Balora nuꞌu̱ yä ñꞌo̱ho̱ xä thutsꞌi pa dä gu̱tꞌi rä ꞌñuu

1. ¿Te mä regalo xä rꞌakägihu̱ rä Hesu?

HA RÄ Xiꞌmhai hinxä mꞌu̱i mä nꞌa rä jäꞌi ngu rä Hesu. Por ejemplo, mi mꞌu̱kua ha rä Xiꞌmhai, rä Hesu bi usa näꞌä rä tsꞌe̱di xki umbäbi rä Zi Dada Jeoba pa bi ja yä milagro ꞌne bi matsꞌi ndunthi yä jäꞌi (Luc. 9:​12-17). Pe hingä ho̱nse̱ꞌä, ꞌnehe bi uni mä nꞌa rä däta regalo näꞌä nunka toꞌo xä rꞌakägihu̱: ¡Bi uni rä bida po gekhu̱! (Juan 15:13). Dende nuꞌmu̱ rä Hesu bi nuhu de rä du, näꞌä xä sigi xä matsꞌi yä jäꞌi. Ja ngu bi promete, xä yꞌapäbi rä Zi Dada Jeoba ge dä usa rä espiritu santo pa dä ꞌñutkägihu̱, dä hñubgä mä mu̱ihu̱ ꞌne dä nupkägihu̱ mä mfenihu̱ (Juan 14:​16, 17, rä nota, TNM; 16:13). ꞌNehe, po mädee de yä mhuntsꞌi, rä Hesu utkägihu̱ hanja gä utihu̱ märꞌa yä jäꞌi de rä Noya Äjuä po gatꞌho rä Xiꞌmhai (Mat. 28:​18-20).

2. ¿Toꞌo nuꞌu̱ yä regalo xä rꞌakägihu̱ mäpaya Ñhesukristo? (Efesios 4:​7, 8).

² Pe hingä ho̱nse̱ꞌu̱ yä regalo xä rꞌakägihu̱ rä Hesu. Rä apostol Pablo bi ꞌñenä ge nuꞌmu̱ rä Hesu bi tso̱ni ha mähetsꞌi, nubye̱ bi uni rꞌa «yä ñꞌo̱ho̱ ngu nꞌa rä regalo» (hñeti Efesios 4:​7, 8, TNM). Rä apostol Pablo bi esplika ge rä Hesu bi uni nuꞌu̱ yä ñꞌo̱ho̱ꞌu̱ pa dä gu̱tꞌi rä ꞌñuu ha rä hnini rä Zi Dada Jeoba ꞌne pa dä matsꞌi yä mhuntsꞌi (Efes. 1:​22, 23; 4:​11-13). Mäpaya, ¿toꞌo nuꞌu̱ yä regalo? Geꞌu̱ yä siervo ministerial, yä anciano ꞌne yä superintendente de gä circuito.a Mäjuäni ge nuyu̱ yä ku yä imperfecto ꞌne rꞌabu̱ di komete yä error (Sant. 3:2). Pe mäske njabu̱, Ñhesukristo di usa nuyu̱ yä ku pa dä maxkägihu̱.

3. Hñutsꞌi nꞌa rä ejemplo pa gi esplika te dä za gä pe̱fihu̱ pa gä umbäbihu̱ rä mfatsꞌi nuꞌu̱ yä ñꞌo̱ho̱ xä hñutsꞌi rä Hesu ngu nꞌa rä regalo.

³ Rä Hesu bi rꞌakägihu̱ nuyu̱ «yä ñꞌo̱ho̱ ngu nꞌa rä regalo» pa dä matsꞌi ꞌne dä japäbi dä ze̱di yä mhuntsꞌi (Efes. 4:12). Pe kada nꞌa de gekhu̱ dä za gä mfaxtehu̱ pa gä kumplihu̱ ko nunä däta responsabilida. Por ejemplo, ꞌmu̱i nuꞌu̱ yä ku xä thutsꞌi pa dä hyoki yä Ngu de gä Mhuntsꞌi. ¿Pe hänge mäjuäni ge märꞌa yä ku faxte hoki yä ñhuni, hmi yä karro pa drä theni yä material ꞌne märꞌaa faxte ko näꞌä di ja mꞌe̱di? Njabu̱ ꞌnehe, kada nꞌa de gekhu̱ dä za gä fatsꞌihu̱ yä siervo ministerial, yä anciano ꞌne yä superintendente de gä circuito. ¿Hanja dä za gä fatsꞌihu̱? Ko näꞌä di mäñhu̱ ꞌne ko näꞌä di pe̱fihu̱. Ma gä handihu̱ hanja di benefisiagihu̱ näꞌä rä ꞌme̱fi di ja nuyu̱ yä ku gu̱tꞌi rä ꞌñuu ha rä hnini rä Zi Dada Jeoba ꞌne hanja dä za dä utihu̱ nuyu̱ yä ku ꞌne rä Hesu ge di balorahu̱ näꞌä rä ꞌme̱fi di ja.

