ਯਿਸੂ ਨੇ ਸੌਲੁਸ ਨੂੰ ਚੁਣਿਆ

ਸੌਲੁਸ ਇਕ ਰੋਮੀ ਨਾਗਰਿਕ ਸੀ ਜਿਸ ਦਾ ਜਨਮ ਤਰਸੁਸ ਵਿਚ ਹੋਇਆ ਸੀ। ਉਹ ਇਕ ਫ਼ਰੀਸੀ ਸੀ ਜੋ ਯਹੂਦੀ ਕਾਨੂੰਨ ਦਾ ਮਾਹਰ ਸੀ। ਉਹ ਮਸੀਹੀਆਂ ਨਾਲ ਨਫ਼ਰਤ ਕਰਦਾ ਸੀ। ਉਹ ਮਸੀਹੀ ਆਦਮੀ-ਔਰਤਾਂ ਨੂੰ ਉਨ੍ਹਾਂ ਦੇ ਘਰੋਂ ਘੜੀਸ ਲਿਆਉਂਦਾ ਸੀ ਅਤੇ ਜੇਲ੍ਹ ਵਿਚ ਬੰਦ ਕਰਵਾ ਦਿੰਦਾ ਸੀ। ਜਦੋਂ ਗੁੱਸੇ ਨਾਲ ਭਰੀ-ਪੀਤੀ ਭੀੜ ਨੇ ਪੱਥਰ ਮਾਰ-ਮਾਰ ਕੇ ਇਸਤੀਫ਼ਾਨ ਨੂੰ ਜਾਨੋਂ ਮਾਰ ਦਿੱਤਾ, ਤਾਂ ਸੌਲੁਸ ਉੱਥੇ ਖੜ੍ਹਾ ਸਾਰਾ ਕੁਝ ਦੇਖ ਰਿਹਾ ਸੀ।

ਪਰ ਸੌਲੁਸ ਸਿਰਫ਼ ਯਰੂਸ਼ਲਮ ਦੇ ਮਸੀਹੀਆਂ ਨੂੰ ਜੇਲ੍ਹ ਵਿਚ ਸੁੱਟ ਕੇ ਖ਼ੁਸ਼ ਨਹੀਂ ਸੀ। ਉਸ ਨੇ ਮਹਾਂ ਪੁਜਾਰੀ ਨੂੰ ਕਿਹਾ ਕਿ ਉਹ ਉਸ ਨੂੰ ਦਮਿਸਕ ਭੇਜ ਦੇਵੇ ਤਾਂਕਿ ਉਹ ਉੱਥੇ ਵੀ ਮਸੀਹੀਆਂ ਨੂੰ ਫੜ ਸਕੇ। ਜਦੋਂ ਸੌਲੁਸ ਸ਼ਹਿਰ ਦੇ ਨੇੜੇ ਪਹੁੰਚਿਆ, ਤਾਂ ਅਚਾਨਕ ਉਸ ਦੇ ਚਾਰੇ ਪਾਸੇ ਤੇਜ਼ ਰੌਸ਼ਨੀ ਚਮਕੀ। ਉਹ ਜ਼ਮੀਨ ਉੱਤੇ ਡਿਗ ਪਿਆ। ਇਕ ਆਵਾਜ਼ ਨੇ ਉਸ ਨੂੰ ਕਿਹਾ: ‘ਸੌਲੁਸ, ਤੂੰ ਕਿਉਂ ਮੇਰੇ ਉੱਤੇ ਜ਼ੁਲਮ ਕਰਦਾ ਹੈਂ?’ ਸੌਲੁਸ ਨੇ ਪੁੱਛਿਆ: ‘ਤੂੰ ਕੌਣ ਹੈਂ?’ ਉਸ ਨੇ ਜਵਾਬ ਦਿੱਤਾ: ‘ਮੈਂ ਯਿਸੂ ਹਾਂ। ਦਮਿਸਕ ਨੂੰ ਜਾਹ ਅਤੇ ਉੱਥੇ ਤੈਨੂੰ ਦੱਸਿਆ ਜਾਵੇਗਾ ਕਿ ਤੂੰ ਕੀ ਕਰਨਾ ਹੈਂ।’ ਉਸੇ ਵੇਲੇ ਸੌਲੁਸ ਅੰਨ੍ਹਾ ਹੋ ਗਿਆ ਅਤੇ ਆਦਮੀ ਉਸ ਦਾ ਹੱਥ ਫੜ ਕੇ ਉਸ ਨੂੰ ਦਮਿਸਕ ਲੈ ਗਏ।

