17. ਸੀਯੋਨ ਦਾ ਛੁਡਾਉਣ ਵਾਲਾ ਕੌਣ ਸੀ, ਅਤੇ ਉਸ ਨੇ ਸੀਯੋਨ ਨੂੰ ਕਦੋਂ ਛੁਡਾਇਆ ਸੀ?

¹⁷ ਮੂਸਾ ਦੀ ਬਿਵਸਥਾ ਦੇ ਅਧੀਨ ਜਿਹੜਾ ਇਸਰਾਏਲੀ ਆਪਣੇ ਆਪ ਨੂੰ ਗ਼ੁਲਾਮੀ ਵਿਚ ਵੇਚ ਦਿੰਦਾ ਸੀ ਉਸ ਨੂੰ ਗ਼ੁਲਾਮੀ ਵਿੱਚੋਂ ਖ਼ਰੀਦ ਕੇ ਛੁਡਾਇਆ ਜਾ ਸਕਦਾ ਸੀ। ਯਸਾਯਾਹ ਦੀ ਭਵਿੱਖਬਾਣੀ ਵਿਚ ਪਹਿਲਾਂ ਵੀ ਯਹੋਵਾਹ ਨੂੰ ਤੋਬਾ ਕਰਨ ਵਾਲਿਆਂ ਦੇ ਛੁਡਾਉਣ ਵਾਲੇ ਵਜੋਂ ਦਿਖਾਇਆ ਗਿਆ ਸੀ। (ਯਸਾਯਾਹ 48:17) ਹੁਣ ਉਸ ਨੂੰ ਫਿਰ ਉਸੇ ਤਰ੍ਹਾਂ ਦਿਖਾਇਆ ਜਾਂਦਾ ਹੈ। ਯਸਾਯਾਹ ਨੇ ਯਹੋਵਾਹ ਦਾ ਵਾਅਦਾ ਲਿਖਿਆ: “ਇੱਕ ਛੁਟਕਾਰਾ ਦੇਣ ਵਾਲਾ ਸੀਯੋਨ ਲਈ, ਅਤੇ ਯਾਕੂਬ ਵਿੱਚ ਅਪਰਾਧ ਤੋਂ ਹਟਣ ਵਾਲਿਆਂ ਲਈ ਆਵੇਗਾ, ਯਹੋਵਾਹ ਦਾ ਵਾਕ ਹੈ।” (ਯਸਾਯਾਹ 59:20) ਇਹ ਭਰੋਸਾ ਦਿਲਾਉਣ ਵਾਲਾ ਵਾਅਦਾ 537 ਸਾ.ਯੁ.ਪੂ. ਵਿਚ ਪੂਰਾ ਹੋਇਆ ਸੀ। ਪਰ ਇਸ ਦੀ ਹੋਰ ਵੀ ਪੂਰਤੀ ਹੋਣੀ ਸੀ। ਪੌਲੁਸ ਰਸੂਲ ਨੇ ਬਾਈਬਲ ਦੇ ਸੈਪਟੁਜਿੰਟ ਤਰਜਮੇ ਤੋਂ ਇਹੋ ਹਵਾਲਾ ਦੇ ਕੇ ਮਸੀਹੀਆਂ ਉੱਤੇ ਲਾਗੂ ਕੀਤਾ ਸੀ। ਉਸ ਨੇ ਲਿਖਿਆ: “ਇਸੇ ਤਰਾਂ ਸਾਰਾ ਇਸਰਾਏਲ ਬਚ ਜਾਵੇਗਾ ਜਿਵੇਂ ਲਿਖਿਆ ਹੋਇਆ ਹੈ,​—ਇਸਰਾਏਲ ਦਾ ਛੁਡਾਉਣ ਵਾਲਾ ਸੀਯੋਨ ਤੋਂ ਨਿੱਕਲੇਗਾ, ਉਹ ਯਾਕੂਬ ਤੋਂ ਅਭਗਤੀ ਹਟਾਵੇਗਾ, ਅਤੇ ਓਹਨਾਂ ਦੇ ਨਾਲ ਮੇਰਾ ਇਹ ਨੇਮ ਹੋਵੇਗਾ, ਜਾਂ ਮੈਂ ਓਹਨਾਂ ਦੇ ਪਾਪ ਚੁੱਕ ਲੈ ਜਾਵਾਂਗਾ।” (ਰੋਮੀਆਂ 11:26, 27) ਵਾਕਈ ਯਸਾਯਾਹ ਦੀ ਭਵਿੱਖਬਾਣੀ ਦੀ ਪੂਰਤੀ ਸਾਡੇ ਜ਼ਮਾਨੇ ਵਿਚ ਅਤੇ ਇਸ ਤੋਂ ਵੀ ਬਾਅਦ ਹੁੰਦੀ ਹੈ। ਉਹ ਕਿਵੇਂ?

