ਜ਼ਕਰਯਾਹ
13 “ਉਸ ਦਿਨ ਦਾਊਦ ਦੇ ਘਰਾਣੇ ਅਤੇ ਯਰੂਸ਼ਲਮ ਦੇ ਵਾਸੀਆਂ ਲਈ ਇਕ ਖੂਹ ਪੁੱਟਿਆ ਜਾਵੇਗਾ ਤਾਂਕਿ ਉਹ ਆਪਣੇ ਪਾਪ ਤੇ ਅਸ਼ੁੱਧਤਾ ਨੂੰ ਧੋ ਸਕਣ।+
2 “ਉਸ ਦਿਨ” ਸੈਨਾਵਾਂ ਦਾ ਯਹੋਵਾਹ ਕਹਿੰਦਾ ਹੈ, “ਮੈਂ ਦੇਸ਼ ਵਿੱਚੋਂ ਬੁੱਤਾਂ ਦੇ ਨਾਂ ਮਿਟਾ ਦੇਵਾਂਗਾ+ ਅਤੇ ਉਨ੍ਹਾਂ ਨੂੰ ਫਿਰ ਕਦੇ ਚੇਤੇ ਨਹੀਂ ਕੀਤਾ ਜਾਵੇਗਾ; ਮੈਂ ਦੇਸ਼ ਵਿੱਚੋਂ ਨਬੀਆਂ ਅਤੇ ਉਨ੍ਹਾਂ ਦਾ ਨਾਮੋ-ਨਿਸ਼ਾਨ ਮਿਟਾ ਦੇਵਾਂਗਾ ਜੋ ਪਰਮੇਸ਼ੁਰ ਦੀਆਂ ਨਜ਼ਰਾਂ ਵਿਚ ਅਸ਼ੁੱਧ ਕੰਮ ਕਰਨ ਦੀ ਹੱਲਾਸ਼ੇਰੀ ਦਿੰਦੇ ਹਨ।+ 3 ਜੇ ਕੋਈ ਆਦਮੀ ਦੁਬਾਰਾ ਭਵਿੱਖਬਾਣੀ ਕਰੇਗਾ, ਤਾਂ ਉਸ ਦੇ ਮਾਤਾ-ਪਿਤਾ, ਜਿਨ੍ਹਾਂ ਨੇ ਉਸ ਨੂੰ ਜਨਮ ਦਿੱਤਾ, ਉਸ ਨੂੰ ਕਹਿਣਗੇ, ‘ਤੂੰ ਜੀਉਂਦਾ ਨਹੀਂ ਰਹੇਂਗਾ ਕਿਉਂਕਿ ਤੂੰ ਯਹੋਵਾਹ ਦਾ ਨਾਂ ਲੈ ਕੇ ਝੂਠੀਆਂ ਗੱਲਾਂ ਕਹੀਆਂ ਹਨ।’ ਅਤੇ ਉਸ ਦੇ ਮਾਤਾ-ਪਿਤਾ, ਜਿਨ੍ਹਾਂ ਨੇ ਉਸ ਨੂੰ ਜਨਮ ਦਿੱਤਾ, ਉਸ ਦੇ ਭਵਿੱਖਬਾਣੀ ਕਰਨ ਕਰਕੇ ਉਸ ਨੂੰ ਵਿੰਨ੍ਹ ਦੇਣਗੇ।+
