ਗਿਦਾਊਨ ਦੀ ਮਿਦਿਆਨੀਆਂ ʼਤੇ ਜਿੱਤ

ਸਮੇਂ ਦੇ ਬੀਤਣ ਨਾਲ ਇਜ਼ਰਾਈਲੀ ਫਿਰ ਯਹੋਵਾਹ ਨੂੰ ਛੱਡ ਕੇ ਦੂਜੇ ਦੇਵੀ-ਦੇਵਤਿਆਂ ਦੀ ਭਗਤੀ ਕਰਨ ਲੱਗ ਪਏ। ਸੱਤ ਸਾਲਾਂ ਤਕ ਮਿਦਿਆਨੀ ਇਜ਼ਰਾਈਲੀਆਂ ਦੇ ਜਾਨਵਰ ਚੋਰੀ ਕਰਦੇ ਰਹੇ ਅਤੇ ਫ਼ਸਲਾਂ ਤਬਾਹ ਕਰਦੇ ਰਹੇ। ਮਿਦਿਆਨੀਆਂ ਤੋਂ ਬਚਣ ਲਈ ਇਜ਼ਰਾਈਲੀ ਗੁਫ਼ਾਵਾਂ ਅਤੇ ਪਹਾੜਾਂ ਵਿਚ ਲੁਕ ਜਾਂਦੇ ਸਨ। ਉਨ੍ਹਾਂ ਨੇ ਮਦਦ ਲਈ ਯਹੋਵਾਹ ਅੱਗੇ ਤਰਲੇ ਕੀਤੇ। ਯਹੋਵਾਹ ਨੇ ਗਿਦਾਊਨ ਨਾਂ ਦੇ ਆਦਮੀ ਕੋਲ ਆਪਣਾ ਦੂਤ ਭੇਜਿਆ। ਦੂਤ ਨੇ ਗਿਦਾਊਨ ਨੂੰ ਕਿਹਾ: ‘ਯਹੋਵਾਹ ਨੇ ਤੈਨੂੰ ਇਕ ਤਾਕਤਵਰ ਯੋਧਾ ਚੁਣਿਆ ਹੈ।’ ਗਿਦਾਊਨ ਨੇ ਕਿਹਾ: ‘ਮੈਂ ਕਿਵੇਂ ਇਜ਼ਰਾਈਲ ਨੂੰ ਬਚਾ ਸਕਦਾ? ਮੈਂ ਤਾਂ ਮਾਮੂਲੀ ਜਿਹਾ ਇਨਸਾਨ ਹਾਂ।’

ਗਿਦਾਊਨ ਨੂੰ ਕਿਵੇਂ ਪਤਾ ਲੱਗਣਾ ਸੀ ਕਿ ਯਹੋਵਾਹ ਨੇ ਉਸ ਨੂੰ ਚੁਣਿਆ ਸੀ? ਉਸ ਨੇ ਜ਼ਮੀਨ ʼਤੇ ਇਕ ਉੱਨ ਦਾ ਗੁੱਛਾ ਰੱਖ ਦਿੱਤਾ ਤੇ ਯਹੋਵਾਹ ਨੂੰ ਕਿਹਾ: ‘ਜੇ ਸਵੇਰ ਨੂੰ ਉੱਨ ਦਾ ਗੁੱਛਾ ਤ੍ਰੇਲ ਨਾਲ ਗਿੱਲਾ ਹੋ ਗਿਆ ਅਤੇ ਜ਼ਮੀਨ ਸੁੱਕੀ ਰਹੀ, ਤਾਂ ਮੈਨੂੰ ਪਤਾ ਲੱਗ ਜਾਵੇਗਾ ਕਿ ਤੂੰ ਚਾਹੁੰਦਾ ਹੈਂ ਕਿ ਮੈਂ ਇਜ਼ਰਾਈਲ ਨੂੰ ਬਚਾਵਾਂ।’ ਅਗਲੀ ਸਵੇਰ ਉੱਨ ਦਾ ਗੁੱਛਾ ਪੂਰੀ ਤਰ੍ਹਾਂ ਗਿੱਲਾ ਸੀ ਤੇ ਜ਼ਮੀਨ ਸੁੱਕੀ ਸੀ! ਪਰ ਗਿਦਾਊਨ ਨੇ ਕਿਹਾ ਕਿ ਅਗਲੇ ਦਿਨ ਉੱਨ ਦਾ ਗੁੱਛਾ ਸੁੱਕਾ ਹੋਵੇ ਅਤੇ ਜ਼ਮੀਨ ਗਿੱਲੀ ਹੋਵੇ। ਜਦੋਂ ਇੱਦਾਂ ਹੋਇਆ, ਤਾਂ ਗਿਦਾਊਨ ਨੂੰ ਯਕੀਨ ਹੋ ਗਿਆ ਕਿ ਯਹੋਵਾਹ ਨੇ ਉਸ ਨੂੰ ਚੁਣਿਆ ਸੀ। ਉਸ ਨੇ ਮਿਦਿਆਨੀਆਂ ਨਾਲ ਲੜਨ ਲਈ ਫ਼ੌਜੀ ਇਕੱਠੇ ਕੀਤੇ।

