NXA̱DI 05
Nubu̱ Biblia bä ʼyëpu̱ yu̱ nhman Ojä pa nangekju̱
Jeoba xi ʼrakju̱ ʼna hogä regalo, nuʼä Biblia, nubu̱ bä ʼyëpu̱ 66 yu̱ libro. Pe̱ dä za̱tho gi nʼya̱nni: “¿Hapu̱ bä nekiʼä Biblia? ¿Toʼo na mbe̱tiʼä bä ʼyëpu̱?”. Pa gä thähmu̱ nuya yu̱ nʼta̱nni, mu̱di gä nuhu̱ ʼbe̱pu̱ bi zo̱ho̱ nuʼä na nhman Ojä nuʼu̱ yu̱ pa di ʼbu̱hmu̱.
1. Geʼbu̱ nuʼä Biblia bi ʼyoʼti yu̱ nʼyohu̱, ¿hanja di ënhmu̱ ge na mbe̱ti Ojäʼä?
40 yu̱ nʼyohu̱ bi ʼyoʼtä Biblia. Nuʼu̱ ho̱nʼtä go ʼbe̱ʼä ma ʼbe̱fi mi pe̱ʼu̱, ʼbu̱ʼu̱ mi hyoya o mi membe̱ti. Bi mu̱di bi ʼtoʼtä Biblia nuʼä je̱ya 1513 ante di mʼbu̱ʼä Cristo ʼne bi guadi nuʼä je̱ya 98 ge ya xi mʼbu̱ʼä Cristo. Janangeʼä, pa dä mba ma juadi dä ʼtoʼti bi thogi 1,600 nje̱ya. Pe̱ madägeʼä, nuʼä Biblia hindi nthe̱kpi. ¿Hanja ngübu̱ bi thogi? Geʼtho geʼä Ojä na mbe̱tiʼä (dä mi nu 1 Tesalonicenses 2:13). Nuʼu̱ yu̱ nʼyohu̱ bi ʼyoʼtä Biblia, himbi ʼyo̱ʼti nuʼä bi bënse̱. “Pe̱ gese̱ʼä ra hogä ndähi Ojä bi bëmbi ʼbe̱ʼä bi ʼyotbu̱ mi ʼyoʼträ nhman Ojäʼu̱” (2 Pedro 1:21).a Ko nangeʼä na espiritu santo, nuʼä Ojä bi bëmbäʼu̱ yu̱ nʼyohu̱ nuʼä ʼbe̱ʼä mi ja dä ʼyo̱ʼti (2 Timoteo 3:16).
2. ¿Toʼoʼu̱ dä za̱ di nja ʼna na Biblia?
Yu̱ jäʼi ge ga̱ʼtho yu̱ dähnini, yu̱ ʼtu̱hnini ʼne ho̱nʼtä go ma ne ña yu̱ jäʼi, dä za̱ dä bädi nuʼu̱ yu̱ hogä nhma bä ʼyëpu̱ ja Biblia (dä mi nu Apocalipsis 14:6). Nuʼä Ojä o̱ʼte ge dä mba ma hokiʼä Biblia xi ngü yu̱ ne ge ñaʼu̱ yu̱ jäʼi. ʼNe geʼä ra libro ge xi mba ma thoki xi ngü yu̱ ne ge ñaʼu̱ yu̱ jäʼi. ʼBe̱ ga̱ʼtho yu̱ jäʼi ʼbu̱kua ha̱i dä za̱ dä bädi nuʼä ʼbe̱ʼä manʼä Biblia, madägeʼä ho̱mdbu̱ go ndabu̱ ʼbu̱i o ho̱nʼtä go̱ ʼbe̱ʼä ma ne ñaʼu̱ yu̱ jäʼi.
3. ¿ʼBe̱ʼä bi ʼyo̱ʼtä Jeoba pa di jamansüʼä Biblia?