19. ਯਹੋਵਾਹ ਨੇ ਰੂਹਾਨੀ ਇਸਰਾਏਲ ਨਾਲ ਕਿਹੜਾ ਨੇਮ ਬੰਨ੍ਹਿਆ ਸੀ?

¹⁹ ਯਹੋਵਾਹ ਨੇ ਰੂਹਾਨੀ ਇਸਰਾਏਲ ਨਾਲ ਇਕ ਨੇਮ ਬੰਨ੍ਹਿਆ। ਅਸੀਂ ਪੜ੍ਹਦੇ ਹਾਂ: “ਮੇਰੀ ਵੱਲੋਂ, ਯਹੋਵਾਹ ਆਖਦਾ ਹੈ, ਓਹਨਾਂ ਨਾਲ ਮੇਰਾ ਏਹ ਨੇਮ ਹੈ, ਮੇਰਾ ਆਤਮਾ ਜੋ ਤੇਰੇ ਉੱਤੇ ਹੈ, ਅਤੇ ਮੇਰੇ ਬਚਨ ਜੋ ਮੈਂ ਤੇਰੇ ਮੂੰਹ ਵਿੱਚ ਪਾਏ, ਤੇਰੇ ਮੂੰਹ ਵਿੱਚੋਂ, ਤੇਰੀ ਅੰਸ ਦੇ ਮੂੰਹ ਵਿੱਚੋਂ, ਸਗੋਂ ਤੇਰੀ ਅੰਸ ਦੀ ਅੰਸ ਦੇ ਮੂੰਹ ਵਿੱਚੋਂ, ਹੁਣ ਤੋਂ ਸਦੀਪਕਾਲ ਤੀਕ ਚੱਲੇ ਨਾ ਜਾਣਗੇ, ਯਹੋਵਾਹ ਆਖਦਾ ਹੈ।” (ਯਸਾਯਾਹ 59:21) ਅਸੀਂ ਇਹ ਨਹੀਂ ਜਾਣਦੇ ਕਿ ਇਹ ਸ਼ਬਦ ਖ਼ੁਦ ਯਸਾਯਾਹ ਉੱਤੇ ਲਾਗੂ ਹੋਏ ਸਨ ਜਾਂ ਨਹੀਂ। ਪਰ ਯਸਾਯਾਹ ਨੇ ਯਿਸੂ ਨੂੰ ਦਰਸਾਇਆ ਸੀ ਇਸ ਲਈ ਇਹ ਸ਼ਬਦ ਯਿਸੂ ਉੱਤੇ ਜ਼ਰੂਰ ਲਾਗੂ ਹੋਏ ਸਨ ਅਤੇ ਯਿਸੂ ਨੂੰ ਭਰੋਸਾ ਦਿੱਤਾ ਗਿਆ ਸੀ ਕਿ “ਉਹ ਆਪਣੀ ਅੰਸ ਨੂੰ ਵੇਖੇਗਾ।” (ਯਸਾਯਾਹ 53:10) ਯਿਸੂ ਨੇ ਯਹੋਵਾਹ ਤੋਂ ਸਿੱਖੇ ਹੋਏ ਬਚਨ ਬੋਲੇ ਸਨ ਅਤੇ ਯਹੋਵਾਹ ਦੀ ਆਤਮਾ ਉਸ ਉੱਤੇ ਸੀ। (ਯੂਹੰਨਾ 1:18; 7:16) ਇਹ ਢੁਕਵਾਂ ਹੈ ਕਿ ਪਰਮੇਸ਼ੁਰ ਦੇ ਇਸਰਾਏਲ ਦੇ ਮੈਂਬਰਾਂ ਨੂੰ, ਜੋ ਯਿਸੂ ਦੇ ਭਰਾ ਅਤੇ ਸੰਗੀ ਰਾਜੇ ਹਨ, ਯਹੋਵਾਹ ਦੀ ਪਵਿੱਤਰ ਆਤਮਾ ਮਿਲਦੀ ਹੈ। ਉਹ ਵੀ ਅਜਿਹੀਆਂ ਗੱਲਾਂ ਦਾ ਪ੍ਰਚਾਰ ਕਰਦੇ ਹਨ ਜੋ ਉਨ੍ਹਾਂ ਨੇ ਆਪਣੇ ਸਵਰਗੀ ਪਿਤਾ ਤੋਂ ਸਿੱਖੀਆਂ ਹਨ। ਉਹ ਸਾਰੇ “ਯਹੋਵਾਹ ਵੱਲੋਂ ਸਿੱਖੇ ਹੋਏ” ਹਨ। (ਯਸਾਯਾਹ 54:13; ਲੂਕਾ 12:12; ਰਸੂਲਾਂ ਦੇ ਕਰਤੱਬ 2:38) ਯਿਸੂ ਰਾਹੀਂ ਯਹੋਵਾਹ ਨੇ ਵਾਅਦਾ ਕੀਤਾ ਹੈ ਕਿ ਉਹ ਉਨ੍ਹਾਂ ਦੇ ਥਾਂ ਕਦੀ ਵੀ ਕਿਸੇ ਹੋਰ ਨੂੰ ਨਹੀਂ ਰੱਖੇਗਾ ਪਰ ਆਪਣੇ ਗਵਾਹਾਂ ਵਜੋਂ ਉਨ੍ਹਾਂ ਨੂੰ ਹਮੇਸ਼ਾ ਲਈ ਵਰਤੇਗਾ। (ਯਸਾਯਾਹ 43:10) ਲੇਕਿਨ ਉਨ੍ਹਾਂ ਦੀ “ਅੰਸ” ਕੌਣ ਹੈ ਜਿਸ ਨੂੰ ਇਸ ਨੇਮ ਤੋਂ ਫ਼ਾਇਦਾ ਹੁੰਦਾ ਹੈ?

20. ਯਹੋਵਾਹ ਦਾ ਅਬਰਾਹਾਮ ਨਾਲ ਵਾਅਦਾ ਪਹਿਲੀ ਸਦੀ ਵਿਚ ਕਿਵੇਂ ਪੂਰਾ ਹੋਇਆ ਸੀ?

²⁰ ਪੁਰਾਣੇ ਜ਼ਮਾਨੇ ਵਿਚ ਯਹੋਵਾਹ ਨੇ ਅਬਰਾਹਾਮ ਨਾਲ ਵਾਅਦਾ ਕੀਤਾ ਸੀ ਕਿ “ਤੇਰੀ ਅੰਸ ਵਿੱਚ ਧਰਤੀ ਦੀਆਂ ਸਾਰੀਆਂ ਕੌਮਾਂ ਬਰਕਤ ਪਾਉਣਗੀਆਂ।” (ਉਤਪਤ 22:18) ਇਸ ਦੇ ਮੁਤਾਬਕ ਕੁਝ ਪੈਦਾਇਸ਼ੀ ਇਸਰਾਏਲੀਆਂ ਨੇ ਮਸੀਹਾ ਨੂੰ ਸਵੀਕਾਰ ਕੀਤਾ ਅਤੇ ਕਈਆਂ ਕੌਮਾਂ ਵਿਚ ਜਾ ਕੇ ਉਸ ਬਾਰੇ ਖ਼ੁਸ਼ ਖ਼ਬਰੀ ਦਾ ਪ੍ਰਚਾਰ ਕੀਤਾ। ਨਤੀਜੇ ਵਜੋਂ ਕੁਰਨੇਲਿਯੁਸ ਤੋਂ ਲੈ ਕੇ ਕਈ ਬੇਸੁੰਨਤ ਗ਼ੈਰ-ਯਹੂਦੀਆਂ ਨੇ ਅਬਰਾਹਾਮ ਦੀ ਮੁੱਖ ਅੰਸ, ਯਾਨੀ ਯਿਸੂ ਰਾਹੀਂ ‘ਬਰਕਤ ਪਾਈ’ ਅਤੇ ਉਹ ਪਰਮੇਸ਼ੁਰ ਦੇ ਇਸਰਾਏਲ ਦਾ ਹਿੱਸਾ ਬਣੇ। ਇਹ ਗ਼ੈਰ-ਯਹੂਦੀ ਅਤੇ ਪੈਦਾਇਸ਼ੀ ਇਸਰਾਏਲੀ ਅਬਰਾਹਾਮ ਦੀ ਅੰਸ ਦਾ ਦੂਜਾ ਹਿੱਸਾ ਬਣੇ। ਇਹ ਯਹੋਵਾਹ ਦੀ “ਪਵਿੱਤਰ ਕੌਮ” ਦਾ ਹਿੱਸਾ ਹਨ ਜਿਸ ਨੂੰ ‘ਯਹੋਵਾਹ ਦਿਆਂ ਗੁਣਾਂ ਦਾ ਪਰਚਾਰ ਕਰਨ’ ਦਾ ਕੰਮ ਸੌਂਪਿਆ ਗਿਆ ਹੈ ‘ਜਿਹ ਨੇ ਉਨ੍ਹਾਂ ਨੂੰ ਅਨ੍ਹੇਰੇ ਤੋਂ ਆਪਣੇ ਅਚਰਜ ਚਾਨਣ ਵਿੱਚ ਸੱਦ ਲਿਆਂਦਾ।’​—1 ਪਤਰਸ 2:9; ਗਲਾਤੀਆਂ 3:7-9, 14, 26-29.

