¿Por hanja xa di jamädibihu̱ rä Zi Dada Jeoba po rä mpumbäte?

1, 2. ¿Por hanja yä mexiꞌmhai di thohu̱ mähye̱gi ja ngu näꞌä rä tsꞌu̱ntꞌu̱ dä no̱nihu̱ ha rä parrafo 1?

IMÄJINÄ ge nꞌa rä tsꞌu̱ntꞌu̱ pe̱ꞌtsi yä dada nuꞌu̱ xa yä riko, pe nse̱kitho yä dada bi du ha nꞌa rä aksidente. ¿Dä za gi imäjinä hängu rä dumu̱i bi senti? Pe hingä ho̱nse̱ꞌä, nubye̱ ja penä bi bädi ge nuꞌu̱ yä dada xki dege gatꞌho näꞌä rä bojä mi pe̱ꞌtsi ꞌne xki mihi ndunthi yä bojä. Hänge näꞌä rä tꞌu̱ bi hñäni de gä erensia ho̱nse̱ nuꞌu̱ yä thai bi tsꞌokuäbi. Hää, xi ndunthi nuꞌu̱ yä thai bi zokuäbi yä dada ꞌne tꞌapäbi näꞌä rä tsꞌu̱ntꞌu̱ ge mäntꞌä dä gutꞌi nuꞌu̱ yä bojäꞌu̱. Pe näꞌä tsꞌu̱ntꞌu̱ hingi tsu̱päbi ꞌne handi ge nunka ma dä za dä gutꞌi nuꞌu̱ yä thaiꞌu̱.

² Rä thogi näꞌä tsꞌu̱ntꞌu̱ ya dä mäñhu̱, njabu̱ ꞌnehe di thogihu̱ mäpaya. Nuꞌu̱ mä mu̱di dadahu̱ —Adán ꞌne Eva— myä perfecto ꞌne mi ꞌmu̱i ha nꞌa rä paraiso xi xmä nsundatho (Gén. 1:27; 2:​7-9). Nuyu̱ xä zahmä xä mꞌu̱i pa nzäntho ko ndunthi rä johya, pe himbi thogi njabu̱. ¿Por hanja? Adán ꞌne Eva bi zo ha rä pekado, hänge rä Zi Dada Jeoba bi yꞌe̱ni de rä paraiso ꞌne bi hñämbäbi näꞌä rä oportunida de dä mꞌu̱i pa nzäntho. ¿Te mä erensia bi zokuäbi gatꞌho nuꞌu̱ yä bätsi ma xä mꞌu̱i? Rä Mäkä Tꞌofo enä: «Ho̱nse̱ ko nꞌadä rä ñꞌo̱ho̱ [Adán], rä tsꞌoki bi yu̱tꞌi ha rä xiꞌmhai. Njabu̱ ko näꞌä rä tsꞌokiꞌä bi nja rä du. ꞋNe koꞌmu̱ gatꞌho yä jäꞌi bi mꞌu̱i ko rä tsꞌoki, hänge nubye̱ gatꞌho bi zu̱di rä du» (Rom. 5:​12, TNM). Hää, Adán bi zogägihu̱ de gä erensia rä pekado ꞌne näꞌä pekadoꞌä geꞌä tsixkägihu̱ ha rä du. ¡Xi nꞌa rä däta thai näꞌä rä pekado bi zogägihu̱ ꞌne ninꞌa rä jäꞌi hingi tsa dä gutꞌi näꞌä thaiꞌä! (Sal. 49:8).

3. ¿Por hanja ꞌñenä go yä thai nuꞌu̱ mä tsꞌokihu̱?

³ Rä Hesu bi kompara yä pekado ko yä thai (Mat. 6:12; Luc. 11:4). Hänge ora di o̱thu̱ yä tsꞌoki ꞌñenä go di tuxu̱ yä thai ko rä Zi Dada Jeoba ꞌne pe̱ꞌtsi te gä jutꞌihu̱. Mu̱ rä Zi Dada Jeoba hinte xä yꞌo̱tꞌe pa xä punꞌgägihu̱ mä tsꞌokihu̱, nuꞌmu̱ pe̱ꞌtsi te xtä jutꞌihu̱ ko rä du ꞌne ya hinte mä humu̱i grä pe̱ꞌtsihu̱ (Rom. 6:​7, 23).