Nuʼä Biblia bi ʼtoʼti nubu̱ ja yu̱ su̱kuä ge hingi ha̱ʼti o ʼnahmantho ʼya. Bi thoni yu̱ royo ge yu̱ xizate ʼne yu̱ xiʼu̱ yu̱ za ge na thü papiro. Pe̱ nuʼu̱ yu̱ nʼyohu̱ mi ëspäʼä Biblia ʼne mi ne di jamansü na Nhman Ojä, bi ʼyoʼti xi ngü yu̱ kopia ʼne horbu̱tho i hyäki. Madägeʼä xi ngü yu̱ jäʼi ge mi ja yu̱ nʼtëdi mi ne xti juaʼä Biblia, kextä xi ngüʼu̱ bi ne dä ʼye̱nyu̱ te pa di jamansüʼä Biblia. Nuʼä Jeoba hinxi hye̱gi ge ʼbu̱ʼä dä zänhmi ge dä zokju̱ nangeʼä na Nhma. Nuʼä Biblia ëna: “Nuʼä na nhmanʼä ma Ojähu̱ di nja pa nzäntho” (Isaías 40:8).
GÄ PÄHMU̱ MANʼNA NANGEHNA
Gä pähmu̱ manʼna ʼbe̱ʼä bi ʼyo̱ʼtä Ojä pa dä bëmbäʼu̱ yu̱ nʼyohu̱ nuʼä dä ʼyorpu̱ Biblia. Kextä gä nuhu̱ nuʼä bi ʼyo̱ʼte pa di jamansüʼä Biblia ʼne pa ga̱ʼtho yu̱ jäʼi dä za̱ dä bädi nuʼä mambu̱.
4. Nuʼä Biblia xikju̱ toʼo na nʼyomfëniʼä nʼtoʼtibu̱
Dä mi nuui ä BIDEO. Mʼbe̱fa dä mi nuui 2 Timoteo 3:16 ʼne manhmi nangehna:
Geʼbu̱ geʼu̱ yu̱ nʼyohu̱ bi ʼyoʼtä Biblia, ¿hanja ʼtëmbi ge na Nhmanʼä Ojä?
¿Ha majuäni dä za̱ gä ëʼkyëihu̱ ge nuʼä Ojä bi xiʼu̱ yu̱ nʼyohu̱ nuʼä mi ja dä ʼyorpu̱ ja Biblia?
Nuʼä sekretario oʼti nuʼä karta, pe̱ nuʼä oʼti na nʼyomfëniʼä na hmü geʼtho geʼä xifi nuʼä ja dä ʼyoʼti. Njarbu̱thoho nuʼä Biblia geʼu̱ yu̱ nʼyohu̱ bi ʼyoʼti, pe̱ nuʼä mambu̱ na nʼyomfëniʼä Ojä.
5. Himbi za̱ bi mba ma ʼbe̱diʼä Biblia
Xi ngü yu̱ ʼtsu̱ʼtabi bi ne xti ʼbe̱ʼä Biblia, pe̱ komo nuʼä Biblia na mbe̱ti Ojäʼä, nuʼä, bi jamansü pa hindä mba ma ʼbe̱di. Kextä bi mʼbu̱ʼu̱ mi ʼbe̱ʼto ʼbu̱ ja yu̱ nijä ge hinmi ne ge nuʼu̱ yu̱ jäʼi dä manʼä Biblia. Pe̱ xi ngüʼu̱ yu̱ jäʼi madägeʼä bi ʼtsu̱i ʼne bi ne dä tho, bi ʼye̱nyu̱ te pa di jamansüʼä Biblia. Gä pähmu̱ ʼna nʼyohu̱ ge bi ʼyo̱ʼte ngübu̱, dä mi nuui ä BIDEO ʼne manhmi nangehna:
Nuya ge gi pädi ge emme xi nhëi ʼbe̱pu̱ bi mba ma jamansüʼä Biblia, ¿ha manʼna gi numanho ge gi ma? ¿Hanja?
Dä mi nuui ä Salmo 119:97 ʼne manhmi nangehna:
¿Hanja xi ngü yu̱ jäʼi bi ne dä ʼye̱nnä te pa di thoki nuʼä Biblia miʼra yu̱ ne ge ña yu̱ jäʼi pa xi ngüʼu̱ dä me̱ʼtsä ʼna Biblia?