ਦਮਿਸਕ ਵਿਚ ਹਨਾਨਿਆ ਨਾਂ ਦਾ ਇਕ ਵਫ਼ਾਦਾਰ ਮਸੀਹੀ ਸੀ। ਯਿਸੂ ਨੇ ਉਸ ਨੂੰ ਦਰਸ਼ਣ ਵਿਚ ਦੱਸਿਆ: ‘ਸਿੱਧੀ ਨਾਂ ਦੀ ਗਲੀ ਵਿਚ ਯਹੂਦਾ ਦੇ ਘਰ ਜਾ ਕੇ ਸੌਲੁਸ ਬਾਰੇ ਪੁੱਛ।’ ਹਨਾਨਿਆ ਨੇ ਕਿਹਾ: ‘ਪ੍ਰਭੂ, ਮੈਂ ਇਸ ਆਦਮੀ ਬਾਰੇ ਸਾਰਾ ਕੁਝ ਜਾਣਦਾ ਹਾਂ। ਉਹ ਤੇਰੇ ਚੇਲਿਆਂ ਨੂੰ ਜੇਲ੍ਹ ਵਿਚ ਸੁੱਟ ਰਿਹਾ ਹੈ!’ ਪਰ ਯਿਸੂ ਨੇ ਕਿਹਾ: ‘ਉਸ ਕੋਲ ਜਾਹ। ਮੈਂ ਸੌਲੁਸ ਨੂੰ ਬਹੁਤ ਸਾਰੀਆਂ ਕੌਮਾਂ ਨੂੰ ਖ਼ੁਸ਼ ਖ਼ਬਰੀ ਸੁਣਾਉਣ ਲਈ ਚੁਣਿਆ ਹੈ।’

ਇਸ ਲਈ ਹਨਾਨਿਆ ਸੌਲੁਸ ਕੋਲ ਗਿਆ ਤੇ ਕਿਹਾ: ‘ਸੌਲੁਸ ਮੇਰੇ ਭਰਾ, ਯਿਸੂ ਨੇ ਮੈਨੂੰ ਤੇਰੀਆਂ ਅੱਖਾਂ ਦੀ ਰੌਸ਼ਨੀ ਵਾਪਸ ਲਿਆਉਣ ਲਈ ਘੱਲਿਆ ਹੈ।’ ਸੌਲੁਸ ਨੂੰ ਉਸੇ ਪਲ ਦੁਬਾਰਾ ਦਿਸਣ ਲੱਗ ਪਿਆ। ਉਸ ਨੇ ਯਿਸੂ ਬਾਰੇ ਸਿੱਖਿਆ ਅਤੇ ਉਸ ਦਾ ਚੇਲਾ ਬਣ ਗਿਆ। ਹੁਣ ਬਪਤਿਸਮਾ ਲੈ ਕੇ ਸੌਲੁਸ ਨੇ ਆਪਣੇ ਮਸੀਹੀ ਭਰਾਵਾਂ ਨਾਲ ਸਭਾ ਘਰਾਂ ਵਿਚ ਪ੍ਰਚਾਰ ਕਰਨਾ ਸ਼ੁਰੂ ਕਰ ਦਿੱਤਾ। ਕੀ ਤੁਸੀਂ ਸੋਚ ਸਕਦੇ ਹੋ ਕਿ ਸੌਲੁਸ ਨੂੰ ਯਿਸੂ ਬਾਰੇ ਪ੍ਰਚਾਰ ਕਰਦਿਆਂ ਦੇਖ ਕੇ ਯਹੂਦੀ ਕਿੰਨੇ ਹੱਕੇ-ਬੱਕੇ ਰਹਿ ਗਏ ਹੋਣੇ? ਉਨ੍ਹਾਂ ਨੇ ਕਿਹਾ: ‘ਇਹ ਉਹੀ ਆਦਮੀ ਨਹੀਂ ਜੋ ਯਿਸੂ ਦੇ ਚੇਲਿਆਂ ਨੂੰ ਫੜ ਕੇ ਜੇਲ੍ਹ ਵਿਚ ਸੁੱਟ ਦਿੰਦਾ ਸੀ?’

