Huahni gi pe̱fi näꞌä di ho rä Zi Dada Jeoba

1. ¿Te di pe̱fihu̱ hyaxtho kada nꞌa de gekhu̱ ꞌne por hanja rꞌabu̱ xä ñhei?

KADA nꞌa de gekhu̱ hyaxtho di huahnihu̱ te di debe gä pe̱fihu̱. Rꞌabu̱ hindi jakägihu̱ xä ñhei gä huahnihu̱ te gä pe̱fihu̱, ngu ora di huahnihu̱ te gä nzimxudihu̱ o te mä ora ma gä ähähu̱. Pe ja märꞌa yä asunto nuꞌu̱ hää di jakägihu̱ xä ñhei gä huahnihu̱ te gä pe̱fihu̱. Por ejemplo, ora di huahnihu̱ te gä pe̱fihu̱ pa gä su mä ndoyꞌohu̱, pa gä ꞌmu̱ihu̱ ko rä johya, pa dä benefisia mä familiahu̱ o pa gä pe̱päbihu̱ mänꞌa xä ñho rä Zi Dada Jeoba. Nzäntho di nehu̱ ge näꞌä di huahnihu̱ gä pe̱fihu̱ dä benefisiagihu̱ ꞌne dä benefisia mä familiahu̱. Pe ndaꞌä mänꞌa di nehu̱, ge näꞌä gä pe̱fihu̱ dä numäñho rä Zi Dada Jeoba (Rom. 12:​1, 2).

2. ¿Ndaꞌu̱ nuꞌu̱ hñuu yä konseho ma dä maxkägihu̱ pa gä pe̱fihu̱ näꞌä xä ñho?

² Ha nunä ntꞌudi di nxadihu̱ ma gä handihu̱ hñuu yä konseho nuꞌu̱ ma dä maxkägihu̱ gä huahnihu̱ gä pe̱fihu̱ näꞌä xä ñho: 1) Mähyoni gä pädihu̱ xä ñho gatꞌho näꞌä di ja mꞌe̱di de nꞌa rä asunto, 2) mähyoni gä o̱tꞌehu̱ ngue̱nda te di mbeni rä Zi Dada Jeoba de näꞌä rä asunto, ꞌne 3) mähyoni gä handihu̱ habu̱ ma dä zixkägihu̱ näꞌä di ne gä pe̱fihu̱. ꞌNehe, ma gä handihu̱ te mähyoni gä pe̱fihu̱ pa gä pädihu̱ gä handihu̱ ndaꞌä xä ñho ꞌne ndaꞌä hinä (Prov. 2:11).

PÄDI XÄ ÑHO GATꞌHO NÄꞌÄ DI JA MꞌE̱DI DE NꞌA RÄ ASUNTO

3. Pa gi pädi te gi pe̱fi, ¿te mähyoni gi pädi mꞌe̱tꞌo?

³ Pa gi pädi te gi pe̱fi, mꞌe̱tꞌo mähyoni gi pädi xä ñho te thogi ko nꞌa rä asunto. ¿Por hanja? Imäjinä ge nꞌa rä jäꞌi di hñeni hänge bi ma rä mediko. ¿Hänge näꞌä mediko mꞌe̱tꞌo ma dä yꞌambäbi näꞌä jäꞌi te mä ñheni pe̱ꞌtsi o habu̱ xä ñꞌu̱ pa njabu̱ dä bädi te mä ꞌñethi dä umbäbi? Njabu̱ ꞌnehe, pa gi huahni gi pe̱fi näꞌä xä ñho mꞌe̱tꞌo mähyoni gi pädi gatꞌho näꞌä imformäsio di ja mꞌe̱di de näꞌä asunto gi ñhandui. ¿Hanja dä za gi ja?

