1, 2. ਅਸੀਂ ਉਤਪਤ 2:3 ਤੋਂ ਕੀ ਸਿੱਖਦੇ ਹਾਂ? ਅਸੀਂ ਕਿਨ੍ਹਾਂ ਸਵਾਲਾਂ ਦੇ ਜਵਾਬ ਜਾਣਾਂਗੇ?

ਉਤਪਤ ਦੇ ਪਹਿਲੇ ਅਧਿਆਇ ਤੋਂ ਅਸੀਂ ਸਿੱਖਦੇ ਹਾਂ ਕਿ ਪਰਮੇਸ਼ੁਰ ਨੇ ਛੇ ਦਿਨਾਂ ਵਿਚ ਧਰਤੀ ਤਿਆਰ ਕੀਤੀ। ਇਹ 24 ਘੰਟਿਆਂ ਵਾਲੇ ਨਹੀਂ, ਸਗੋਂ ਕਾਫ਼ੀ ਲੰਬੀ ਮਿਆਦ ਵਾਲੇ ਦਿਨ ਸਨ। ਸਮੇਂ ਦੀ ਇਸ ਹਰ ਮਿਆਦ ਦੀ ਸਮਾਪਤੀ ਨੂੰ ਬਾਈਬਲ “ਸੰਝ ਤੇ ਸਵੇਰ” ਕਹਿੰਦੀ ਹੈ। (ਉਤ. 1:5, 8, 13, 19, 23, 31) ਪਰ ਸੱਤਵਾਂ ਦਿਨ ਵੱਖਰਾ ਸੀ ਜਿਸ ਬਾਰੇ ਬਾਈਬਲ ਕਹਿੰਦੀ ਹੈ: ‘ਪਰਮੇਸ਼ੁਰ ਨੇ ਸੱਤਵੇਂ ਦਿਨ ਨੂੰ ਅਸੀਸ ਦਿੱਤੀ ਅਤੇ ਇਸ ਨੂੰ ਪਵਿੱਤਰ ਦਿਨ ਬਣਾਇਆ, ਕਿਉਂਕਿ ਉਸ ਨੇ ਉਨ੍ਹਾਂ ਸਾਰੇ ਕੰਮਾਂ ਤੋਂ ਆਰਾਮ ਲਿਆ ਜੋ ਸੰਸਾਰ ਦੀ ਸਾਜਨਾ ਕਰਨ ਵੇਲੇ ਕਰ ਰਿਹਾ ਸੀ।’—ਉਤ. 2:3, ERV.

² ਉਤਪਤ ਦੀ ਕਿਤਾਬ ਵਿਚ ਜਦੋਂ ਕਿਹਾ ਗਿਆ ਸੀ ਕਿ ਪਰਮੇਸ਼ੁਰ ਨੇ “ਆਰਾਮ ਲਿਆ,” ਤਾਂ ਇਸ ਦਾ ਮਤਲਬ ਹੈ ਕਿ ਉਹ ਉਦੋਂ ਵੀ ਆਰਾਮ ਕਰ ਰਿਹਾ ਸੀ। ਇਸ ਲਈ ਅਸੀਂ ਕਹਿ ਸਕਦੇ ਹਾਂ ਕਿ ਜਦੋਂ ਮੂਸਾ ਨੇ 1513 ਈਸਵੀ ਪੂਰਵ ਵਿਚ ਉਤਪਤ ਦੀ ਕਿਤਾਬ ਲਿਖੀ, ਤਾਂ ਪਰਮੇਸ਼ੁਰ ਆਰਾਮ ਕਰ ਰਿਹਾ ਸੀ। ਨਾਲੇ ਪਰਮੇਸ਼ੁਰ ਨੇ ਬਾਅਦ ਵਿਚ ਬਾਈਬਲ ਵਿਚ ਕਿਹਾ ਕਿ ਲੋਕ ਉਸ ਦੇ ਆਰਾਮ ਵਿਚ ਵੜ ਸਕਦੇ ਸਨ, ਯਾਨੀ ਉਸ ਵਾਂਗ ਆਰਾਮ ਕਰ ਸਕਦੇ ਸਨ। ਕੀ ਪਰਮੇਸ਼ੁਰ ਹਾਲੇ ਵੀ ਆਰਾਮ ਕਰ ਰਿਹਾ ਹੈ? ਜੇ ਹਾਂ, ਅਸੀਂ ਉਸ ਦੇ ਆਰਾਮ ਵਿਚ ਕਿਵੇਂ ਵੜ ਸਕਦੇ ਹਾਂ? ਇਨ੍ਹਾਂ ਸਵਾਲਾਂ ਦੇ ਜਵਾਬ ਜਾਣਨੇ ਬਹੁਤ ਜ਼ਰੂਰੀ ਹਨ।