21. (ੳ) ਸਾਡੇ ਜ਼ਮਾਨੇ ਵਿਚ ਪਰਮੇਸ਼ੁਰ ਦੇ ਇਸਰਾਏਲ ਨੇ ਕਿਹੜੀ “ਅੰਸ” ਪੈਦਾ ਕੀਤੀ ਹੈ? (ਅ) ਪਰਮੇਸ਼ੁਰ ਦੇ ਇਸਰਾਏਲ ਨਾਲ ਯਹੋਵਾਹ ਦਾ ਨੇਮ ਇਸ ਅੰਸ ਨੂੰ ਕਿਹੜਾ ਭਰੋਸਾ ਦਿਵਾਉਂਦਾ ਹੈ?

²¹ ਇਸ ਤਰ੍ਹਾਂ ਲੱਗਦਾ ਹੈ ਕਿ ਅੱਜ ਪਰਮੇਸ਼ੁਰ ਦੇ ਇਸਰਾਏਲ ਦੀ ਪੂਰੀ ਗਿਣਤੀ ਇਕੱਠੀ ਹੋ ਚੁੱਕੀ ਹੈ। ਫਿਰ ਵੀ ਵੱਡੇ ਪੈਮਾਨੇ ਤੇ ਕੌਮਾਂ ਬਰਕਤਾਂ ਪਾ ਰਹੀਆਂ ਹਨ। ਇਹ ਕਿਸ ਤਰ੍ਹਾਂ? ਪਰਮੇਸ਼ੁਰ ਦੇ ਇਸਰਾਏਲ ਨੇ “ਅੰਸ” ਪੈਦਾ ਕੀਤੀ ਹੈ। ਇਹ “ਅੰਸ” ਯਿਸੂ ਦੇ ਉਹ ਚੇਲੇ ਹਨ ਜੋ ਫਿਰਦੌਸ ਧਰਤੀ ਉੱਤੇ ਸਦਾ ਲਈ ਜੀਉਣ ਦੀ ਆਸ ਰੱਖਦੇ ਹਨ। (ਜ਼ਬੂਰ 37:11, 29) ਯਹੋਵਾਹ ਨੇ ਇਸ “ਅੰਸ” ਨੂੰ ਵੀ ਆਪਣੇ ਰਾਹਾਂ ਬਾਰੇ ਸਿਖਾਇਆ ਹੈ। (ਯਸਾਯਾਹ 2:2-4) ਭਾਵੇਂ ਕਿ ਉਨ੍ਹਾਂ ਨੇ ਪਵਿੱਤਰ ਆਤਮਾ ਨਾਲ ਬਪਤਿਸਮਾ ਨਹੀਂ ਲਿਆ ਜਾਂ ਉਹ ਨਵੇਂ ਨੇਮ ਵਿਚ ਨਹੀਂ ਹਨ, ਉਨ੍ਹਾਂ ਨੂੰ ਯਹੋਵਾਹ ਦੀ ਪਵਿੱਤਰ ਆਤਮਾ ਤੋਂ ਬਲ ਮਿਲਦਾ ਹੈ ਤਾਂਕਿ ਉਹ ਉਨ੍ਹਾਂ ਸਾਰੀਆਂ ਰੁਕਾਵਟਾਂ ਦਾ ਸਾਮ੍ਹਣਾ ਕਰ ਸਕਣ ਜੋ ਸ਼ਤਾਨ ਉਨ੍ਹਾਂ ਦੇ ਪ੍ਰਚਾਰ ਦੇ ਕੰਮ ਵਿਚ ਲਿਆਉਂਦਾ ਹੈ। (ਯਸਾਯਾਹ 40:28-31) ਇਨ੍ਹਾਂ ਦੀ ਗਿਣਤੀ ਹੁਣ ਲੱਖਾਂ ਵਿਚ ਹੈ ਅਤੇ ਇਹ ਵੱਧ ਰਹੀ ਹੈ ਕਿਉਂਕਿ ਉਹ ਵੀ ਆਪਣੀ ਅੰਸ ਪੈਦਾ ਕਰ ਰਹੇ ਹਨ। ਮਸਹ ਕੀਤੇ ਹੋਇਆਂ ਨਾਲ ਯਹੋਵਾਹ ਦਾ ਨੇਮ ਇਸ “ਅੰਸ” ਨੂੰ ਭਰੋਸਾ ਦਿਵਾਉਂਦਾ ਹੈ ਕਿ ਯਹੋਵਾਹ ਉਨ੍ਹਾਂ ਨੂੰ ਵੀ ਆਪਣੇ ਗਵਾਹਾਂ ਵਜੋਂ ਹਮੇਸ਼ਾ ਲਈ ਵਰਤੇਗਾ।​—ਪਰਕਾਸ਼ ਦੀ ਪੋਥੀ 21:3, 4, 7.