4. Ja ngu di handihu̱ ha Proverbios 18:​13, ¿te dä hogi gi pe̱fi pa gi pädi gatꞌho näꞌä imformäsio di ja mꞌe̱di de nꞌa rä asunto? (Hyandi ꞌnehe yä kꞌoi).

⁴ ¿Te ma dä maxꞌäꞌi pa gi pe̱ꞌtsi gatꞌho näꞌä rä imformäsio di ja mꞌe̱di? Yꞌo̱tꞌe yä ntꞌani. Imäjinä ge bri mbitaꞌi gi ma ha nꞌa rä ngo o ha nꞌa rä kombibio, pe hingi pädi xä ñho näꞌä jäꞌi bi mbitaꞌi nixi gi pädi te ma dä nja ha näꞌä kombibioꞌä. Hänge dä hogi gi yꞌambäbi: «¿Hämꞌu̱ ꞌne habu̱ ma dä nja nunä kombibio? ¿Hängu yä jäꞌi ma dä ntini? ¿Toꞌo ma dä su ge gatꞌho dä bo̱ni xä ñho? ¿Toꞌo nuꞌu̱ yä jäꞌi ma dä ntini? ¿Te ma dä tꞌo̱tꞌe? ¿Ma dä tꞌuni yä ithe?». Gi yꞌo̱tꞌe nuya yä ntꞌani geꞌä ma dä maxꞌäꞌi pa gi hyandi mu̱ dä hogi gi ma o hinä (hñeti Proverbios 18:13).

5. ¿Te mähyoni gi pe̱fi mu̱ ya gä pädi gatꞌho näꞌä mi ja mꞌe̱di?

⁵ Mu̱ ya gä pädi gatꞌho näꞌä mi ja mꞌe̱di, nubye̱ hyandi te dä za dä thogi. Por ejemplo, nubye̱ dä hogi gi hñudi gi ntso̱ꞌmi ꞌne gi ñꞌanise̱: «¿Ma gä ma ha näꞌä rä ngo mu̱ ya dä pädi ge ma dä ntini rꞌa yä jäꞌi nuꞌu̱ hingi pe̱ꞌtsuäbi rä tꞌekꞌei yä mhända rä Zi Dada Jeoba? ¿Ma gä ma mäske di pädi ge ma dä tꞌuni yä ithe ꞌne joꞌo toꞌo ma dä su näꞌä ngoꞌä? ¿Ja rä peligro de dä nja rꞌa yä tꞌo̱tꞌe xä ntsꞌo ha näꞌä ngoꞌä?» (1 Ped. 4:3). ꞌNehe dä hogi gi hyandi mu̱ ma dä hñäkꞌäꞌi de gi ntini ha rä mhuntsꞌi o gi po̱ni gi predika. Pe gatꞌho näꞌä ya dä handihu̱, geꞌä ma dä maxꞌäꞌi pa gi hyandi te ma gi pe̱fi ꞌne näꞌä gi mbenige. Pe tobe di ꞌme̱di gi pe̱fi näꞌä xa mähyoni: di ꞌme̱di gi hyandibye̱ te di mbeni rä Zi Dada Jeoba de näꞌä asuntoꞌä (Prov. 2:6).

YꞌO̱TꞌE NGUE̱NDA TE DI MBENI RÄ ZI DADA JEOBA

6. Ja ngu di handihu̱ ha Santiago 1:​5, ¿por hanja xa mähyoni gi xatuäbi rä Zi Dada Jeoba ꞌne gi yꞌapäbi rä mfatsꞌi?

⁶ Xatuäbi rä Zi Dada Jeoba ꞌne yꞌapäbi dä maxꞌäꞌi pa gi ntiende te di mbeniꞌä de näꞌä asunto. Rä Zi Dada Jeoba di prometegihu̱ dä rꞌakägihu̱ rä mfädi pa gä handihu̱ mu̱ näꞌä ma gä pe̱fihu̱ xä ñho o hinä. Rä Mäkä Tꞌofo mää ge rä Zi Dada Jeoba umbäbi rä mfädi «gatꞌho nuꞌu̱ toꞌo dä yꞌapäbiꞌä» (hñeti Santiago 1:5).a

7. ¿Hanja dä za gi pädi te di mbeni rä Zi Dada Jeoba de nꞌa rä asunto? Hñutsꞌi nꞌa rä ejemplo.

