ਮੈਂ ਸੈਕਸ ਕਰਨ ਦੇ ਦਬਾਅ ਦਾ ਸਾਮ੍ਹਣਾ ਕਿਵੇਂ ਕਰਾਂ?

ਤੁਸੀਂ ਕੀ ਕਰਦੇ?

ਕਲਪਨਾ ਕਰੋ: ਹੈਦਰ ਦੋ ਮਹੀਨੇ ਪਹਿਲਾਂ ਮਾਈਕ ਨੂੰ ਮਿਲੀ ਸੀ, ਪਰ ਉਸ ਨੂੰ ਲੱਗਦਾ ਹੈ ਕਿ ਉਹ ਉਸ ਨੂੰ ਸਦੀਆਂ ਤੋਂ ਜਾਣਦੀ ਹੈ। ਉਹ ਇਕ-ਦੂਜੇ ਨੂੰ ਮੈਸਿਜ ਕਰਦੇ ਰਹਿੰਦੇ ਹਨ ਅਤੇ ਕਈ-ਕਈ ਘੰਟੇ ਫ਼ੋਨ ʼਤੇ ਗੱਲਾਂ ਕਰਦੇ ਹਨ। ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਕੁਝ ਗੱਲਾਂ ਬਾਰੇ ਉਨ੍ਹਾਂ ਦੋਵਾਂ ਦੀ ਸੋਚ ਇੱਕੋ ਜਿਹੀ ਹੈ। ਪਰ ਹੁਣ ਮਾਈਕ ਗੱਲਬਾਤ ਕਰਨ ਤੋਂ ਇਲਾਵਾ ਕੁਝ ਹੋਰ ਵੀ ਚਾਹੁੰਦਾ ਹੈ।

ਪਿਛਲੇ ਦੋ ਮਹੀਨਿਆਂ ਵਿਚ ਮਾਈਕ ਅਤੇ ਹੈਦਰ ਨੇ ਸਿਰਫ਼ ਇਕ-ਦੂਜੇ ਦਾ ਹੱਥ ਹੀ ਫੜਿਆ ਸੀ ਅਤੇ ਇਕ-ਦੂਜੇ ਨੂੰ ਚੁੰਮਿਆ ਸੀ। ਹੈਦਰ ਇਸ ਤੋਂ ਅੱਗੇ ਨਹੀਂ ਵਧਣਾ ਚਾਹੁੰਦੀ। ਪਰ ਉਹ ਮਾਈਕ ਨੂੰ ਗੁਆਉਣਾ ਵੀ ਨਹੀਂ ਚਾਹੁੰਦੀ। ਮਾਈਕ ਉਸ ਨੂੰ ਅਹਿਸਾਸ ਕਰਵਾਉਂਦਾ ਹੈ ਕਿ ਉਹ ਕਿੰਨੀ ਸੋਹਣੀ ਹੈ ਅਤੇ ਉਸ ਲਈ ਜਾਨ ਤੋਂ ਵੀ ਪਿਆਰੀ ਹੈ। ਇਸ ਤੋਂ ਇਲਾਵਾ, ਹੈਦਰ ਸੋਚਦੀ ਹੈ: “ਅਸੀਂ ਇਕ-ਦੂਜੇ ਨੂੰ ਪਿਆਰ ਕਰਦੇ ਹਾਂ, ਇਸ ਲਈ . . .”

ਜੇ ਤੁਹਾਡੀ ਡੇਟਿੰਗ ਅਤੇ ਵਿਆਹ ਕਰਾਉਣ ਦੀ ਉਮਰ ਹੋ ਗਈ ਹੈ ਅਤੇ ਤੁਸੀਂ ਹੈਦਰ ਦੀ ਜਗ੍ਹਾ ਹੁੰਦੇ, ਤਾਂ ਤੁਸੀਂ ਕੀ ਕਰਦੇ?

ਰੁਕੋ ਤੇ ਸੋਚੋ!