YÄ SIERVO MINISTERIAL GEꞌU̱ YÄ MAXTE

4. ¿Hanja mi faxte nuꞌu̱ yä siervo ministerial ha yä pa nuꞌu̱ yä mu̱di kristianu?

⁴ Ha yä pa nuꞌu̱ yä mu̱di kristianu, rꞌa yä ku bi thutsꞌi de gä siervo ministerial (1 Tim. 3:8). Zäi ge gehyu̱ bi mää rä apostol Pablo ge myä maxte ja ngu di handihu̱ ha 1 Corintios 12:28. Po̱de nuyu̱ yä ku go gehyu̱ mi ja nuꞌu̱ yä tꞌu̱kä ꞌme̱fi mi ja mꞌe̱di pa njabu̱ yä anciano go mi prokura dä ꞌñudi rä Noya Äjuä ꞌne dä su nuꞌu̱ yä ku de rä mhuntsꞌi. Tal vez nuꞌu̱ yä ku myä siervo ministerial mi faxte dä yꞌofo yä kopia de rä Mäkä Tꞌofo o dä dai näꞌä rä material mi ja mꞌe̱di pa dä thoki nuyu̱ yä kopia.

5. ¿Hanja faxte mäpaya nuꞌu̱ yä siervo ministerial ha yä mhuntsꞌi?

⁵ ¿Hanja faxte mäpaya nuꞌu̱ yä siervo ministerial ha yä mhuntsꞌi? (1 Ped. 4:10). Rꞌabu̱ di nkargo dä hyokä yä kuenta ha rä mhuntsꞌi, handi te mä territorio ma dä tꞌungä ntꞌo̱de, ku̱ꞌti yä solisitu pa dä tꞌadi yä he̱ꞌmi ꞌne yä mfistꞌofo ꞌne ora dä zo̱ho̱ umbäbi nuꞌu̱ yä publicador toꞌo bi yꞌadi. ꞌNehe, di nkargo de rä sonido ha rä mhuntsꞌi, umbäbi ntsaya yä ku ꞌne faxte umbäbi rä mantenimiento rä Ngu de gä Mhuntsꞌi. Gatꞌho nuya yä ꞌme̱fi di ja mꞌe̱di pa njabu̱ rä mhuntsꞌi dä ꞌmu̱i xä ñho (1 Cor. 14:40). Rꞌabu̱ yä siervo ministerial dri nkargobi dä ja rä mhuntsꞌi Rä Mꞌu̱i ꞌne yä ꞌMe̱fi yä Kristianu o dri nkargobi dä uni yä discurso de gä 30 minuto. O ꞌnehe, di thutsꞌi dä matsꞌi nuꞌu̱ yä enkargado de nꞌa rä grupo. Rꞌabu̱ yä anciano dä za dä yꞌapäbi nꞌa rä siervo ministerial dä kompañä pa duä nupäbi rä mfeni nuꞌu̱ yä ku di japäbi mꞌe̱di.

6. ¿Por hanja xa di balorahu̱ näꞌä pe̱fi yä siervo ministerial?