⁷ Mu̱ ya gä xatuäbi rä Zi Dada Jeoba ꞌne gä apäbi dä maxꞌäꞌi pa gi hyandi te di debe gi pe̱fi, nubye̱ xa dä jamäsu hanja ma dä dädi ri sadi. Ma gä hutsꞌihu̱ nunä rä ejemplo: imäjinä ge gi yꞌo ha nꞌa rä hnini ꞌne gi mꞌe̱di. Zäi ge ma gi yꞌapäbi rä mfatsꞌi nꞌa rä jäꞌi näꞌä rä mengu de näꞌä lugaꞌä ꞌne ma gi yꞌambäbi te mä ꞌñuu debe gi ju̱u̱. Pe, ¿ma gi ma nsinke gi yꞌo̱de mꞌe̱tꞌo te ma dä xiꞌi? Hinä. Zäi ge ma gi to̱ꞌmi pa xa gi jamäsu ora dä xiꞌi te mä ꞌñuu di debe gi ju̱u̱. Njabu̱ ꞌnehe ora gi xatuäbi rä Zi Dada Jeoba ꞌne gi apäbi dä maxꞌäꞌi pa gi ntiende te di mbeni de nꞌa rä asunto. Mähyoni xa gi «yꞌo̱de xä ñho» te ne dä xiꞌi po mädee de gi nxadi rä Mäkä Tꞌofo ꞌne gi hyoni nuꞌu̱ yä testo mää de näꞌä rä asunto gi ñhandui. Ma gä imäjinähu̱ mänꞌaki näꞌä rä imbitasio bi tꞌaꞌi pa gi ma ha nꞌa rä kombibio. Änte de gi desidi mu̱ gi ma o hinä, dä hogi gi hyandi te mää rä Mäkä Tꞌofo de nuꞌu̱ yä ngo habu̱ ja yä nti, yä tsꞌo tꞌo̱tꞌe ꞌne yä tsꞌo ntsitsꞌi. ꞌNehe dä hogi gi hyoni te mää rä Mäkä Tꞌofo ora di tokaꞌi gi desidi mu̱ gi pe̱fi näꞌä go gi ne o mu̱ gi hñutsꞌi mꞌe̱tꞌo rä Tsꞌu̱tꞌhui Äjuä ha ri bida (Mat. 6:33; Rom. 13:13; 1 Cor. 15:33).

8. ¿Te dä hogi gi pe̱fi pa gi pädi te di mbeni rä Zi Dada Jeoba de näꞌä rä asunto gi ñhandui? (Hyandi ꞌnehe rä kꞌoi).

⁸ Rꞌabu̱ zäi ge gi handi ge di jaꞌi mꞌe̱di toꞌo dä rꞌaꞌi nꞌa rä hogä konseho o toꞌo dä maxꞌäꞌi pa gi tini näꞌä rä imformäsio gi honi de näꞌä rä asunto gi ñhandui. Ora gi thogi njabu̱, mäjuäni ge dä za dä maxꞌäꞌi nꞌa rä ku o nꞌa rä zi nju näꞌä ya pe̱ꞌtsi rä esperiensia. Pe, dä hogi ge nuꞌise̱ gi pädi gi imbestiga te mää rä Mäkä Tꞌofo ꞌne nuꞌu̱ yä he̱ꞌmi xä rꞌakägihu̱ rä hnini rä Zi Dada Jeoba. Pa geꞌä, dä hogi gi usa nuya yä mfatsꞌi: Guía de estudio para los testigos de Jehová ꞌne rä mfistꞌofo Textos bíblicos para la vida cristiana. Beni ge nuꞌi gi ne gi pädi te di mbeni rä Zi Dada Jeoba de näꞌä rä asunto gi ñhandui pa gi pe̱fi näꞌä di hoꞌä hingä näꞌä go gi nege.

