Yä erramienta pa gä udihu̱
1. Ja ngu nuꞌu̱ yä me̱fi di usa xä ñho yä erramienta, ¿te mähyoni gä pe̱fihu̱?
1 Pa dä thoki yä ꞌme̱fi, di ja mꞌe̱di ndunthi yä erramienta. Rꞌa yä erramienta di ja mꞌe̱di nzäntho, pe märꞌaa di ja mꞌe̱di ho̱nse̱ ha yä däta ꞌme̱fi. Toꞌo pe̱ꞌtsi ndunthi rä esperiensia de dä hyoki yä ꞌme̱fi, pe̱ꞌtsi gatꞌho nuꞌu̱ yä erramienta di japäbi mꞌe̱di, ꞌne pädi dä usa xä ñho. Rä Mäkä Tꞌofo, ꞌnehe xikägihu̱ gä o̱tꞌehu̱ ntsꞌe̱di po gä mämbäbihu̱ xä ñho rä Noya Äjuä ꞌne “dä ñꞌotho de te gä ntsahu̱” (2 Tim. 2:15). ¿Te mä erramienta näꞌä hindi debe gä pumfrihu̱? Rä Mäkä Tꞌofo, geꞌä mä erramientahu̱ xa mähyoni pa gä xahnihu̱ yä jäꞌi (Mat. 28:19, 20). Hänge mähyoni gä o̱thu̱ ntsꞌe̱di po gä usahu̱ xä ñho nunä erramienta pa gä udihu̱ «xä ñho rä Noya Äjuä». Pe ja märꞌa yä erramienta nuꞌu̱ di pe̱ꞌtsihu̱ ꞌne mähyoni gä pädi gä usahu̱ pa gä utihu̱ yä jäꞌi näꞌä mäjuäni (Prov. 22:29).
2. ¿Te mä erramienta di pe̱ꞌtsihu̱ pa gä xahnihu̱ yä jäꞌi?
2 Märꞌa yä erramienta mähyoni. Rä mfistꞌofo ¿Qué enseña realmente la Biblia? geꞌä rä mu̱di mfatsꞌi di pe̱ꞌtsihu̱ pa gä utihu̱ yä jäꞌi de rä Mäkä Tꞌofo. Xti uadi de gä nxadihu̱ ko yä jäꞌi nunä mfistꞌofo, ma gä thogihu̱ ko rä mfistꞌofo “Manténganse en el amor de Dios” pa dä bädi hanja dä me̱fi ha rä mꞌu̱i nuꞌu̱ yä tsꞌofo uni rä Mäkä Tꞌofo. Hänge mähyoni gä pädihu̱ gä usahu̱ xä ñho nuya yoho yä mfistꞌofo. ꞌNehe, pa gä fu̱dihu̱ yä estudio, hindi debe dä mꞌe̱di ha mä erramientahu̱ rä foyeto Äjuä pe̱ꞌtsi rꞌa yä hogä noya pa nuꞌi. Pe mu̱ di tinihu̱ yä jäꞌi nuꞌu̱ hingi pädi dä hñeti xä ñho rä he̱ꞌmi, dä za gä usahu̱ rä foyeto Yꞌo̱te Äjuä, o Yꞌo̱te Äjuä pa dä za gi ꞌmu̱i pa nzäntho. ꞌNehe hindi debe dä mꞌe̱di rä foyeto ¿Toꞌo pe̱päbi rä bolunta Jeoba mäpaya?, ngeꞌä nunä foyeto xä thoki pa gä gu̱hnihu̱ yä estudio pa ha rä hnini Äjuä. Yä bideo ¿Por hanja mähyoni gä nxadihu̱ rä Mäkä Tꞌofo?, ¿Te di tꞌo̱tꞌe ha rä Ngu de gä Mhuntsꞌi?, ꞌne ¿Te rä thuhu Äjuä?, gehya märꞌa yä erramienta nuꞌu̱ mähyoni gä pädi gä usahu̱ xä ñho pa gä xahnihu̱ yä jäꞌi.
3. ¿Hanja ma dä maxkägihu̱ nuꞌu̱ yä artikulo ma dä ꞌñehe ha Mä Mäkä ꞌMe̱fihu̱ pa Äjuä?
3 Nuꞌu̱ yä artikulo ma dä ꞌñehe ha Mä Mäkä ꞌMe̱fihu̱ pa Äjuä, ma dä maxkägihu̱ gä pädi gä usahu̱ xä ñho nuꞌu̱ yä erramienta di pe̱ꞌtsihu̱ pa gä xahnihu̱ yä jäꞌi. Mu̱ gä o̱tꞌehu̱ ntsꞌe̱di po gä jahu̱bu̱, ma gä udihu̱ ge di jamäsuhu̱ nunä tsꞌofo: “Jamäsu näꞌä gi udi. Ogi tsaya gi yꞌo̱tꞌä njabu̱, ngeꞌä nuꞌmu̱ gi yꞌo̱tꞌä njabu̱, nuꞌmu̱ ma gi ñäni ri te ꞌne ma gi ñämbäbi yä te nuꞌu̱ dä yꞌo̱xꞌäꞌi” (1 Tim. 4:16).