¿Te pe̱fi Jeoba nuꞌmu̱ punꞌgägihu̱ mä pekadohu̱?

1. ¿Rꞌabu̱ te ne dä mää nꞌa rä jäꞌi ora enä: «Di puñꞌäꞌi»?

¿TE MA gi senti mu̱ nꞌa rä jäꞌi näꞌä gä ofende ꞌne gä u̱mbäbi rä mfeni dä ñꞌeñꞌäꞌi: «¡Ya ogi turimu̱i! ¡Ma gä punꞌäꞌi!»? Zäi ge xa ma dä haxämhaiꞌi. Pe zäi ge tobe gi sigi gi ñꞌani: «¿Xi te bi ne bi mää nunä jäꞌi? ¿Ge xa mäjuäni ma dä punꞌgägi ꞌne ge näꞌä rä ntsitsꞌi ja entre gekhe ma dä sigi ꞌñenä hinte xä thogi? ¿O enä ge di punꞌgägi pe näꞌä rä ntsitsꞌi ja entre gekhe ma dä mpadi dende nubye̱?».

2. ¿Te nguꞌä näꞌä rä mpumbäte uni rä Zi Dada Jeoba? (Hyandi ꞌnehe rä nota).

² Ninꞌa rä jäꞌi hingä ma dä punꞌgägihu̱ ja ngu di punꞌgägihu̱ rä Zi Dada Jeoba. Hänge ha nꞌa de nuꞌu̱ yä jähñä ehe ha rä Mäkä Tꞌofo enä: «Ngeꞌä Ho̱nse̱ꞌi gi pädi gi uni näꞌä xa mäjuäni rä mpumbäte, ꞌne geꞌä jakägi gä pe̱tsꞌäꞌi ndunthi rä tꞌekꞌei» (Sal. 130:4).a Hää, näꞌä rä mpumbäte uni rä Zi Dada Jeoba geꞌä «xa mäjuäni rä mpumbäte». Rä Zi Dada Jeoba go geꞌä huxä rä ejemplo de hanja di debe gä unihu̱ näꞌä xa mäjuäni rä mpumbäte. Rꞌa yä yꞌofo de rä Mäkä Tꞌofo bi usa rä noya sa·láj de rä idioma hebreo, pa dä mää ho̱nse̱ näꞌä rä mpumbäte uni rä Zi Dada Jeoba. Pe nunä noya, nunka bi usaꞌu̱ pa dä mää näꞌä rä mpumbäte uni yä mexiꞌmhai.

3. ¿Por hanja di rꞌakägihu̱ ndunthi rä johya gä pädihu̱ tenguꞌä näꞌä rä mpumbäte uni rä Zi Dada Jeoba? (Isaías 55:​6, 7).

³ Nuꞌmu̱ rä Zi Dada Jeoba pumbäbi nꞌa rä jäꞌi, borra ꞌne puꞌtuäbi gatꞌho yä tsꞌoki ꞌne sigi näꞌä rä hogä ntsitsꞌi ꞌñenä go hinte xä thogi. Hää, rä Zi Dada Jeoba pumbäbi näꞌä jäꞌi gatꞌho yä pekado. ¿Hänge rꞌakägihu̱ ndunthi rä johya gä pädihu̱ njabu̱? (Hñeti Isaías 55:​6, 7).

4. ¿Te usa rä Zi Dada Jeoba pa dä maxkägihu̱ gä ntiendehu̱ hängu rä ndängi näꞌä rä mpumbäte rꞌakägihu̱?