9. ¿Hanja dä za gä ꞌmu̱ihu̱ seguro ge näꞌä ma gä pe̱fihu̱ hää di ho rä Zi Dada Jeoba? (Efesios 5:17).

⁹ ¿Hanja dä za gä ꞌmu̱ihu̱ seguro ge näꞌä ma gä pe̱fihu̱ hää di ho rä Zi Dada Jeoba? Mähyoni gä konosehu̱ xä ñho Toꞌoꞌä. Proverbios 9:10 enä: «Gä pädihu̱ xä ñho toꞌo Äjuä, jakägihu̱ gä ntiendehu̱ ndaꞌä xä ñho ꞌne ndaꞌä hinä». Nuya yä noya signifika ge mu̱ gä pädihu̱ xä ñho tenguꞌä rä mꞌu̱i rä Zi Dada Jeoba, te ma dä me̱fi, te mä tꞌo̱tꞌe di mädi ꞌne te mä tꞌo̱tꞌe di u̱tsa, geꞌä ma dä maxkägihu̱ gä pädihu̱ ndaꞌä xä ñho ꞌne ndaꞌä hinä. Hänge mu̱ gi beni te gi pe̱fi dä hogi gi ñꞌanise̱: «Nubye̱ ya di konose tenguꞌä rä mꞌu̱i rä Zi Dada Jeoba, ¿ma dä ho nunä ma gä pe̱fi?» (hñeti Efesios 5:17).b

10. Mäske di mädihu̱ mä familiahu̱ ꞌne mä amigohu̱, ¿ndaꞌä mänꞌa xa di nehu̱?

¹⁰ Nuju̱ xa di o̱thu̱ ntsꞌe̱di po gä johyabihu̱ rä koraso rä Zi Dada Jeoba mäske rꞌabu̱ hindi kohihu̱ xä ñho ko mä familiahu̱ o ko mä amigohu̱ ꞌne asta di nkue̱ kongekhu̱. Por ejemplo, rꞌabu̱ yä dada tuyämu̱i po rä tꞌixu o po rä tꞌu̱ ꞌne trata dä kombense pa dä nthäti ko nꞌa rä jäꞌi näꞌä ja ndunthi rä bojä mäske näꞌä jäꞌiꞌä hingi pe̱ꞌtsi nꞌa rä hogä ntsitsꞌi ko rä Zi Dada Jeoba o hingi e̱ntsꞌuäbi rä ganä pa dä me̱päbi ngu ri ꞌñehe. Mäjuäni ge yä dada tuyämu̱i po yä bätsi ꞌne hingi ne dä hyandi ge xudi ndämäni dä thogi rä ñhoya. Pe, ¿toꞌo ma dä matsꞌi näꞌä nxutsi o näꞌä tsꞌu̱ntꞌu̱ pa dä me̱ꞌtsi nꞌa rä hogä ntsitsꞌi ko rä Zi Dada Jeoba? ¿Te di mbeni rä Zi Dada Jeoba de nunä asunto? Yä mpengi nuya yä ntꞌani ma gä tinihu̱ ha Mateo 6:​33, nuꞌmu̱ Ñhesukristo bi ꞌñembäbi nuꞌu̱ yä de̱ni: «Hyoñhu̱ mꞌe̱tꞌo hanja dä za gi ꞌmu̱hu̱ xä ñho ha rä mhända Äjuä ꞌne gi yꞌohu̱ ngu nuꞌä di hoꞌä». Hänge mäske di mädihu̱ mä dadahu̱, mä nänähu̱ o mä amigohu̱ ꞌne di pe̱ꞌtsuäbihu̱ rä tꞌekꞌei märꞌa yä jäꞌi, pa gekhu̱ mänꞌa di nehu̱ gä pe̱fihu̱ näꞌä di ho rä Zi Dada Jeoba ꞌne gä johyabihu̱ rä koraso.

