RÄ LECCIÓN 22
¿Hanja dä za gi ꞌñuti märꞌa yä zi jäꞌi nuꞌu̱ yä hogä notisia bi ehe de Äjuä?
Zäi ge ha kada nꞌa rä lección de nunä he̱ꞌmi, xkä tini rꞌa yä ntꞌudi de rä Biblia nuꞌu̱ mä mꞌe̱tꞌo hingä ngi pädi. Zäi ge asta gi enä: «¡Gatꞌho yä jäꞌi debe dä bädihmä näꞌä udi rä Biblia!». Pe zäi ge rꞌabu̱ gi ntsa o gi tsu gi xipäbi märꞌa näꞌä xkä pädi de rä Noya Äjuä. Hänge ha nunä lección ma gä pädihu̱ hanja dä za gi täpäbi rä ntsa ꞌne rä ntsu, ꞌne hanja dä za gi tini rä johya de gi xipäbi märꞌa nuꞌu̱ yä hogä notisia xkä pädi de rä Biblia.
1. ¿Hanja dä za gi fu̱di gi xipäbi näꞌä xkä pädi de rä Biblia nuꞌu̱ yä jäꞌi gi konose?
Nuꞌu̱ yä apostol rä Hesu bi ꞌñenä: «Nuje hindä za gä he̱gihe de gä mäñhe nuꞌu̱ yä tꞌo̱tꞌe xtä handihe ꞌne xtä o̱dehe» (Hechos 4:20, TNM). Ja ngu di handihu̱, nuꞌu̱ yä apostol xa mi balora gatꞌho näꞌä xki bädi de rä Hesu ꞌne mi ne dä xipäbi gatꞌho yä jäꞌi. ¿Gi senti njabu̱ ꞌnehe? Mu̱ hää, ko ndunthi rä tꞌekꞌei hyoni hanja dä za gi xipäbi ri familia ꞌne nuꞌu̱ ri amigo näꞌä xkä pädi de rä Noya Äjuä (hñeti Colosenses 4:6).
Jaua rꞌa yä idea
Ora gi ñäui ri familia dä za gi ꞌñembäbi njaua: «¿Gä xiꞌi te xtä pädi nunä semänä?».
Ora gi handi ge di hñeni o turämu̱i nꞌa ri amigo, dä za gi ꞌñuti nꞌa rä testo de rä Biblia näꞌä dä nupäbi rä mfeni.
Mu̱ ha ri ꞌme̱fi toꞌo dä ñꞌani te xkä pe̱tꞌho, dä za gi xipäbi näꞌä xkä pädi ha ri curso de rä Biblia o ha rä mhuntsꞌi.
ꞌÑuti nuꞌu̱ ri amigo näꞌä rä página de jw.org.
Mbitabi ri familia o ri amigo dä hñudi dä yꞌo̱de ora tꞌaꞌi ri curso de rä Biblia o ꞌñuti hanja dä yꞌadi nꞌa rä curso ha jw.org.
2. ¿Por hanja di bale rä penä gi po̱ni gi predika ko rä mhuntsꞌi?
Nuꞌu̱ yä de̱ni rä Hesu himbi predikabi ho̱nse̱ nuꞌu̱ yä jäꞌi mi konose. Rä Hesu «bi me̱hni de gä yoho [...] ha yä hnini» pa dä predikabi gatꞌho yä jäꞌi (Lucas 10:1). Ja ngu di handihu̱, rä Hesu bi mändabi nuꞌu̱ yä de̱ni dä predika en orden. Njabu̱, bi umbäbi rä oportunida gatꞌho yä jäꞌi dä yꞌo̱de nuꞌu̱ yä hogä notisia bi ehe dä Äjuä. ꞌNehe, nuꞌu̱ yä de̱ni rä Hesu bi me̱ꞌtsi ndunthi rä johya de dä predika mähye̱gi (Lucas 10:17). Xi nuꞌi, ¿hingi hohmä gi tini näꞌä rä johya de gi predika mähye̱gi ko yä ku de rä mhuntsꞌi?
