¿Tengu nuꞌu̱ yä curso de rä Mäkä Tꞌofo uni yä testigo rä Jeoba?
Yä testigo rä Jeoba dä za dä maxꞌäꞌi gi ntiende te udi rä Mäkä Tꞌofo. Hyandi hanja ma dä maxꞌäꞌi gi nxadi rä Mäkä Tꞌofo.
Ma dä maxꞌäꞌi gi pädi hanja gi dä za gi tini rä johya
Ma dä maxꞌäꞌi gi pädi hanja gi yꞌo̱tꞌe ri amigo Äjuä
Ma dä maxꞌäꞌi gi pädi te mä humu̱i ja pa xudi ndämäni
Ha nunä luga ma gi timbäbi yä mpengi nuya yä ntꞌani:
Mu̱ gä asepta nꞌa rä curso, ¿pe̱ꞌtsi te gä ntestigo rä Jeoba?
Mu̱ ya xtä nxadi rä Mäkä Tꞌofo, ¿dä za dä tꞌakägi mä nꞌa rä curso?
¿Tengu nuꞌu̱ yä curso de rä Mäkä Tꞌofo?
Ma gi pe̱ꞌtsi nꞌa rä xahnäte näꞌä ma dä maxꞌäꞌi gi nxadi rä Mäkä Tꞌofo po yä tema. Pa geꞌä di usahe nꞌa rä he̱ꞌmi rä thuhu ¡Johya pa nzäntho! Nunä he̱ꞌmi ma dä maxꞌäꞌi gi pädi te udi rä Biblia ꞌne hanja gi pe̱fi ha ri mꞌu̱i nuꞌu̱ yä tsꞌofo ma gi pädi. Pa gi hyandi hanja di tꞌo̱tꞌe nꞌa rä curso, po rä mhäte hyandi nunä bideo.
¿Hängu pe̱ꞌtsi te gä jutꞌi?
Otho. Rä Hesu bi ꞌñenä: «Gratis gä hänihu̱; gratis ma gi unihu̱» (Mateo 10:8). Hindi kobrahe po nuꞌu̱ yä curso nixi po nuꞌu̱ yä he̱ꞌmi di unihe. Nuje dä za gä rꞌaꞌähe nꞌa rä Mäkä Tꞌofo ꞌne nꞌa rä he̱ꞌmi ¡Johya pa nzäntho!
¿Hängu di dura kada nꞌa rä curso?
Depende de geꞌi. Näꞌä rä he̱ꞌmi di usahe pe̱ꞌtsi 60 yä lección. Rꞌa yä jäꞌi xä desidi dä nxadi nꞌaa o yoho yä lección tatꞌä semänä.
¿Hanja gä adi nꞌa rä curso?
1. Ñuꞌtsi nꞌa rä formulario pa gi yꞌadi toꞌo dä zo̱ñꞌäꞌi. Ma gä usahe nuꞌu̱ ri dato ho̱nse̱ pa gä pe̱fihe näꞌä gi adi.
2. Nꞌa rä testigo rä Jeoba ma dä nzoꞌi pa gi nxadihu̱ rä Mäkä Tꞌofo. Ma dä xiꞌi hanja di tꞌo̱tꞌe nꞌa rä curso ꞌne ma dä dädi nuꞌu̱ yä duda gi pe̱ꞌtsi.
3. Ma gi kohihu̱ te mä pa ꞌne te mä ora dä za gi nxadihu̱. Nuꞌi go ma gi desidi mu̱ gi ne ge toꞌo dä zo̱ñꞌäꞌi ha ri nguu pa gi nxadihu̱ rä Mäkä Tꞌofo, o ꞌnehe dä za gi nxadihu̱ po rä telefono, po yä videollamada, po yä karta o asta po mäde de rä correo. Kada nꞌa rä curso di dura ngu nꞌa ora. Pe dä za dä dura mä ndunthi o menu de nꞌa ora, depende de hängu rä tiempo gi pe̱ꞌtsi.
¿Dä za gä prueba mꞌe̱tꞌo tengu nuꞌu̱ yä curso?