HYANDI HABU̱ MA DÄ ZIXꞌÄꞌI NÄꞌÄ GI NE GI PE̱FI

11. Ja ngu di handihu̱ ha Proverbios 2:​11, ¿te ma dä maxꞌäꞌi pa gi hyandi dende änte habu̱ ma dä zixꞌäꞌi näꞌä gi ne gi pe̱fi?

¹¹ Mu̱ ya gä handi te mää rä Mäkä Tꞌofo de näꞌä rä asunto gi ñhandui, nubye̱ hyandi ndaꞌä mänꞌa xä ñho gi pe̱fi (hñeti Proverbios 2:11). Ora gi ñhandui nꞌa rä asunto, rꞌabu̱ ñꞌenä ja ndunthi yä ꞌñuu habu̱ hingi pädi ndaꞌä ma gi ju̱u̱, hänge xä ñho gi hyandi habu̱ ma dä zixꞌäꞌi kada nꞌa de nuꞌu̱ yä ꞌñuuꞌu̱. Rꞌabu̱ hinxä ñhei gi hyandi te ma ꞌñuu mänꞌa xä ñho, pe rꞌabu̱ dä za dä jaꞌi xä ñhei ꞌne dä za gi ꞌmu̱i komfundido. ¿Te ma dä maxꞌäꞌi näꞌä oraꞌä? Mu̱ gi pädi gi usa ri mfeni pa gi hyandi ndaꞌä xä ñho ꞌne ndaꞌä hinä, geꞌä ma dä maxꞌäꞌi pa hingi ju̱u̱ nꞌa rä ꞌñuu xä ntsꞌo ꞌne go gi huahni gi pe̱fi näꞌä xä ñho.

12, 13. Mu̱ gi pädi gi usa ri mfeni pa gi hyandi ndaꞌä xä ñho ꞌne ndaꞌä hinä, ¿hanja geꞌä ma dä maxꞌäꞌi ora gi huahni nꞌa rä ꞌme̱fi?

¹² Nubye̱ imäjinä ge gi honi nꞌa rä ꞌme̱fi pa dä za gi mäntene ri familia ꞌne gä tini yoho yä me̱fi. Koꞌmu̱ gi ne gi huahni xä ñho, mꞌe̱tꞌo gi ñꞌani: «¿Te mä ꞌme̱fiꞌu̱? ¿Hängu yä pa ma dä tꞌadi gä mpe̱fi? ¿Hängu rä yabu̱?». Koꞌmu̱ ya gä handi ge xä ñho nuyu̱ yoho yä ꞌme̱fi ꞌne hingä ma dä mhändaꞌi gi pe̱fi nꞌa rä tꞌo̱tꞌe näꞌä di proibi rä Mäkä Tꞌofo, nubye̱ gi ne gi huahni näꞌä rä ꞌme̱fi gi handi ge ma dä mhändaꞌi gi pe̱fi näꞌä gi ho ꞌne ge ma drä jutꞌi xä ñho. ¿Pe gi pädi? Tobe di ja mꞌe̱di gi hyandi näꞌä xa mähyoni.

