¿Te mä mꞌu̱i mi ja ha rä uädri Eden?

Jeoba bi umbi rä Adan ꞌne rä Eba ndunthi yä hogä tꞌo̱tꞌe (Génesis 1:28)

Jeoba bi hyoki rä Eba. Gehnä rä mu̱di ꞌme̱hñä bi hyoki pa bi nthäti ko rä Adan (Génesis 2:21, 22).

Nuꞌmu̱ Jeoba bi hyoki rä Adan ꞌne rä Eba, yä mfeni ꞌne yä ndoyꞌo hinte mi ñꞌoui rä tsꞌoki.

Rä Adan ꞌne rä Eba mi ꞌmu̱i ha rä uädri Eden. Näꞌä rä uädri xa mi mähotho, mi thogi nꞌa rä däthe, mi ꞌmu̱i yä zuꞌue, ꞌne xa mi ja yä zaa nuꞌu̱ mi uni yä fruta.

Rä Zi Dada Jeoba mi ñäui rä Adan ꞌne rä Eba, mi uti ꞌne mi umbi yä tsꞌofo. Mu̱ rä Adan ꞌne rä Eba xä yꞌo̱te Äjuä, nuꞌmu̱ nuyu̱ xä za xä mꞌu̱i pa nzäntho ha rä Xiꞌmhai ha näꞌä rä uädri.

Äjuä xki mändabi ge hinxä zipä rä fruta nꞌa de nuꞌu̱ yä zaa (Génesis 2:16, 17)

Rä Zi Dada Jeoba xki mändabi rä Adan ꞌne rä Eba ge hinxä zipä rä fruta nꞌa de nuꞌu̱ yä zaa mi ꞌmai ha rä uädri. Mu̱ xä zi de näꞌä rä fruta, nuꞌu̱ ma xä du.

Bi mꞌu̱ nꞌa rä e̱nxe̱ näꞌä himbi yꞌo̱te Äjuä. Nunä rä tsꞌo e̱nxe̱ tꞌembi rä Zithu ꞌne rä Diablo.

Rä Zithu hingä mi ne ge rä Adan ꞌne rä Eba xä yꞌo̱te rä Zi Dada Jeoba. Ko nꞌa rä kꞌeñä, rä Zithu bi xipi rä Eba ge mu̱ xä zi de näꞌä rä fruta, ma xä zo̱ho̱ xä nja ngu Äjuä, ꞌne hingä ma xä du. ¡Pe hingä mäjuäni näꞌä bi mää rä Zithu! (Génesis 3:1-5.)