Hää. Pa geꞌä mꞌe̱tꞌo ñuꞌtsi nunä formulario. Ora dä nzoꞌäꞌi nꞌa rä testigo rä Jeoba xipäbi ge ho̱nse̱ gi ne gi prueba rꞌa yä pa tengu nuꞌu̱ yä curso di unihe, pe tobe hingi pädi mu̱ ma gi sigi o hinä. Pa geꞌä ma dä rꞌaꞌi rä foyeto ¡Johya pa nzäntho! habu̱ ehe ho̱nse̱ hñuu yä lección.
Mu̱ gä asepta nꞌa rä curso, ¿pe̱ꞌtsi te gä ntestigo rä Jeoba?
Hinä. Nuje di hohe gä utihe yä jäꞌi de rä Mäkä Tꞌofo, pe hinto di obligabihe dä zo̱ho̱ dä Ntestigo. Nuje di kumplihe ko gä utihe te udi rä Mäkä Tꞌofo. Kada nꞌa rä jäꞌi go ma dä desidise̱ mu̱ ne dä Ntestigo o hinä (1 Pedro 3:15).
¿Dä za gä usa mä Mäkä Tꞌofose̱?
Hää. Nuje xtä nzäi gä usahe rä Traducción del Nuevo Mundo ngeꞌä mänꞌa hingi hei toꞌo dä ntiendebi, pe hingä ma gä nkue̱he mu̱ gi ne usa mä nꞌa rä Mäkä Tꞌofo.
¿Dä za gä mbitabi märꞌaa?
Hää. Dä za gi mbitabi gatꞌho ri familia, ri amigo o toꞌo go gi ne.
Mu̱ ya xtä nxadi rä Mäkä Tꞌofo, ¿dä za dä tꞌakägi mä nꞌa rä curso?
Hää. Dä rꞌakägihe ndunthi rä johya gä utꞌäꞌihe mänꞌaki. Nubye̱ di pe̱ꞌtsihe yä rꞌayꞌo mfatsꞌi pa gä nxadihu̱ rä Mäkä Tꞌofo. Di pädihe ge xa ma gi ho ndunthi.
¿Dä za gä nxadise̱ rä Mäkä Tꞌofo nsinke toꞌo dä maxkägi?
Hää. Mäske ndunthi yä jäꞌi mänꞌa di ho toꞌo dä ꞌñuti de rä Mäkä Tꞌofo ngeꞌä njabu̱ mä nꞌa di ntiendebi, pe märꞌaa mänꞌa di ho dä nxadise̱. Ha rä sección «Yä erramienta pa gä nxadihu̱ rä Mäkä Tꞌofo», ma gi tsu̱di ndunthi de nuꞌu̱ yä mfatsꞌi ja pa gi nxadise̱ rä Mäkä Tꞌofo. Gehya rꞌa de nuꞌu̱ yä erramienta:
Yä ntꞌudi de rä Mäkä Tꞌofo. Ha nunä rä sección ma gi tini yä hogä tsꞌofo nuꞌu̱ ma dä maxꞌäꞌi ha ri mꞌu̱i. Por ejemplo: ¿Hanja dä za gi ꞌmu̱i ko tsꞌu̱tho rä bojä? ¿Te dä za gi pe̱fi mu̱ nse̱kitho dä zu̱ꞌä nꞌa rä hñeni? ¿Te dä za gi pe̱fi mu̱ gi jotꞌätho ha ri nguu?
Yä bideo de rä Mäkä Tꞌofo. Ha nuya yä tꞌu̱kä bideo ma gi pädi rꞌa de nuꞌu̱ yä ntꞌudi ehe ha rä Mäkä Tꞌofo.
Rä Mäkä Tꞌofo thädi nuya yä ntꞌani. Ma gi hyandäse̱ hanja rä Mäkä Tꞌofo thädi ndunthi de nuꞌu̱ yä ntꞌani gi pe̱ꞌtsi.
Yä testo ꞌne näꞌä di signifika. Hyandi te di signifika rꞌa de nuꞌu̱ yä noya o yä testo de rä Mäkä Tꞌofo.