4. a) ¿Te ma gä thohu̱ mu̱ hinto dä maxkägihu̱? (Salmo 49:​7-9). b) ¿Te ri bo̱ni rä noya pekado ha rä Mäkä Tꞌofo? (Hyandi rä recuadro habu̱ enä «Pekado»).

⁴ Po nuju̱se̱ hingi tsa gä rekuperahu̱ näꞌä bi ꞌme̱di Adán ꞌne Eva (hñeti Salmo 49:​7-9). Mu̱ hinto dä maxkägihu̱, hindä za gä mꞌu̱ihu̱ pa nzäntho nixi gä pe̱ꞌtsihu̱ rä humu̱i de gä nuhuhu̱ de rä du. Hää, nsi rä mfatsꞌi ma gä huadihu̱ ngu huadi yä zi mboꞌni (Ecl. 3:19; 2 Ped. 2:12).

5. ¿Te xä yꞌo̱tꞌe rä Zi Dada Jeoba pa dä maxkägihu̱ gä jutꞌihu̱ näꞌä rä däta thai bi zogägihu̱ Adán? (Hyandi ꞌnehe rä kꞌoi ).

⁵ Ma gä benihu̱ mänꞌaki näꞌä rä tsꞌu̱ntꞌu̱ dä no̱nihu̱ ha parrafo 1. ¿Te ma dä senti mu̱ nꞌa rä ñꞌo̱ho̱ näꞌä xä jabi ndunthi rä bojä go dä ne dä gutꞌi nuꞌu̱ yä thai bi zokuäbi yä dada? Zäi ge näꞌä tsꞌu̱ntꞌu̱ ko ndunthi rä johya ma dä hñäni näꞌä mfatsꞌiꞌä ꞌne xa ma dä jamädibi näꞌä ñꞌo̱ho̱. Njabu̱ ꞌnehe rä Zi Dada Jeoba; xa di mäkägihu̱ ꞌne xä uni nꞌa rä däta regalo näꞌä dä za dä gutꞌi näꞌä rä däta thai bi zogägihu̱ Adán. Rä Hesu bi mää te mä regaloꞌä ora bi ꞌñenä: «Äjuä xi bi mädi ntsꞌe̱di gatꞌho yä jäꞌi de rä xiꞌmhai, hänge bä pe̱hnä rä rꞌa Tꞌu̱, pa nu to gatꞌho dä gamfriꞌä hindä mꞌe̱di, nuꞌu̱ ma dä me̱ꞌtsä rä te pa nzäntho» (Juan 3:16). Nunä regalo ꞌnehe faxkägihu̱ pa gä pe̱ꞌtsihu̱ nꞌa rä hogä ntsitsꞌi ko rä Zi Dada Jeoba.

6. ¿Te mä noya ma gä handihu̱ te ri bo̱ni ꞌne por hanja?

⁶ ¿Hanja dä za gä benefisiahu̱ de näꞌä rä däta regalo bi rꞌakägihu̱ rä Zi Dada Jeoba? Pa gä tinihu̱ rä mpengi nunä ntꞌani, ma gä handihu̱ te ri bo̱ni nuꞌu̱ yä noya ehe ha rä Mäkä Tꞌofo ora enä ge rä Zi Dada Jeoba bä pe̱hni rä Tꞌu̱ pa dä za gä ntsitsꞌihu̱ mänꞌaki kongeꞌä, ge bi uni nꞌa rä mpo̱te nuꞌmu̱ bi ofrese rä Tꞌu̱ ngu nꞌa rä ofrenda, ge bi uni nꞌa rä rescate, ge dä za gä xotꞌihu̱ de rä pekado ꞌne ge Äjuä dä za dä puꞌti gatꞌho mä thaihu̱ ꞌne dä nugägihu̱ ngu dyä hojäꞌihu̱. Gä hudihu̱ ꞌne gä ntso̱ꞌmihu̱ te ri bo̱ni nuya yä noya, geꞌä ma dä maxkägihu̱ pa mänꞌa gä jamädibihu̱ rä Zi Dada Jeoba po gatꞌho näꞌä xä me̱fi pa dä punꞌgägihu̱ mä pekadohu̱.