¹³ Nubye̱ dä hogi gi yꞌo̱tꞌe nuya yä ntꞌani: «¿Nunä ꞌme̱fi ma dä hñägägi de gä ntini ha yä mhuntsꞌi? ¿Ma gä mpe̱fi ndunthi ꞌne ya hingä ma dä gohi rä tiempo pa gä dedikabi mä familia ꞌne gä fatsꞌi dä me̱ꞌtsi nꞌa rä hogä ntsitsꞌi ko rä Zi Dada Jeoba?». Mu̱ gi yꞌo̱tꞌe nuya yä ntꞌani, geꞌä ma dä maxꞌäꞌi pa gi huahni mꞌe̱tꞌo rä Zi Dada Jeoba ꞌne ri familia, ke näꞌä di ofreseꞌi gi tähä näꞌä rä ꞌme̱fi gi ne gi ju̱u̱. Mu̱ gi pe̱fi njabu̱, rä Zi Dada Jeoba ma dä rꞌaꞌi rä jäpi.

14. ¿Te ma dä maxkägihu̱ pa hingä japäbihu̱ dä mfeꞌtse märꞌaa?

¹⁴ Ora di pädihu̱ gä usahu̱ mä mfenihu̱ pa gä handihu̱ ndaꞌä xä ñho ꞌne ndaꞌä hinä, geꞌä ma dä maxkägihu̱ pa gä handihu̱ te ma dä thogi ko näꞌä di huahnihu̱ gä pe̱fihu̱ ꞌne hanja ma dä afektabi märꞌaa. Geꞌä ma dä maxkägihu̱ pa gä huahnihu̱ gä pe̱fihu̱ näꞌä xä ñho ꞌne hingä japäbihu̱ dä mfeꞌtse märꞌaa (Filip. 1:10). Xa mähyoni gä handihu̱ te ma dä mbeni märꞌaa o hanja ma dä afektabi. Por ejemplo, ora di huahnihu̱ hanja gä ñhokihu̱ o te mä dutu gä heehu̱, rꞌabu̱ dä za xa gä hohu̱ näꞌä rä modo de hanja di ñhehu̱ o hanja di ñhokihu̱, pe pa mä kuhu̱ o märꞌaa yä jäꞌi ora dä hyandi dä za dä mbeni xä ntsꞌo de gekhu̱, dä mfada o asta dä ntsa. Hänge mu̱ gä pädihu̱ gä usahu̱ mä mfenihu̱ pa gä dahu̱ ngue̱nda ndaꞌä xä ñho ꞌne ndaꞌä hinä, geꞌä ma dä maxkägihu̱ gä pe̱ꞌtsuäbihu̱ rä tꞌekꞌei näꞌä di senti märꞌaa. ꞌNehe näꞌä rä mhäte di sentihu̱ po rä Zi Dada Jeoba ꞌne po mä mikꞌeihu̱, geꞌä ma dä maxkägihu̱ pa gä jamäsuhu̱ hanja di ñhokihu̱ ꞌne hanja di ñhehu̱ ꞌne njabu̱ gä udihu̱ ge di hombäbihu̱ rä ñho märꞌaa, hingä di hongä mä ñhose̱hu̱ (1 Cor. 10:​23, 24, 32; 1 Tim. 2:​9, 10). Hää, gä pädihu̱ gä usahu̱ mä mfenihu̱ pa gä dahu̱ ngue̱nda ndaꞌä xä ñho ꞌne ndaꞌä hinä, ma dä maxkägihu̱ pa gä huahnihu̱ gä pe̱fihu̱ näꞌä xä ñho ꞌne njabu̱ gä udihu̱ ge di pe̱ꞌtsuäbihu̱ rä mhäte ꞌne rä tꞌekꞌei märꞌaa.

15. ¿Te mähyoni gi pe̱fi änte de gi fu̱di gi ja näꞌä gä desidi?