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ hanja dä za gi täpäbi rä ntsa ꞌne rä ntsu, ꞌne gi tini rä johya de gi xipäbi märꞌaa nuꞌu̱ yä hogä notisia xkä pädi de rä Biblia.
3. Rä Zi Dada Jeoba ma dä mꞌu̱i kongeꞌi
Rꞌa yä zi jäꞌi di ntsa o tsu dä xipäbi märꞌa näꞌä xä bädi de rä Biblia, ꞌne rꞌabu̱ enä: «¿Xi te ma dä mängä yä jäꞌi de geki?».
Xi nuꞌi, ¿gi ntsa o gi tsu gi xipäbi märꞌa näꞌä xkä pädi de rä Biblia? ¿Por hanja?
Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:
Ja ngu dä handihu̱ ha rä bideo, ¿te bi me̱fi nuꞌu̱ yä bäsjäꞌi pa bi däpäbi rä ntsa ꞌne rä ntsu?
Hñetihu̱ Isaías 41:10, ꞌnepu̱ thädihu̱ nunä rä ntꞌani:
Mu̱ gi tsu o gi ntsa gi predika, ¿hanja ma dä maxꞌäꞌi mu̱ gi xatuäbi rä Zi Dada Jeoba?
¿Gi pädi?
Ndunthi yä testigo rä Jeoba, pede ge mä mꞌe̱tꞌo mi senti ge nunka ma xä za xä predikabi märꞌaa. Por ejemplo, nꞌa rä zi ku rä thuhu Sergey, pede ge mä mꞌe̱tꞌo mi senti ge hinte mi bale ꞌne xa mi japäbi xä ñhei dä ñäui märꞌaa. Näꞌä enä: «Nuꞌmu̱ dä fu̱di dä nxadi rä Biblia tobe ndi tsu. Pe mäske njabu̱, dä fu̱di dä xipäbi märꞌa näꞌä xti pädi de rä Noya Äjuä. Dä handi hanja geꞌä bi maxkägi gä tsamäñho, ꞌne geꞌä bi maxkägi gä pe̱ꞌtsi ha mä mfeni ꞌne ha mä koraso näꞌä xti pädi de rä Biblia».
4. Ñä ko ndunthi rä tꞌekꞌei
Ora ma gi xipäbi märꞌa näꞌä xkä pädi de rä Biblia, beni mꞌe̱tꞌo te ma gi mää ꞌne hanja ma gi mää. Hñetihu̱ 2 Timoteo 2:24, TNM ꞌne 1 Pedro 3:15, TNM, ꞌnepu̱ thädihu̱ nuya yä ntꞌani:
Ora gi xipäbi märꞌa näꞌä xkä pädi de rä Biblia, ¿hanja dä za gi jamäsu nuya yä konseho uni nuya yä testo dä hetihu̱?
Rꞌabu̱ ri familia o nuꞌu̱ ri amigo hingä ma dä ho näꞌä ma gi xipäbi de rä Biblia. ¿Te dä hogi gi pe̱fi ꞌne te dä hogi hingi pe̱fi?
En lugar de gä kondenähu̱ o gä tsu̱ihu̱ yä jäꞌi po näꞌä kamfri, ¿por hanja mänꞌa dä hogi gä huahnihu̱ rꞌa yä ntꞌani nuꞌu̱ dä japäbi dä ntso̱ꞌmi?