ਸੌਲੁਸ ਨੇ ਦਮਿਸਕ ਵਿਚ ਰਹਿ ਕੇ ਤਿੰਨ ਸਾਲ ਪ੍ਰਚਾਰ ਕੀਤਾ। ਯਹੂਦੀ ਸੌਲੁਸ ਨਾਲ ਨਫ਼ਰਤ ਕਰਦੇ ਸਨ ਅਤੇ ਉਸ ਨੂੰ ਜਾਨੋਂ ਮਾਰਨ ਦੀਆਂ ਸਾਜ਼ਸ਼ਾਂ ਘੜਦੇ ਸਨ। ਪਰ ਚੇਲਿਆਂ ਨੂੰ ਇਸ ਗੱਲ ਦਾ ਪਤਾ ਲੱਗ ਗਿਆ ਅਤੇ ਉਨ੍ਹਾਂ ਨੇ ਸੌਲੁਸ ਦੀ ਉੱਥੋਂ ਬਚ ਕੇ ਨਿਕਲਣ ਵਿਚ ਮਦਦ ਕੀਤੀ। ਉਨ੍ਹਾਂ ਨੇ ਉਸ ਨੂੰ ਇਕ ਵੱਡੀ ਸਾਰੀ ਟੋਕਰੀ ਵਿਚ ਬਿਠਾ ਕੇ ਤਾਕੀ ਥਾਣੀਂ ਥੱਲੇ ਉਤਾਰ ਦਿੱਤਾ।

ਸੌਲੁਸ ਨੇ ਯਰੂਸ਼ਲਮ ਪਹੁੰਚ ਕੇ ਭੈਣਾਂ-ਭਰਾਵਾਂ ਨਾਲ ਮਿਲਣ-ਗਿਲਣ ਦੀ ਕੋਸ਼ਿਸ਼ ਕੀਤੀ। ਪਰ ਉਹ ਉਸ ਤੋਂ ਡਰਦੇ ਸਨ। ਫਿਰ ਬਰਨਾਬਾਸ ਨਾਂ ਦਾ ਚੇਲਾ ਸੌਲੁਸ ਨੂੰ ਰਸੂਲਾਂ ਕੋਲ ਲੈ ਕੇ ਗਿਆ ਅਤੇ ਉਨ੍ਹਾਂ ਨੂੰ ਯਕੀਨ ਦਿਵਾਇਆ ਕਿ ਸੌਲੁਸ ਸੱਚੀਂ ਬਦਲ ਚੁੱਕਾ ਸੀ। ਸੌਲੁਸ ਨੇ ਯਰੂਸ਼ਲਮ ਦੀ ਮੰਡਲੀ ਨਾਲ ਮਿਲ ਕੇ ਜੋਸ਼ ਨਾਲ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ ਕਰਨਾ ਸ਼ੁਰੂ ਕਰ ਦਿੱਤਾ। ਬਾਅਦ ਵਿਚ ਉਹ ਪੌਲੁਸ ਦੇ ਨਾਂ ਤੋਂ ਜਾਣਿਆ ਜਾਣ ਲੱਗਾ।