TE HONI JEOBA: GÄ NTSITSꞌIHU̱ MÄNꞌAKI KONGEꞌÄ

7. a) ¿Te bi mꞌe̱di Adán ꞌne Eva? b) Koꞌmu̱ yä bätsigihu̱ Adán ꞌne Eva, ¿te xa mi jakägihu̱ mꞌe̱di ꞌne por hanja? (Romanos 5:​10, 11).

⁷ Adán ꞌne Eva bi ꞌme̱di näꞌä rä oportunida de dä mꞌu̱i pa nzäntho ꞌne näꞌä rä hogä ntsitsꞌi mi pe̱ꞌtsi ko rä Zi Dada Jeoba. Hää, nubye̱ Adán ꞌne Eva bi nkontraui Jeoba (Luc. 3:38). Nuꞌmu̱ Adán ꞌne Eva bi desidi bi zo ha rä pekado, rä Zi Dada Jeoba bi yꞌe̱ni de rä familia. Nuꞌmu̱ bi thogi njabu̱, Adán ꞌne Eva tobe himi ꞌmu̱i yä bätsi (Gén. 3:​23, 24; 4:1). Koꞌmu̱ nuꞌu̱ yä bätsi himbi mꞌu̱i mbo ha rä familia rä Zi Dada Jeoba, gatꞌho ndi nkontrahu̱ Kongeꞌä. Hänge mi ja mꞌe̱di gä rekuperahu̱ näꞌä rä hogä ntsitsꞌi bi ꞌme̱di Adán ꞌne Eva (hñeti Romanos 5:​10, 11).a Hää, koꞌmu̱ ndi nkontrahu̱ ko rä Zi Dada Jeoba, mi jakägihu̱ mꞌe̱di gä o̱tꞌehu̱ mä amigohu̱. ¿Pe gi pädi toꞌo bi joni mꞌe̱tꞌo pa dä mu̱ti nꞌa rä hogä ntsitsꞌi? ¡Rä Zi Dada Jeoba! Ma gä handihu̱ te bi yꞌo̱tꞌe.

TE BI ME̱FI JEOBA: BI PO̱TE NÄꞌÄ BI ꞌME̱DI ADÁN

8. ¿Te mi ja mꞌe̱di pa xä nja mänꞌaki nꞌa rä hogä ntsitsꞌi entre rä Zi Dada Jeoba ꞌne yä jäꞌi?

⁸ Rä Zi Dada Jeoba bi po̱te näꞌä bi ꞌme̱di Adán. ¿Pa te? Pa njabu̱ gatꞌho yä jäꞌi dä za dä me̱ꞌtsi mänꞌaki nꞌa rä hogä ntsitsꞌi Kongeꞌä. Rä noya po̱te ne dä mää ora dri paati nꞌa rä kosa po mänꞌaa —pe näꞌä dri pe̱ꞌtsi mähye̱gi rä muui—, pa njabu̱ drä rekupera näꞌä xä mꞌe̱di. ¡Geꞌä bi me̱fi rä Zi Dada Jeoba! Rä Mäkä Tꞌofo enä ge «Äjuä bi uni nꞌa rä mpo̱te nuꞌmu̱ bi ofrese rä Tꞌu̱ ngu nꞌa rä ofrenda» (Rom. 3:​25, TNM). Ko näꞌä bi me̱fi rä Zi Dada Jeoba, nubye̱ kada nꞌa de gekhu̱ dä za gä pe̱ꞌtsihu̱ mänꞌaki nꞌa rä hogä ntsitsꞌi Kongeꞌä.

9. ¿Te bi mändabi rä Zi Dada Jeoba dä me̱fi yä israelita pa drä pumbäbi yä tsꞌoki?

⁹ Mäyaꞌmu̱ rä Zi Dada Jeoba bi xipäbi rä hnini te mi debe dä me̱fi pa drä pumbäbi yä pekado ꞌne njabu̱ dä me̱ꞌtsi nꞌa rä hogä ntsitsꞌi kongeꞌä. Tatꞌä je̱ya ha rä hnini Israel mi ja nꞌa rä Pa de gä Nsu̱kä pekado. Ha nunä pa, rä ndä gä majhä mi uni nꞌa rä mboꞌni de gä ofrenda po yä pekado rä hnini. Mähyoni gä benihu̱ ge nꞌa rä mboꞌni hingä mähye̱gi rä muui ko nꞌa rä jäꞌi. Po geꞌä, nuꞌu̱ yä ofrendaꞌu̱ himi tsa dä xu̱kuäbi xä ñho yä pekado yä israelita. Pe rä Zi Dada Jeoba mi ja rä paha dä pumbäbi yä tsꞌoki yä israelita, ora mi handi ge nuyu̱ xa mäjuäni mi mpe̱tsꞌi de nuꞌu̱ yä tsꞌoki, ꞌne mi uni nuꞌu̱ yä ofrenda ja ngu mi apäbi (Heb. 10:​1-4). ꞌNehe nuꞌu̱ yä ofrenda, mi bembäbi yä israelita ge nuyu̱ xki mꞌu̱i ko rä tsꞌoki ꞌne ge mi japäbi mꞌe̱di nꞌa rä ofrenda näꞌä xä za xä puꞌtuäbi ꞌne xä goꞌmpäbi gatꞌho yä pekado.

