ਦੂਜਾ ਸਮੂਏਲ

10 ਬਾਅਦ ਵਿਚ ਅੰਮੋਨੀਆਂ+ ਦਾ ਰਾਜਾ ਮਰ ਗਿਆ ਅਤੇ ਉਸ ਦਾ ਪੁੱਤਰ ਹਾਨੂਨ ਉਸ ਦੀ ਥਾਂ ਰਾਜ ਕਰਨ ਲੱਗਾ।+ 2 ਇਸ ਕਰਕੇ ਦਾਊਦ ਨੇ ਕਿਹਾ: “ਮੈਂ ਨਾਹਾਸ਼ ਦੇ ਪੁੱਤਰ ਹਾਨੂਨ ਨਾਲ ਅਟੱਲ ਪਿਆਰ ਕਰਾਂਗਾ ਜਿਵੇਂ ਉਸ ਦੇ ਪਿਤਾ ਨੇ ਮੇਰੇ ਨਾਲ ਅਟੱਲ ਪਿਆਰ ਕੀਤਾ ਸੀ।” ਇਸ ਲਈ ਦਾਊਦ ਨੇ ਆਪਣੇ ਸੇਵਕਾਂ ਨੂੰ ਭੇਜਿਆ ਕਿ ਉਹ ਉਸ ਨੂੰ ਦਿਲਾਸਾ ਦੇਣ ਕਿਉਂਕਿ ਉਸ ਦੇ ਪਿਤਾ ਦੀ ਮੌਤ ਹੋ ਗਈ ਸੀ। ਪਰ ਜਦੋਂ ਦਾਊਦ ਦੇ ਸੇਵਕ ਅੰਮੋਨੀਆਂ ਦੇ ਦੇਸ਼ ਵਿਚ ਆਏ, 3 ਤਾਂ ਅੰਮੋਨੀਆਂ ਦੇ ਹਾਕਮਾਂ ਨੇ ਆਪਣੇ ਮਾਲਕ ਹਾਨੂਨ ਨੂੰ ਕਿਹਾ: “ਤੇਰੇ ਖ਼ਿਆਲ ਵਿਚ ਕੀ ਦਾਊਦ ਨੇ ਤੇਰੇ ਪਿਤਾ ਦਾ ਸਨਮਾਨ ਕਰਨ ਲਈ ਦਿਲਾਸਾ ਦੇਣ ਵਾਲੇ ਬੰਦੇ ਤੇਰੇ ਕੋਲ ਭੇਜੇ ਹਨ? ਕੀ ਦਾਊਦ ਨੇ ਆਪਣੇ ਸੇਵਕਾਂ ਨੂੰ ਤੇਰੇ ਕੋਲ ਇਸ ਕਰਕੇ ਨਹੀਂ ਘੱਲਿਆ ਕਿ ਉਹ ਸ਼ਹਿਰ ਨੂੰ ਦੇਖਣ ਅਤੇ ਇਸ ਦੀ ਜਾਸੂਸੀ ਕਰਨ ਤੇ ਇਸ ਨੂੰ ਤਬਾਹ ਕਰ ਦੇਣ?” 4 ਇਸ ਲਈ ਹਾਨੂਨ ਨੇ ਦਾਊਦ ਦੇ ਸੇਵਕਾਂ ਨੂੰ ਫੜ ਕੇ ਉਨ੍ਹਾਂ ਦੀ ਇਕ ਪਾਸੇ ਦੀ ਦਾੜ੍ਹੀ ਮੁੰਨ ਦਿੱਤੀ+ ਅਤੇ ਉਨ੍ਹਾਂ ਦੇ ਕੱਪੜੇ ਲੱਕ ਤੋਂ ਥੱਲੇ ਕੱਟ ਕੇ ਉਨ੍ਹਾਂ ਨੂੰ ਭੇਜ ਦਿੱਤਾ। 