Rä apostol Pablo bi tsꞌitsꞌi pa Roma

Ha näꞌä rä hñuu rä biahe de gä predicación bi yꞌo̱tꞌe rä apostol Pablo, bi uadi ha Jerusalén, ꞌne ja bi tꞌe̱ntꞌini fadi. Nꞌa rä xui, rä Hesu bi ꞌñembäbi ha nꞌa rä visión: «Ma gi ma pa Roma ꞌne ma gi predika ha näꞌä hniniꞌä». Hänge bi tsitsꞌi pa ha rä hnini Cesarea, ꞌne ja bä oni fadi po yo nje̱ya. Nꞌa rä pa, nuꞌmu̱ mi ꞌmai ante rä gobernador Festo, rä apostol Pablo bi ꞌñembäbi: «Di ne go dä hñänkägi ngue̱nda Cesar ha rä hnini Roma». Festo bi dädi: «Mu̱ gi ne ge Cesar go dä yꞌaꞌä ngue̱nda, ma gä pe̱hnäꞌi kongeꞌä». Hänge bi tsꞌitsꞌi ha nꞌa de nuꞌu̱ yä barko ri ma pa Roma, ꞌne bi me̱ui Lucas ꞌne Aristarco.

Ora ya mi yꞌo ha rä ndehe, bi mu̱di bi nja nꞌa rä däta bu̱nthi yꞌee po ndunthi yä pa. Gatꞌho bi hñuyämu̱i ge ma xä du. Pe rä apostol Pablo bi ꞌñembäbiꞌu̱: «Yꞌo̱dehu̱ gatꞌho, nꞌa rä e̱nxe̱ bi ꞌñengägi mänxui ha nꞌa rä tꞌi: “Ogi tsu. Ma gi tso̱ni ha Roma, ꞌne gatꞌho nuꞌu̱ gi ñꞌoui ha rä barko ma dä ñäni yä te”. Hänge ¡ogi tsuhu̱!, hingä ma gä tuhu̱».

Mꞌe̱fa de xki nto̱xkui po 14 yä pa näꞌä rä bu̱nthi yꞌee, bi zo̱ni ha rä ñäni rä ndehe. Mi nꞌa rä thuhu Malta näꞌä lugaꞌä. Näꞌä rä barko bi mfati ko yä do ꞌne bi xe̱ni, pe nuꞌu̱ 276 yä jäꞌi hinte bi ja. Pa bi zo̱ni ha rä ñäni rä ndehe, rꞌaa bi nku̱nthe ꞌne märꞌaa bi gu̱ rꞌa yä xe̱ni de näꞌä rä barko pa bi za bi hñätsꞌi ha rä dehe. Nuꞌu̱ yä me Malta bi su nuꞌu̱ yä jäꞌi ꞌne bi ñꞌudi nꞌa rä faspi pa bi mpaꞌtiꞌu̱.

Hñu nzänä mꞌe̱fa, nuꞌu̱ yä soldado bi zitsꞌi rä apostol Pablo ha mä nꞌa rä barko pa Roma. Ora bi zo̱ni, yä ku nguntꞌä bi ma bä thädi. Nuꞌmu̱ rä apostol Pablo bi hyandi nuꞌu̱ yä ku, näꞌä bi umbäbi njamädi Äjuä ꞌne xa bi johya. Mäske rä apostol Pablo mi o fadi, bi tꞌumbäbi nse̱ki dä renta nꞌa rä nguu pa ja dä ꞌmu̱hni ꞌne ho̱nse̱ bi thutsꞌi rꞌa yä soldado pa dä su. Bi jabu̱ po yo nje̱ya. Koꞌmu̱ mi pa ndunthi yä jäꞌi pa mi tso̱ni, näꞌä mi uti de rä Tsꞌu̱tꞌhui Äjuä ꞌne de rä Hesu. ꞌNehe bi yꞌopäbi rꞌa yä karta nuꞌu̱ yä mhuntsꞌi mi kohi ha Asia Menor ꞌne Judea. Ja ngu di handihu̱, rä Zi Dada Jeoba bi usa rä apostol Pablo pa ꞌñudi de rä Noya ha ndunthi yä dähni.