⁶ ¿Por hanja xa di balorahu̱ näꞌä pe̱fi yä siervo ministerial? Ma gä handihu̱ te xä mää rꞌa yä ku. Nꞌa rä zi nju rä thuhu Beberlyb de rä dähni Bolivia enä: «Po näꞌä rä ꞌme̱fi pe̱fi yä zi ku yä siervo ministerial tsa di thogi temäꞌentho ha yä mhuntsꞌi. Näꞌä rä ꞌme̱fi di jaꞌu̱, hopkägi gä ntuhu ko ndunthi rä johya, gä uni mä komentario, gä o̱de yä discurso ꞌne gä handi xä ñho yä bideo ꞌne yä foto. Nuyu̱ yä zi ku di bijila yä goxthi de ha yä Ngu de gä Mhuntsꞌi ꞌne hoki gatꞌho näꞌä di ja mꞌe̱di pa dä za dä conecta nuꞌu̱ yä zi ku por Zoom. Ora huadi rä mhuntsꞌi faxte ko rä limpiesa, ko nuꞌu̱ yä kuenta ꞌne di asegura de gä pe̱ꞌtsihu̱ nuꞌu̱ yä mfistꞌofo ꞌne nuꞌu̱ yä he̱ꞌmi di honihu̱ pa gä predikahu̱. ¡Hängu njamädi di umbäbi nuyu̱ yä zi ku!». Mä nꞌa rä zi nju rä thuhu Leslie —rä ꞌme̱hñä nꞌa rä anciano de rä dähni Colombia— enä: «Yä siervo ministerial fatsꞌi ndunthi mä däme. Mu̱ hindri ꞌmu̱i yä siervo ministerial toꞌo dä matsꞌi, mä däme mänꞌa dri ja xi ndunthi rä ꞌme̱fi. Hänge xa di umbäbi ndunthi njamädi nuyu̱ yä zi ku po gatꞌho näꞌä pe̱fi ko rä johya ꞌne rä mhäte». Xi nuꞌi, ¿gi senti njabu̱ po nuyu̱ yä zi ku yä siervo ministerial? (1 Tim. 3:13).

7. ¿Hanja dä za gä udihu̱ ge di jamädihu̱ po nuꞌu̱ yä siervo ministerial faxte ha rä mhuntsꞌi? (Hyandi ꞌnehe rä kꞌoi).

⁷ Zäi ge di rekonosehu̱ ge yä siervo ministerial di mpe̱fi ndunthi. Pe rä Mäkä Tꞌofo enä: «ꞋNehe ꞌñudihu̱ ge gi jamädihu̱» (Col. 3:​15, TNM). Ma gä handihu̱ hanja nꞌa rä anciano rä thuhu Daavid de rä dähni Finlandia, udi ge di jamädibi nuyu̱ yä siervo ministerial. Nuni zi ku enä: «Di pe̱mpäbi nuꞌu̱ yä siervo ministerial nꞌa rä mensaje o nꞌa rä zi he̱ꞌmi ko nꞌa rä testo de rä Mäkä Tꞌofo ꞌne di no̱ni te mä ꞌme̱fi bi ja habu̱ bi maxkägi ndunthi ꞌne di xipäbi hängu di jamädibi». Nꞌa rä ku rä thuhu Pascal ko rä zi ꞌme̱hñä rä thuhu Jael bi ꞌmu̱i ha nꞌa rä hnini rä thuhu Nueva Caledonia. Ora xatuäbi rä Zi Dada Jeoba nuni medinthäti ꞌnehe pete gatꞌho näꞌä rä ꞌme̱fi di ja yä siervo ministerial. Nuni medinthäti enä: «Ha mä sadihe di umbäbihe njamädi rä Zi Dada Jeoba po nuyu̱ yä zi ku yä siervo ministerial faxte ha rä mhuntsꞌi. Di bäntebihe ge dä matsꞌi nuyu̱ yä zi ku». Hää, ora di xatuäbihu̱ rä Zi Dada Jeoba ꞌne di adihu̱ po yä siervo ministerial, Näꞌä o̱de mä sadihu̱ ꞌne gatꞌho rä mhuntsꞌi di benefisia (2 Cor. 1:11).

YÄ ANCIANO XA DI MPE̱FI NDUNTHI

8. ¿Por hanja rä apostol Pablo bi ꞌñenä ge nuꞌu̱ yä anciano de näꞌä tiempoꞌä xa mi mpe̱fi ndunthi? (1 Tesalonicenses 5:​12, 13).

⁸ Ha yä pa nuꞌu̱ yä mu̱di kristianu, yä anciano ꞌnehe xa mi mpe̱fi ndunthi ha yä mhuntsꞌi (hñeti 1 Tesalonicenses 5:​12, 13, TNM; 1 Tim. 5:17). Nuyu̱ yä ku mi gu̱tꞌi rä ꞌñuu ha yä congregación, mi nkargo de dä tꞌo̱tꞌe yä mhuntsꞌi ꞌne dä tomä yä desision. ꞌNehe mi umbäbi yä konseho yä ku ꞌne yä nju pa njabu̱ mi ze̱di yä jamfri ꞌne mi sigi mi yꞌo ha rä ꞌñuu rä Zi Dada Jeoba (1 Tes. 2:​11, 12; 2 Tim. 4:2). Nuyu̱ yä anciano ꞌnehe mi o̱tꞌe ntsꞌe̱di po dä me̱ꞌtsi nꞌa rä hogä ntsitsꞌi ko rä Zi Dada Jeoba ꞌne mi su xä ñho yä familia (1 Tim. 3:​2, 4; Tito 1:​6-9).

