ਕੀ ਮਰੇ ਹੋਏ ਲੋਕਾਂ ਲਈ ਕੋਈ ਉਮੀਦ ਹੈ?

1. ਮਰੇ ਹੋਏ ਲੋਕਾਂ ਬਾਰੇ ਕਿਹੜੀ ਖ਼ੁਸ਼ ਖ਼ਬਰੀ ਹੈ?

ਜਦ ਯਿਸੂ ਯਰੂਸ਼ਲਮ ਨੇੜੇ ਬੈਥਨੀਆ ਨਾਂ ਦੇ ਪਿੰਡ ਪਹੁੰਚਿਆ, ਤਾਂ ਉਸ ਦੇ ਦੋਸਤ ਲਾਜ਼ਰ ਨੂੰ ਮਰੇ ਚਾਰ ਦਿਨ ਹੋ ਗਏ ਸਨ। ਯਿਸੂ ਉਸ ਦੀਆਂ ਭੈਣਾਂ, ਮਾਰਥਾ ਤੇ ਮਰੀਅਮ ਨਾਲ ਉਸ ਦੀ ਕਬਰ ʼਤੇ ਗਿਆ। ਜਲਦੀ ਹੀ ਬਹੁਤ ਸਾਰੇ ਲੋਕ ਇਕੱਠੇ ਹੋ ਗਏ। ਕੀ ਤੁਸੀਂ ਕਲਪਨਾ ਕਰ ਸਕਦੇ ਹੋ ਕਿ ਲਾਜ਼ਰ ਦੀਆਂ ਭੈਣਾਂ ਕਿੰਨੀਆਂ ਖ਼ੁਸ਼ ਹੋਈਆਂ ਹੋਣੀਆਂ ਜਦ ਯਿਸੂ ਨੇ ਉਨ੍ਹਾਂ ਦੇ ਭਰਾ ਨੂੰ ਜੀਉਂਦਾ ਕੀਤਾ?​—ਯੂਹੰਨਾ 11:21-24, 38-44 ਪੜ੍ਹੋ।

ਮਾਰਥਾ ਨੂੰ ਇਸ ਖ਼ੁਸ਼ ਖ਼ਬਰੀ ਬਾਰੇ ਪਤਾ ਸੀ ਕਿ ਮਰੇ ਹੋਏ ਲੋਕਾਂ ਨੂੰ ਦੁਬਾਰਾ ਜੀਉਂਦਾ ਕੀਤਾ ਜਾਵੇਗਾ। ਉਸ ਨੂੰ ਪਤਾ ਸੀ ਕਿ ਯਹੋਵਾਹ ਮਰੇ ਹੋਏ ਲੋਕਾਂ ਨੂੰ ਧਰਤੀ ʼਤੇ ਰਹਿਣ ਲਈ ਦੁਬਾਰਾ ਜੀਉਂਦਾ ਕਰੇਗਾ।​—ਅੱਯੂਬ 14:14, 15 ਪੜ੍ਹੋ।

2. ਮਰਨ ਤੋਂ ਬਾਅਦ ਕੀ ਹੁੰਦਾ ਹੈ?

ਅਸੀਂ ਮਿੱਟੀ ਤੋਂ ਬਣੇ ਇਨਸਾਨ ਹਾਂ। (ਉਤਪਤ 2:7; 3:19) ਸਾਡੇ ਸਰੀਰ ਦੇ ਅੰਦਰ ਕੋਈ ਆਤਮਾ ਵਰਗੀ ਚੀਜ਼ ਨਹੀਂ ਹੈ ਜੋ ਮੌਤ ਹੋਣ ਤੇ ਜੀਉਂਦੀ ਰਹਿੰਦੀ ਹੈ। ਜਦ ਅਸੀਂ ਮਰ ਜਾਂਦੇ ਹਾਂ, ਤਾਂ ਸਾਡਾ ਦਿਮਾਗ਼ ਵੀ ਮਰ ਜਾਂਦਾ ਹੈ ਯਾਨੀ ਉਹ ਕੋਈ ਕੰਮ ਨਹੀਂ ਕਰਦਾ। ਇਸੇ ਕਰਕੇ ਲਾਜ਼ਰ ਨੇ ਜੀਉਂਦਾ ਹੋ ਜਾਣ ਤੋਂ ਬਾਅਦ ਆਪਣੀ ਮੌਤ ਬਾਰੇ ਕੁਝ ਨਹੀਂ ਦੱਸਿਆ ਕਿਉਂਕਿ ਮਰੇ ਹੋਏ ਕੁਝ ਨਹੀਂ ਜਾਣਦੇ।​—ਜ਼ਬੂਰਾਂ ਦੀ ਪੋਥੀ 146:4; ਉਪਦੇਸ਼ਕ ਦੀ ਪੋਥੀ 9:5, 6, 10 ਪੜ੍ਹੋ।