ਜੇ ਤੁਸੀਂ ਕੋਈ ਕਾਨੂੰਨ ਤੋੜਦੇ ਹੋ, ਜਿਵੇਂ ਕਿ ਸਿਗਨਲ ਤੋੜਨਾ, ਤਾਂ ਤੁਹਾਨੂੰ ਇਸ ਦੇ ਅੰਜਾਮ ਭੁਗਤਣੇ ਪੈਣਗੇ। ਇਹ ਗੱਲ ਨੈਤਿਕ ਕਾਨੂੰਨ ਤੋੜਨ ʼਤੇ ਵੀ ਲਾਗੂ ਹੁੰਦੀ ਹੈ, ਜਿਵੇਂ ਕਿ ‘ਹਰਾਮਕਾਰੀ ਤੋਂ ਦੂਰ ਰਹਿਣ’ ਦਾ ਕਾਨੂੰਨ।​—1 ਥੱਸਲੁਨੀਕੀਆਂ 4:3.

ਇਸ ਹੁਕਮ ਨੂੰ ਤੋੜਨ ਦੇ ਕੀ ਨਤੀਜੇ ਨਿਕਲਣਗੇ? ਬਾਈਬਲ ਕਹਿੰਦੀ ਹੈ: “ਜਿਹੜਾ ਹਰਾਮਕਾਰੀ ਕਰਨ ਵਿਚ ਲੱਗਾ ਰਹਿੰਦਾ ਹੈ, ਉਹ ਆਪਣੇ ਹੀ ਸਰੀਰ ਦੇ ਖ਼ਿਲਾਫ਼ ਪਾਪ ਕਰਦਾ ਹੈ।” (1 ਕੁਰਿੰਥੀਆਂ 6:18) ਇਹ ਗੱਲ ਕਿਵੇਂ ਸੱਚ ਸਾਬਤ ਹੁੰਦੀ ਹੈ?

ਖੋਜਕਾਰਾਂ ਦਾ ਕਹਿਣਾ ਹੈ ਕਿ ਜਿਨ੍ਹਾਂ ਨੇ ਵਿਆਹ ਤੋਂ ਪਹਿਲਾਂ ਸੈਕਸ ਕੀਤਾ ਹੈ, ਉਨ੍ਹਾਂ ਨੂੰ ਇਹ ਕੁਝ ਨਤੀਜੇ ਭੁਗਤਣੇ ਪੈਂਦੇ ਹਨ:

• ਗਮ: ਜਿਨ੍ਹਾਂ ਨੌਜਵਾਨਾਂ ਨੇ ਵਿਆਹ ਤੋਂ ਪਹਿਲਾਂ ਸੈਕਸ ਕੀਤਾ ਹੈ, ਉਨ੍ਹਾਂ ਵਿੱਚੋਂ ਜ਼ਿਆਦਾਤਰ ਬਾਅਦ ਵਿਚ ਪਛਤਾਏ।

• ਸ਼ੱਕ: ਸੈਕਸ ਕਰਨ ਤੋਂ ਬਾਅਦ ਦੋਨੋਂ ਇਕ-ਦੂਜੇ ਤੇ ਸ਼ੱਕ ਕਰਨ ਲੱਗ ਜਾਂਦੇ ਹਨ, ‘ਪਤਾ ਨਹੀਂ ਇਹ ਨੇ ਹੋਰ ਕਿਹਦੇ-ਕਿਹਦੇ ਨਾਲ ਸੈਕਸ ਕੀਤਾ ਹੋਣਾ!’

