¿Te di thogi nuꞌu̱ yä jäꞌi xä du?

Ha rä du ja gehni di mꞌe̱di gatꞌho rä te. ꞌÑenä go nꞌa rä tꞌähä xi ntsꞌe̱di (Juan 11:11-14). Nuꞌu̱ xä du hingi tsa dä yꞌo̱de, dä hyandi, dä ñä ha nixi otho yä mfeni (Eclesiastés 9:5, 10). Yä jamfri nuꞌu̱ hingä mäjuäni, udi ge nuꞌu̱ yä jäꞌi xä du bi ꞌmu̱i ha mä nꞌa rä te ko nuꞌu̱ yä xita xä du. Pe hingä geꞌä udi rä Mäkä Tꞌofo.

Nuꞌu̱ yä jäꞌi xä du hingi tsa dä maxkägihu̱ ha nixi tsa dä yꞌo̱tkägihu̱ rä ntsꞌomꞌu̱i. Ndunthi yä jäꞌi o̱ꞌtuä yä mixa, to̱ꞌmi ko yä do̱ni ꞌne yä ñhuni nuꞌu̱ yä jäꞌi xä du ngeꞌä hurämu̱i ge nuyu̱ bi pengi. Pe nunä nzäi hindi ho Äjuä ngeꞌä nunä jamfri ehe ha yä nkꞌuamba rä Zithu. Nixi hingi tsa dä johya nuꞌu̱ yä jäꞌi xä du ngeꞌä nuyu̱ ya otho yä te. Hinxä ñho gä tsuhu̱ ha nixi gä xo̱kämbenihu̱ nuꞌu̱ yä jäꞌi xä du. Pe̱ꞌtsi gä xo̱kämbenihu̱ se̱he̱ Äjuä (Mateo 4:10).

Ndunthi nuꞌu̱ yä jäꞌi xä du ma dä me̱ꞌtsi rä te mänꞌaki. Nꞌa rä pa, Jeoba ma dä japi dä nuhu nuꞌu̱ yä jäꞌi xä du pa njabu̱ dä mꞌu̱i ha rä Xiꞌmhai de gä uädri (Juan 5:28, 29; Hechos 24:15). Äjuä dä za dä gu̱tsꞌi nuꞌu̱ yä jäꞌi xä du ja ngu nuju̱ tsa di ju̱tsꞌihu̱ nꞌa rä jäꞌi näꞌä ähä (Marcos 5:22, 23, 41, 42).

Rä Zithu xä japi rä jäꞌi dä gamfri ge nuꞌu̱ yä jäꞌi xä du bi ꞌmu̱i ha mänꞌa rä te, pe näꞌä nꞌa rä nkꞌuamba. Rä Zithu ꞌne yä u̱xjua japi rä jäꞌi dä gamfri ge nuꞌu̱ yä jäꞌi xä du bi pengi, uni yä xuñha ꞌne japäbi rä jäꞌi dä ñheni. Rä Zithu hatꞌi yä jäꞌi, japi te handi o japi te di ꞌui. Hänge Jeoba di u̱tsa dä hyandi toꞌo ñäui nuꞌu̱ yä jäꞌi xä du (Deuteronomio 18:10-12).