12 ਜਾਸੂਸ

ਇਜ਼ਰਾਈਲੀ ਸੀਨਈ ਪਹਾੜ ਤੋਂ ਪਾਰਾਨ ਦੀ ਉਜਾੜ ਵਿੱਚੋਂ ਦੀ ਸਫ਼ਰ ਕਰਦਿਆਂ ਕਾਦੇਸ਼ ਨਾਂ ਦੀ ਜਗ੍ਹਾ ਪਹੁੰਚੇ। ਉੱਥੇ ਯਹੋਵਾਹ ਨੇ ਮੂਸਾ ਨੂੰ ਕਿਹਾ: ‘ਤੂੰ ਕਨਾਨ ਦੇਸ਼ ਦੀ ਜਾਸੂਸੀ ਕਰਨ ਲਈ 12 ਆਦਮੀਆਂ ਨੂੰ ਘੱਲ ਜੋ ਦੇਸ਼ ਮੈਂ ਇਜ਼ਰਾਈਲੀਆਂ ਨੂੰ ਦੇਣ ਜਾ ਰਿਹਾ ਹਾਂ। ਹਰ ਗੋਤ ਵਿੱਚੋਂ ਇਕ-ਇਕ ਆਦਮੀ ਘੱਲੀਂ।’ ਸੋ ਮੂਸਾ ਨੇ 12 ਆਦਮੀ ਚੁਣੇ ਤੇ ਉਨ੍ਹਾਂ ਨੂੰ ਕਿਹਾ: ‘ਕਨਾਨ ਨੂੰ ਜਾਓ ਤੇ ਪਤਾ ਕਰੋ ਕਿ ਉੱਥੇ ਦੀ ਜ਼ਮੀਨ ਉਪਜਾਊ ਹੈ ਜਾਂ ਨਹੀਂ। ਦੇਖੋ ਕਿ ਉੱਥੇ ਦੇ ਲੋਕ ਤਾਕਤਵਰ ਹਨ ਜਾਂ ਕਮਜ਼ੋਰ ਅਤੇ ਲੋਕ ਤੰਬੂਆਂ ਵਿਚ ਰਹਿੰਦੇ ਹਨ ਜਾਂ ਸ਼ਹਿਰਾਂ ਵਿਚ।’ ਫਿਰ 12 ਜਾਸੂਸ ਕਨਾਨ ਦੇਸ਼ ਚਲੇ ਗਏ ਜਿਨ੍ਹਾਂ ਵਿਚ ਯਹੋਸ਼ੁਆ ਤੇ ਕਾਲੇਬ ਵੀ ਸਨ।

40 ਦਿਨਾਂ ਬਾਅਦ ਜਾਸੂਸ ਕਨਾਨ ਤੋਂ ਅੰਜੀਰ, ਅਨਾਰ ਤੇ ਅੰਗੂਰ ਲੈ ਕੇ ਵਾਪਸ ਮੁੜੇ। ਜਾਸੂਸਾਂ ਨੇ ਖ਼ਬਰ ਦਿੱਤੀ: ‘ਇਹ ਉਪਜਾਊ ਦੇਸ਼ ਹੈ, ਪਰ ਲੋਕ ਤਾਕਤਵਰ ਹਨ ਤੇ ਉਨ੍ਹਾਂ ਦੇ ਸ਼ਹਿਰਾਂ ਦੀਆਂ ਕੰਧਾਂ ਉੱਚੀਆਂ-ਉੱਚੀਆਂ ਹਨ।’ ਫਿਰ ਕਾਲੇਬ ਨੇ ਕਿਹਾ: ‘ਅਸੀਂ ਉਨ੍ਹਾਂ ਨੂੰ ਜਿੱਤ ਸਕਦੇ ਹਾਂ। ਆਓ ਆਪਾਂ ਤੁਰੰਤ ਉੱਥੇ ਚੱਲੀਏ।’ ਕੀ ਤੁਹਾਨੂੰ ਪਤਾ ਕਿ ਕਾਲੇਬ ਨੇ ਇੱਦਾਂ ਕਿਉਂ ਕਿਹਾ ਸੀ? ਕਿਉਂਕਿ ਉਸ ਨੂੰ ਅਤੇ ਯਹੋਸ਼ੁਆ ਨੂੰ ਯਹੋਵਾਹ ʼਤੇ ਭਰੋਸਾ ਸੀ। ਪਰ ਦਸ ਜਾਸੂਸਾਂ ਨੇ ਕਿਹਾ: ‘ਨਹੀਂ! ਉੱਥੇ ਦੇ ਲੋਕ ਤਾਂ ਦੈਂਤਾਂ ਵਾਂਗ ਉੱਚੇ-ਲੰਬੇ ਹਨ! ਉਨ੍ਹਾਂ ਦੇ ਮੁਕਾਬਲੇ ਤਾਂ ਅਸੀਂ ਟਿੱਡੀਆਂ ਵਰਗੇ ਸੀ।’