ਯਹੋਵਾਹ ਨੇ ਗਿਦਾਊਨ ਨੂੰ ਕਿਹਾ: ‘ਮੈਂ ਇਜ਼ਰਾਈਲੀਆਂ ਨੂੰ ਜਿੱਤ ਦਿਵਾਵਾਂਗਾ। ਪਰ ਤੇਰੇ ਕੋਲ ਬਹੁਤ ਸਾਰੇ ਫ਼ੌਜੀ ਹੋਣ ਕਰਕੇ ਸ਼ਾਇਦ ਤੂੰ ਸੋਚੇ ਕਿ ਤੂੰ ਆਪਣੇ ਬਲ ʼਤੇ ਲੜਾਈ ਜਿੱਤੀ। ਸਾਰੇ ਫ਼ੌਜੀਆਂ ਨੂੰ ਕਹਿ ਕਿ ਜਿਨ੍ਹਾਂ ਨੂੰ ਡਰ ਲੱਗ ਰਿਹਾ ਹੈ, ਉਹ ਘਰ ਵਾਪਸ ਚਲੇ ਜਾਣ।’ ਇਸ ਲਈ 22,000 ਫ਼ੌਜੀ ਘਰ ਵਾਪਸ ਚਲੇ ਗਏ ਅਤੇ 10,000 ਫ਼ੌਜੀ ਰਹਿ ਗਏ। ਯਹੋਵਾਹ ਨੇ ਕਿਹਾ: ‘ਹਾਲੇ ਵੀ ਫ਼ੌਜੀ ਬਹੁਤ ਜ਼ਿਆਦਾ ਹਨ। ਉਨ੍ਹਾਂ ਨੂੰ ਨਦੀ ਕੋਲ ਲੈ ਜਾ ਅਤੇ ਪਾਣੀ ਪੀਣ ਲਈ ਕਹਿ। ਉਨ੍ਹਾਂ ਵਿੱਚੋਂ ਸਿਰਫ਼ ਉਨ੍ਹਾਂ ਫ਼ੌਜੀਆਂ ਨੂੰ ਰੱਖੀਂ ਜੋ ਪਾਣੀ ਪੀਂਦੇ ਵੇਲੇ ਆਪਣੇ ਦੁਸ਼ਮਣਾਂ ʼਤੇ ਵੀ ਨਜ਼ਰ ਰੱਖਣ।’ ਪਾਣੀ ਪੀਂਦਿਆਂ ਸਿਰਫ਼ 300 ਆਦਮੀਆਂ ਨੇ ਇੱਦਾਂ ਕੀਤਾ। ਯਹੋਵਾਹ ਨੇ ਵਾਅਦਾ ਕੀਤਾ ਕਿ ਇਹ 300 ਆਦਮੀ 1,35,000 ਮਿਦਿਆਨੀ ਫ਼ੌਜੀਆਂ ਨੂੰ ਹਰਾ ਦੇਣਗੇ।

ਉਸੇ ਰਾਤ ਯਹੋਵਾਹ ਨੇ ਗਿਦਾਊਨ ਨੂੰ ਕਿਹਾ: ‘ਹੁਣ ਮਿਦਿਆਨੀਆਂ ʼਤੇ ਹਮਲਾ ਕਰਨ ਦਾ ਸਮਾਂ ਹੈ!’ ਗਿਦਾਊਨ ਨੇ ਆਪਣੇ ਆਦਮੀਆਂ ਨੂੰ ਨਰਸਿੰਗੇ ਅਤੇ ਵੱਡੇ-ਵੱਡੇ ਘੜੇ ਦਿੱਤੇ ਜਿਨ੍ਹਾਂ ਵਿਚ ਉਨ੍ਹਾਂ ਨੇ ਮਸ਼ਾਲਾਂ ਲੁਕਾਈਆਂ ਸਨ। ਉਸ ਨੇ ਉਨ੍ਹਾਂ ਨੂੰ ਕਿਹਾ: ‘ਮੇਰੇ ਵੱਲ ਦੇਖਿਓ ਤੇ ਬਿਲਕੁਲ ਉਸੇ ਤਰ੍ਹਾਂ ਕਰਿਓ ਜਿਵੇਂ ਮੈਂ ਕਰਾਂਗਾ।’ ਗਿਦਾਊਨ ਨੇ ਨਰਸਿੰਗਾ ਵਜਾਇਆ, ਘੜਾ ਭੰਨਿਆ ਅਤੇ ਮਸ਼ਾਲ ਚੁੱਕ ਕੇ ਉੱਚੀ ਆਵਾਜ਼ ਵਿਚ ਕਿਹਾ: ‘ਯਹੋਵਾਹ ਦੀ ਤਲਵਾਰ ਤੇ ਗਿਦਾਊਨ ਦੀ ਤਲਵਾਰ!’ 300 ਆਦਮੀਆਂ ਨੇ ਵੀ ਇਸੇ ਤਰ੍ਹਾਂ ਕੀਤਾ। ਮਿਦਿਆਨੀ ਬੁਰੀ ਤਰ੍ਹਾਂ ਡਰ ਗਏ ਅਤੇ ਇੱਧਰ-ਉੱਧਰ ਭੱਜਣ ਲੱਗੇ। ਹਫੜਾ-ਦਫੜੀ ਵਿਚ ਉਨ੍ਹਾਂ ਨੇ ਇਕ-ਦੂਸਰੇ ʼਤੇ ਹੀ ਹਮਲਾ ਕਰ ਦਿੱਤਾ। ਇਕ ਵਾਰ ਫਿਰ ਯਹੋਵਾਹ ਨੇ ਇਜ਼ਰਾਈਲੀਆਂ ਦੀ ਆਪਣੇ ਦੁਸ਼ਮਣਾਂ ʼਤੇ ਜਿੱਤ ਹਾਸਲ ਕਰਨ ਵਿਚ ਮਦਦ ਕੀਤੀ।