• ਨਿਰਾਸ਼ਾ: ਜ਼ਿਆਦਾਤਰ ਕੁੜੀਆਂ ਅਜਿਹਾ ਸਾਥੀ ਚਾਹੁੰਦੀਆਂ ਹਨ ਜੋ ਉਨ੍ਹਾਂ ਦੀ ਹਿਫਾਜ਼ਤ ਕਰੇਗਾ, ਨਾ ਕਿ ਉਨ੍ਹਾਂ ਦਾ ਫ਼ਾਇਦਾ ਉਠਾਏਗਾ। ਬਹੁਤ ਸਾਰੇ ਮੁੰਡੇ ਬਾਅਦ ਵਿਚ ਉਨ੍ਹਾਂ ਕੁੜੀਆਂ ਨੂੰ ਪਸੰਦ ਨਹੀਂ ਕਰਦੇ ਜਿਨ੍ਹਾਂ ਨਾਲ ਉਨ੍ਹਾਂ ਨੇ ਪਹਿਲਾਂ ਸੈਕਸ ਕਰ ਲਿਆ ਹੁੰਦਾ।

• ਮੁੱਖ ਗੱਲ: ਤੁਹਾਡਾ ਕੁਆਰਾਪਣ ਬਹੁਤ ਅਨਮੋਲ ਹੈ। ਇਸ ਨੂੰ ਐਵੇਂ ਨਾ ਗੁਆਓ! ਵਿਆਹ ਤੋਂ ਪਹਿਲਾਂ ਸੈਕਸ ਕਰ ਕੇ ਤੁਸੀਂ ਇਹ ਬਹੁਤ ਕੀਮਤੀ ਚੀਜ਼ ਗੁਆ ਦਿੰਦੇ ਹੋ ਅਤੇ ਆਪਣੇ ਆਪ ਨੂੰ ਭ੍ਰਿਸ਼ਟ ਕਰਦੇ ਹੋ।​—ਰੋਮੀਆਂ 1:24.

ਦਿਖਾਓ ਕਿ ਤੁਹਾਡੇ ਵਿਚ ‘ਹਰਾਮਕਾਰੀ ਤੋਂ ਦੂਰ ਰਹਿਣ’ ਦੀ ਹਿੰਮਤ ਹੈ। (1 ਥੱਸਲੁਨੀਕੀਆਂ 4:3) ਜਦੋਂ ਤੁਹਾਡਾ ਵਿਆਹ ਹੋਵੇਗਾ, ਤਦ ਤੁਸੀਂ ਸੈਕਸ ਕਰ ਸਕਦੇ ਹੋ। ਉਸ ਵੇਲੇ ਤੁਹਾਨੂੰ ਉਹ ਚਿੰਤਾ, ਪਛਤਾਵਾ ਅਤੇ ਘਬਰਾਹਟ ਨਹੀਂ ਮਹਿਸੂਸ ਹੋਵੇਗੀ ਜੋ ਵਿਆਹ ਤੋਂ ਪਹਿਲਾਂ ਸੈਕਸ ਕਰਨ ਨਾਲ ਹੁੰਦੀ।​—ਕਹਾਉਤਾਂ 7:22, 23; 1 ਕੁਰਿੰਥੀਆਂ 7:3.

ਤੁਸੀਂ ਕੀ ਸੋਚਦੇ ਹੋ?

• ਜੇ ਕੋਈ ਤੁਹਾਨੂੰ ਸੱਚ-ਮੁੱਚ ਪਿਆਰ ਕਰਦਾ ਹੈ, ਤਾਂ ਕੀ ਉਹ ਤੁਹਾਨੂੰ ਸਰੀਰਕ ਨੁਕਸਾਨ ਪਹੁੰਚਾਵੇਗਾ ਜਾਂ ਤੁਹਾਡੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਵੇਗਾ?

• ਜੇ ਕੋਈ ਸੱਚ-ਮੁੱਚ ਤੁਹਾਡੀ ਪਰਵਾਹ ਕਰਦਾ ਹੈ, ਤਾਂ ਕੀ ਉਹ ਤੁਹਾਨੂੰ ਕੋਈ ਅਜਿਹਾ ਕੰਮ ਕਰਨ ਲਈ ਕਹੇਗਾ ਜਿਸ ਕਰਕੇ ਯਹੋਵਾਹ ਨਾਲ ਤੁਹਾਡਾ ਰਿਸ਼ਤਾ ਖ਼ਤਰੇ ਵਿਚ ਪੈ ਜਾਵੇ?​—ਇਬਰਾਨੀਆਂ 13:4.