞌmhai, näꞌä himbi hyoni rä ñhose̱, sino ke bi hyombäbi rä ñho yä jäꞌi ꞌne bi hyoni rä modo hanja dä matsꞌi (Mat. 4:23; 8:16). Rä Hesu bi dini ndunthi rä johya ora mi uti märꞌaa de rä Noya Äjuä ꞌne nunka bi hyoni dä tꞌeꞌtsuäbi rä nsu ora mi fatsꞌi yä jäꞌi ꞌne mi umbäbi näꞌä mi japäbi mꞌe̱di. Zi ku, mu̱ nuꞌi ꞌnehe gi mfaxte de gä siervo ministerial po näꞌä rä mhäte gi senti po rä Zi Dada Jeoba ꞌne yä ku —ꞌne hingä ngeꞌä gi honi dä tꞌetsꞌäꞌi ri nsu—, gi nuhmä ma gi tini ndunthi rä johya ꞌnehe.

12. ¿Por hanja hindi debe gä sentihu̱ ge hindi pädihu̱ te gä pe̱fihu̱?

¹² ¿Pe xiꞌmu̱ gi senti ge hingi pädi te gi pe̱fi? Ogi desanimä. Zäi ge gi pe̱ꞌtsi yä hogä mꞌu̱i nuꞌu̱ ma dä matsꞌi ndunthi rä mhuntsꞌi. Ma dä maxꞌäꞌi ndunthi mu̱ gi xatuäbi rä Zi Dada Jeoba ꞌnepu̱ gi hñeti te mää 1 Corintios 12:​12-30. Ha nuya yä testo udi hanja pa rä Zi Dada Jeoba —tanto nuꞌi ngu kada nꞌa rä ku—, gatꞌho o̱tꞌe rä mꞌe̱di ha rä mhuntsꞌi. Hänge ogi desanimä mu̱ gi handi ge tobe hingi kumpli ko gatꞌho nuꞌu̱ yä rekisito adi rä Mäkä Tꞌofo pa dä za gi nsiervo ministerial. Mänꞌa dä hogi gi hyandi hanja dä za gi umbäbi rä Zi Dada Jeoba ꞌne yä ku gatꞌho näꞌä tsu̱ꞌi gi pe̱fi. ꞌNe ogi turimu̱i, yä anciano hingä ma dä rꞌaꞌi nꞌa rä ꞌme̱fi näꞌä hingä ma dä za gi kumpli (Rom. 12:​4-8).

13. ¿Te mä nꞌa ma dä nupꞌäꞌi ri mfeni pa hingi ntsu gi mfaxte de gä siervo ministerial?

¹³ ¿Te mä nꞌa ma dä nupꞌäꞌi ri mfeni pa hingi ntsu gi mfaxte de gä siervo ministerial? Beni ge dende nuꞌmu̱ gä nxixtehe pa gi pe̱päbi rä Zi Dada Jeoba, signifika ge ya gi kumpli ko ndunthi de nuꞌu̱ yä rekisitoꞌu̱. Geꞌu̱ mismo yä rekisito di kumpli gatꞌho yä ku. ¿Por hanja di mäñhu̱ njabu̱? Ngeꞌä kada nꞌa rä ku, pe̱ꞌtsi te o̱tꞌe ntsꞌe̱di po dä me̱ꞌtsi nꞌa rä hogä ntsitsꞌi ko rä Zi Dada Jeoba, po dä me̱ꞌtsi rä johya de dä matsꞌi märꞌaa ꞌne po dä ꞌñudi nꞌa rä hogä mꞌu̱i ja ngu di mända rä Zi Dada Jeoba. ¿Gi da ngue̱nda? Ya hingi ꞌme̱di ndunthi yä rekisito pa dä za gi nsiervo ministerial.

NÄꞌÄ DÄ HOGI GI SIGI GI PE̱FI

14. ¿Te di signifika yä noya «dä nresponsable ꞌne dä bädi dä dähä rä tꞌekꞌei»? (1 Timoteo 3:​8-10, 12).

¹⁴ Ma gä handihu̱ rꞌa de nuꞌu̱ rä rekisito mähyoni dä sigi dä kumpli nuꞌu̱ ne dä nsiervo ministerial (hñeti 1 Timoteo 3:​8-10, 12, TNM). Rä Mäkä Tꞌofo mää ge yä siervo ministerial «debe dä nresponsable ꞌne dä bädi dä dähä rä tꞌekꞌei». Pe nuya yä noya hindi signifika ge hindi debe dä nthede o hindi debe dä diberti, ngeꞌä rä Mäkä Tꞌofo ꞌnehe mää ge ja ꞌnehe «nꞌa rä tiempo de gä thede» (Ecl. 3:​1, 4). Pe yä siervo ministerial hää xa mähyoni dä jamäsu nuꞌu̱ yä responsabilida pe̱ꞌtsi pa njabu̱ märꞌaa dä hyandi ge hää ri ꞌñepäbi dä ꞌme̱tsuäbi rä komfiansa. Hää, mu̱ dä me̱fi njabu̱, yä ku ꞌnehe ma dä me̱ꞌtsuäbi rä tꞌekꞌei.