4 “ਉਸ ਦਿਨ ਹਰ ਨਬੀ ਜਦੋਂ ਵੀ ਭਵਿੱਖਬਾਣੀ ਕਰੇਗਾ, ਉਹ ਦਰਸ਼ਣ ਦੱਸਦੇ ਸਮੇਂ ਸ਼ਰਮਿੰਦਾ ਹੋਵੇਗਾ; ਉਹ ਧੋਖਾ ਦੇਣ ਲਈ ਵਾਲ਼ਾਂ ਦਾ ਬਣਿਆ ਚੋਗਾ* ਨਹੀਂ ਪਾਉਣਗੇ।+ 5 ਅਤੇ ਉਹ ਕਹੇਗਾ, ‘ਮੈਂ ਨਬੀ ਨਹੀਂ ਹਾਂ। ਮੈਂ ਤਾਂ ਜ਼ਮੀਨ ਵਾਹੁਣ ਵਾਲਾ ਆਦਮੀ ਹਾਂ ਕਿਉਂਕਿ ਮੈਨੂੰ ਛੋਟੇ ਹੁੰਦੇ ਨੂੰ ਇਕ ਆਦਮੀ ਨੇ ਖ਼ਰੀਦ ਲਿਆ ਸੀ।’ 6 ਅਤੇ ਜੇ ਕੋਈ ਉਸ ਨੂੰ ਪੁੱਛੇ, ‘ਤੇਰੇ ਮੋਢਿਆਂ ਵਿਚਕਾਰ* ਇਹ ਜ਼ਖ਼ਮ ਕੀ ਹਨ?’ ਤਾਂ ਉਹ ਜਵਾਬ ਦੇਵੇਗਾ, ‘ਇਹ ਉਹ ਜ਼ਖ਼ਮ ਹਨ ਜੋ ਮੈਨੂੰ ਆਪਣੇ ਦੋਸਤਾਂ* ਦੇ ਘਰ ਵਿਚ ਮਿਲੇ।’”
7 “ਹੇ ਤਲਵਾਰ, ਮੇਰੇ ਚਰਵਾਹੇ ਖ਼ਿਲਾਫ਼ ਉੱਠ,+
ਉਸ ਆਦਮੀ ਖ਼ਿਲਾਫ਼ ਜੋ ਮੇਰਾ ਸਾਥੀ ਹੈ,” ਸੈਨਾਵਾਂ ਦਾ ਯਹੋਵਾਹ ਕਹਿੰਦਾ ਹੈ।
8 “ਸਾਰੇ ਦੇਸ਼ ਵਿਚ,” ਯਹੋਵਾਹ ਕਹਿੰਦਾ ਹੈ,
“ਦੋ-ਤਿਹਾਈ ਲੋਕ ਵੱਢੇ ਜਾਣਗੇ ਤੇ ਨਾਸ਼ ਹੋ ਜਾਣਗੇ;
ਅਤੇ ਇਕ-ਤਿਹਾਈ ਲੋਕਾਂ ਨੂੰ ਇਸ ਵਿਚ ਛੱਡ ਦਿੱਤਾ ਜਾਵੇਗਾ।
9 ਫਿਰ ਮੈਂ ਇਕ-ਤਿਹਾਈ ਲੋਕਾਂ ਨੂੰ ਅੱਗ ਵਿਚ ਤਾਵਾਂਗਾ;
ਮੈਂ ਉਨ੍ਹਾਂ ਨੂੰ ਚਾਂਦੀ ਵਾਂਗ ਸ਼ੁੱਧ ਕਰਾਂਗਾ
ਅਤੇ ਸੋਨੇ ਵਾਂਗ ਪਰਖਾਂਗਾ।+
ਉਹ ਮੇਰਾ ਨਾਂ ਲੈ ਕੇ ਮੈਨੂੰ ਪੁਕਾਰਨਗੇ
ਅਤੇ ਮੈਂ ਉਨ੍ਹਾਂ ਨੂੰ ਜਵਾਬ ਦੇਵਾਂਗਾ।
ਮੈਂ ਕਹਾਂਗਾ, ‘ਇਹ ਮੇਰੇ ਲੋਕ ਹਨ’+
ਅਤੇ ਉਹ ਕਹਿਣਗੇ, ‘ਯਹੋਵਾਹ ਸਾਡਾ ਪਰਮੇਸ਼ੁਰ ਹੈ।’”