9. ¿Ndaꞌu̱ rꞌa de nuꞌu̱ yä responsabilida di kumpli yä anciano mäpaya?

⁹ Mäpaya yä anciano ꞌnehe xa ja ndunthi yä ꞌme̱fi, ngeꞌä nuyu̱ yä ku ꞌueke rä tiempo pa dä predika (2 Tim. 4:5). Hää, nuyu̱ yä ku gu̱tꞌi rä ꞌñuu pa ungä ntꞌo̱de rä Noya Äjuä, pa di organisa te mä territorio ma dä predika rä mhuntsꞌi ꞌne utkägihu̱ hanja gä predikahu̱ ꞌne gä udihu̱ xä ñho rä Noya Äjuä. Yä anciano ꞌnehe faxte ha yä mhuntsꞌi ngu yä nzaya ꞌne udi rä nhuekäte ꞌne rä mhäte pa ko ngatꞌho yä ku. Ora nꞌa rä kristianu o̱tꞌe nꞌa rä däta pekado, yä anciano umbäbi rä mfatsꞌi näꞌä ku pa dä yo me̱ꞌtsi mänꞌaki nꞌa rä hogä ntsitsꞌi ko rä Zi Dada Jeoba. Pe ꞌnehe, o̱tꞌe ntsꞌe̱di po dä su rä mhuntsꞌi ꞌne dä hyandi ge nzäntho dä mꞌu̱i xä ntꞌaxi (1 Cor. 5:​12, 13; Gál. 6:1). Pe yä anciano xä thutsꞌi ha yä mhuntsꞌi principalmente pa dä mfaxte ngu yä mayꞌo ꞌne dä supäbi rä taxo rä Zi Dada Jeoba (1 Ped. 5:​1-3). Yä anciano ꞌueke rä tiempo pa hoki nuꞌu̱ yä discurso uni, o̱tꞌe ntsꞌe̱di po dä konose gatꞌho yä ku de rä mhuntsꞌi ꞌne tso̱ni ha yä nguu pa dä hñuꞌmpäbi yä mu̱i ꞌne dä nupäbi yä mfeni. Märꞌa yä anciano faxte pa dä thoki yä Ngu de gä Mhuntsꞌi ꞌne dä tꞌumbäbi rä mantenimiento. Märꞌaa faxte pa di organisa habu̱ dä tꞌo̱tꞌe yä däta mhuntsꞌi. Märꞌaa faxte ha yä Comités de Enlace con los Hospitales, ha yä Grupos de Visita a Pacientes ꞌne di kumpli ko märꞌa yä responsabilida. ¿Hänge yä anciano xa di mpe̱fi ndunthi po gekhu̱?

10. ¿Por hanja xa di mädihu̱ yä anciano de rä mhuntsꞌi?

¹⁰ Rä Zi Dada Jeoba bi mää ge nuꞌu̱ yä mayꞌo xä hñutsꞌi, ma xä supäbi xä ñho rä taxo hänge nuꞌu̱ yä zi de̱ti «hinte ma dä zu nixi hinte ma dä pidi» (Jer. 23:4). Geꞌä pede ge xä senti nꞌa rä zi nju rä thuhu Johanna de rä dähni Finlandia. Rä mämä nunä zi nju xa bi hñeni ꞌne enä: «Xa jakägi xä ñhei gä xipäbi märꞌaa te di senti. Pe nꞌa rä anciano näꞌä hingä ndi konose xä ñho, ko ndunthi rä pasensia bi yꞌo̱de näꞌä ndi senti, bi ja nꞌa rä sadi kongeki ꞌne bi bengägi hängu di mäkägi rä Zi Dada Jeoba. Hindi beni gatꞌho näꞌä bi xikägi, pe hää di beni ge ya hindä ntsu. Di kamfri ge rä Zi Dada Jeoba go bä pe̱hni näꞌä anciano pa bi maxkägi ora xa mi jakägi mꞌe̱di». Xi nuꞌi, ¿xkä handi hanja yä anciano de rä mhuntsꞌi xä maxꞌäꞌi?

