Yä politiko enä ge rä Xiꞌmhai mänꞌitꞌho ma dä uadi | ¿Te udi rä Biblia?

Rä pa nonxi 10 de oktubre de rä 2022, dende xa mi nꞌitꞌho yä ruso bi yꞌe̱ntsꞌi ndunthi yä bomba ha rꞌa yä hnini de Ucrania. Bi thogi njabu̱, ngeꞌä yopa änte Ucrania bi yꞌe̱ntsꞌi nꞌa rä bomba näꞌä bi dagi getbu̱ de näꞌä rä puente kohi entre Rusia ꞌne Crimea. Rꞌa yä pa änte de nunä thogi, yä politiko ya xki mää ge mänꞌitꞌho ma dä nja nꞌa rä gerra näꞌä xä hñuꞌmpäbiꞌu̱ rä Armagedón.

•  «Dende nuꞌu̱ yä pa mi mända Kennedy [nꞌa rä presidente de Estados Unidos], ꞌne änte de ke Estados Unidos xä amenäsa rä Unión Soviétia po nuꞌu̱ yä bomba xki hñutsꞌi ha Cuba, kasi hinto mi usa rä noya Armagedón ja ngu nubye̱. [...] Mapäya ya hinto dä za usa yä bomba nsinke dä nja nꞌa rä gerra» (Joe Biden, rä presidente de Estados Unidos, 6 de rä oktubre de rä 2022).

•  «Nuga di ꞌmu̱i seguro ge nunä rä gerra gehnä rä Armagedón, ꞌne dä za dä huati gatꞌho rä Xiꞌmhai» (geꞌä bi mängä Volodímir Zelenski —rä presidente de Ucrania— nuꞌmu̱ bi tꞌambäbi de nuꞌu̱ yä peligro ja de drä usa yä bomba, BBC News, 8 de rä oktubre de rä 2022.

¿Ma dä uadi nunä rä Xiꞌmhai po ränge nuꞌu̱ yä bomba e̱ntsꞌi yä politiko? ¿Te udi rä Biblia?

¿Ma drä usa yä bomba pa drä huati rä Xiꞌmhai?

Hinä. Ha rä Mäkä Tꞌofo se̱he̱ ehe nꞌadä rä mꞌiki rä noya Armagedón ha Apocalipsis 16:16. Pe rä Mäkä Tꞌofo hingi udi ge nunä nꞌa rä gerra entre yä politiko, sino nꞌa rä gerra entre Äjuä kontra yä gobiernu o «yä ndä de gatꞌho rä xiꞌmhai» (Apocalipsis 16:14). Rä Zi Dada Jeoba ma dä usa rä gerra de Armagedón pa dä huati gatꞌho nuꞌu̱ yä gobiernu ja mäpaya (Daniel 2:44).

Mu̱ gi ne gi pädi mä nꞌa tu̱i te ma dä thogi ko rä Xiꞌmhai xti zo̱ho̱ Armagedón, hyandi rä artikulo «¿Te me̱ꞌä rä Armagedón?».

¿Ma drä usa yä bomba pa drä huati rä Xiꞌmhai ꞌne yä jäꞌi?

Hinä. Äjuä dä za dä hyopi ge yä gobiernu dä usa yä bomba ha nuꞌu̱ yä gerra ja entre yä politiko, pe hingä ma dä hyopi dä huati rä Xiꞌmhai po mäde de yä bomba. Rä Mäkä Tꞌofo enä:

•  «Rä xiꞌmhai ma dä nja pa nzäntho» (Eclesiastés 1:4).

•  «Nuꞌu̱ yä jäꞌi o̱tꞌe rä justisia ma dä mꞌu̱i ha rä xiꞌmhai, ꞌne ja ma dä mꞌu̱hni pa nzäntho» (Salmo 37:29).

Tanto nuꞌu̱ yä profecía hutsꞌi ha rä Mäkä Tꞌofo ꞌne nuꞌu̱ yä thogi ja mäpaya, udi xä ñho ge di ꞌmu̱ihu̱ xa getbu̱ de rä fin de nuꞌu̱ yä tsꞌo tꞌo̱tꞌe di handihu̱ (Mateo 24:3-7; 2 Timoteo 3:1-5). Pa gi pädi te mä mꞌu̱i to̱bgägihu̱ xudi ndämäni, di mbitaꞌihe gi yꞌadi nꞌa rä curso de rä Mäkä Tꞌofo. Hinte mä bojä ma gi jutꞌi.