10. ¿Te bi me̱fi rä Zi Dada Jeoba pa njabu̱ dä za drä pumbäbi yä pekado gatꞌho yä mexiꞌmhai?

¹⁰ ¿Te bi me̱fi rä Zi Dada Jeoba pa njabu̱ dä za drä pumbäbi yä pekado gatꞌho yä mexiꞌmhai? Bä pe̱hni rä hmäkä Tꞌu̱ pa bi uni rä te. Rä Mäkä Tꞌofo enä: «Rä Kristo bi tꞌuni de gä ofrenda nꞌa mꞌikitho pa bi ndudebi yä tsꞌoki ndunthi yä jäꞌi» (Heb. 9:​28, TNM). Hää, rä Hesu bi «uni rä te ngu nꞌa rä rescate po ndunthi yä jäꞌi» (Mat. 20:​28, TNM). ¿Pe te me̱ꞌä nꞌa rä rescate?

KONTE BI GUTꞌI JEOBA: BI UNI NꞌA RÄ RESCATE

11. a) ¿Te ri bo̱ni nꞌa rä rescate? b) ¿Toꞌo mi tsa dä gutꞌi näꞌä rä rescate?

¹¹ Ha rä Mäkä Tꞌofo rä noya rescate geꞌä tꞌembäbi näꞌä rä njutꞌi di tꞌuni pa te drä po̱te ꞌne pa drä rekupera nꞌa rä hogä ntsitsꞌi.b Rä Mäkä Tꞌofo udi ge rä Zi Dada Jeoba go geꞌä bi desidi ge mi debe drä jutꞌi nꞌa rä rescate, pa njabu̱ dä za dä punꞌgägihu̱ mä tsꞌokihu̱ ꞌne dä za gä pe̱ꞌtsihu̱ nꞌa rä hogä ntsitsꞌi kongeꞌä. ¿Hängu mi ja mꞌe̱di drä jutꞌi? Ma gä benihu̱ ge Adán ꞌne Eva myä perfecto ꞌne mi pe̱ꞌtsi rä oportunida de dä mꞌu̱i pa nzäntho. Hänge mi ja mꞌe̱di drä jutꞌi nꞌa rä rescate näꞌä mähye̱gi drä muui ko näꞌä bi ꞌme̱di Adán (1 Tim. 2:6). Näꞌä rescate ho̱nse̱ ma xä za xä gutꞌi nꞌa rä ñꞌo̱ho̱ näꞌä dri kumpli nuya hñuu yä rekisito: 1) Drä perfecto, 2) dri pe̱ꞌtsi rä oportunida de dä mꞌu̱i pa nzäntho ha rä Xiꞌmhai, ꞌne 3) ko rä pahase̱ xä ne xä uni rä bida po gekhu̱. Ho̱nse̱ nꞌa rä ñꞌo̱ho̱ näꞌä di kumpli nuya hñuu yä rekisito geꞌä ma xä za xä gutꞌi näꞌä bi ꞌme̱di Adán.

12. ¿Por hanja rä Hesu bi za bi po̱te näꞌä rä te bi ꞌme̱di Adán?

