Rä Xiꞌmhai ꞌmu̱i en peligro | ¿Te udi rä Biblia?

«Po gatꞌho näꞌä pe̱fi yä jäꞌi nguntꞌä ma dä huati nunä rä Xiꞌmhai habu̱ di ꞌmu̱ihu̱. Po rängeꞌä, mäpaya ja yä luga habu̱ bi ꞌuäi ntsꞌe̱di ꞌne ku̱tꞌi rä dehe ha yä ngu yä jäꞌi, mientra ha märꞌa yä luga otho rä dehe, o xa ja yä bu̱nthi yꞌee ꞌne xi xä pa rä Hyadi. Pe hingä ho̱nse̱ꞌä, ya xä du o yꞌo ri mꞌe̱di nꞌa miyon yä planta ꞌne yä zuꞌue» (Geꞌä bi mängä António Guterres, näꞌä rä secretario general de las Naciones Unidas, mꞌe̱fa de näꞌä rä imforme bi uni rä Grupo Intergubernamental de Expertos sobre el Cambio Climático, rä pa 4 de rä abril de rä 2022).

«Nuꞌu̱ yä bämhñä jäꞌi de gatꞌho rä xiꞌmhai enä ge ha nuꞌu̱ yä je̱ya xä ꞌñepu̱, ꞌmu̱i en peligro de dä mꞌe̱di nuꞌu̱ 423 yä mboza ꞌne yä luga xa mähotho bi ja ha Estados Unidos po ränge rä pahyadi. Ha nuya yä luga njatꞌä ja yä nzo̱o̱ po rä pahyadi, ja yä dängä däyꞌe, yꞌo ri deni nuꞌu̱ yä hielo bi jani, ꞌne po rängeꞌä yꞌo ri ntꞌagi mbo rä dehe nuꞌu̱ yä luga xa mähotho» («Flooding Chaos in Yellowstone, a Sign of Crises to Come» [Caóticas inundaciones en Yellowstone, un aviso de las crisis que vendrán], The New York Times, 15 de rä junio de rä 2022).

¿Ma dä zo̱ho̱ rä pa habu̱ dä nja rä hogä tiempo? Mu̱ hää, ¿hämꞌu̱? Hyandi te udi rä Biblia.

Rä Biblia ya xki mää ge yä jäꞌi ma xä tsꞌoni rä Xiꞌmhai

Rä Biblia enä ge Äjuä ma dä «huatä nuꞌu̱ to xä tsꞌokä rä xiꞌmhai» (Apocalipsis 11:18). Nunä rä testo udi hñuu yä tꞌo̱tꞌe:

1. 1. Yä jäꞌi ma xä tsꞌoni rä Xiꞌmhai.

2. 2. Ma dä uadi nuꞌu̱ yä dañu xä tꞌo̱tꞌpäbi rä Xiꞌmhai.

3. 3. Äjuä ma dä hyoki de nunä rä Xiꞌmhai nꞌa rä luga xa mähotho.

¡Hinto ma dä za dä huati rä Xiꞌmhai!

Rä Biblia enä: «Rä xiꞌmhai ma dä dura pa nzäntho» (Eclesiastés 1:4). Hää, Äjuä bi hyoki rä Xiꞌmhai pa ja dä mꞌu̱kua yä jäꞌi.

• «Nuꞌu̱ yä jäꞌi o̱tꞌe rä justisia ma dä mꞌu̱i ha rä xiꞌmhai, ꞌne ja ma dä mꞌu̱hni pa nzäntho» (Salmo 37:29).

Äjuä ma dä hyoki mänꞌaki de rä Xiꞌmhai nꞌa rä luga xa mähotho pa gä mꞌu̱ihu̱.

• «Yä yꞌotꞌä hai xa ma dä ndo̱ni ko rä johya, ꞌne yä däta yꞌotꞌä ꞌmatha xa ma dä johya ꞌne ma dä ndo̱ni ngu rä azafrán» (Isaías 35:1).