⁴ Näꞌä rä mpumbäte uni rä Zi Dada Jeoba hingä mähye̱gi ko näꞌä rä mpumbäte uni yä mexiꞌmhai. Koꞌmu̱ rä Zi Dada Jeoba pädi xä ñho ge jakägihu̱ xä ñhei gä ntiendehu̱ hängu rä ndängi näꞌä rä mpumbäte rꞌakägihu̱, hänge usa rä Mäkä Tꞌofo habu̱ ehe rꞌa yä noya ꞌne rꞌa yä kꞌoi mähotho nuꞌu̱ faxkägihu̱ gä ntiendehu̱ tenguꞌä näꞌä rä mpumbäte rꞌakägihu̱. Ha nunä ntꞌudi di nxadihu̱, ma gä handihu̱ rꞌa de nuya yä kꞌoi habu̱ utkägihu̱ hanja mu̱ xa mäjuäni di arrepentihu̱ de mä pekadohu̱, rä Zi Dada Jeoba punꞌgägihu̱ ꞌne hokägihu̱ gä pe̱ꞌtsihu̱ mänꞌaki nꞌa rä hogä ntsitsꞌi kongeꞌä. Ma gä handihu̱ rꞌa mänꞌaa de nuya yä kꞌoi ꞌne geꞌä ma dä maxkägihu̱ pa mänꞌa dä ze̱di näꞌä rä mhäte di pe̱ꞌtsuäbihu̱.

JEOBA JU̱ꞌTSI ꞌNE HÄTSꞌI MÄ PEKADOHU̱

5. ¿Te thogi nuꞌmu̱ rä Zi Dada Jeoba di punꞌgägihu̱ mä tsꞌokihu̱?

⁵ Rä Mäkä Tꞌofo enä ge yä pekado ꞌñenä nꞌa rä däta ꞌmatsꞌi näꞌä xa xä ñhu̱. Por ejemplo rä rey David bi ꞌñenä: «Nuꞌu̱ mä tsꞌoki xtä o̱tꞌe, odä ha mä mfeni; ꞌñenä go di ndu nꞌa rä däta ꞌmatsꞌi näꞌä xa xä ñhu̱» (Sal. 38:4). Pe ha rä Salmo 25:18 ꞌne 32:5 enä ge rä Zi Dada Jeoba umbäbi rä mpumbäte nuꞌu̱ xa mäjuäni di mpe̱tsꞌi po nuꞌu̱ yä pekado xä yꞌo̱tꞌe. Ha rä idioma hebreo rä noya «punꞌgägi» ri bo̱ni «ju̱ꞌtsi» o «hñätsꞌi». Nuya yä noya, jakägihu̱ gä imäjinähu̱ hanja rä Zi Dada Jeoba ꞌñenä nꞌa rä ñꞌo̱ho̱ näꞌä xa ja ndunthi rä tsꞌe̱di ꞌne ju̱ꞌtsi näꞌä rä däta ꞌmatsꞌi di nduhu̱. Hää, ju̱ꞌtsi ꞌne hätsꞌi gatꞌho nuꞌu̱ mä pekadohu̱.

6. ¿Asta habu̱ hätsꞌi rä Zi Dada Jeoba mä pekadohu̱?

⁶ ¿Pe habu̱ hätsꞌi rä Zi Dada Jeoba nuꞌu̱ mä pekadohu̱? Ha rä Salmo 103:12 di tinihu̱ nꞌa rä kꞌoi näꞌä faxkägihu̱ gä ntiendehu̱ asta habu̱ hätsꞌi. Nunä testo enä: «Ja ngu rä yabu̱ rä mbo̱xhyadi de rä yu̱hyadi, njabu̱ rä yabu̱ de gekhu̱ habu̱ hutsꞌi nuꞌu̱ mä pekadohu̱». ¿Dä za gi imäjinä hängu rä yabu̱ kohi mbo̱xhyadi de yu̱hyadi? ¡Xa yabu̱ ꞌne nunka ma dä za dä nthe̱ nꞌa ko mänꞌaa! Hänge rä Salmo 103:12 utkägihu̱ ge nuꞌmu̱ rä Zi Dada Jeoba punꞌgägihu̱, ju̱ꞌtsi mä tsꞌokihu̱ pa hätsꞌi xa yabu̱ de gekhu̱ habu̱ nunka ma dä za gä nthe̱hu̱ mänꞌaki kongeꞌu̱. ¿Hänge asta haxämhaigihu̱ gä pädihu̱ njabu̱?

