¿Hanja dä za dä me̱ꞌtsi rä johya ri familia?

1. ¿Por hanja mähyoni ge yä medinthäti dä ñꞌofo ha yä mbo̱ho̱ pa dä mꞌu̱i ko johya?

Jeoba, näꞌä Zi Dada de gä johya habu̱ bi ehe nuꞌu̱ yä hogä noya, ne ge gatꞌho yä familia dä mꞌu̱i ko rä johya (1 Timoteo 1:11, NM). Äjuä geꞌä bi hyoki rä nthäti dende ri mu̱di. Hänge mu̱ nꞌa ñꞌo̱ho̱ ꞌne nꞌa ꞌme̱hñä ne dä mꞌu̱i mähye̱gi, mähyoni dä nthäti ha yä mbo̱ho̱ pa njabu̱ dä me̱ꞌtsi nꞌa rä familia ko rä johya, ꞌne yä bätsi dä za dä me̱ꞌtsi rä johya ꞌne rä mhäte. Yä kristianu mähyoni dä nthäti ja ngu di mända nuꞌu̱ yä tsꞌu̱tꞌhui de näꞌä rä hnini habu̱ ꞌmu̱i . Hñeti Lucas 2:1, 4, 5.

¿Hanja handi Jeoba yä medinthäti? Nuꞌmu̱ nꞌa ñꞌo̱ho̱ ꞌne nꞌa ꞌme̱hñä di nthäti, Jeoba to̱ꞌmi ge nuyu̱ dä mꞌu̱i mähye̱gi pa nzäntho. Jeoba hingi ne ge yä däme ꞌne yä ꞌme̱hñä dä hyatꞌi näꞌä toꞌo xä nthätui (Hebreos 13:4). Jeoba di u̱tsa yä diborsio (Malaquías 2:16). Pe Jeoba, hopi dä diborsia nꞌa däme o nꞌa ꞌme̱hñä pa dä nthäti mänꞌaki mu̱ ne, pe ho̱nse̱ mu̱ näꞌä toꞌo xä nthätui bi ñꞌähui mä nꞌa jäꞌi. Hñeti Mateo 19:3-6, 9.

2. ¿Hanja ri ꞌñehe dä ntsitsꞌi yä medinthäti?

Jeoba bi hyoki rä ñꞌo̱ho̱ ꞌne rä ꞌme̱hñä pa dä mfatsꞌi nꞌa ngu mänꞌaa (Génesis 2:18). Rä däme, näꞌä ñäxu de rä nguu, mähyoni dä gu̱tꞌi rä ꞌñuu pa dä hyombäbi te dä zi, te dä hyee, ꞌne habu̱ dä mꞌu̱i rä familia. ꞌNehe mähyoni dä gu̱tꞌi ꞌñuu pa dä ꞌñuti rä familia de Äjuä. Rä däme pe̱ꞌtsi te dä hyombäbi rä ñho rä ꞌme̱hñä ꞌne hindä hyoni rä ñhose̱. Yä medinthäti mähyoni dä mädi ꞌne dä ꞌñudi rä tꞌekꞌei nꞌa ngu mänꞌaa. Di pädihu̱ ge gatꞌho yä däme ꞌne gatꞌho yä ꞌme̱hñä pe̱ꞌtsi rä tsꞌoki, hänge mähyoni dä bädi dä uni rä pumbäte pa njabu̱ dä mꞌu̱i ko rä johya ha yä medinthäti. Hñeti Efesios 4:31, 32; 5:22-25, 33, ꞌne 1 Pedro 3:7.

3. ¿Xä ñho dä ñhe̱gi yä medinthäti mu̱ thogi yä xuñha?

Mu̱ gi thogi yä xuñha ha ri medinthäti, mähyoni gi yꞌo̱tꞌe ntsꞌe̱di pa gi uni rä mhäte (1 Corintios 13:4, 5). Rä Noya Äjuä hingi embi yä medinthäti dä ñhe̱gi pa dä uadi nuꞌu̱ yä xuñha pe̱ꞌtsi. Hñeti 1 Corintios 7:10-13.

4. Bätsihu̱, ¿te ne Äjuä pa nuꞌähu̱?

Äjuä ne ge yä bätsi dä mꞌu̱i ko rä johya. Äjuä di rꞌaꞌi nuꞌu̱ yä tsꞌofo mänꞌa xä ñho pa gi pädi hanja gi ꞌmu̱i ko rä johya nubye̱ gä bäsjäꞌi. Äjuä ꞌnehe ne ge gi japämäsu näꞌä mfädi ꞌne nuꞌu̱ yä tsꞌofo rꞌaꞌi ri dada ꞌne ri nänä (Colosenses 3:20). Rä Zi Dada Jeoba ne ge nuꞌi gi pe̱fi näꞌä adi Jeoba ꞌne rä Tꞌu̱ pa njabu̱ gi tini rä johya. Hñeti Eclesiastés 11:9–12:1; Mateo 19:13-15, ꞌne 21:15, 16.

5. Dadahu̱, ¿hanja dä za gi fatsꞌihu̱ ri bätsihu̱ pa dä me̱ꞌtsi rä johya?

Yä dada ꞌne yä nänä mähyoni dä mfatsꞌi pa dä hyombäbi te dä zi, te dä hyee, ꞌne habu̱ dä mꞌu̱i yä bätsi (1 Timoteo 5:8). Pe hingä ho̱nse̱ꞌä di ja mꞌe̱di. Yä dada ꞌne yä nänä mähyoni dä ꞌñuti yä bätsi dä mädi Äjuä ꞌne dä bädi de geꞌä pa njabu̱ dä za dä dini rä johya (Efesios 6:4). Mu̱ yä bätsi handi hanja yä dada ꞌne yä nänä mädi Äjuä, geꞌä ma dä japi ꞌnehe dä mädi Äjuä dende ha yä koraso. Pa yä bätsi dä me̱ꞌtsi yä hogä mfeni, mähyoni ge yä dada dä umbi nuꞌu̱ yä tsꞌofo bi ehe de Äjuä hutsꞌi ha rä Mäkä Tꞌofo. Hñeti Deuteronomio 6:4-7 ꞌne Proverbios 22:6.

Yä bätsi di johya nuꞌmu̱ yä dada di nupäbi yä mfeni ꞌne xipäbi ge geꞌä pe̱fi. Yä bätsi ꞌnehe di japäbi mꞌe̱di yä tsꞌofo habu̱ hingä geꞌä pe̱fi pa njabu̱ hindä gu̱ nꞌa ꞌñuu xä ntsꞌo näꞌä ma dä hämpäbi yä u̱gi (Proverbios 22:15). Pe yä dada pe̱ꞌtsi te dä beni ge hinxä ñho dä yu̱ntꞌi o dä me̱tꞌi ntsꞌe̱di yä bätsi. Hñeti Colosenses 3:21.

Yä testigo rä Jeoba xä hyoki ndunthi yä he̱ꞌmi pa yä dada ꞌne yä bätsi. Nuꞌu̱ yä tsꞌofo uni nuꞌu̱ yä he̱ꞌmi xä thäi de rä Mäkä Tꞌofo. Hñeti Salmo 19:7, 11.