¹² Rä Hesu go geꞌä bi za bi gutꞌi näꞌä rä rescate po nuya hñuu yä raso: 1) Näꞌä mrä perfecto ꞌne nunka bi yꞌo̱tꞌe nꞌa rä tsꞌoki (1 Ped. 2:22). 2) Mu̱ xä ne rä Hesu, näꞌä xä za xä mꞌu̱i pa nzäntho ha rä Xiꞌmhai, ꞌne 3) ko rä pahase̱, rä Hesu bi ne bi uni rä te pa bi du po gekhu̱ (Heb. 10:​9, 10). Rä Hesu näꞌä mrä perfecto ja ngu mi nja Adán nuꞌmu̱ tobe hixki zo ha rä pekado (1 Cor. 15:​45, TNM). Hänge ko näꞌä rä bida bi uni rä Hesu bi za bi po̱te näꞌä rä te bi ꞌme̱di Adán (Rom. 5:19). Rä Mäkä Tꞌofo embäbi rä Hesu «rä gäxä Adán» ꞌne näꞌä bi uni rä te «nꞌakitho [ . . . ] pa bi xu̱kä yä tsꞌoki pa nzäntho». Po geꞌä ya hingi ja mꞌe̱di dä ꞌñehe mä nꞌa rä ñꞌo̱ho̱ näꞌä drä perfecto pa dä gutꞌi ko rä te näꞌä bi ꞌme̱di Adán (Heb. 7:27; 10:12).

13. ¿Te me̱ꞌä nꞌa rä mpo̱te ꞌne te me̱ꞌä nꞌa rä rescate?

¹³ Nuꞌmu̱, ¿te ri bo̱ni nꞌa rä mpo̱te ꞌne nꞌa rä rescate? Nꞌa rä mpo̱te geꞌä gatꞌho näꞌä pe̱fi rä Zi Dada Jeoba pa njabu̱ yä jäꞌi dä za dä me̱ꞌtsi mänꞌaki nꞌa rä hogä ntsitsꞌi kongeꞌä. Rä rescate geꞌä nꞌa rä njutꞌi bi tꞌuni rä Zi Dada Jeoba pa dä za drä pumbäbi yä pekado yä mexiꞌmhai. ¿Hängu bi gutꞌi rä Zi Dada Jeoba? ¡Bä pe̱hni rä Tꞌu̱ pa bi näꞌmi rä ji po gekhu̱! (Efes. 1:7; Heb. 9:14).

YÄ BENEFISIO: DI XOTꞌIHU̱ DE RÄ PEKADO, DRI PUꞌTI MÄ THAIHU̱ ꞌNE NJABU̱ JEOBA NUGÄGIHU̱ NGU DYÄ HOJÄꞌIHU̱

14. ¿Te ma gä hanthu̱ ꞌne hanja ma dä maxkägihu̱?

¹⁴ Rä Mäkä Tꞌofo usa ndunthi yä noya pa dä mää te mä benefisio o te mä jäpi di hänihu̱ ko näꞌä rä mpo̱te bi uni rä Zi Dada Jeoba. Mäske nuya yä noya ꞌñenä mähye̱gi, pe kada nꞌa de gehya udi te mä tꞌo̱tꞌe bi me̱fi rä Zi Dada Jeoba pa njabu̱ dä za gä hänihu̱ rä mpumbäte. Ma gä handihu̱ kada nꞌa de nuya yä noya, pa njabu̱ mänꞌa gä jamädibihu̱ rä Zi Dada Jeoba gatꞌho näꞌä bi me̱fi po gekhu̱.

15, 16. a) ¿Te ri bo̱ni rä noya xotꞌi? b) ¿Te di sentihu̱ ora di pädihu̱ ge dä za gä kꞌotꞌihu̱ de rä pekado ꞌne de rä du?

¹⁵ Rä Mäkä Tꞌofo udi ge ko näꞌä rä njutꞌi bi uni rä Zi Dada Jeoba dä za gä xotꞌihu̱. ¿Te ri bo̱ni rä noya xotꞌi? Nunä noya ri bo̱ni «tꞌumbäbi rä mpumbäte» o «dri fatsꞌi pa dä kꞌotꞌi». Rä apostol Pedro bi ꞌñenä: «Nuꞌähu̱ gi pädihu̱ ge hingä ko nuꞌu̱ yä tꞌo̱tꞌe di tsꞌoki o di deni —ngu rä oro ꞌne rä plata— konte bri jutꞌi pa gi kꞌotꞌihu̱ [o «pa bri xotꞌähu̱» o «the̱kꞌähu̱»] de näꞌä rä mꞌu̱i hinte di muui bi zokꞌähu̱ ri dadahu̱ ꞌne ri xitahu̱. Sino ke bri jutꞌi ko näꞌä rä ji xa di muui, ja ngu rä ji nꞌa rä zi tꞌu̱kä de̱ti näꞌä hinte mä tsꞌoki di ñꞌoui. Hää, bri jutꞌi ko rä ji rä Kristo» (1 Ped. 1:​18, 19, TNM).