7. ¿Te mä kꞌoi usa rä Mäkä Tꞌofo pa dä ꞌñudi näꞌä pe̱fi rä Zi Dada Jeoba ko mä pekadohu̱? (Miqueas 7:​18, 19).

⁷ ¿Te o̱tuäbi rä Zi Dada Jeoba nuꞌu̱ mä pekadohu̱ hätsꞌi? ¿Kohui kongeꞌä? Hinä. Nꞌa rä pa rä rey Ezequías bi ꞌñenä: «Gatꞌho nuꞌu̱ mä pekado, xkä fo̱te nxu̱tha de geꞌi». Nuya yä noya ꞌnehe ri bo̱ni «xkä häki de ri thandi gatꞌho mä pekado» (Is. 38:​9, 17; rä nota). Hänge ora xa mäjuäni di arrepentihu̱ po näꞌä xtä o̱tꞌehu̱, rä Zi Dada Jeoba ꞌñenä go ju̱u̱ nuꞌu̱ mä pekadohu̱ ꞌne fo̱te yabu̱ habu̱ nunka dä za dä hyandi mänꞌaki. Nuꞌu̱ yä noya hutsꞌi ha Isaías 38:17 ꞌnehe dä za dä tꞌenä njaua: «Gi ja ngue̱nda ꞌñenä hinte mä pekado dä o̱tꞌe». Rä Mäkä Tꞌofo uni mä nꞌa rä kꞌoi mähotho habu̱ di handihu̱ te o̱tuäbi rä Zi Dada Jeoba nuꞌu̱ mä pekadohu̱ (hñeti Miqueas 7:​18, 19). Ha nuya yä testo udi hanja rä Zi Dada Jeoba ꞌñenä go ju̱ nuꞌu̱ mä pekadohu̱ ꞌne fo̱te asta mbo ha rä ndehe. ¿Dä za gi imäjinä hämꞌu̱ ma gi tini nꞌa rä tꞌo̱tꞌe mu̱ gi tho̱ge ꞌne dä yu̱i asta mbo rä ndehe?

8. ¿Te xtä pädihu̱ asta nubye̱?

⁸ Ko nuꞌu̱ yä kꞌoi dä handihu̱, dä pädihu̱ hanja nuꞌmu̱ rä Zi Dada Jeoba di punꞌgägihu̱ mä tsꞌokihu̱, ꞌñenä go hägägihu̱ näꞌä rä ꞌmatsꞌi xa xmä ñhu̱ ndi nduhu̱. Hää, di sentihu̱ ja ngu bi senti rä rey David nuꞌmu̱ bi ꞌñenä: «Dä me̱ꞌtsi ndunthi rä johya nuꞌu̱ toꞌo xrä pumbäbi nuꞌu̱ yä tsꞌo tꞌo̱tꞌe xä me̱fi ꞌne dri borrabi yä pekado. Dä me̱ꞌtsi ndunthi rä johya näꞌä rä jäꞌi xä ꞌñenä rä Zi Dada Jeoba ge hingä ma dä hñäꞌspäbi ngue̱nda nuꞌu̱ yä pekado xä yꞌo̱tꞌe» (Rom. 4:​6-8, TNM). ¡Nunä gehnä xa rä thuhu rä mpumbäte!

JEOBA JAPÄBI DÄ MꞌE̱DI MÄ PEKADOHU̱

9. ¿Te mä kꞌoi usa rä Zi Dada Jeoba pa faxkägihu̱ gä ntiendehu̱ te pe̱fi ko nuꞌu̱ mä pekadohu̱?

