¿Por hanja hopi Äjuä dä nja yä ntsꞌomꞌu̱i ꞌne yä sufrimiento?

1. ¿Hanja bi mu̱di bi nja yä ntsꞌomꞌu̱i?

Yä ntsꞌomꞌu̱i bi mu̱di nuua ha rä Xiꞌmhai nuꞌmu̱ rä Zithu bi mää näꞌä rä mu̱di nkꞌuamba o nhemhñä. Ri mu̱di, rä Zithu mi nꞌa hogä e̱nxe̱, pe näꞌä bi ne bi me̱fi yä tsꞌoki, ꞌne yä himbi ne bi sigi bi mää näꞌä mäjuäni (Juan 8:44). Rä Zithu bi mu̱di bi me̱ꞌtsi nꞌa rä tsꞌo mfeni: mi ne ge yä jäꞌi go xä xo̱kämbeniꞌä. Hää, mi ne dä hñäni näꞌä ho̱nse̱ go ri ꞌñepi Äjuä. Rä Zithu bi kadi ꞌne bi hyatꞌi Eba, näꞌä rä mu̱di ꞌme̱hñä. Njabu̱ Eba bi me̱fi näꞌä bi xipi rä Zithu, ꞌne ya himbi yꞌo̱te Äjuä. Mꞌe̱fa, Adan himbi yꞌo̱te ꞌnehe Äjuä ja ngu xki ja Eba. Njabu̱, ko näꞌä bi me̱fi Adan bi zo̱ho̱ bi nja rä du ꞌne rä sufrimiento. Hñeti Génesis 3:1-6, 19.

Nuꞌmu̱ rä Zithu bi kadi Eba pa ya hinxä yꞌo̱te Äjuä, bi mu̱di bi japi yä jäꞌi bi nju̱tsꞌi kontra Äjuä, näꞌä Däta Tsꞌu̱tꞌhui de gatꞌho rä Xiꞌmhai. Kasi gatꞌho yä jäꞌi de rä Xiꞌmhai o̱te rä Zithu ꞌne udi ge hingi ne dä yꞌo̱te Äjuä ngu rä Ndä. Njabu̱ rä Zithu tꞌembi rä «ndä de nunä xiꞌmhai». Hñeti Juan 14:30 ꞌne 1 Juan 5:19.

2. ¿Bi tsꞌoki näꞌä bi hyoki Äjuä?

Gatꞌho näꞌä hoki Äjuä po̱ni xä ñho ꞌne hinte tu rä tsꞌoki. Äjuä bi hyoki yä jäꞌi ꞌne yä e̱nxe̱ nsi rä tsꞌoki pa xä za xä yꞌo̱te xä ñho Äjuä (Deuteronomio 32:4, 5). Äjuä bi hyogägihu̱ pa dä za gä huahnihu̱ mu̱ di ne gä pe̱fihu̱ näꞌä xä ñho o näꞌä hingi ho. Nuꞌmu̱ di huahnihu̱ gä pe̱fihu̱ näꞌä xä ñho di udihu̱ hängu di mädihu̱ Äjuä. Hñeti Santiago 1:13-15 ꞌne 1 Juan 5:3.

3. ¿Por hanja Äjuä xä hye̱gi xä nja yä sufrimiento asta mäpaya?

Po rꞌa yä mꞌo yä je̱ya, Jeoba xä hye̱gi ge yä jäꞌi xä nju̱tsꞌi kontra geꞌä. ¿Por hanja? Pa dä ꞌñudi ge nixi nꞌa rä tsꞌu̱tꞌhui de nunä Xiꞌmhai hindä za dä matsꞌi yä jäꞌi (Eclesiastés 7:29; 8:9). Yä jäꞌi xä mända thogi 6,000 yä je̱ya ꞌne xä nheki ge hinxä za xä hñäki yä däta tuhni, yä ntsꞌomꞌu̱i ꞌne yä däta ñheni. Hñeti Jeremías 10:23 ꞌne Romanos 9:17.

