ਲਾਲ ਸਮੁੰਦਰ ʼਤੇ ਚਮਤਕਾਰ

ਜਿੱਦਾਂ ਹੀ ਫ਼ਿਰਊਨ ਨੇ ਸੁਣਿਆ ਕਿ ਇਜ਼ਰਾਈਲੀ ਮਿਸਰ ਛੱਡ ਕੇ ਚਲੇ ਗਏ ਸਨ, ਉਸ ਨੇ ਉਨ੍ਹਾਂ ਦਾ ਪਿੱਛਾ ਕਰਨ ਦਾ ਫ਼ੈਸਲਾ ਕੀਤਾ। ਉਸ ਨੇ ਫ਼ੌਜੀਆਂ ਨੂੰ ਹੁਕਮ ਦਿੱਤਾ: ‘ਮੇਰੇ ਯੁੱਧ ਦੇ ਸਾਰੇ ਰਥ ਤਿਆਰ ਕਰੋ। ਚਲੋ ਆਪਾਂ ਇਜ਼ਰਾਈਲੀਆਂ ਦਾ ਪਿੱਛਾ ਕਰੀਏ! ਸਾਨੂੰ ਉਨ੍ਹਾਂ ਨੂੰ ਜਾਣ ਨਹੀਂ ਦੇਣਾ ਚਾਹੀਦਾ।’ ਫ਼ਿਰਊਨ ਅਤੇ ਉਸ ਦੇ ਆਦਮੀਆਂ ਨੇ ਇਜ਼ਰਾਈਲੀਆਂ ਦਾ ਪਿੱਛਾ ਕੀਤਾ।

ਯਹੋਵਾਹ ਆਪਣੇ ਲੋਕਾਂ ਨਾਲ ਸੀ। ਪਰਮੇਸ਼ੁਰ ਦਿਨ ਨੂੰ ਬੱਦਲ ਤੇ ਰਾਤ ਨੂੰ ਅੱਗ ਨਾਲ ਉਨ੍ਹਾਂ ਦੀ ਅਗਵਾਈ ਕਰ ਰਿਹਾ ਸੀ। ਉਹ ਉਨ੍ਹਾਂ ਨੂੰ ਲਾਲ ਸਮੁੰਦਰ ਕੋਲ ਲੈ ਆਇਆ ਅਤੇ ਉਸ ਨੇ ਉਨ੍ਹਾਂ ਨੂੰ ਉੱਥੇ ਡੇਰਾ ਲਾਉਣ ਲਈ ਕਿਹਾ।

ਫਿਰ ਇਜ਼ਰਾਈਲੀਆਂ ਨੇ ਦੇਖਿਆ ਕਿ ਫ਼ਿਰਊਨ ਤੇ ਉਸ ਦੀ ਫ਼ੌਜ ਉਨ੍ਹਾਂ ਦੇ ਪਿੱਛੇ ਆ ਰਹੀ ਸੀ। ਉਹ ਫਸ ਗਏ ਸਨ ਕਿਉਂਕਿ ਅੱਗੇ ਲਾਲ ਸਮੁੰਦਰ ਸੀ ਅਤੇ ਪਿੱਛੇ ਮਿਸਰੀ ਫ਼ੌਜ। ਉਹ ਮੂਸਾ ਨੂੰ ਚੀਕ-ਚੀਕ ਕੇ ਕਹਿਣ ਲੱਗੇ: ‘ਅਸੀਂ ਮਰਨ ਵਾਲੇ ਹਾਂ। ਤੂੰ ਸਾਨੂੰ ਮਿਸਰ ਵਿਚ ਹੀ ਰਹਿਣ ਦਿੰਦਾ।’ ਪਰ ਮੂਸਾ ਨੇ ਕਿਹਾ: ‘ਡਰੋ ਨਾ। ਯਹੋਵਾਹ ʼਤੇ ਭਰੋਸਾ ਰੱਖੋ ਤੇ ਦੇਖੋ ਕਿ ਉਹ ਸਾਨੂੰ ਕਿਵੇਂ ਬਚਾਵੇਗਾ।’ ਮੂਸਾ ਨੇ ਯਹੋਵਾਹ ʼਤੇ ਪੂਰਾ ਭਰੋਸਾ ਰੱਖਿਆ। ਹੈਨਾ?

ਯਹੋਵਾਹ ਨੇ ਇਜ਼ਰਾਈਲੀਆਂ ਨੂੰ ਸਾਮਾਨ ਬੰਨ੍ਹਣ ਅਤੇ ਅੱਗੇ ਤੁਰਨ ਲਈ ਕਿਹਾ। ਉਸ ਰਾਤ ਯਹੋਵਾਹ ਨੇ ਬੱਦਲ ਨੂੰ ਮਿਸਰੀਆਂ ਤੇ ਇਜ਼ਰਾਈਲੀਆਂ ਵਿਚਕਾਰ ਖੜ੍ਹਾ ਕਰ ਦਿੱਤਾ। ਮਿਸਰੀਆਂ ਵਾਲੇ ਪਾਸੇ ਹਨੇਰਾ ਸੀ। ਪਰ ਇਜ਼ਰਾਈਲੀਆਂ ਵੱਲ ਚਾਨਣ ਸੀ।