15. ¿Te di signifika yä noya «hindi debe drä majäne» ꞌne «hindä ñꞌambisioso nixi dä ñhate kontal te dä dähä»?

¹⁵ «Hindi debe drä majäne». Signifika ge nꞌa rä siervo ministerial debe dä ñꞌonrado ꞌne dä ꞌñudi ge dä za dä ꞌme̱tsuäbi rä komfiansa. Hää, mähyoni dä kumpli ko näꞌä di promete ꞌne hindä hyatꞌi märꞌaa (Prov. 3:32). «Hindi debe dä ñꞌambisioso nixi dä ñhate kontal te dä dähä». Nuya yä noya signifika ge di debe dä ñꞌonrado ko nuꞌu̱ yä donäsio de rä mhuntsꞌi, ora di trata yä negosio o märꞌa yä asunto de gä bojä. Hindi debe dä probecha de näꞌä rä ntsitsꞌi pe̱ꞌtsi ko yä ku pa dä dähä yä bojä.

16. a) ¿Te signifika ora rä Mäkä Tꞌofo mää ge hinto di debe dä «zi ndunthi yä binu»? b) ¿Te signifika dä me̱ꞌtsi nꞌa rä konsiensia o «nꞌa rä mfeni xä ntꞌaxi»?

¹⁶ «Hindi debe dä zi ndunthi yä binu». Signifika ge nꞌa rä siervo ministerial hindi debe dä nja rä famä ge rä ti o ge pe̱ꞌtsi rä bisio ko yä ithe. Debe dä mꞌu̱i ja ngu di mända rä Zi Dada Jeoba pa njabu̱ dä me̱ꞌtsi nꞌa rä konsiensia ꞌne «nꞌa rä mfeni xä ntꞌaxi». Mäske nꞌa rä ku hingä ma dä za dä mperfecto, pe hää dä za dä me̱ꞌtsi nꞌa rä hogä ntsitsꞌi ko rä Zi Dada Jeoba ꞌne njabu̱ dä me̱ꞌtsi nꞌa rä tsaya ha rä mfeni.

17. ¿Te signifika ora rä Mäkä Tꞌofo enä ge nꞌa rä ku «mꞌe̱tꞌo debe dä thandi xä ñho mu̱ dä za dä mfaxte»? (1 Timoteo 3:10; hyandi ꞌnehe rä kꞌoi).

¹⁷ «Mꞌe̱tꞌo debe dä thandi xä ñho mu̱ dä za dä mfaxte». Nuꞌu̱ faxte de gä siervo ministerial, mꞌe̱tꞌo ya xä ꞌñudi ge ri ꞌñepäbi dä ꞌme̱tsuäbi rä komfiansa pa dä tꞌumbäbi nꞌa rä responsabilida. Hänge mu̱ yä anciano dä nkargoꞌi te gi pe̱fi, kumpli ko näꞌä responsabilida ja ngu bi siꞌi ꞌne ja ngu di mända rä ngu Betel. Ñꞌani xä ñho hämꞌu̱ ꞌne hanja di debe gi kumpli näꞌä ꞌme̱fi bi tꞌaꞌi. Mu̱ yä ku ꞌne yä nju de rä mhuntsꞌi dä hyandi ge gi pe̱fi xä ñho nuꞌu̱ yä ꞌme̱fi tꞌaꞌi, nuꞌu̱ ma dä da ngue̱nda ge ri jamfri yꞌo ri ñätsꞌi ꞌne ge grä responsable. Ancianohu̱, ꞌñutihu̱ hanja dä ja nꞌa rä ꞌme̱fi nuꞌu̱ yä ku ya xä nxixtehe (hñeti 1 Timoteo 3:​10, TNM). ¿Ha rä mhuntsꞌi ꞌmu̱i nuꞌu̱ yä zi ku ya xä nxixtehe ꞌne pe̱ꞌtsi 15 nje̱ya o asta menu de 10 nje̱ya? ¿Di tede näꞌä rä ntsitsꞌi pe̱ꞌtsi ko rä Zi Dada Jeoba po mädee de di nxadi rä Mäkä Tꞌofo ꞌne di ñhoki pa yä mhuntsꞌi? ¿Uni yä komentario ha yä mhuntsꞌi ꞌne po̱ni di ungä ntꞌo̱de rä Noya Äjuä? Mu̱ hää, dä hogi gi hyandihu̱ ngu te mä ꞌme̱fi dä za gi umbäbihu̱ pa dä za dä mfaxte ha rä mhuntsꞌi. Njabu̱ ko rä tiempo nuyu̱ yä bäsjäꞌi ma dä ꞌñudi mu̱ mꞌe̱fa dä za dä maxte de gä siervo ministerial.

18. ¿Te signifika yä noya «mꞌe̱tꞌo debe dä thandi [ . . . ] mu̱ otho de te drä akusabi»?