Yä tsꞌu̱tꞌhui yä mexiꞌmhai hinxä za xä kumpli näꞌä xä ñäꞌti yä jäꞌi. Pe rä Tsꞌu̱tꞌhui Äjuä hää di kumpli ꞌne fatsꞌi yä jäꞌi (Isaías 48:17, 18). Nguntꞌä, Jeoba ma dä hñäki ꞌne ma dä huati gatꞌho nuꞌu̱ yä tsꞌu̱tꞌhui de nunä Xiꞌmhai. Ho̱nse̱ nuꞌu̱ yä jäꞌi di huahni Äjuä ngu rä Ndä, geꞌu̱ ma dä mꞌu̱i ha rä Xiꞌmhai (Isaías 11:9). Hñeti Daniel 2:44.

Hyandi rä bideo ¿Por hanja hopi Äjuä dä nja yä sufrimiento?

4. ¿Te dä za gä pe̱fihu̱ ko näꞌä rä pasensia pe̱skägihu̱ Äjuä?

Rä Zithu bi mää ge gatꞌho yä jäꞌi pe̱päbi Jeoba ho̱nse̱ nuꞌmu̱ häni yä ñho de geꞌä. ¿Gi hohmä gi ꞌñudi ge hingä mäjuäni näꞌä bi mää rä Zithu? Ko näꞌä rä pasensia pe̱skägihu̱ Äjuä, dä za gä udihu̱ ge hingä mäjuäni näꞌä bi mää rä Zithu. Ko näꞌä mä mꞌu̱ihu̱ di pe̱ꞌtsihu̱, ma gä udihu̱ mu̱ di nehu̱ go dä mändagihu̱ Äjuä o di nehu̱ dä mändagihu̱ yä mexiꞌmhai. Hñeti Job 1:8-12 ꞌne Proverbios 27:11.

5. ¿Hanja dä za gä huahnihu̱ Äjuä ngu mä Ndähu̱?

Nuju̱ dä za gä huahnihu̱ Äjuä ngu mä Ndähu̱ mu̱ gä xo̱kämbenihu̱ Äjuä ngu hutsꞌi ha rä Mäkä Tꞌofo (Juan 4:23). Nuꞌmu̱ hindi ku̱tꞌihu̱ ha yä politika ꞌne ha yä däta tuhni ja ngu bi ja rä Hesu, di udihu̱ ge hindi nehu̱ go dä mändagihu̱ rä Zithu. Hñeti Juan 17:14.

Rä Zithu ko näꞌä rä tsꞌe̱di pe̱ꞌtsi, japi yä jäꞌi dä me̱fi yä däta tsꞌoki nuꞌu̱ di tsꞌombäbi yä mꞌu̱i yä jäꞌi. Nuꞌmu̱ di u̱tsahu̱ ꞌne hindi pe̱fihu̱ nuꞌu̱ yä tsꞌo tꞌo̱tꞌe, rꞌabu̱ mä familiahu̱ ꞌne märꞌa mä ntsitsꞌihu̱ ma dä dengägihu̱ ꞌne hingä ma dä mäkägihu̱ (1 Pedro 4:3, 4). Hänge nuju̱ mähyoni gä huahnihu̱ te mä ꞌñuu di ne gä te̱nihu̱. ¿Gi hohmä gi ntsitsꞌiui nuꞌu̱ yä jäꞌi di mädi ꞌne pe̱pi Äjuä? ¿Gi hohmä gi yꞌo̱te nuꞌu̱ yä hogä mhända Äjuä? Mu̱ gä pe̱fihu̱ njabu̱, nuꞌmu̱ ma gä udihu̱ ge hingä mäjuäni näꞌä bi mää rä Zithu nuꞌmu̱ bi ꞌñenä ge mu̱ gä pe̱ꞌtsihu̱ yä xuñha, hingä ma gä pe̱päbihu̱ Äjuä. Hñeti 1 Corintios 6:9, 10 ꞌne 15:33.

Näꞌä rä mhäte pe̱ꞌtsi Äjuä po yä jäꞌi, udi ge nguntꞌä ma dä hñäki gatꞌho yä sufrimiento ꞌne yä ntsꞌomꞌu̱i. Toꞌo dä ꞌñudi ge kamfri ge näꞌä rä ꞌñuu Äjuä geꞌä mänꞌa xä ñho ꞌne di huahni Äjuä ngu rä Ndä, ma dä za dä mꞌu̱i pa nzäntho ko rä johya nuua ha rä Xiꞌmhai. Hñeti Juan 3:16.