6. ʼNa libro pa ga̱ʼtho yu̱ jäʼi
Nuʼä Biblia geʼä ʼna libro ge xi mba ma thoki miʼra yu̱ ne o idioma ʼne xi ngü xi mba ma daʼti. Dä mi nuui Hechos 10:34, 35 ʼne manhmi nangehna:
¿Hanja nuʼä Ojä ne ge dä mba ma hoki miʼra yu̱ ne o idioma nuʼä na Nhma ʼne dä mba daʼti xi ngü yu̱ hnini?
¿ʼBe̱ʼä manʼna gi ho nangeʼä Biblia?
ʼBe̱
ga̱ʼtho
yu̱ jäʼi
manʼä Biblia nuʼä ra ne ge ña o idioma ge pädi
Thogi
3,000
ge yu̱ ne o yu̱ idioma
ge jaʼä Biblia ge juadi o ʼna xe̱kitho
5,000 yu̱ miyone
ʼBe̱ geʼä ra ngü xi mba ma imprimiʼä Biblia.
Manʼna xi ngü ge dä geʼu̱ miʼra yu̱ libro ge ja
NUʼÄ ʼBE̱ʼÄ MANʼU̱ ʼRA YU̱ JÄʼI: “Nuʼä Biblia yu̱ jäʼitho bi ʼyoʼti”.
Xiʼe, ¿ʼbe̱ʼä gi mbëni?
¿ʼBe̱ʼä ürkähu̱ ge nuʼä Biblia majuäni na nʼyomfëniʼä Ojä?
NUʼÄ MANʼNA JAʼTSE̱DI
Nuʼä Biblia geʼä na Nhman Ojäʼä, ʼne nuʼä, xi ʼyo̱ʼte ge ga̱ʼtho yu̱ jäʼi dä za̱ dä manʼä Biblia.
Nuʼä dä pähmu̱
¿ʼBe̱ʼä ne dä ma ge nuʼä Ojä bi bëmbäʼu̱ yu̱ nʼyohu̱ ge dä ʼyoʼtä Biblia?
¿ʼBe̱ʼä manʼna gi ho nangeʼä ʼbe̱pu̱ xi bonʼkä Biblia madägeʼä xi ngüʼu̱ bi ne bi ʼbe̱di? ¿ʼBe̱ʼä gi mbëni ge xi mba ma thoki miʼra yu̱ ne o yu̱ idiomaʼä Biblia ʼne ge xi mba ma daʼti?
Nuya ge gä pädi nuʼä ga̱ʼtho xi ʼyo̱ʼtä Ojä pa dä zoʼi nangeʼä Biblia, ¿ʼbe̱ʼä gi mbëni gi ʼyo̱ʼte?
DÄ MI PÄDI MANʼNA
Dä mi pädi ʼbe̱ʼä ga̱ʼtho bi thoʼä Biblia: desde na mu̱di mi ʼtoʼti asta nuʼu̱ yu̱ pa di ʼbu̱hmu̱ya.
“¿ʼBe̱ʼä bi thogi pa dä za̱ di njaʼä Biblia” (¡Despertad!, nobiembre ge 2007)
Dä mi pädi ʼbe̱pu̱ bi bonʼkä Biblia madägeʼä mi ʼbu̱i hñuʼu̱ yu̱ nsu̱ihu̱.
“Nuʼä Biblia xi ngü ʼbe̱ʼä bi thogi, pe̱ bi bongi” (La Atalaya, núm. 4 2016)
Dä mi nu ʼbe̱ʼä ma hëi bi thogi ʼra yu̱ jäʼi nange bi thoki miʼra yu̱ ne o yu̱ idiomaʼä Biblia.
Nangeʼä ge ja xi ngü yu̱ kopiaʼä Biblia, ¿ʼbe̱pu̱ dä za̱ gi pädi ge njoʼo xi pa̱di nuʼä nʼtoʼtibu̱ na Nhman Ojä?
“¿Ha xi mba ma pa̱di nuʼä bä ʼyëpu̱ Biblia?” (Bä ʼyëpu̱ jw.org)