5 ਜਦੋਂ ਦਾਊਦ ਨੂੰ ਇਸ ਬਾਰੇ ਦੱਸਿਆ ਗਿਆ, ਤਾਂ ਉਸ ਨੇ ਤੁਰੰਤ ਉਨ੍ਹਾਂ ਕੋਲ ਆਦਮੀ ਭੇਜੇ ਕਿਉਂਕਿ ਉਨ੍ਹਾਂ ਦਾ ਘੋਰ ਨਿਰਾਦਰ ਕੀਤਾ ਗਿਆ ਸੀ; ਅਤੇ ਰਾਜੇ ਨੇ ਉਨ੍ਹਾਂ ਨੂੰ ਕਿਹਾ: “ਜਦ ਤਕ ਤੁਹਾਡੀ ਦਾੜ੍ਹੀ ਦੁਬਾਰਾ ਨਹੀਂ ਵਧ ਜਾਂਦੀ, ਉਦੋਂ ਤਕ ਤੁਸੀਂ ਯਰੀਹੋ+ ਵਿਚ ਹੀ ਰਹਿਓ ਅਤੇ ਫਿਰ ਮੁੜ ਆਇਓ।”

6 ਕੁਝ ਸਮੇਂ ਬਾਅਦ ਅੰਮੋਨੀਆਂ ਨੇ ਦੇਖਿਆ ਕਿ ਉਹ ਦਾਊਦ ਦੀਆਂ ਨਜ਼ਰਾਂ ਵਿਚ ਘਿਣਾਉਣੇ ਬਣ ਗਏ ਸਨ, ਇਸ ਲਈ ਅੰਮੋਨੀਆਂ ਨੇ ਸੰਦੇਸ਼ ਦੇਣ ਵਾਲਿਆਂ ਨੂੰ ਘੱਲਿਆ ਅਤੇ ਬੈਤ-ਰਹੋਬ+ ਅਤੇ ਸੋਬਾਹ ਤੋਂ 20,000 ਪੈਦਲ ਚੱਲਣ ਵਾਲੇ ਸੀਰੀਆਈ ਫ਼ੌਜੀ+ ਕਿਰਾਏ ʼਤੇ ਲਏ; ਮਾਕਾਹ+ ਦੇ ਰਾਜੇ ਨੂੰ 1,000 ਫ਼ੌਜੀਆਂ ਸਣੇ; ਅਤੇ ਇਸ਼ਟੋਬ* ਤੋਂ 12,000 ਆਦਮੀ ਲਏ।+ 7 ਜਦੋਂ ਦਾਊਦ ਨੇ ਇਸ ਬਾਰੇ ਸੁਣਿਆ, ਤਾਂ ਉਸ ਨੇ ਯੋਆਬ ਅਤੇ ਆਪਣੇ ਸਭ ਤੋਂ ਤਾਕਤਵਰ ਯੋਧਿਆਂ ਸਣੇ ਸਾਰੀ ਫ਼ੌਜ ਨੂੰ ਭੇਜਿਆ।+ 8 ਫਿਰ ਅੰਮੋਨੀ ਨਿਕਲੇ ਅਤੇ ਸ਼ਹਿਰ ਦੇ ਦਰਵਾਜ਼ੇ ʼਤੇ ਮੋਰਚਾ ਬੰਨ੍ਹ ਕੇ ਖੜ੍ਹ ਗਏ ਅਤੇ ਸੋਬਾਹ ਤੇ ਰਹੋਬ ਤੋਂ ਆਏ ਸੀਰੀਆਈ ਫ਼ੌਜੀ ਇਸ਼ਟੋਬ* ਅਤੇ ਮਾਕਾਹ ਦੇ ਨਾਲ ਖੁੱਲ੍ਹੇ ਮੈਦਾਨ ਵਿਚ ਅਲੱਗ ਖੜ੍ਹੇ ਸਨ।