11. ¿Hanja dä za gä utihu̱ yä anciano ge di jamädibihu̱ po näꞌä rä ꞌme̱fi di ja po gekhu̱? (Hyandi ꞌnehe rä kꞌoi).

¹¹ Rä Zi Dada Jeoba ne gä utihu̱ yä anciano hängu rä tꞌekꞌei ꞌne rä mhäte di pe̱ꞌtsuäbihu̱ «po näꞌä rä ꞌme̱fi di jaꞌu̱» (1 Tes. 5:​12, 13, TNM). Henrietta ꞌnehe bi ꞌmu̱i ha rä dähni Finlandia ꞌne enä: «Ko ndunthi rä johya di handi ge yä anciano fatsꞌi märꞌaa; pe hindi signifika ge pongibi rä tiempo o rä tsꞌe̱di o hindi signifika ge hingi ja yä xuñha ꞌne yä dumu̱i ꞌnehe. Hänge rꞌabu̱ ora di ze̱njua nuga di embäbi: “Gi pädi zi ku, di ne gi pädi ge nuꞌi xa grä hojäꞌi ꞌne grä hogä mayꞌo”». Nꞌa rä zi nju rä thuhu Sera de rä dähni Turquía enä: «Yä anciano ꞌnehe ja mꞌe̱di toꞌo dä nupäbi yä mfeni pa dä sigi ndelante. Hänge rꞌabu̱ di hokuäbi nꞌa rä zi tarjeta habu̱ di umbäbi njamädi po näꞌä rä ꞌme̱fi di ja. Di mbitabi nꞌa rä zi ñhuni o di adi gä po̱ni gä predika kongeꞌu̱». Xi nuꞌi, ¿ꞌmu̱i nꞌa rä anciano näꞌä toꞌo gi umbäbi njamädi po näꞌä rä mfatsꞌi xä rꞌaꞌi? ¿Dä za gi ꞌñuti hängu gi jamädibi? (1 Cor. 16:18).

YÄ SUPERINTENDENTE DE GÄ CIRCUITO JAPI DÄ ZE̱DI YÄ MHUNTSꞌI

12. ¿Ndaꞌä mä nꞌa rä regalo bi umbäbi rä Hesu gatꞌho yä mhuntsꞌi ꞌne pate? (1 Tesalonicenses 2:​7, 8).

¹² Ja mä nꞌa rä regalo näꞌä xä uni rä Hesu pa gatꞌho yä mhuntsꞌi. Ha yä pa nuꞌu̱ yä mu̱di kristianu rä Hesu bi giabi nuꞌu̱ yä anciano de Jerusalén pa bi hñutsꞌi Pablo, Bernabé ꞌne märꞌa yä kristianu ngu yä biajante (Hech. 11:22). ¿Pate bi hñutsꞌi nuyu̱ yä biajante? ꞌNehe pa dä japi dä ze̱di yä mhuntsꞌi ja ngu di ja yä siervo ministerial ꞌne yä anciano (Hech. 15:​40, 41). Pablo, Bernabé ꞌne nuꞌu̱ märꞌa yä kristianu bi ja ndunthi yä sacrificio ꞌne asta bi hñutsꞌi en peligro yä bida kontal dä matsꞌi yä ku, dä ꞌñuti ꞌne dä nupäbi yä mfeni (hñeti 1 Tesalonicenses 2:​7, 8).

13. ¿Te mä ꞌme̱fi di ja yä superintendente de gä circuito?

¹³ Yä superintendente de circuito, rꞌabu̱ di biaha yä nthebetho yä kilometro pa tso̱ni yä mhuntsꞌi. Tatꞌä semänä uni yä discurso, tso̱ni yä ku pa huꞌmpäbi yä mu̱i ꞌne nupäbi yä mfeni, diriji näꞌä rä mhuntsꞌi pa yä precursor, di ja näꞌä rä mhuntsꞌi pa yä anciano ꞌne di ja nuꞌu̱ yä mhuntsꞌi änte de dä bo̱ni dä predika yä ku. ꞌNehe hoki yä discurso ꞌne organisa nuꞌu̱ yä däta mhuntsꞌi de gä nꞌa pa ꞌne de gä hñu pa. ꞌNehe, nuyu̱ yä ku udi ha yä ngunsadi pa yä precursor, organisa näꞌä rä mhuntsꞌi ko yä precursor de ha rä circuito ꞌne rꞌabu̱ rä ngu Betel zofo nuyu̱ yä ku pa dä atiende nuꞌu̱ yä asunto po̱ni ꞌne di ja mꞌe̱di drä atiende nguntꞌä.