5. Uni rä johya gä utihu̱ märꞌa nuꞌu̱ yä hogä notisia
Rä Zi Dada Jeoba bi nkargobi rä Hesu dä ꞌñuti yä jäꞌi nuꞌu̱ yä hogä notisia. ¿Hanja bi hyandi rä Hesu nunä ꞌme̱fi bi tꞌumbäbi? Hñetihu̱ Juan 4:34, ꞌnepu̱ thädihu̱ nuya yä ntꞌani:
Pa dä nja mä tehu̱, mä tsꞌe̱dihu̱ ꞌne pa gä pe̱ꞌtsihu̱ rä johya, di ja mꞌe̱di gä ñunihu̱ xä ñho. ¿Por hanja gi kamfri ge rä Hesu bi kompara dä me̱päbi rä bolunta Äjuä ko dä ñuni?
¿Te mä johya gi kamfri ge ma gi tini mu̱ gi xipäbi märꞌa nuꞌu̱ yä hogä notisia bi ehe de rä Zi Dada Jeoba?
Jaua rꞌa yä idea
Durante näꞌä rä mhuntsꞌi ja entre semänä tꞌudi hanja gä predikahu̱. Hyandi xä ñho hanja dä za gi fu̱di gi ñäui nꞌa rä jäꞌi pa gi predikabi.
Yꞌambäbi ri xahnäte te dä za gi pe̱fi pa njabu̱ ꞌnehe dä za gi thogi ha rä plataforma ngu nꞌa rä estudiante ha näꞌä rä mhuntsꞌi ja entre semänä. Kada dä tꞌaꞌi nꞌa rä asignación o discurso pa gi uni ha rä mhuntsꞌi, geꞌä ma dä maxꞌäꞌi pa gi pädi hanja gi ꞌñuti yä zi jäꞌi de rä Biblia.
Ha kada nꞌa rä lección de nunä he̱ꞌmi, ehe nꞌa rä parte habu̱ enä «Rꞌa yä jäꞌi enä». Nunä ma dä maxꞌäꞌi pa gi nsaya hanja dä za gi thädi ora te mää o te ñꞌani yä zi jäꞌi.
RꞌA YÄ JÄꞌI ENÄ: «¿Te xkä pe̱tꞌho?, o ¿te xkä jatho?».
¿Hanja dä za gi probecha nunä oportunida pa gi xipäbi näꞌä jäꞌi näꞌä xkä pädi ha ri curso de rä Biblia?
NÄꞌÄ DÄ PÄDIHU̱
Gä utihu̱ märꞌa yä zi jäꞌi nuꞌu̱ yä hogä notisia xtä pädihu̱ de rä Biblia, rꞌakägihu̱ ndunthi rä johya. Xki fu̱di gi predika ma gi hyandi ge hingä xa xä ñhei ja ngu gi mbeni.
Pa gä benihu̱
¿Por hanja xa mähyoni gä utihu̱ märꞌa yä zi jäꞌi nuꞌu̱ yä hogä notisia xtä pädihu̱ de rä Biblia?
¿Hanja dä za gi predikabi märꞌa ko ndunthi rä tꞌekꞌei?
¿Hanja dä za gi täpäbi rä ntsa ꞌne rä ntsu?
HABU̱ DÄ ZA GI PÄDI MÄ NꞌA TU̱I
Hyandi goho yä forma hanja dä za gi usa rä tarjeta de contacto pa gi fu̱di gi predikabi märꞌaa.
Hyandi goho yä konseho nuꞌu̱ ma dä maxꞌäꞌi ndunthi pa dä za gi predikabi yä zi jäꞌi.
«¿Xkä ñhoki pa gi mpe̱huä de gä jäꞌi?» (La Atalaya, septiembre de 2020)
Hyandi hanja rä Biblia pede de nꞌa rä zi nxutsi näꞌä bi me̱ꞌtsi rä balo pa bi ꞌñuti de Äjuä märꞌa yä zi jäꞌi. Nunä nꞌa rä hogä ejemplo pa yä bätsi ꞌne yä däta jäꞌi.
Hyandi te dä za gi pe̱fi pa njabu̱ dä za gi predikabi nuꞌu̱ ri familia tobe hingi pädi de rä Zi Dada Jeoba.