5. ਸੱਤਵੇਂ ਦਿਨ ਯਹੋਵਾਹ ਕੀ ਕਰਨਾ ਚਾਹੁੰਦਾ ਸੀ? ਪਰਮੇਸ਼ੁਰ ਆਪਣਾ ਮਕਸਦ ਕਦੋਂ ਪੂਰਾ ਕਰੇਗਾ?

⁵ ਇਸ ਸਵਾਲ ਦੇ ਜਵਾਬ ਲਈ ਸਾਨੂੰ ਯਾਦ ਰੱਖਣ ਦੀ ਲੋੜ ਹੈ ਕਿ ਯਹੋਵਾਹ ਨੇ ਕਿਸੇ ਖ਼ਾਸ ਮਕਸਦ ਲਈ ਸੱਤਵਾਂ ਦਿਨ ਚੁਣਿਆ ਸੀ। ਉਤਪਤ 2:3 ਸਾਨੂੰ ਦੱਸਦਾ ਹੈ: ‘ਪਰਮੇਸ਼ੁਰ ਨੇ ਸੱਤਵੇਂ ਦਿਨ ਨੂੰ ਅਸੀਸ ਦਿੱਤੀ ਅਤੇ ਉਹ ਨੂੰ ਪਵਿੱਤ੍ਰ ਠਹਿਰਾਇਆ।’ ਯਹੋਵਾਹ ਨੇ ਇਹ ਦਿਨ ਪਵਿੱਤਰ ਠਹਿਰਾਇਆ ਕਿਉਂਕਿ ਇਹ ਉਹ ਦਿਨ ਹੈ ਜਦੋਂ ਪਰਮੇਸ਼ੁਰ ਧਰਤੀ ਲਈ ਰੱਖਿਆ ਆਪਣਾ ਮਕਸਦ ਪੂਰਾ ਕਰੇਗਾ। ਉਸ ਦਾ ਮਕਸਦ ਹੈ ਕਿ ਆਗਿਆਕਾਰ ਆਦਮੀ ਅਤੇ ਔਰਤਾਂ ਧਰਤੀ ਉੱਤੇ ਰਹਿਣ ਅਤੇ ਇਸ ਦੀ ਦੇਖ-ਭਾਲ ਕਰਨ। (ਉਤ. 1:28) ਯਹੋਵਾਹ ਪਰਮੇਸ਼ੁਰ ਅਤੇ “ਸਬਤ ਦੇ ਦਿਨ ਦਾ ਮਾਲਕ” ਯਿਸੂ ਮਸੀਹ ਇਸ ਲਈ ‘ਹੁਣ ਤੀਕੁਰ ਕੰਮ ਕਰ ਰਹੇ’ ਹਨ ਤਾਂਕਿ ਧਰਤੀ ਲਈ ਪਰਮੇਸ਼ੁਰ ਦਾ ਮਕਸਦ ਪੂਰਾ ਹੋਵੇ। (ਮੱਤੀ 12:8) ਜਦ ਤਕ ਇਹ ਮਕਸਦ ਪੂਰਾ ਨਹੀਂ ਹੁੰਦਾ, ਤਦ ਤਕ ਆਰਾਮ ਦਾ ਦਿਨ ਚੱਲਦਾ ਰਹੇਗਾ। ਇਹ ਮਸੀਹ ਦਾ ਹਜ਼ਾਰ ਸਾਲ ਦਾ ਰਾਜ ਖ਼ਤਮ ਹੋਣ ਤੇ ਬੀਤੇਗਾ।