14. ¿Por hanja xa di balorahu̱ näꞌä rä ꞌme̱fi di ja yä superintendente de gä circuito?

¹⁴ ¿Hanja di benefisia yä mhuntsꞌi de näꞌä rä ꞌme̱fi di ja yä biajante? Nꞌa rä ku de Turquía enä: «Ora xä zo̱ngägihe yä biajante, xä nupkägi mä mfeni pa gä sigi gä usa mä tiempo pa gä fatsꞌi yä ku. Xtä konose ndunthi yä biajante ꞌne gatꞌho xä jakägi gä senti xä ñho ꞌne mäske ja ndunthi yä ꞌme̱fi, nzäntho xä me̱ꞌtsi rä tiempo pa dä ñä kongeki». Johanna, —näꞌä rä zi nju ya dä no̱nihu̱ ha rä parrafo 10—, beni hanja nꞌa rä pa bi bo̱ni ko nꞌa rä biajante pa bi predika pe ninꞌa rä jäꞌi himbi dini ha yä nguu. Nuni zi nju enä: «Mäske njabu̱, nunka ma gä pumfri näꞌä paꞌä ngeꞌä yoho mä nju xki ma xki ꞌmu̱i ha mä nꞌa rä luga ꞌne xa ndi hñei ndunthi. Pe rä superintendente de gä circuito, ko rä mhäte bi nupkägi mä mfeni ꞌne bi maxkägi gä handi ge mäske mäpaya mä familiahu̱ rꞌabu̱ ꞌmu̱i yabu̱, ha rä rꞌayꞌo Xiꞌmhai ya ma gä pe̱ꞌtsihu̱ gatꞌho rä tiempo pa gä muntsꞌihu̱ ꞌne gä kombibihu̱». Otho rä duda ge ha nuꞌu̱ yä mhuntsꞌi habu̱ xä zo̱ni yä superintendente de gä circuito, yä zi ku xa xä zo̱ho̱ xä mädi (Hech. 20:​37–21:1).

15. a) ¿Hanja dä za gä jamäsuhu̱ näꞌä di mända 3 Juan 5-8 ꞌne gä udihu̱ ge di balorahu̱ nuꞌu̱ yä superintendente de gä circuito? (Hyandi ꞌnehe rä kꞌoi). b) ¿Por hanja xa mähyoni ꞌnehe gä o̱thu̱ ngue̱nda yä ꞌme̱hñä nuꞌu̱ yä zi ku gu̱tꞌi rä ꞌñuu ꞌne te dä za gä pe̱fihu̱ po nuyu̱ yä zi nju? (Hyandi rä recuadro «Yꞌo̱tꞌe ngue̱nda nuꞌu̱ yä zi ꞌme̱hñä»).

¹⁵ Rä apostol Juan bi animäbi nꞌa rä kristianu mrä thuhu Gayo pa dä umbäbi ntsaya nuꞌu̱ yä ku mi tso̱ni yä mhuntsꞌi. Näꞌä bi ꞌñembäbi: «Po rä mäte, fatsꞌi nuꞌu̱ yä ku ko näꞌä di japäbi mꞌe̱di pa yä biahe ꞌne pe̱fi ja ngu di ho Äjuä» (hñeti 3 Juan 5-8, TNM). ¿Xi hanja dä za gä pe̱fihu̱ njabu̱ ꞌnehe? Nuju̱ ꞌnehe di jamäsuhu̱ nunä mhända ora di mbitabihu̱ rä biajante nꞌa rä zi ñhuni ꞌne ora di apoyahu̱ nuꞌu̱ yä pa po̱ni yä ku de rä mhuntsꞌi pa di predika kongeꞌä. Näꞌä rä zi nju rä thuhu Leslie dä no̱nihu̱ ha rä parrafo 6, mää te pe̱fi pa dä ꞌñudi ge di jamädibi nuyu̱ yä superintendente de gä circuito. Nunä zi nju enä: «Di xatuäbi rä Zi Dada Jeoba ꞌne di apäbi ge dä umbäbi nuꞌu̱ yä zi ku näꞌä di japäbi mꞌe̱di. Mä zi däme ꞌne nuga, di ho gä opäbihe nꞌa rä zi karta ꞌne di xipäbihe hängu di nupkägihe mä mfenihe ora tso̱ho̱ ha rä mhuntsꞌi». Mähyoni gä benihu̱ ge yä superintendente de gä circuito ꞌnehe thogi yä xuñha ngu nuju̱. Nuyu̱ yä zi ku rꞌabu̱ di hñeni, thogi yä dumu̱i ꞌne rꞌabu̱ ꞌnehe di desanimä. Pe rä Zi Dada Jeoba dä za dä usaꞌi pa dä dädi yä sadi nuyu̱ yä zi ku ora gi opäbi o gi xipäbi rꞌa yä noya nuꞌu̱ nupäbi yä mfeni o nuꞌmu̱ gi umbäbi nꞌa rä zi regalo (Prov. 12:25).

