ਪ੍ਰਾਚੀਨ ਇਸਰਾਏਲ ਦਾ ਬੁੱਧੀਮਾਨ ਰਾਜਾ ਸੁਲੇਮਾਨ ਇਕ ਪਿਤਾ ਦੇ ਪਿਆਰ-ਭਰੇ ਸ਼ਬਦਾਂ ਵਿਚ ਕਹਿੰਦਾ ਹੈ: “ਹੇ ਮੇਰੇ ਪੁੱਤ੍ਰ, ਜੇ ਤੂੰ ਮੇਰੇ ਆਖੇ ਲੱਗੇਂ, ਅਤੇ ਮੇਰੇ ਹੁਕਮਾਂ ਨੂੰ ਆਪਣੇ ਕੋਲ ਸਾਂਭ ਰੱਖੇਂ, ਭਈ ਬੁੱਧ ਵੱਲ ਕੰਨ ਲਾਵੇਂ, ਅਤੇ ਸਮਝ ਉੱਤੇ ਚਿੱਤ ਲਾਵੇਂ,—ਹਾਂ, ਜੇ ਤੂੰ ਬਿਬੇਕ ਲਈ ਪੁਕਾਰੇਂ, ਅਤੇ ਸਮਝ ਲਈ ਅਵਾਜ਼ ਕਢੇਂ, ਜੇ ਤੂੰ ਚਾਂਦੀ ਵਾਂਙੁ ਉਹ ਦੀ ਭਾਲ ਕਰੇਂ, ਅਤੇ ਗੁਪਤ ਧਨ ਵਾਂਙੁ ਉਹ ਦੀ ਖੋਜ ਕਰੇਂ, ਤਾਂ ਤੂੰ ਯਹੋਵਾਹ ਦੇ ਭੈ ਨੂੰ ਸਮਝੇਂਗਾ, ਅਤੇ ਪਰਮੇਸ਼ੁਰ ਦੇ ਗਿਆਨ ਨੂੰ ਪ੍ਰਾਪਤ ਕਰੇਂਗਾ।”—ਕਹਾਉਤਾਂ 2:1-5.

ਬੁੱਧ ਦਾ ਮਤਲਬ ਹੈ ਪਰਮੇਸ਼ੁਰ ਤੋਂ ਮਿਲੇ ਗਿਆਨ ਨੂੰ ਚੰਗੀ ਤਰ੍ਹਾਂ ਵਰਤਣਾ। ਅਤੇ ਬਾਈਬਲ ਕਿੰਨੇ ਵਧੀਆ ਤਰੀਕੇ ਵਿਚ ਬੁੱਧ ਨੂੰ ਪੇਸ਼ ਕਰਦੀ ਹੈ! ਜੀ ਹਾਂ, ਜਿੱਦਾਂ ਕਹਾਉਤਾਂ ਦੀ ਪੁਸਤਕ ਅਤੇ ਉਪਦੇਸ਼ਕ ਦੀ ਪੋਥੀ ਵਿਚ ਦਰਜ ਹਨ, ਬਾਈਬਲ ਬੁੱਧ ਦੀਆਂ ਗੱਲਾਂ ਨਾਲ ਭਰੀ ਹੋਈ ਹੈ, ਅਤੇ ਸਾਨੂੰ ਇਨ੍ਹਾਂ ਗੱਲਾਂ ਵੱਲ ਧਿਆਨ ਦੇਣਾ ਚਾਹੀਦਾ ਹੈ। ਬਾਈਬਲ ਵਿਚ ਅਜਿਹੀਆਂ ਕਈ ਉਦਾਹਰਣਾਂ ਹਨ ਜੋ ਪਰਮੇਸ਼ੁਰੀ ਸਿਧਾਂਤਾਂ ਨੂੰ ਲਾਗੂ ਕਰਨ ਦੇ ਫ਼ਾਇਦੇ ਅਤੇ ਉਨ੍ਹਾਂ ਨੂੰ ਰੱਦ ਕਰਨ ਦੇ ਖ਼ਤਰੇ ਦਿਖਾਉਂਦੀਆਂ ਹਨ। (ਰੋਮੀਆਂ 15:4; 1 ਕੁਰਿੰਥੀਆਂ 10:11) ਮਿਸਾਲ ਲਈ, ਅਲੀਸ਼ਾ ਨਬੀ ਦੇ ਲਾਲਚੀ ਦਾਸ, ਗੇਹਾਜੀ ਵੱਲ ਧਿਆਨ ਦਿਓ। (2 ਰਾਜਿਆਂ 5:20-27) ਕੀ ਇਹ ਮਿਸਾਲ ਸਾਨੂੰ ਲਾਲਚ ਤੋਂ ਬਚਣ ਦੀ ਬੁੱਧੀਮਤਾ ਨਹੀਂ ਸਿਖਾਉਂਦੀ? ਯਾਕੂਬ ਦੀ ਧੀ ਦੀਨਾਹ “ਦੇਸ ਦੀਆਂ ਧੀਆਂ” ਨਾਲ ਮੁਲਾਕਾਤ ਕਰਨ ਜਾਂਦੀ ਸੀ। ਭਾਵੇਂ ਕਿ ਇਹ ਮੁਲਾਕਾਤਾਂ ਚੰਗੀਆਂ ਜਾਪਦੀਆਂ ਸਨ, ਇਨ੍ਹਾਂ ਦੇ ਬੁਰੇ ਨਤੀਜੇ ਤੋਂ ਅਸੀਂ ਕੀ ਸਿੱਖਦੇ ਹਾਂ? (ਉਤਪਤ 34:1-31) ਕੀ ਅਸੀਂ ਬੁਰੀ ਸੰਗਤ ਰੱਖਣ ਦੀ ਮੂਰਖਤਾ ਨੂੰ ਝਟਪਟ ਨਹੀਂ ਸਮਝ ਲੈਂਦੇ?—ਕਹਾਉਤਾਂ 13:20; 1 ਕੁਰਿੰਥੀਆਂ 15:33.

ਬੁੱਧ ਵੱਲ ਕੰਨ ਲਾਉਣ ਵਿਚ ਸਮਝ ਅਤੇ ਬਿਬੇਕ ਪ੍ਰਾਪਤ ਕਰਨਾ ਸ਼ਾਮਲ ਹੈ। ਵੈਬਸਟਰਸ ਰਿਵਾਈਜ਼ਡ ਅਨਅਬ੍ਰਿਜਡ ਡਿਕਸ਼ਨਰੀ ਦੇ ਅਨੁਸਾਰ ਸਮਝ “ਮਨ ਦੀ ਸ਼ਕਤੀ ਜਾਂ ਯੋਗਤਾ ਹੈ ਜਿਸ ਰਾਹੀਂ ਦੋ ਚੀਜ਼ਾਂ ਵਿਚਕਾਰ ਫ਼ਰਕ ਦੇਖਿਆ ਜਾ ਸਕਦਾ ਹੈ।” ਪਰਮੇਸ਼ੁਰੀ ਸਮਝ ਚੰਗੇ ਅਤੇ ਬੁਰੇ ਵਿਚਕਾਰ ਫ਼ਰਕ ਦੇਖਣ ਅਤੇ ਫਿਰ ਸਹੀ ਰਸਤਾ ਚੁਣਨ ਦੀ ਯੋਗਤਾ ਹੈ। ਜੇ ਅਸੀਂ ਸਮਝ ਉੱਤੇ ‘ਚਿੱਤ ਨਾ ਲਾਈਏ’ ਜਾਂ ਉਸ ਨੂੰ ਪ੍ਰਾਪਤ ਕਰਨ ਦੀ ਇੱਛਾ ਨਾ ਰੱਖੀਏ ਤਾਂ ਅਸੀਂ ‘ਉਸ ਰਾਹ’ ਉੱਤੇ ਕਿੱਦਾਂ ਰਹਿ ਸਕਦੇ ਹਾਂ “ਜਿਹੜਾ ਜੀਉਣ ਨੂੰ ਜਾਂਦਾ ਹੈ”? (ਮੱਤੀ 7:14. ਬਿਵਸਥਾ ਸਾਰ 30:19, 20 ਦੀ ਤੁਲਨਾ ਕਰੋ।) ਪਰਮੇਸ਼ੁਰ ਦੇ ਬਚਨ ਦਾ ਅਧਿਐਨ ਕਰਨ ਅਤੇ ਉਸ ਦੀਆਂ ਗੱਲਾਂ ਉੱਤੇ ਅਮਲ ਕਰਨ ਦੁਆਰਾ ਸਮਝ ਮਿਲਦੀ ਹੈ।