ਦਾਨੀਏਲ ਸ਼ੇਰਾਂ ਦੇ ਘੁਰਨੇ ਵਿਚ

ਦਾਰਾ ਮਾਦੀ ਬਾਬਲ ਦਾ ਅਗਲਾ ਰਾਜਾ ਸੀ। ਦਾਰਾ ਨੇ ਦਾਨੀਏਲ ਵਿਚ ਕੁਝ ਖ਼ਾਸ ਦੇਖਿਆ। ਉਸ ਨੇ ਦਾਨੀਏਲ ਨੂੰ ਦੇਸ਼ ਦੇ ਸਭ ਤੋਂ ਅਹਿਮ ਆਦਮੀਆਂ ʼਤੇ ਨਿਗਰਾਨ ਠਹਿਰਾਇਆ। ਇਹ ਆਦਮੀ ਦਾਨੀਏਲ ਨਾਲ ਈਰਖਾ ਕਰਦੇ ਸਨ ਅਤੇ ਉਸ ਤੋਂ ਛੁਟਕਾਰਾ ਪਾਉਣਾ ਚਾਹੁੰਦੇ ਸਨ। ਇਹ ਆਦਮੀ ਜਾਣਦੇ ਸਨ ਕਿ ਦਾਨੀਏਲ ਹਰ ਰੋਜ਼ ਤਿੰਨ ਵਾਰ ਯਹੋਵਾਹ ਨੂੰ ਪ੍ਰਾਰਥਨਾ ਕਰਦਾ ਸੀ। ਇਸ ਲਈ ਉਨ੍ਹਾਂ ਨੇ ਦਾਰਾ ਨੂੰ ਕਿਹਾ: ‘ਹੇ ਮਹਾਰਾਜ, ਇਕ ਅਜਿਹਾ ਕਾਨੂੰਨ ਹੋਣਾ ਚਾਹੀਦਾ ਹੈ ਜਿਸ ਮੁਤਾਬਕ ਸਾਰੇ ਜਣੇ ਸਿਰਫ਼ ਤੁਹਾਨੂੰ ਹੀ ਪ੍ਰਾਰਥਨਾ ਕਰਨ। ਜਿਹੜਾ ਵੀ ਇਹ ਕਾਨੂੰਨ ਨਾ ਮੰਨੇ, ਉਸ ਨੂੰ ਸ਼ੇਰਾਂ ਦੇ ਘੁਰਨੇ ਵਿਚ ਸੁੱਟਿਆ ਜਾਵੇ।’ ਦਾਰਾ ਨੂੰ ਇਹ ਗੱਲ ਵਧੀਆ ਲੱਗੀ ਅਤੇ ਉਸ ਨੇ ਕਾਨੂੰਨ ʼਤੇ ਦਸਤਖਤ ਕਰ ਦਿੱਤੇ।

ਜਦੋਂ ਦਾਨੀਏਲ ਨੇ ਇਹ ਕਾਨੂੰਨ ਸੁਣਿਆ, ਤਾਂ ਉਹ ਆਪਣੇ ਘਰ ਗਿਆ। ਉਸ ਨੇ ਬਾਰੀ ਖੋਲ੍ਹੀ ਤੇ ਗੋਡੇ ਟੇਕ ਕੇ ਯਹੋਵਾਹ ਨੂੰ ਪ੍ਰਾਰਥਨਾ ਕੀਤੀ। ਜਿਹੜੇ ਆਦਮੀ ਉਸ ਨਾਲ ਈਰਖਾ ਕਰਦੇ ਸਨ, ਉਹ ਉਸ ਦੇ ਘਰ ਆ ਵੜੇ ਅਤੇ ਉਸ ਨੂੰ ਪ੍ਰਾਰਥਨਾ ਕਰਦਿਆਂ ਦੇਖਿਆ। ਉਹ ਦਾਰਾ ਕੋਲ ਗਏ ਅਤੇ ਕਿਹਾ: ‘ਦਾਨੀਏਲ ਨੇ ਤੇਰਾ ਕਹਿਣਾ ਨਹੀਂ ਮੰਨਿਆ। ਉਹ ਹਰ ਦਿਨ ਤਿੰਨ ਵਾਰ ਪਰਮੇਸ਼ੁਰ ਨੂੰ ਪ੍ਰਾਰਥਨਾ ਕਰਦਾ ਹੈ।’ ਦਾਰਾ ਦਾਨੀਏਲ ਨੂੰ ਪਸੰਦ ਕਰਦਾ ਸੀ ਅਤੇ ਨਹੀਂ ਚਾਹੁੰਦਾ ਸੀ ਕਿ ਦਾਨੀਏਲ ਮਰੇ। ਸਾਰਾ ਦਿਨ ਉਹ ਦਾਨੀਏਲ ਨੂੰ ਬਚਾਉਣ ਦਾ ਰਾਹ ਲੱਭਦਾ ਰਿਹਾ। ਪਰ ਰਾਜਾ ਵੀ ਆਪਣੇ ਬਣਾਏ ਕਾਨੂੰਨ ਨੂੰ ਬਦਲ ਨਹੀਂ ਸਕਦਾ ਸੀ। ਉਸ ਨੂੰ ਆਪਣੇ ਆਦਮੀਆਂ ਨੂੰ ਹੁਕਮ ਦੇਣਾ ਪਿਆ ਕਿ ਉਹ ਦਾਨੀਏਲ ਨੂੰ ਖੂੰਖਾਰ ਸ਼ੇਰਾਂ ਦੇ ਘੁਰਨੇ ਵਿਚ ਸੁੱਟ ਦੇਣ।

