Oxki ma gi tagi ha nuꞌu̱ yä trampa ja ha yä redes sociales

POR HANJA XA MÄHYONI. Gatꞌho yä erramienta xä ñho, pe mu̱ hingä usahu̱ xä ñho dä za dä u̱ngägihu̱. Njabu̱ thogi ko yä redes sociales. Rꞌa yä kristianu xä desidi hindä usa, märꞌa hää di usa pa dä ñäui yä familia o yä amigo. Pe rä Zithu di usa yä redes sociales pa dä me̱gägihu̱ yä trampa ꞌne njabu̱ gä tsꞌonihu̱ mä ntsitsꞌihu̱ ko Jeoba ꞌne mä thuhuhu̱ ante märꞌaa. Pe ja ngu bi ja rä Hesu, dä za gä usahu̱ nuꞌu̱ yä tsꞌofo di tinihu̱ ha rä Noya Äjuä pa gä ꞌuegehu̱ de nuꞌu̱ yä trampa (Lu 4:4, 8, 12).

TE HINDI DEBE GI PE̱FI ORA GI USA YÄ REDES SOCIALES

• Ogi dedikabi ndunthi ri tiempo. Mu̱ di usahu̱ ndunthi rä tiempo ha yä redes sociales, ma dä hñägägihu̱ näꞌä rä tiempo di debe gä dedikabihu̱ rä Zi Dada Jeoba.

  Gehnä mää rä Mäkä Tꞌofo: Ef 5:15, 16; Flp 1:10

• Ogi handi nuꞌu̱ yä kosa hingi tꞌaxi. Toꞌo handi nuꞌu̱ yä foto ꞌne yä bideo habu̱ di nheki nuꞌu̱ yä jäꞌi hingi he yä dutu o o̱tꞌe yä pekado ko yä ndoyꞌo, dä za dä zo̱ho̱ dä nja ngu nꞌa rä bisio pä geꞌu̱ o ma dä uadi dä me̱fi nuꞌu̱ yä pekadoꞌu̱. Rꞌaa xä yu̱tꞌi ha nuꞌu̱ yä página xä hyoki yä apostata ꞌne xä tsꞌoni yä ntsitsꞌi ko Jeoba.

  Gehnä mää rä Mäkä Tꞌofo: Mt 5:28; Flp 4:8

• Ogi po̱ꞌtse yä komentario nixi yä foto nuꞌu̱ hingi nupäbi yä mfeni märꞌaa. Mä korasohu̱ rä traisionero ꞌne dä za dä jakägihu̱ gä po̱ꞌtsehu̱ yä foto o yä komentario nuꞌu̱ dä za dä japi dä ꞌme̱ yä tsa märꞌaa o dä japi dä mfeꞌtse ꞌne dä ꞌuege de Äjuä.

  Gehnä mää rä Mäkä Tꞌofo: Ro 14:13; Ef 4:29

HYANTHU̱ RÄ BIDEO USA RI MFÄDI ORA GI USA YÄ REDES SOCIALES. MÄÑHU̱ HANJA GÄ ꞌUEGEHU̱ DE NUYA YÄ TRAMPA: