ਅਸਤਰ ਨੇ ਆਪਣੇ ਲੋਕਾਂ ਨੂੰ ਬਚਾਇਆ

ਅਸਤਰ ਇਕ ਯਹੂਦਣ ਸੀ ਜੋ ਫਾਰਸ ਦੇ ਸ਼ੂਸ਼ਨ ਸ਼ਹਿਰ ਵਿਚ ਰਹਿੰਦੀ ਸੀ। ਬਹੁਤ ਸਾਲ ਪਹਿਲਾਂ ਨਬੂਕਦਨੱਸਰ ਉਸ ਦੇ ਪਰਿਵਾਰ ਨੂੰ ਯਰੂਸ਼ਲਮ ਤੋਂ ਲੈ ਆਇਆ ਸੀ। ਉਸ ਦਾ ਪਾਲਣ-ਪੋਸ਼ਣ ਮਾਰਦਕਈ ਨੇ ਕੀਤਾ ਸੀ ਜੋ ਉਸ ਦੇ ਪਿਤਾ ਦੇ ਭਰਾ ਦਾ ਮੁੰਡਾ ਸੀ। ਮਾਰਦਕਈ ਫਾਰਸ ਦੇ ਰਾਜੇ ਅਹਸ਼ਵੇਰੋਸ਼ ਦਾ ਅਧਿਕਾਰੀ ਸੀ।

ਰਾਜਾ ਅਹਸ਼ਵੇਰੋਸ਼ ਨਵੀਂ ਰਾਣੀ ਚਾਹੁੰਦਾ ਸੀ। ਉਸ ਦੇ ਸੇਵਕ ਉਸ ਕੋਲ ਦੇਸ਼ ਦੀਆਂ ਸਭ ਤੋਂ ਸੋਹਣੀਆਂ ਕੁੜੀਆਂ ਲੈ ਕੇ ਆਏ। ਇਨ੍ਹਾਂ ਕੁੜੀਆਂ ਵਿਚ ਅਸਤਰ ਵੀ ਸੀ। ਇਨ੍ਹਾਂ ਸਾਰੀਆਂ ਕੁੜੀਆਂ ਵਿੱਚੋਂ ਰਾਜੇ ਨੇ ਅਸਤਰ ਨੂੰ ਰਾਣੀ ਬਣਾਇਆ। ਮਾਰਦਕਈ ਨੇ ਅਸਤਰ ਨੂੰ ਕਿਹਾ ਕਿ ਉਹ ਕਿਸੇ ਨੂੰ ਇਹ ਨਾ ਦੱਸੇ ਕਿ ਉਹ ਇਕ ਯਹੂਦਣ ਸੀ।

ਘਮੰਡੀ ਹਾਮਾਨ ਸਾਰੇ ਮੰਤਰੀਆਂ ਦਾ ਮੁਖੀ ਸੀ। ਉਸ ਚਾਹੁੰਦਾ ਸੀ ਕਿ ਸਾਰੇ ਜਣੇ ਉਸ ਦੇ ਅੱਗੇ ਝੁਕਣ। ਪਰ ਮਾਰਦਕਈ ਨੇ ਝੁਕਣ ਤੋਂ ਮਨ੍ਹਾ ਕੀਤਾ। ਇਸ ਕਰਕੇ ਹਾਮਾਨ ਨੂੰ ਗੁੱਸਾ ਚੜ੍ਹਿਆ ਹੋਇਆ ਸੀ ਤੇ ਉਹ ਉਸ ਨੂੰ ਮਾਰਨਾ ਚਾਹੁੰਦਾ ਸੀ। ਜਦੋਂ ਹਾਮਾਨ ਨੂੰ ਪਤਾ ਲੱਗਾ ਕਿ ਮਾਰਦਕਈ ਇਕ ਯਹੂਦੀ ਸੀ, ਤਾਂ ਉਸ ਨੇ ਦੇਸ਼ ਵਿੱਚੋਂ ਸਾਰੇ ਯਹੂਦੀਆਂ ਨੂੰ ਮਾਰਨ ਦੀ ਸਾਜ਼ਸ਼ ਘੜੀ। ਉਸ ਨੇ ਰਾਜੇ ਨੂੰ ਦੱਸਿਆ: ‘ਯਹੂਦੀ ਬਹੁਤ ਖ਼ਤਰਨਾਕ ਹਨ। ਤੈਨੂੰ ਉਨ੍ਹਾਂ ਤੋਂ ਛੁਟਕਾਰਾ ਪਾਉਣਾ ਚਾਹੀਦਾ ਹੈ।’ ਅਹਸ਼ਵੇਰੋਸ਼ ਨੇ ਕਿਹਾ: ‘ਤੂੰ ਜੋ ਕਰਨਾ ਹੈ, ਉਹ ਕਰ’ ਅਤੇ ਰਾਜੇ ਨੇ ਉਸ ਨੂੰ ਕਾਨੂੰਨ ਬਣਾਉਣ ਦਾ ਅਧਿਕਾਰ ਦੇ ਦਿੱਤਾ। ਹਾਮਾਨ ਨੇ ਇਕ ਕਾਨੂੰਨ ਬਣਾਇਆ। ਇਸ ਕਾਨੂੰਨ ਵਿਚ ਲੋਕਾਂ ਨੂੰ ਕਿਹਾ ਗਿਆ ਕਿ ਅਦਾਰ ਮਹੀਨੇ ਦੇ 13ਵੇਂ ਦਿਨ ਸਾਰੇ ਯਹੂਦੀਆਂ ਨੂੰ ਮਾਰ ਦਿੱਤਾ ਜਾਵੇ। ਯਹੋਵਾਹ ਇਹ ਸਾਰਾ ਕੁਝ ਦੇਖ ਰਿਹਾ ਸੀ।

ਅਸਤਰ ਇਸ ਕਾਨੂੰਨ ਬਾਰੇ ਕੁਝ ਨਹੀਂ ਜਾਣਦੀ ਸੀ। ਇਸ ਲਈ ਮਾਰਦਕਈ ਨੇ ਉਸ ਨੂੰ ਇਸ ਦੀ ਇਕ ਨਕਲ ਭੇਜੀ ਤੇ ਕਿਹਾ: ‘ਜਾਹ ਤੇ ਰਾਜੇ ਨਾਲ ਗੱਲ ਕਰ।’ ਅਸਤਰ ਨੇ ਕਿਹਾ: ‘ਜਿਹੜਾ ਵੀ ਬਿਨ-ਬੁਲਾਏ ਰਾਜੇ ਕੋਲ ਜਾਂਦਾ ਹੈ, ਉਸ ਨੂੰ ਜਾਨੋਂ ਮਾਰ ਦਿੱਤਾ ਜਾਂਦਾ ਹੈ। ਰਾਜੇ ਨੇ 30 ਦਿਨਾਂ ਤੋਂ ਮੈਨੂੰ ਆਪਣੇ ਕੋਲ ਨਹੀਂ ਬੁਲਾਇਆ ਹੈ। ਪਰ ਮੈਂ ਜਾਵਾਂਗੀ। ਜੇ ਉਸ ਨੇ ਆਪਣਾ ਸੋਨੇ ਦਾ ਰਾਜ-ਡੰਡਾ ਮੇਰੇ ਵੱਲ ਵਧਾਇਆ, ਤਾਂ ਮੈਂ ਜੀਉਂਦੀ ਰਹਾਂਗੀ। ਜੇ ਨਹੀਂ, ਤਾਂ ਮੈਨੂੰ ਮੌਤ ਦੀ ਸਜ਼ਾ ਮਿਲੇਗੀ।’

ਅਸਤਰ ਮਹਿਲ ਦੇ ਵਿਹੜੇ ਵਿਚ ਗਈ। ਜਦੋਂ ਰਾਜੇ ਨੇ ਉਸ ਨੂੰ ਦੇਖਿਆ, ਤਾਂ ਉਸ ਨੇ ਆਪਣਾ ਰਾਜ-ਡੰਡਾ ਉਸ ਵੱਲ ਵਧਾਇਆ। ਉਹ ਰਾਜੇ ਕੋਲ ਗਈ। ਰਾਜੇ ਨੇ ਉਸ ਨੂੰ ਪੁੱਛਿਆ: ‘ਅਸਤਰ, ਮੈਂ ਤੇਰੇ ਲਈ ਕੀ ਕਰ ਸਕਦਾ?’ ਉਸ ਨੇ ਕਿਹਾ: ‘ਮੈਂ ਤੁਹਾਨੂੰ ਤੇ ਹਾਮਾਨ ਨੂੰ ਦਾਅਵਤ ਵਿਚ ਆਉਣ ਦਾ ਸੱਦਾ ਦੇਣ ਆਈ ਹਾਂ।’ ਜਦੋਂ ਉਹ ਦਾਅਵਤ ਵਿਚ ਆਏ, ਤਾਂ ਅਸਤਰ ਨੇ ਉਨ੍ਹਾਂ ਨੂੰ ਦੂਸਰੇ ਦਿਨ ਫਿਰ ਦਾਅਵਤ ਵਿਚ ਆਉਣ ਦਾ ਸੱਦਾ ਦਿੱਤਾ। ਦੂਜੀ ਦਾਅਵਤ ਵਿਚ ਰਾਜੇ ਨੇ ਉਸ ਨੂੰ ਫਿਰ ਪੁੱਛਿਆ: ‘ਦੱਸ, ਮੈਂ ਤੇਰੇ ਲਈ ਕੀ ਕਰ ਸਕਦਾ?’ ਉਸ ਨੇ ਕਿਹਾ: ‘ਕੋਈ ਮੈਨੂੰ ਤੇ ਮੇਰੇ ਲੋਕਾਂ ਨੂੰ ਮਾਰਨਾ ਚਾਹੁੰਦਾ ਹੈ। ਸਾਨੂੰ ਬਚਾ ਲੈ।’ ਰਾਜੇ ਨੇ ਪੁੱਛਿਆ: ‘ਤੈਨੂੰ ਕੌਣ ਮਾਰਨਾ ਚਾਹੁੰਦਾ?’ ਉਸ ਨੇ ਕਿਹਾ: ‘ਇਹ ਬੁਰਾ ਆਦਮੀ, ਹਾਮਾਨ।’ ਅਹਸ਼ਵੇਰੋਸ਼ ਨੂੰ ਇੰਨਾ ਗੁੱਸਾ ਚੜ੍ਹ ਗਿਆ ਕਿ ਉਸ ਨੇ ਹਾਮਾਨ ਨੂੰ ਉਸੇ ਵੇਲੇ ਮਰਵਾ ਦਿੱਤਾ।

ਪਰ ਹਾਮਾਨ ਵੱਲੋਂ ਬਣਾਏ ਕਾਨੂੰਨ ਨੂੰ ਕੋਈ ਰੱਦ ਨਹੀਂ ਕਰ ਸਕਦਾ ਸੀ, ਇੱਥੋਂ ਤਕ ਕਿ ਰਾਜਾ ਵੀ ਨਹੀਂ। ਸੋ ਰਾਜੇ ਨੇ ਮਾਰਦਕਈ ਨੂੰ ਮੰਤਰੀਆਂ ਦਾ ਮੁਖੀ ਬਣਾ ਦਿੱਤਾ ਤੇ ਉਸ ਨੂੰ ਨਵਾਂ ਕਾਨੂੰਨ ਬਣਾਉਣ ਦਾ ਅਧਿਕਾਰ ਦੇ ਦਿੱਤਾ। ਮਾਰਦਕਈ ਨੇ ਕਾਨੂੰਨ ਬਣਾਇਆ ਕਿ ਜਦੋਂ ਯਹੂਦੀਆਂ ʼਤੇ ਹਮਲਾ ਕੀਤਾ ਜਾਵੇ, ਤਾਂ ਉਹ ਆਪਣੀਆਂ ਜਾਨਾਂ ਬਚਾਉਣ ਲਈ ਮੁਕਾਬਲਾ ਕਰ ਸਕਦੇ ਸਨ। ਅਦਾਰ ਮਹੀਨੇ ਦੇ 13ਵੇਂ ਦਿਨ ਯਹੂਦੀਆਂ ਨੇ ਆਪਣੇ ਦੁਸ਼ਮਣਾਂ ਨੂੰ ਹਰਾ ਦਿੱਤਾ। ਉਸ ਸਮੇਂ ਤੋਂ ਉਹ ਹਰ ਸਾਲ ਆਪਣੀ ਜਿੱਤ ਦਾ ਜਸ਼ਨ ਮਨਾਉਂਦੇ ਸਨ।