9 ਜਦੋਂ ਯੋਆਬ ਨੇ ਦੇਖਿਆ ਕਿ ਅੱਗਿਓਂ ਅਤੇ ਪਿੱਛਿਓਂ ਫ਼ੌਜਾਂ ਉਸ ਉੱਤੇ ਹਮਲਾ ਕਰਨ ਵਾਲੀਆਂ ਸਨ, ਤਾਂ ਉਸ ਨੇ ਇਜ਼ਰਾਈਲ ਦੇ ਸਭ ਤੋਂ ਵਧੀਆ ਫ਼ੌਜੀਆਂ ਵਿੱਚੋਂ ਕੁਝ ਜਣੇ ਚੁਣੇ ਅਤੇ ਉਨ੍ਹਾਂ ਨੂੰ ਸੀਰੀਆਈ ਫ਼ੌਜੀਆਂ ਦਾ ਮੁਕਾਬਲਾ ਕਰਨ ਲਈ ਮੋਰਚਾ ਬੰਨ੍ਹਣ ਲਈ ਕਿਹਾ।+ 10 ਉਸ ਨੇ ਬਾਕੀ ਆਦਮੀਆਂ ਨੂੰ ਆਪਣੇ ਭਰਾ ਅਬੀਸ਼ਈ ਦੇ ਅਧੀਨ* ਰੱਖਿਆ+ ਤਾਂਕਿ ਉਹ ਅੰਮੋਨੀਆਂ+ ਦਾ ਮੁਕਾਬਲਾ ਕਰਨ ਲਈ ਮੋਰਚਾ ਬੰਨ੍ਹਣ। 11 ਫਿਰ ਉਸ ਨੇ ਕਿਹਾ: “ਜੇ ਸੀਰੀਆਈ ਫ਼ੌਜੀ ਮੇਰੇ ʼਤੇ ਭਾਰੀ ਪੈ ਗਏ, ਤਾਂ ਤੂੰ ਮੈਨੂੰ ਬਚਾਉਣ ਆਈਂ; ਪਰ ਜੇ ਅੰਮੋਨੀ ਤੇਰੇ ʼਤੇ ਭਾਰੀ ਪੈ ਗਏ, ਤਾਂ ਮੈਂ ਤੈਨੂੰ ਬਚਾਉਣ ਆਵਾਂਗਾ। 12 ਸਾਨੂੰ ਆਪਣੇ ਲੋਕਾਂ ਅਤੇ ਆਪਣੇ ਪਰਮੇਸ਼ੁਰ ਦੇ ਸ਼ਹਿਰਾਂ ਖ਼ਾਤਰ ਤਕੜੇ ਹੋਣ ਅਤੇ ਦਲੇਰ ਬਣਨ ਦੀ ਲੋੜ ਹੈ+ ਅਤੇ ਯਹੋਵਾਹ ਉਹੀ ਕਰੇਗਾ ਜੋ ਉਸ ਦੀਆਂ ਨਜ਼ਰਾਂ ਵਿਚ ਚੰਗਾ ਹੈ।”+

13 ਫਿਰ ਯੋਆਬ ਅਤੇ ਉਸ ਦੇ ਆਦਮੀ ਯੁੱਧ ਵਿਚ ਸੀਰੀਆਈ ਫ਼ੌਜੀਆਂ ਨਾਲ ਮੁਕਾਬਲਾ ਕਰਨ ਲਈ ਅੱਗੇ ਵਧੇ ਅਤੇ ਉਹ ਉਸ ਅੱਗੋਂ ਭੱਜ ਗਏ।+ 14 ਜਦੋਂ ਅੰਮੋਨੀਆਂ ਨੇ ਦੇਖਿਆ ਕਿ ਸੀਰੀਆਈ ਫ਼ੌਜੀ ਭੱਜ ਗਏ ਸਨ, ਤਾਂ ਉਹ ਅਬੀਸ਼ਈ ਦੇ ਅੱਗੋਂ ਭੱਜ ਗਏ ਅਤੇ ਸ਼ਹਿਰ ਅੰਦਰ ਚਲੇ ਗਏ। ਉਸ ਤੋਂ ਬਾਅਦ ਯੋਆਬ ਅੰਮੋਨੀਆਂ ਕੋਲੋਂ ਯਰੂਸ਼ਲਮ ਵਾਪਸ ਮੁੜ ਆਇਆ।