¹⁵ Pe mu̱ gi huahni gi pe̱fi nꞌa rä tꞌo̱tꞌe näꞌä xa xä ñhei ngeꞌä gä handi ge geꞌä mänꞌa xä ñho, nuꞌmu̱ xa dä hogi gi jamäsu näꞌä rä konseho bi uni Ñhesukristo nuꞌmu̱ bi ꞌñenä ge di debe gi «beni mꞌe̱tꞌo te gatꞌho mähyoni» (Luc. 14:28). Mähyoni gi hyandi hängu rä tiempo ma dä zitsꞌi, rä bojä ꞌne gatꞌho näꞌä ma dä ja mꞌe̱di pa gi kumpli ko näꞌä gä huahni gi pe̱fi. Rꞌabu̱ ma dä ja mꞌe̱di gi xipäbi ri familia pa gi ñähu̱ te mähyoni dä me̱fi kada nꞌaa pa dä maxꞌäꞌi. ¿Por hanja di debe gi planea dende änte? Geꞌä ma dä maxꞌäꞌi pa gi hyandi te gatꞌho ma dä ja mꞌe̱di o te hingä ma dä ja mꞌe̱di ꞌne rꞌabu̱ asta ma dä bo̱ni nꞌa rä solusio mänꞌa xä ñho. ꞌNehe mu̱ gi xipäbi ri familia nuꞌu̱ ma dä rꞌaꞌi rꞌa yä idea ꞌne nuꞌu̱ ma dä mꞌu̱i dispuesto dä maxꞌäꞌi pa dä bo̱ni xä ñho näꞌä ma gi pe̱fi (Prov. 15:22).

JAMÄSU NUꞌU̱ YÄ KONSEHO UNI RÄ ZI DADA JEOBA PA DÄ BO̱NI XÄ ÑHO NÄꞌÄ MA GI PE̱FI

16. ¿Te mä konseho mähyoni gi jamäsu pa dä bo̱ni xä ñho näꞌä gi ne gi pe̱fi? (Hyandi ꞌnehe rä recuadro «Hñuu yä konseho nuꞌu̱ ma dä maxꞌäꞌi gi huahni gi pe̱fi näꞌä xä ñho»).

¹⁶ Mu̱ gi ñhandui nꞌa rä xuñha o nꞌa rä asunto habu̱ hingä ngi pädi te mä ꞌñuu gi ju̱u̱ pe ya gä jamäsu nuya yä konseho bi uni rä Zi Dada Jeoba, nuꞌmu̱ ya xkä ñhoki pa gi huahni gi pe̱fi näꞌä xä ñho. Koꞌmu̱ ya gä imbestiga ꞌne ya gi pädi xä ñho gatꞌho näꞌä di ja mꞌe̱di de näꞌä asuntoꞌä ꞌne ya gä handi ha rä Mäkä Tꞌofo te di mbeni rä Zi Dada Jeoba, nubye̱ ogi pumfri gi xatuäbi ꞌne yꞌapäbi dä maxꞌäꞌi pa dä bo̱ni xä ñho näꞌä gä desidi gi pe̱fi.

17. ¿Te ma dä maxꞌäꞌi pa gi huahni gi pe̱fi näꞌä xä ñho?

¹⁷ Pe zäi ge dä za gi ꞌñenä: «Mä mꞌe̱tꞌo ya xtä ñhantꞌmee märꞌa yä asunto ꞌne ya xtä pädi te gä pe̱fi». Pe beni ge mäske gi pe̱ꞌtsä ndunthi rä mfädi o gi pe̱ꞌtsä ndunthi rä esperiensia, xa mähyoni gi yꞌo̱tꞌe ngue̱nda näꞌä rä mfädi bi ehe de rä Zi Dada Jeoba. ¿Por hanja? Ngeꞌä ho̱nse̱ rä Zi Dada Jeoba dä za dä rꞌakägihu̱ näꞌä xa mäjuäni rä mfädi ꞌne ho̱nse̱ꞌä dä za dä maxkägihu̱ pa gä pädihu̱ gä handihu̱ ndaꞌä xä ñho ꞌne ndaꞌä hinä (Prov. 2:​1-5). Hää, beni ge ho̱nse̱ rä Zi Dada Jeoba dä za dä maxꞌäꞌi pa gi huahni gi pe̱fi näꞌä go di hoꞌä (Sal. 23:​2, 3).