ਕੀ ਪਰਮੇਸ਼ੁਰ ਮਰੇ ਹੋਇਆਂ ਨੂੰ ਅੱਗ ਵਿਚ ਤਸੀਹੇ ਦਿੰਦਾ ਹੈ? ਬਾਈਬਲ ਸਾਨੂੰ ਸਾਫ਼ ਦੱਸਦੀ ਹੈ ਕਿ ਮਰੇ ਹੋਏ ਕੁਝ ਨਹੀਂ ਜਾਣਦੇ, ਇਸ ਲਈ ਇਹ ਸਿੱਖਿਆ ਬਿਲਕੁਲ ਗ਼ਲਤ ਹੈ ਅਤੇ ਇਹ ਰੱਬ ਨੂੰ ਬਦਨਾਮ ਕਰਦੀ ਹੈ। ਲੋਕਾਂ ਨੂੰ ਅੱਗ ਵਿਚ ਤਸੀਹੇ ਦੇਣ ਦਾ ਖ਼ਿਆਲ ਮਨ ਵਿਚ ਲਿਆਉਣਾ ਵੀ ਰੱਬ ਲਈ ਘਿਣਾਉਣਾ ਹੈ।​—ਯਿਰਮਿਯਾਹ 7:31 ਪੜ੍ਹੋ।

ਵੀਡੀਓ ਦੇਖੋ ਮਰਨ ਤੋਂ ਬਾਅਦ ਕੀ ਹੁੰਦਾ ਹੈ?

3. ਕੀ ਮਰੇ ਹੋਏ ਲੋਕ ਸਾਡੇ ਨਾਲ ਗੱਲ ਕਰ ਸਕਦੇ ਹਨ?

ਮਰੇ ਹੋਏ ਲੋਕ ਨਾ ਹੀ ਬੋਲ ਸਕਦੇ ਹਨ ਤੇ ਨਾ ਹੀ ਸੁਣ ਸਕਦੇ ਹਨ। (ਜ਼ਬੂਰਾਂ ਦੀ ਪੋਥੀ 115:17) ਪਰ ਕੁਝ ਦੂਤ ਬਹੁਤ ਦੁਸ਼ਟ ਹਨ ਅਤੇ ਉਹ ਕਿਸੇ ਮਰੇ ਹੋਏ ਵਿਅਕਤੀ ਦੀ ਆਵਾਜ਼ ਕੱਢ ਕੇ ਲੋਕਾਂ ਨਾਲ ਗੱਲਾਂ ਕਰਦੇ ਹਨ। (2 ਪਤਰਸ 2:4) ਯਹੋਵਾਹ ਮਰੇ ਹੋਏ ਲੋਕਾਂ ਨਾਲ ਗੱਲ ਕਰਨ ਦੀ ਕੋਸ਼ਿਸ਼ ਕਰਨ ਤੋਂ ਮਨ੍ਹਾ ਕਰਦਾ ਹੈ।​—ਬਿਵਸਥਾ ਸਾਰ 18:10, 11 ਪੜ੍ਹੋ।

4. ਕਿਨ੍ਹਾਂ ਨੂੰ ਮੁੜ ਜੀਉਂਦਾ ਕੀਤਾ ਜਾਵੇਗਾ?