ਯਹੋਵਾਹ ਨੇ ਮੂਸਾ ਨੂੰ ਆਪਣਾ ਹੱਥ ਸਮੁੰਦਰ ਵੱਲ ਕਰਨ ਲਈ ਕਿਹਾ। ਫਿਰ ਯਹੋਵਾਹ ਨੇ ਸਾਰੀ ਰਾਤ ਤੇਜ਼ ਹਨੇਰੀ ਵਗਾਈ। ਸਮੁੰਦਰ ਦੋ ਹਿੱਸਿਆਂ ਵਿਚ ਵੰਡਿਆ ਗਿਆ। ਆਲੇ-ਦੁਆਲੇ ਪਾਣੀ ਦੀਆਂ ਉੱਚੀਆਂ-ਉੱਚੀਆਂ ਕੰਧਾਂ ਬਣ ਗਈਆਂ ਤੇ ਵਿਚਕਾਰ ਸੁੱਕੀ ਜ਼ਮੀਨ। ਲੱਖਾਂ ਹੀ ਇਜ਼ਰਾਈਲੀਆਂ ਨੇ ਸੁੱਕੀ ਜ਼ਮੀਨ ਉੱਤੋਂ ਦੀ ਲੰਘਣਾ ਸ਼ੁਰੂ ਕਰ ਦਿੱਤਾ।

ਫ਼ਿਰਊਨ ਦੀ ਫ਼ੌਜ ਵੀ ਇਜ਼ਰਾਈਲੀਆਂ ਦੇ ਪਿੱਛੇ-ਪਿੱਛੇ ਸਮੁੰਦਰ ਵਿਚ ਚਲੀ ਗਈ। ਫਿਰ ਯਹੋਵਾਹ ਨੇ ਫ਼ੌਜ ਵਿਚ ਹਫੜਾ-ਦਫੜੀ ਮਚਾ ਦਿੱਤੀ। ਉਨ੍ਹਾਂ ਦੇ ਰਥਾਂ ਦੇ ਪਹੀਏ ਲੱਥ ਗਏ। ਫ਼ੌਜੀ ਉੱਚੀ-ਉੱਚੀ ਕਹਿਣ ਲੱਗੇ: ‘ਆਓ ਇੱਥੋਂ ਭੱਜ ਚਲੀਏ। ਯਹੋਵਾਹ ਇਨ੍ਹਾਂ ਦੀ ਖ਼ਾਤਰ ਲੜ ਰਿਹਾ ਹੈ।’

ਯਹੋਵਾਹ ਨੇ ਮੂਸਾ ਨੂੰ ਕਿਹਾ: ‘ਆਪਣਾ ਹੱਥ ਸਮੁੰਦਰ ਵੱਲ ਕਰ।’ ਉਸੇ ਵੇਲੇ ਪਾਣੀ ਦੀਆਂ ਕੰਧਾਂ ਮਿਸਰੀ ਫ਼ੌਜ ʼਤੇ ਡਿਗ ਪਈਆਂ। ਫ਼ਿਰਊਨ ਤੇ ਉਸ ਦੇ ਸਾਰੇ ਆਦਮੀ ਮਾਰੇ ਗਏ। ਉਨ੍ਹਾਂ ਵਿੱਚੋਂ ਇਕ ਵੀ ਨਾ ਬਚਿਆ।

ਸਮੁੰਦਰ ਦੇ ਦੂਜੇ ਪਾਸੇ, ਇਜ਼ਰਾਈਲੀਆਂ ਦੀ ਵੱਡੀ ਭੀੜ ਗਾ ਕੇ ਪਰਮੇਸ਼ੁਰ ਦੀ ਤਾਰੀਫ਼ ਕਰ ਰਹੀ ਸੀ: “ਯਹੋਵਾਹ ਲਈ ਗੀਤ ਗਾਓ ਕਿਉਂਕਿ ਉਸ ਨੇ ਸ਼ਾਨਦਾਰ ਜਿੱਤ ਹਾਸਲ ਕੀਤੀ। ਉਸ ਨੇ ਘੋੜੇ ਅਤੇ ਉਸ ਦੇ ਸਵਾਰ ਨੂੰ ਸਮੁੰਦਰ ਵਿਚ ਸੁੱਟ ਦਿੱਤਾ ਹੈ।” ਲੋਕੀ ਗਾ ਰਹੇ ਸਨ ਅਤੇ ਔਰਤਾਂ ਡਫਲੀਆਂ ਵਜਾਉਣ ਦੇ ਨਾਲ-ਨਾਲ ਨੱਚ ਵੀ ਰਹੀਆਂ ਸਨ। ਸਾਰੇ ਲੋਕ ਬਹੁਤ ਖ਼ੁਸ਼ ਸਨ ਕਿਉਂਕਿ ਉਹ ਹੁਣ ਸੱਚ-ਮੁੱਚ ਆਜ਼ਾਦ ਹੋ ਗਏ ਸਨ।