⁹ Nubye̱ ma gä handihu̱ märꞌa yä kꞌoi nuꞌu̱ ehe ha rä Mäkä Tꞌofo, ꞌne faxkägihu̱ gä ntiendehu̱ hanja rä Zi Dada Jeoba usa näꞌä rä rescate o njutꞌi, pa dä japäbi dä mꞌe̱di gatꞌho yä pekado nuꞌu̱ xa mäjuäni di arrepenti. Por ejemplo, rä Mäkä Tꞌofo enä ge rä Zi Dada Jeoba peni ꞌne peꞌte yä pekado, ꞌne njabu̱ di tꞌaxki näꞌä rä yꞌo̱tä tsꞌoki (Sal. 51:7; Is. 4:4; Jer. 33:8). Rä Zi Dada Jeoba mää te thogi mꞌe̱fa nuꞌmu̱ enä: «Mäske nuꞌu̱ ri pekadohu̱ xa xä nthe̱ni, ma dä tꞌaxki ngu yä xitse̱ nuꞌu̱ xa xä ntꞌaxi; mäske xträ nthe̱ni ngu rä the̱ngä dutu, ma dä zo̱ho̱ dä nja ngu rä tꞌaxä xiyꞌo» (Is. 1:18). Nꞌa rä mäncha xa xä nthe̱ni ha nꞌa rä tꞌaxä dutu, xa xä ñhei toꞌo dä yꞌo̱ke. Njabu̱ ꞌnehe nuꞌu̱ mä pekadohu̱, pe rä Zi Dada Jeoba xikägihu̱ ge näꞌä hää dä za dä japäbi dä tꞌaxki ꞌne ya hinte dä gohi de geꞌä.

10. ¿Ndaꞌä mä nꞌa rä kꞌoi usa rä Mäkä Tꞌofo pa dä ꞌñutkägihu̱ te nguꞌu̱ mä pekadohu̱ ꞌne te pe̱fi rä Zi Dada Jeoba kongeꞌu̱?

¹⁰ Ja ngu ya dä handihu̱ ha rä ntꞌudi pa gä nxadihu̱ 6, rä Mäkä Tꞌofo udi ge mä pekadohu̱ ꞌñenä go yä thai (Mat. 6:12; Luc. 11:4). Hänge ora di o̱thu̱ nꞌa rä pekado kontra rä Zi Dada Jeoba, ꞌñenä go ri te näꞌä rä thai di pe̱ꞌtsihu̱ kongeꞌä. Pe nuꞌmu̱ di punꞌgägihu̱ ꞌñenä go engägihu̱: «¡Ya ogi turimu̱i! Ya hindi ja mꞌe̱di gi jutkägi näꞌä gi tukägi; näꞌä rä he̱ꞌmi habu̱ mi hutsꞌi nuꞌu̱ ri thai ya dä tu̱ni». ¡Xa di rꞌakägihu̱ ndunthi rä johya, gä pädihu̱ hanja rä Zi Dada Jeoba punꞌgägihu̱ nuꞌu̱ mä thai di pe̱ꞌtsihu̱ kongeꞌä!

11. ¿Te ri bo̱ni ora rä Mäkä Tꞌofo enä ge rä Zi Dada Jeoba borra mä pekadohu̱? (Hechos 3:19).

¹¹ Rä Zi Dada Jeoba hingä ho̱nse̱ di punꞌgägihu̱ nuꞌu̱ mä thaihu̱, sino ke ꞌnehe puꞌti xä ñho pa hindä nheki habu̱ mi hutsꞌi (hñeti Hechos 3:​19, TNM). Nunä kꞌoi zäi ge jakägihu̱ gä imäjinähu̱ ora nꞌa rä jäꞌi di tacha nꞌa rä documento habu̱ hutsꞌi näꞌä mä thaihu̱ di pe̱ꞌtsihu̱ kongeꞌä. Mäske näꞌä documento ya hingi ja rä muui, pe zäi ge tobe di nheki hängu ndi tuhu̱. Pe Hechos 3:19 udi ge rä Zi Dada Jeoba hindi tacha mä thaihu̱ o mä pekadohu̱, sino ke di borra gatꞌho. Mäyaꞌmu̱, nuꞌu̱ yä documento mi ntꞌofo, himi hei toꞌo dä borra ꞌne dä putꞌi gatꞌho näꞌä mi hutsꞌi. Hänge mu̱ näꞌä documento mi hutsꞌi nꞌa rä thai, mi tsa drä borra gatꞌho asta ya xa hinte dä nheki. Hää, ꞌñenä nunka bi nja näꞌä thaiꞌä. ¡Hängu di jamädibihu̱ rä Zi Dada Jeoba ngeꞌä ora di borra mä pekadohu̱, puꞌti gatꞌho pa ya hinte dä nheki! (Sal. 51:9).