ਇਜ਼ਰਾਈਲੀ ਇਹ ਸੁਣ ਕੇ ਨਿਰਾਸ਼ ਹੋ ਗਏ। ਉਹ ਬੁੜ-ਬੁੜ ਕਰਨ ਲੱਗੇ ਤੇ ਇਕ-ਦੂਜੇ ਨੂੰ ਕਹਿਣ ਲੱਗੇ: ‘ਆਓ ਆਪਾਂ ਇਕ ਨਵਾਂ ਆਗੂ ਚੁਣੀਏ ਤੇ ਮਿਸਰ ਵਾਪਸ ਮੁੜ ਜਾਈਏ। ਅਸੀਂ ਕਨਾਨ ਦੇਸ਼ ਜਾ ਕੇ ਕਿਉਂ ਮਰੀਏ?’ ਯਹੋਸ਼ੁਆ ਤੇ ਕਾਲੇਬ ਨੇ ਕਿਹਾ: ‘ਯਹੋਵਾਹ ਖ਼ਿਲਾਫ਼ ਨਾ ਜਾਓ ਅਤੇ ਨਾ ਹੀ ਡਰੋ। ਯਹੋਵਾਹ ਸਾਡੀ ਰੱਖਿਆ ਕਰੇਗਾ।’ ਪਰ ਇਜ਼ਰਾਈਲੀਆਂ ਨੇ ਉਨ੍ਹਾਂ ਦੀ ਗੱਲ ਨਾ ਸੁਣੀ। ਉਹ ਤਾਂ ਯਹੋਸ਼ੁਆ ਤੇ ਕਾਲੇਬ ਨੂੰ ਮਾਰਨਾ ਚਾਹੁੰਦੇ ਸਨ।

ਯਹੋਵਾਹ ਨੇ ਕੀ ਕੀਤਾ? ਉਸ ਨੇ ਮੂਸਾ ਨੂੰ ਕਿਹਾ: ‘ਮੈਂ ਇਜ਼ਰਾਈਲੀਆਂ ਲਈ ਇੰਨਾ ਕੁਝ ਕੀਤਾ, ਪਰ ਉਹ ਅਜੇ ਵੀ ਮੇਰਾ ਕਹਿਣਾ ਨਹੀਂ ਮੰਨਦੇ। ਇਸ ਲਈ ਉਹ 40 ਸਾਲ ਉਜਾੜ ਵਿਚ ਰਹਿਣਗੇ ਤੇ ਇੱਥੇ ਹੀ ਮਰ ਜਾਣਗੇ। ਸਿਰਫ਼ ਇਜ਼ਰਾਈਲੀਆਂ ਦੇ ਬੱਚੇ ਅਤੇ ਯਹੋਸ਼ੁਆ ਤੇ ਕਾਲੇਬ ਹੀ ਉਸ ਦੇਸ਼ ਵਿਚ ਜਾਣਗੇ ਜੋ ਮੈਂ ਉਨ੍ਹਾਂ ਨੂੰ ਦੇਣ ਦਾ ਵਾਅਦਾ ਕੀਤਾ ਸੀ।’