ਰਾਜੇ ਨੂੰ ਦਾਨੀਏਲ ਦਾ ਬਹੁਤ ਫ਼ਿਕਰ ਸੀ ਜਿਸ ਕਰਕੇ ਉਸ ਨੂੰ ਸਾਰੀ ਰਾਤ ਨੀਂਦ ਨਾ ਆਈ। ਸਵੇਰੇ ਉਹ ਦੌੜ ਕੇ ਘੁਰਨੇ ਕੋਲ ਗਿਆ ਤੇ ਦਾਨੀਏਲ ਨੂੰ ਪੁਕਾਰਿਆ: ‘ਕੀ ਤੇਰੇ ਪਰਮੇਸ਼ੁਰ ਨੇ ਤੈਨੂੰ ਬਚਾ ਲਿਆ?’

ਦਾਰਾ ਨੇ ਇਕ ਆਵਾਜ਼ ਸੁਣੀ। ਇਹ ਦਾਨੀਏਲ ਦੀ ਸੀ। ਉਸ ਨੇ ਦਾਰਾ ਨੂੰ ਕਿਹਾ: ‘ਯਹੋਵਾਹ ਦੇ ਦੂਤ ਨੇ ਸ਼ੇਰਾਂ ਦੇ ਮੂੰਹ ਬੰਦ ਕਰ ਦਿੱਤੇ। ਉਨ੍ਹਾਂ ਨੇ ਮੈਨੂੰ ਕੋਈ ਨੁਕਸਾਨ ਨਹੀਂ ਪਹੁੰਚਾਇਆ।’ ਦਾਰਾ ਬਹੁਤ ਖ਼ੁਸ਼ ਸੀ। ਉਸ ਨੇ ਹੁਕਮ ਦਿੱਤਾ ਕਿ ਦਾਨੀਏਲ ਨੂੰ ਸ਼ੇਰਾਂ ਦੇ ਘੁਰਨੇ ਵਿੱਚੋਂ ਕੱਢਿਆ ਜਾਵੇ। ਦਾਨੀਏਲ ਦੇ ਇਕ ਝਰੀਟ ਵੀ ਨਹੀਂ ਆਈ ਸੀ। ਫਿਰ ਰਾਜੇ ਨੇ ਹੁਕਮ ਦਿੱਤਾ: ‘ਦਾਨੀਏਲ ʼਤੇ ਇਲਜ਼ਾਮ ਲਾਉਣ ਵਾਲਿਆਂ ਨੂੰ ਸ਼ੇਰਾਂ ਦੇ ਘੁਰਨੇ ਵਿਚ ਸੁੱਟ ਦਿਓ।’ ਜਦੋਂ ਉਨ੍ਹਾਂ ਨੂੰ ਸੁੱਟਿਆ ਗਿਆ, ਤਾਂ ਸ਼ੇਰਾਂ ਨੇ ਉਨ੍ਹਾਂ ਨੂੰ ਖਾ ਲਿਆ।

ਦਾਰਾ ਨੇ ਆਪਣੇ ਲੋਕਾਂ ਨੂੰ ਇਹ ਹੁਕਮ ਦਿੱਤਾ: ‘ਹਰ ਕੋਈ ਦਾਨੀਏਲ ਦੇ ਪਰਮੇਸ਼ੁਰ ਤੋਂ ਡਰੇ ਕਿਉਂਕਿ ਉਸ ਨੇ ਦਾਨੀਏਲ ਨੂੰ ਸ਼ੇਰਾਂ ਤੋਂ ਬਚਾਇਆ।’

ਕੀ ਤੁਸੀਂ ਦਾਨੀਏਲ ਵਾਂਗ ਹਰ ਰੋਜ਼ ਯਹੋਵਾਹ ਨੂੰ ਪ੍ਰਾਰਥਨਾ ਕਰਦੇ ਹੋ?