¹⁶ Ko näꞌä rä njutꞌi bi uni rä Zi Dada Jeoba, dä za gä xotꞌihu̱ de rä pekado ꞌne de rä du di dominägihu̱ mäpaya ꞌne xa di jakägihu̱ gä sufrihu̱ (Rom. 5:21). ¡Hängu di jamädibihu̱ rä Zi Dada Jeoba ngeꞌä bä pe̱hni rä Tꞌu̱ ngu nꞌa rä njutꞌi! ꞌNehe xa di jamädibihu̱ rä Hesu ngeꞌä bi mꞌu̱i dispuesto bi uni rä te pa gä xotꞌihu̱ de rä pekado ꞌne de rä du (1 Cor. 15:22).

17, 18. a) ¿Te ri bo̱ni ora enä ge rä Zi Dada Jeoba puꞌti gatꞌho mä thaihu̱? b) ¿Te mä benefisio di hänihu̱?

¹⁷ Jeoba puꞌti gatꞌho mä thaihu̱ ꞌne nugägihu̱ ngu dyä hojäꞌihu̱. Ko näꞌä rä njutꞌi bi uni rä Zi Dada Jeoba ꞌne rä Hesu, nubye̱ bi thäki gatꞌho nuꞌu̱ yä kargo mi ja kontra gekhu̱. Mäske rä Zi Dada Jeoba näꞌä nꞌa rä Zi Dada näꞌä o̱tꞌe rä justisia ꞌne xa di u̱tsa rä pekado, himbi rꞌakägihu̱ näꞌä ndi meresehu̱ ꞌne bi desidi bi puꞌti gatꞌho mä thaihu̱. Nunä benefisio hingä go di tähäse̱hu̱; pe ora handi rä Zi Dada Jeoba ge di huxu̱ mä jamfrihu̱ ꞌne mä komfiansahu̱ ha gatꞌho näꞌä bi me̱fi pa bi po̱te näꞌä bi ꞌme̱di Adán, ꞌne ora handi ge di balorahu̱ näꞌä rä njutꞌi bi uni, geꞌä nupäbi rä mfeni pa desidi dä puꞌti gatꞌho mä thaihu̱ (Rom. 3:24; Gál. 2:16).

¹⁸ ¿Te mä benefisio di hänihu̱ ora rä Zi Dada Jeoba puꞌti gatꞌho mä thaihu̱ ꞌne nugägihu̱ ngu dyä hojäꞌihu̱? Rꞌaa xä hñäni nꞌa rä regalo de dä thahni pa dä ma ha mähetsꞌi pa dä mända ko rä Kristo, ꞌne nubye̱ rä Zi Dada Jeoba xä yꞌo̱tꞌe yä bätsi nuyu̱ yä kristianu (Tito 3:7; 1 Juan 3:1). Koꞌmu̱ rä Zi Dada Jeoba bi puꞌtuäbi gatꞌho yä thai nuya yä kristianu ꞌñenä go nunka te bi yꞌo̱tꞌe. Po geꞌä bi thahni pa dä ma ha mähetsꞌi ꞌne dä mända ko rä Kristo (Rom. 8:​1, 2, 30). Märꞌa yä kristianu pe̱ꞌtsi nꞌa rä humu̱i de dä mꞌu̱i pa nzäntho nuua ha rä Xiꞌmhai ꞌne pe̱ꞌtsi nꞌa rä hogä ntsitsꞌi ko rä Zi Dada Jeoba. Nuyu̱ yä kristianu ꞌnehe xrä pumbäbi gatꞌho yä thai (Sant. 2:​21-23). Nuꞌu̱ toꞌo dä tokabi dä hyandi xti zo̱ho̱ rä Armagedón, pe̱ꞌtsi rä oportunida de nunka dä bädi tenguꞌä rä du (Juan 11:26). ꞌNehe rä Mäkä Tꞌofo udi ge tanto nuꞌu̱ «yä hojäꞌi» ngu nuꞌu̱ «yä tsꞌomꞌu̱i» xä du, ma dä me̱ꞌtsä rä oportunida de dä nuhu de rä du pa dä mꞌu̱i mänꞌaki ha rä Xiꞌmhai (Hech. 24:​15, TNM; Juan 5:​28, 29, TNM). Pe hingä ho̱nse̱ꞌä, gatꞌho nuꞌu̱ ma dä mꞌu̱i ha rä Xiꞌmhai xti mparaiso, ko rä tiempo «ma drä xoꞌti de rä tsꞌoki pa ya hindä mꞌu̱i de gä esclavo de rä pekado ni de rä du. Njabu̱, yä mexiꞌmhai ma dä mꞌu̱i libre, ꞌne Äjuä nubye̱ ma dä yꞌo̱tꞌe yä bätsi» (Rom. 8:​21, TNM). Ja ngu di handihu̱, ko näꞌä rä mpo̱te ꞌne rä njutꞌi bi uni rä Zi Dada Jeoba, geꞌä xoki rä ꞌñuu pa njabu̱ rä Zi Dada Jeoba dä yꞌo̱tꞌägihu̱ yä bätsi, ha nuju̱ gä o̱tꞌehu̱ mä Dadahu̱. ¿Hänge xi nꞌa rä däta jäpi näꞌä di to̱ꞌmhu̱?