¹⁸ «Mꞌe̱tꞌo debe dä thandi [ . . . ] mu̱ otho de te drä akusabi». Yä siervo ministerial xa mähyoni dä mꞌu̱i ja ngu di mända rä Zi Dada Jeoba pa njabu̱ hinte mä raso dä me̱ꞌtsi märꞌaa pa dä ñä xä ntsꞌo de geꞌu̱. Mäjuäni ge rꞌabu̱ yä jäꞌi ñä xä ntsꞌo de nuꞌu̱ pe̱päbi rä Zi Dada Jeoba. Geꞌä bi thogi ꞌnehe rä Hesu ꞌne bi mää ge nuꞌu̱ yä de̱ni ma xä thogi njabu̱ ꞌnehe (Juan 15:20). Mu̱ nuꞌi gi ne gi nsiervo ministerial ꞌne gi o̱tꞌe ntsꞌe̱di po gi de̱mbäbi rä kꞌoi rä Hesu ꞌne gi mꞌu̱i ja ngu di mända rä Zi Dada Jeoba, yä ku de rä mhuntsꞌi ma dä me̱tsꞌäꞌi rä tꞌekꞌei ꞌne rä komfiansa (Mat. 11:19).

19. ¿Te di signifika ora enä rä Mäkä Tꞌofo ge nꞌa rä ku «debe dä me̱ꞌtsi nꞌadä rä ꞌme̱hñä»?

¹⁹ Nuꞌu̱ yä zi ku ne dä mfaxte de gä siervo ministerial ꞌne ya xä nthäti «debe dä me̱ꞌtsi nꞌadä rä ꞌme̱hñä». Nuꞌmu̱ rä Zi Dada Jeoba bi thäti näꞌä rä mu̱di ñꞌo̱ho̱ ko näꞌä rä mu̱di ꞌme̱hñä, bi ꞌñenä ge rä nthäti debe dä nja entre ho̱nse̱ nꞌadä rä ñꞌo̱ho̱ ꞌne nꞌadä rä ꞌme̱hñä. Hänge nuꞌu̱ yä zi ku ne dä nsiervo ministerial debe dä sigi dä jamäsu nunä mhända (Mat. 19:​3-9). Nꞌa rä ñꞌo̱ho̱ näꞌä pe̱päbi rä Zi Dada Jeoba —xä nthäti o hinä—, nunka di debe dä mꞌe̱ngui nꞌa rä ꞌme̱hñä näꞌä hinxä nthätui (Heb. 13:4). Pe nꞌa rä ku näꞌä ya xä nthäti, nunka di debe dä hyatꞌä rä ꞌme̱hñä ko mä nꞌa rä ꞌme̱hñä. Hää, hindi debe dä koketeabi o dä xaxi märꞌa yä ꞌme̱hñä (Job 31:1).

20. ¿Hanja udi nꞌa rä ku ge di «diriji xä ñho» rä familia?

²⁰ Nuꞌu̱ ne dä nsiervo ministerial, debe «dä diriji xä ñho yä bätsi ꞌne rä familia». Nuꞌu̱ yä ku xä nthäti, debe dä kumpli xä ñho ko nuꞌu̱ yä responsabilida xä umbäbi rä Zi Dada Jeoba. ¿Ngu te mä responsabilida? Debe dä diriji rä mhuntsꞌi de gä familia tatꞌä semänä. Debe dä gu̱ꞌtuäbi rä ꞌñuu rä familia pa dä bo̱ni gatꞌho dä ungä ntꞌo̱de rä Noya Äjuä. ꞌNehe, debe dä matsꞌi yä bätsi dä me̱ꞌtsi nꞌa rä hogä ntsitsꞌi ko rä Zi Dada Jeoba (Efes. 6:4). Nꞌa rä ku näꞌä di su xä ñho rä familia, udi ge ma dä za dä su xä ñho rä mhuntsꞌi (hyandi ꞌnehe te mää 1 Timoteo 3:5).

21. ¿Te dä za gi pe̱fi mu̱ tobe hingi faxte de gä siervo ministerial?

²¹ Mu̱ nuꞌi tobe hingi faxte de gä siervo ministerial, xatuäbi rä Zi Dada Jeoba ꞌne hyandi xä ñho te mängä nunä ntꞌudi di nxadihu̱. Yꞌo̱tꞌe ntsꞌe̱di po gi kumpli nuꞌu̱ yä rekisito adi rä Mäkä Tꞌofo. Beni hängu rä mhäte gi pe̱ꞌtsuäbi rä Zi Dada Jeoba ꞌne yä ku. Japäbi dä te näꞌä rä mhäteꞌä pa dä nja ri ganä gi pe̱päbi märꞌaa (1 Ped. 4:​8, 10). Mu̱ gi pe̱fi njabu̱, gi nuhmä ma gi tini ndunthi rä johya. ¡Ge rä Zi Dada Jeoba dä jäpi gatꞌho näꞌä gi pe̱fi pa dä za gi mfaxte de gä siervo ministerial! (Filip. 2:13).