ਲੱਖਾਂ ਹੀ ਮਰ ਚੁੱਕੇ ਲੋਕਾਂ ਨੂੰ ਇਸ ਧਰਤੀ ʼਤੇ ਮੁੜ ਜੀਉਂਦਾ ਕੀਤਾ ਜਾਵੇਗਾ। ਉਨ੍ਹਾਂ ਵਿਚ ਕੁਝ ਅਜਿਹੇ ਲੋਕ ਵੀ ਹੋਣਗੇ ਜੋ ਪਰਮੇਸ਼ੁਰ ਨੂੰ ਜਾਣਦੇ ਨਹੀਂ ਸਨ ਅਤੇ ਜਿਨ੍ਹਾਂ ਨੇ ਬੁਰੇ ਕੰਮ ਕੀਤੇ ਸਨ।​—ਲੂਕਾ 23:43; ਰਸੂਲਾਂ ਦੇ ਕੰਮ 24:15 ਪੜ੍ਹੋ।

ਅਜਿਹੇ ਲੋਕ ਰੱਬ ਬਾਰੇ ਸੱਚਾਈ ਸਿੱਖ ਸਕਣਗੇ ਤੇ ਯਿਸੂ ਦਾ ਕਹਿਣਾ ਮੰਨ ਕੇ ਉਸ ʼਤੇ ਨਿਹਚਾ ਰੱਖ ਸਕਣਗੇ। (ਪ੍ਰਕਾਸ਼ ਦੀ ਕਿਤਾਬ 20:11-13) ਦੁਬਾਰਾ ਜੀਉਂਦੇ ਹੋਏ ਲੋਕਾਂ ਵਿੱਚੋਂ ਜਿਹੜੇ ਚੰਗੇ ਕੰਮ ਕਰਨਗੇ, ਉਹ ਧਰਤੀ ʼਤੇ ਹਮੇਸ਼ਾ ਲਈ ਜੀ ਸਕਣਗੇ।​—ਯੂਹੰਨਾ 5:28, 29 ਪੜ੍ਹੋ।

5. ਮਰ ਚੁੱਕੇ ਲੋਕਾਂ ਨੂੰ ਦੁਬਾਰਾ ਜੀਉਂਦਾ ਕੀਤੇ ਜਾਣ ਦੀ ਉਮੀਦ ਤੋਂ ਸਾਨੂੰ ਯਹੋਵਾਹ ਬਾਰੇ ਕੀ ਪਤਾ ਲੱਗਦਾ ਹੈ?

ਮਰੇ ਹੋਏ ਲੋਕਾਂ ਨੂੰ ਇਸ ਲਈ ਜੀਉਂਦਾ ਕੀਤਾ ਜਾ ਸਕਦਾ ਹੈ ਕਿਉਂਕਿ ਰੱਬ ਨੇ ਆਪਣੇ ਪੁੱਤਰ ਨੂੰ ਸਾਡੇ ਲਈ ਆਪਣੀ ਜਾਨ ਕੁਰਬਾਨ ਕਰਨ ਲਈ ਭੇਜਿਆ ਸੀ। ਇਸ ਤੋਂ ਅਸੀਂ ਯਹੋਵਾਹ ਦੇ ਪਿਆਰ ਤੇ ਅਪਾਰ ਕਿਰਪਾ ਬਾਰੇ ਸਿੱਖ ਸਕਦੇ ਹਾਂ। ਜਦ ਮਰ ਚੁੱਕੇ ਲੋਕ ਦੁਬਾਰਾ ਜੀਉਂਦਾ ਕੀਤੇ ਜਾਣਗੇ, ਤਾਂ ਤੁਸੀਂ ਖ਼ਾਸ ਕਰਕੇ ਕਿਸ ਨੂੰ ਦੇਖਣਾ ਚਾਹੋਗੇ?​—ਯੂਹੰਨਾ 3:16; ਰੋਮੀਆਂ 6:23 ਪੜ੍ਹੋ।