¿Dä za yä jäꞌi dä mfatsꞌi nꞌa ngu mänꞌaa pa dä salba rä Xiꞌmhai? | ¿Te udi rä Biblia?

Rä pa ndomingo 20 de rä nobiembre de rä 2022, bi uadi näꞌä rä mhuntsꞌi bi yꞌo̱tꞌe Las Naciones Unida habu̱ bi trata rä tema de rä Cambio Climático (COP27). Nuꞌu̱ yä jäꞌi bi ntini ha nunä rä mhuntsꞌi, bi mämbi nꞌa ngu mänꞌaa hängu rä bojä dä za drä usa pa dä tꞌumbäbi rä mfatsꞌi nuꞌu̱ yä zi jäꞌi ora dä zo̱päbi nꞌa rä tsꞌo thogi po ränge rä cambio climático, ngu rä pahyadi o yä däyꞌe. Mäske nunä rä kohi ma dä benefisiabi ndunthi yä jäꞌi, hinte ma dä sirbe pa dä ebita dä nja yä tsꞌo thogi.

•  «Nuga di ꞌmu̱i de acuerdo dä nja nꞌa rä fondo pa dä tꞌumbäbi rä mfatsꞌi yä zi jäꞌi ora dä nja nꞌa rä tsꞌo thogi po ränge rä cambio climático [...]. Pe di pädi ge hingä kombastaꞌä [...]. Rä Xiꞌmhai mänꞌitꞌho ma dä uadi mu̱ hinte gä pe̱fihu̱» (geꞌä bi mängä António Guterres, näꞌä rä secretario general de las Naciones Unidas; 19 de rä nobiembre de rä 2022).

•  «Nunä rä Xiꞌmhai ya xi xä tsꞌoki, mu̱ dä sigi njabu̱ mänꞌitꞌho ma dä uadi» (Mary Robinson, rä ex presidenta de Irlanda ꞌne rä ex alta comisionada de rä ONU para los Derechos Humanos; 20 de rä nobiembre de rä 2022).

Ndunthi yä bäsjäꞌi turämu̱i ꞌne hingi pädi te ma dä thogi xudi ndämäni ko rä Xiꞌmhai. ¿Dä za yä jäꞌi dä mfatsꞌi nꞌa ngu mänꞌaa pa dä salba rä Xiꞌmhai? ¿Te udi rä Biblia?

¿Dä za yä jäꞌi dä salba rä Xiꞌmhai?

Hinä. Mäpaya ndunthi yä jäꞌi xa di mpe̱fi ndunthi ꞌne xä gasta ndunthi yä bojä pa ya hindä sigi dä ntsꞌoni rä Xiꞌmhai, pe hinte xä logra. Rä Mäkä Tꞌofo udi por hanja yä jäꞌi hinte xä logra. Hyandi nuya yä raso:

•  «Näꞌä xä no̱nge ya hinto dä za dä huäni» (Eclesiastés 1:15).

  Näꞌä ne dä mää: Gatꞌho näꞌä dä me̱fi yä gobiernu pa dä salba rä Xiꞌmhai hingä ma dä logra, ngeꞌä Äjuä himbi hyoki yä jäꞌi pa go dä mändase̱ (Jeremías 10:23). Hänge mäske xi yä jäꞌi dä mfatsꞌi nꞌa ngu mänꞌaa, hinte ma dä za dä me̱fi po rä Xiꞌmhai.

•  «Ngeꞌä yä jäꞌi ma dä mädise̱, xi ma dä kꞌatꞌi yä bojä [...], hinte mä kohi ma dä ne dä ja» (2 Timoteo 3:2, 3).

  Näꞌä ne dä mää: Yä dende mäyaꞌmu̱, rä Mäkä Tꞌofo ya mi mää te mä mꞌu̱i ma dä me̱ꞌtsi yä jäꞌi mäpaya. Yä jäꞌi honi yä ñhose̱ ꞌne hingi ꞌmu̱i dispuesto dä mpe̱fi mähye̱gi pa dä yꞌo̱tꞌe näꞌä xä ñho. ¿Hänge mäjuäni geꞌä thogi mäpaya?

¡Xudi ndämäni ma dä nja nꞌa rä hogä mꞌu̱i!

Rä Zi Dada Jeoba ya xä hñuxäse̱ nꞌa rä gobiernu näꞌä hää ma dä za dä salba rä Xiꞌmhai, geꞌä Ñhesukristo. Rä Mäkä Tꞌofo enä de geꞌä:

•  «Näꞌä rä tsꞌu̱tꞌhui go ma dä ndu ha yä xiꞌnxi. ꞌNe ma dä tꞌembäbi Hogä Consejero, Zi Dada näꞌä xa ja rä Tsꞌe̱di, rä Dada pa Nzäntho, Prinsipe näꞌä häki yä tuhni» (Isaías 9:6).

Rä Hesu go geꞌä näꞌä rä Rey xä hñutsꞌi Jeoba pa dä mända ha rä Xiꞌmhai (Mateo 6:9). Rä Hesu ja rä tsꞌe̱di, rä mfädi ꞌne xa desea dä su tanto rä Xiꞌmhai ꞌne nuꞌu̱ yä jäꞌi ma dä mꞌu̱kua (Salmo 72:12, 16). Mänꞌitꞌho, rä Hesu ma dä huati gatꞌho nuꞌu̱ toꞌo tsꞌongä rä Xiꞌmhai (Apocalipsis 11:18; Isaías 35:1, 7).

Mu̱ gi ne gi pädi mä nꞌa tu̱i de näꞌä ma dä me̱fi Äjuä pa dä hñäki rä pahyadi ꞌne gatꞌho nuꞌu̱ yä xuñha bi hä, hñeti rä artikulo «¿Qué dice la Biblia sobre el cambio climático y nuestro futuro?».