DI JA MꞌE̱DI MÄRꞌA YÄ KU PA DÄ GU̱TꞌI RÄ ꞌÑUU

16. ¿Te mä ntꞌani dä hogi dä yꞌo̱tꞌe nuꞌu̱ yä ñꞌo̱ho̱ ya xä nxixtehe? (Proverbios 3:27).

¹⁶ Po gatꞌho rä Xiꞌmhai, di ja mꞌe̱di märꞌa yä ku pa dä zo̱ho̱ dä nja «ngu nꞌa rä regalo» ha yä mhuntsꞌi. Mu̱ nuꞌi grä ñꞌo̱ho̱ ꞌne ya gä nxixtehe, ¿dä za gi nja ngu nꞌa de nuyu̱ yä regalo? (hñeti Proverbios 3:27). ¿Gi o̱tꞌe ntsꞌe̱di po gi kumpli yä rekisito pa gi mfaxte ngu nꞌa rä siervo ministerial? Mu̱ ya gä pe̱fi njabu̱, ¿nubye̱ gi o̱tꞌe ntsꞌe̱di po gi kumpli yä rekisito pa dä za gi mfaxte de gä anciano?c ¿Dä za gi ja rꞌa yä mpadi ha ri bida pa dä za gi ma ha rä Ngu Nsadi pa yä Evangelizador de rä Tsꞌu̱tꞌhui Äjuä? Toꞌo po̱ni ha nunä ngu nsadi, rä Hesu di usa ndunthi pa dä mfaxte ha yä mhuntsꞌi. Mu̱ gi kamfri ge ninꞌa de gehya hindä za gi pe̱fi, xatuäbi rä Zi Dada Jeoba ꞌne xipäbi. Yꞌapäbi ge dä maxꞌäꞌi ꞌne dä rꞌaꞌi rä espiritu santo pa gi kumpli ko nuꞌu̱ yä responsabilida tꞌaꞌi (Luc. 11:13; Hech. 20:28).

17. ¿Te udi gatꞌho näꞌä rä ꞌme̱fi di ja nuꞌu̱ yä ku gu̱tꞌi rä ꞌñuu ha rä hnini rä Zi Dada Jeoba mäpaya?

¹⁷ Gatꞌho näꞌä rä ꞌme̱fi di ja nuꞌu̱ yä ñꞌo̱ho̱ xä uni rä Hesu «ngu nꞌa rä regalo» pa dä mfaxte ha yä mhuntsꞌi, udi ge rä Hesu go geꞌä gu̱nkägihu̱ ꞌne rꞌakägihu̱ rä gia ha nuya yä gäxä pa (Mat. 28:20). Rä Hesu geꞌä mä reyhu̱, xa di mäkägihu̱ ndunthi, rꞌakägihu̱ gatꞌho näꞌä di jakägihu̱ mꞌe̱di ꞌne rꞌakägihu̱ nuꞌu̱ yä ku gu̱tꞌi rä ꞌñuu ꞌne faxkägihu̱. ¿Hänge xa di jamädihu̱ po geꞌä? Nde, ma gä honihu̱ rä modo hanja gä udihu̱ ge di jamädihu̱ po nuya yä regalo. ꞌNehe, nunka di debe gä pumfrihu̱ gä umbäbihu̱ njamädi rä Zi Dada Jeoba ngeꞌä xä rꞌakägihu̱ ndunthi yä regalo nuꞌu̱ «xa xä ñho» (Sant. 1:17).