12. ¿Pa te usa rä Zi Dada Jeoba näꞌä rä kꞌoi de nꞌa rä däta ꞌmo gui?

¹² Rä Zi Dada Jeoba usa mä nꞌa rä kꞌoi pa dä ꞌñudi te o̱ꞌtuäbi nuꞌu̱ mä pekadohu̱. Ha Isaías 44:22 enä: «Ma gä japäbi dä mꞌe̱di nuꞌu̱ ri tsꞌoki ꞌñenä go ma dä njoꞌmi ko nꞌa rä gui, ꞌne nuꞌu̱ ri pekado ꞌñenä go ma dä njoꞌmi ko nꞌa rä däta ꞌmo gui». Hää, ora rä Zi Dada Jeoba punꞌgägihu̱ mä tsꞌokihu̱, ꞌñenä go koꞌmi gatꞌho mä pekadohu̱ ko nꞌa rä däta ꞌmo gui pa njabu̱ hinto dä za dä hyandi.

13. Xi nuꞌi, ¿te gi senti ora gi handi hanja rä Zi Dada Jeoba puñꞌäꞌi ri pekado?

¹³ ¿Te utkägihu̱ gatꞌho nuꞌu̱ yä kꞌoi ya dä handihu̱? Ge nuꞌmu̱ rä Zi Dada Jeoba di punꞌgägihu̱, hindi debe gä mbenihu̱ ge pe̱ꞌtsi nꞌa rä rejistro habu̱ ofo nuꞌu̱ yä pekado di o̱tꞌehu̱. Koꞌmu̱ nuꞌu̱ mä thaihu̱ ya bi njutꞌi ko rä ji rä Hesu, ya hindi ja mꞌe̱di go gä jutꞌihu̱. Nuꞌu̱ mä pekadohu̱, bi putꞌi gatꞌho ꞌñenä go nunka te dä o̱tꞌehu̱. Hää, ora xa mäjuäni di arrepentihu̱, rä Zi Dada Jeoba xa mäjuäni di punꞌgägihu̱ ꞌne borra pa nzäntho nuꞌu̱ mä pekadohu̱.

JEOBA PUNꞌGÄGIHU̱ ꞌNE NUGÄGIHU̱ MÄNꞌAKI NGU YÄ AMIGO

14. ¿Por hanja dä za gä kamfrihu̱ ge rä Zi Dada Jeoba hää xa mäjuäni di punꞌgägihu̱? (Hyandi ꞌnehe yä kꞌoi).

¹⁴ Ora rä Zi Dada Jeoba enä ge di punꞌgägihu̱, näꞌä nugägihu̱ mänꞌaki ngu yä amigo. Ora di pädihu̱ njabu̱, geꞌä faxkägihu̱ pa ya hindä u̱ngägihu̱ mä mfenihu̱ po näꞌä dä pe̱fihu̱ ꞌne ya hingä mbenihu̱ ge rä Zi Dada Jeoba di sigi di nkue̱ kongekhu̱. Gä pädihu̱ ge rä Zi Dada Jeoba ya bi punꞌgägihu̱, ꞌnehe faxkägihu̱ pa ya hingä mbenihu̱ ge honi rä modo hanja dä kastigagihu̱ po näꞌä dä o̱tꞌehu̱. Hää, mismo rä Zi Dada Jeoba bi ꞌñembäbi rä profeta Jeremías: «Ma gä pumbäbi yä tsꞌoki ꞌne ya hingä beni nuꞌu̱ yä pekado» (Jer. 31:34). Rä apostol Pablo ꞌnehe bi yꞌofo nuya yä noya bi mää rä Zi Dada Jeoba ora bi ꞌñenä: «Hiñhaꞌmu̱ ma gä yopä bembäbi yä tsꞌoki» (Heb. 8:12). ¿Te di signifika nuya yä noya?