19. ¿Hanja di ꞌmu̱hu̱bye̱ ko näꞌä bi me̱fi po gekhu̱ rä Zi Dada Jeoba ꞌne rä Hesu? (Hyandi ꞌnehe rä recuadro «Rä mpumbäte rä Zi Dada Jeoba»).

¹⁹ Ha rä mu̱di parrafo de nunä ntꞌudi di nxadihu̱, dä no̱nihu̱ de nꞌa rä bäsjäꞌi näꞌä bi tsꞌokuäbi de gä erensia ndunthi yä thai. Njabu̱ ꞌnehe ndi ꞌmu̱ihu̱ mä mꞌe̱tꞌo ko näꞌä rä pekado bi zogägihu̱ Adán ꞌne mi joꞌo toꞌo dä maxkägihu̱. Pe rä Zi Dada Jeoba bi hyoni rä modo hanja bi po̱te näꞌä bi ꞌme̱di Adán ꞌne bi uni nꞌa rä njutꞌi po gekhu̱. Hää, bi uni rä Tꞌu̱ pa bi du po gekhu̱. Nubye̱ hää mu̱ gä pe̱ꞌtsuäbihu̱ rä jamfri Ñhesukristo, geꞌä xotꞌkägihu̱ de rä pekado ꞌne de rä du. ꞌNehe, nuyu̱ mä pekadohu̱ dä za drä puꞌti pa nzäntho ꞌne rä Zi Dada Jeoba ma dä yꞌo̱tꞌe ngue̱nda ge nunka te dä o̱tehu̱. Pe ndaꞌä ma nꞌa rä däta jäpi dä za gä pe̱ꞌtsihu̱, eske rä Zi Dada Jeoba ma dä yꞌo̱tꞌägihu̱ yä bätsi ꞌne nuju̱ ma gä o̱tꞌehu̱ mä Dadahu̱ ꞌne ya hinto ma dä tsꞌoni näꞌä rä hogä ntsitsꞌi di pe̱ꞌtsihu̱ kongeꞌä.

20. ¿Te ma gä handihu̱ ha näꞌä rä ntꞌudi xä ꞌñepu̱?

²⁰ Ora di hudihu̱ ꞌne di ntso̱ꞌmihu̱ pa gä handihu̱ gatꞌho näꞌä xä me̱fi rä Zi Dada Jeoba ꞌne rä Hesu po gekhu̱, mänꞌa di te näꞌä rä mhäte di sentihu̱ po geꞌu̱ ꞌne xa di jamädibihu̱ (2 Cor. 5:15). Mu̱ nuꞌu̱ hinte xä yꞌo̱tꞌe po gekhu̱, nubye̱ hinte mä humu̱i grä pe̱ꞌtsihu̱. Ha näꞌä rä ntꞌudi xä ꞌñepu̱ ma gä handihu̱ rꞌa yä kꞌoi ꞌne rꞌa yä noya, nuꞌu̱ ma dä maxkägihu̱ gä ntiendehu̱ xä ñho, te ri bo̱ni näꞌä rä mpumbäte rꞌakägihu̱ rä Zi Dada Jeoba kada nꞌa de gekhu̱.