15 ਜਦੋਂ ਸੀਰੀਆਈ ਫ਼ੌਜੀਆਂ ਨੇ ਦੇਖਿਆ ਕਿ ਉਹ ਇਜ਼ਰਾਈਲ ਹੱਥੋਂ ਹਾਰ ਗਏ ਸਨ, ਤਾਂ ਉਹ ਦੁਬਾਰਾ ਇਕੱਠੇ ਹੋਏ।+ 16 ਇਸ ਲਈ ਹਦਦਅਜ਼ਰ+ ਨੇ ਦਰਿਆ*+ ਦੇ ਇਲਾਕੇ ਤੋਂ ਸੀਰੀਆਈ ਫ਼ੌਜੀਆਂ ਨੂੰ ਬੁਲਾਇਆ ਅਤੇ ਉਹ ਹਦਦਅਜ਼ਰ ਦੀ ਫ਼ੌਜ ਦੇ ਮੁਖੀ ਸ਼ੋਬਕ ਦੀ ਅਗਵਾਈ ਵਿਚ ਹੇਲਾਮ ਆਏ।

17 ਜਦੋਂ ਦਾਊਦ ਨੂੰ ਇਹ ਖ਼ਬਰ ਮਿਲੀ, ਤਾਂ ਉਸ ਨੇ ਤੁਰੰਤ ਸਾਰੇ ਇਜ਼ਰਾਈਲ ਨੂੰ ਇਕੱਠਾ ਕੀਤਾ ਅਤੇ ਯਰਦਨ ਦਰਿਆ ਪਾਰ ਕਰ ਕੇ ਹੇਲਾਮ ਆਇਆ। ਫਿਰ ਸੀਰੀਆਈ ਫ਼ੌਜੀਆਂ ਨੇ ਦਾਊਦ ਦਾ ਮੁਕਾਬਲਾ ਕਰਨ ਲਈ ਮੋਰਚਾ ਬੰਨ੍ਹਿਆ ਅਤੇ ਉਸ ਨਾਲ ਯੁੱਧ ਕੀਤਾ।+ 18 ਪਰ ਸੀਰੀਆਈ ਫ਼ੌਜੀ ਇਜ਼ਰਾਈਲ ਅੱਗੋਂ ਭੱਜ ਗਏ; ਦਾਊਦ ਨੇ ਸੀਰੀਆਈ ਫ਼ੌਜ ਦੇ 700 ਰਥਵਾਨਾਂ ਅਤੇ 40,000 ਘੋੜਸਵਾਰਾਂ ਨੂੰ ਮਾਰ ਦਿੱਤਾ ਅਤੇ ਉਸ ਨੇ ਉਨ੍ਹਾਂ ਦੀ ਫ਼ੌਜ ਦੇ ਮੁਖੀ ਸ਼ੋਬਕ ʼਤੇ ਵਾਰ ਕੀਤਾ ਤੇ ਉਹ ਉੱਥੇ ਹੀ ਮਰ ਗਿਆ।+ 19 ਜਦੋਂ ਹਦਦਅਜ਼ਰ ਦੇ ਅਧੀਨ ਸਾਰੇ ਰਾਜਿਆਂ ਯਾਨੀ ਉਸ ਦੇ ਸੇਵਕਾਂ ਨੇ ਦੇਖਿਆ ਕਿ ਇਜ਼ਰਾਈਲ ਨੇ ਉਨ੍ਹਾਂ ਨੂੰ ਹਰਾ ਦਿੱਤਾ ਸੀ, ਤਾਂ ਉਨ੍ਹਾਂ ਨੇ ਫ਼ੌਰਨ ਇਜ਼ਰਾਈਲ ਨਾਲ ਸ਼ਾਂਤੀ ਕਾਇਮ ਕਰ ਲਈ ਅਤੇ ਉਨ੍ਹਾਂ ਦੇ ਅਧੀਨ ਹੋ ਗਏ;+ ਸੀਰੀਆਈ ਫ਼ੌਜ ਨੇ ਫਿਰ ਕਦੇ ਅੰਮੋਨੀਆਂ ਦੀ ਮਦਦ ਕਰਨ ਦੀ ਹਿੰਮਤ ਨਹੀਂ ਕੀਤੀ।