15. ¿Te ri bo̱ni ora rä Zi Dada Jeoba enä ge ya hingä ma dä beni nuꞌu̱ mä pekadohu̱ ya bi punꞌgägihu̱?

¹⁵ Ha rä Mäkä Tꞌofo rä noya beni hingä nzäntho ri bo̱ni gä benihu̱ näꞌä bi thogi mä mꞌe̱tꞌo. Rꞌabu̱ ri bo̱ni gä benihu̱ te bi thogi ko nꞌa rä jäꞌi ꞌne gä honihu̱ te gä pe̱fihu̱ po geꞌä. Por ejemplo, nꞌa rä yꞌo̱tä tsꞌoki mi zu̱di ꞌnehe ha nꞌa rä zaa, bi ꞌñembäbi rä Hesu: «Bengägi nuꞌmu̱ xki hñudi ha ri Tsꞌu̱tꞌhui» (Luc. 23:​42, 43, TNM). Näꞌä jäꞌiꞌä hingä ho̱nse̱ bi yꞌapäbi rä Hesu dä beni te bi thogi kongeꞌä, sino ke mi apäbi te dä me̱fi po geꞌä. Hänge rä Hesu bi prometebi ge ma dä gu̱tsꞌi de rä du nuꞌmu̱ bi ꞌñembäbi: «Ma gi ꞌmu̱i kongeki ha rä Paraiso». Hänge ora rä Zi Dada Jeoba engägihu̱ ge ya hingä ma dä beni nuꞌu̱ mä pekadohu̱, ri bo̱ni ge hinte ma dä me̱fi kontra gekhu̱. Hää, rä Zi Dada Jeoba nunka ma dä kastiga nꞌa rä jäꞌi po nuꞌu̱ yä pekado ya xä pumbäbi nixi njatꞌä ma dä bembäbi.

16. ¿Te di sentihu̱ ora di handihu̱ hanja rä Zi Dada Jeoba di punꞌgägihu̱ mä pekadohu̱?

¹⁶ Rä Mäkä Tꞌofo usa mä nꞌa rä kꞌoi pa faxkägihu̱ gä ntiendehu̱ hanja di sentihu̱ ora rä Zi Dada Jeoba punꞌgägihu̱ mä pekadohu̱. Koꞌmu̱ gatꞌho xtä mꞌu̱ihu̱ ko rä tsꞌoki, ꞌñenä go dyä esclavohu̱ de rä pekado. Pe ora rä Zi Dada Jeoba desidi dä punꞌgägihu̱ nubye̱ ꞌñenä go kꞌu̱ki nuꞌu̱ yä kadenä habu̱ ndi thätꞌihu̱ ꞌne njabu̱ «xotkägihu̱ de rä pekado» (Rom. 6:​17, 18, TNM; Apoc. 1:​5, TNM). Hää, ora di handihu̱ hanja rä Zi Dada Jeoba di punꞌgägihu̱, jakägihu̱ gä tsahu̱ ndunthi rä johya ꞌñenä näꞌä nꞌa rä esclavo bri xoꞌti ꞌne bri the̱gi.

17. ¿Por hanja ora di punꞌgägihu̱ mä pekadohu̱ rä Zi Dada Jeoba, ꞌñenä go o̱thegihu̱ de nꞌa rä tso ñheni? (Isaías 53:5).

¹⁷ (Hñeti Isaías 53:5). Nubye̱ ma gä handihu̱ nꞌa rä gäxä kꞌoi. Rä Mäkä Tꞌofo di kompara näꞌä rä pekado di pe̱ꞌtsihu̱ ko nꞌa rä ñheni näꞌä otho rä ꞌñethi. Kada di o̱thu̱ nꞌa rä pekado, di tsꞌonihu̱ näꞌä rä ntsitsꞌi di pe̱ꞌtsihu̱ ko rä Zi Dada Jeoba, ꞌne näꞌä ñheniꞌä ꞌñenä go mänꞌa ri ziꞌti. Pe koꞌmu̱ rä Zi Dada Jeoba bä pe̱hni rä Tꞌu̱ pa bi uni rä te po gekhu̱, nubye̱ ꞌñenä go o̱thegihu̱ (1 Ped. 2:24). ¿Dä za gi imäjinä te di senti nꞌa rä jäꞌi ora di tꞌo̱the de nꞌa rä tsꞌo ñheni? ¡Zäi ge xa di johya! Njabu̱ ꞌnehe, hängu rä johya di sentihu̱ ora di handihu̱ hanja rä Zi Dada Jeoba di punꞌgägihu̱ mä pekadohu̱; ꞌñenä go o̱the näꞌä rä ntsitsꞌi habu̱ xti tsꞌonihu̱. Hää, nugägihu̱ ngu yä amigo ꞌñenä go hinte bi thogi.

¿HANJA DI BENEFISIAGIHU̱ NÄꞌÄ RÄ MPUMBÄTE RꞌAKÄGIHU̱ RÄ ZI DADA JEOBA?

18. ¿Te utkägihu̱ nuꞌu̱ yä kꞌoi dä handihu̱ de näꞌä rä mpumbäte rꞌakägihu̱ rä Zi Dada Jeoba? (Hyandi ꞌnehe rä recuadro «¿Te pe̱fi rä Zi Dada Jeoba nuꞌmu̱ di punꞌgägihu̱?»).

¹⁸ Gatꞌho nuya yä kꞌoi dä handihu̱, ¿te utkägihu̱ de näꞌä rä mpumbäte rꞌakägihu̱ rä Zi Dada Jeoba? Ge ora di punꞌgägihu̱, japäbi dä mꞌe̱di pa nzäntho nuꞌu̱ mä pekadohu̱. Ora di punꞌgägihu̱, ya hingä njatꞌä ma dä benꞌgägihu̱ näꞌä dä o̱tꞌehu̱ ꞌne sigi nugägihu̱ ngu yä amigo. Pe mähyoni gä benihu̱ ge näꞌä rä mpumbäte rꞌakägihu̱ rä Zi Dada Jeoba, hindi meresegihu̱, sino ke rꞌakägihu̱ rä mpumbäte ngu nꞌa rä regalo ngeꞌä xa di mäkägihu̱ ꞌne di huegägihu̱ (Rom. 3:​24, TNM).

19. a) ¿De te xa di jamädibihu̱ rä Zi Dada Jeoba? (Romanos 4:8). b) ¿Te ma gä pädihu̱ ha näꞌä rä ntꞌudi xä ꞌñepu̱?

¹⁹ (Hñeti Romanos 4:​8, TNM). Hängu rä jamädi di umbäbihu̱ rä Zi Dada Jeoba ngeꞌä ja ngu enä ha Salmo 130:​4, ho̱nse̱ꞌä «uni näꞌä xa mäjuäni rä mpumbäte». Pe mähyoni gä benihu̱ ge mu̱ di nehu̱ ge rä Zi Dada Jeoba dä punꞌgägihu̱ gatꞌho mä tsꞌokihu̱, xa mähyoni gä jamäsuhu̱ näꞌä bi mää rä Hesu nuꞌmu̱ bi ꞌñenä: «Mu̱ hingi pumbähu̱ nuꞌu̱ toꞌo o̱tꞌähu̱ rä ntsꞌomꞌu̱i, nuꞌmu̱ nixi Äjuä rä Dada hindä punꞌäꞌihu̱ ri tsꞌokihu̱ ꞌnehe» (Mat. 6:​14, 15). Hää, xa mähyoni gä de̱mbäbihu̱ rä ꞌmu̱i rä Zi Dada Jeoba ꞌne gä unihu̱ ꞌnehe rä mpumbäte. Ha näꞌä rä ntꞌudi xä ꞌñepu̱, ma gä pädihu̱ hanja dä za gä jahu̱.