• ਬਾਗ਼ੀਆਂ ਉੱਤੇ ਹਾਇ!
    ਯਸਾਯਾਹ ਦੀ ਭਵਿੱਖਬਾਣੀ—ਸਾਰੀ ਮਨੁੱਖਜਾਤੀ ਲਈ ਚਾਨਣ 1

    • ਝੂਠੀ ਪੂਜਾ ਨੇ ਹਿੰਸਾ ਪੈਦਾ ਕੀਤੀ

      14, 15. (ੳ) ਬੁਰੇ ਦੂਤਾਂ ਦੀ ਪੂਜਾ ਦਾ ਨਤੀਜਾ ਕੀ ਹੋਇਆ ਸੀ? (ਅ) ਯਸਾਯਾਹ ਨੇ ਇਸਰਾਏਲ ਲਈ ਕਿਹੜੇ ਵੱਧ ਰਹੇ ਦੁੱਖ ਬਾਰੇ ਭਵਿੱਖਬਾਣੀ ਕੀਤੀ ਸੀ?

      14 ਅਸਲ ਵਿਚ, ਝੂਠੀ ਪੂਜਾ ਭੂਤਾਂ, ਯਾਨੀ ਬੁਰੇ ਦੂਤਾਂ ਦੀ ਪੂਜਾ ਹੈ। (1 ਕੁਰਿੰਥੀਆਂ 10:20) ਜਿਵੇਂ ਜਲ-ਪਰਲੋ ਤੋਂ ਪਹਿਲਾਂ ਦੇਖਿਆ ਗਿਆ ਸੀ, ਬੁਰੇ ਦੂਤਾਂ ਦਾ ਅਸਰ ਹਿੰਸਾ ਪੈਦਾ ਕਰਦਾ ਹੈ। (ਉਤਪਤ 6:11, 12) ਤਾਂ ਫਿਰ, ਇਹ ਕੋਈ ਹੈਰਾਨੀ ਦੀ ਗੱਲ ਨਹੀਂ ਕਿ ਜਦੋਂ ਇਸਰਾਏਲੀ ਲੋਕ ਸੱਚਾ ਧਰਮ ਛੱਡ ਕੇ ਬੁਰੇ ਦੂਤਾਂ ਦੀ ਪੂਜਾ ਕਰਨ ਲੱਗੇ, ਤਾਂ ਦੇਸ਼ ਹਿੰਸਾ ਅਤੇ ਦੁਸ਼ਟਤਾ ਨਾਲ ਭਰ ਗਿਆ।—ਬਿਵਸਥਾ ਸਾਰ 32:17; ਜ਼ਬੂਰ 106:35-38.

      15 ਯਸਾਯਾਹ ਨੇ ਤਸਵੀਰੀ ਭਾਸ਼ਾ ਵਿਚ ਦੁਸ਼ਟਤਾ ਅਤੇ ਹਿੰਸਾ ਦੇ ਫੈਲ ਜਾਣ ਬਾਰੇ ਦੱਸਿਆ: “ਬੁਰਿਆਈ ਤਾਂ ਅੱਗ ਵਾਂਙੁ ਬਲਦੀ ਹੈ, ਉਹ ਕੰਡੇ ਤੇ ਕੰਡਿਆਲੇ ਭਸਮ ਕਰਦੀ ਹੈ, ਅਤੇ ਉਹ ਬਣ ਦੀਆਂ ਝੰਗੀਆਂ ਵਿੱਚ ਭੜਕ ਉੱਠਦੀ ਹੈ, ਓਹ ਧੂੰਏਂ ਦੇ ਗੂੜ੍ਹੇ ਬੱਦਲਾਂ ਵਿੱਚ ਉਤਾਹਾਂ ਚੜ੍ਹਦੀਆਂ ਹਨ। ਸੈਨਾਂ ਦੇ ਯਹੋਵਾਹ ਦੇ ਕਹਿਰ ਵਿੱਚ ਧਰਤੀ ਸੜ ਜਾਂਦੀ ਹੈ, ਲੋਕ ਅੱਗ ਦੇ ਬਾਲਣ ਜੇਹੇ ਹੁੰਦੇ ਹਨ, ਕੋਈ ਆਪਣੇ ਭਰਾ ਦੀ ਰਈ ਨਹੀਂ ਕਰਦਾ। ਕੋਈ ਸੱਜੇ ਹੱਥ ਵੱਲੋਂ ਕੁਝ ਖਿੱਚਦਾ ਪਰ ਰਹਿੰਦਾ ਭੁੱਖਾ ਹੈ, ਕੋਈ ਖੱਬੇ ਹੱਥ ਵੱਲੋਂ ਖਾਂਦਾ ਪਰ ਓਹ ਰੱਜਦੇ ਨਹੀਂ, ਹਰ ਮਨੁੱਖ ਆਪਣੀ ਬਾਂਹ ਦਾ ਮਾਸ ਖਾਵੇਗਾ, ਮਨੱਸ਼ਹ ਇਫ਼ਰਾਈਮ ਨੂੰ ਅਰ ਇਫ਼ਰਾਈਮ ਮਨੱਸ਼ਹ ਨੂੰ, ਅਤੇ ਓਹ ਮਿਲ ਕੇ ਯਹੂਦਾਹ ਦੇ ਵਿਰੁੱਧ ਹੁੰਦੇ ਹਨ। ਏਹ ਦੇ ਹੁੰਦਿਆਂ ਤੇ ਵੀ ਉਹ ਦਾ ਕ੍ਰੋਧ ਨਹੀਂ ਹਟਿਆ, ਸਗੋਂ ਉਹ ਦਾ ਹੱਥ ਅਜੇ ਚੁੱਕਿਆ ਹੋਇਆ ਹੈ।”—ਯਸਾਯਾਹ 9:18-21.

      16. ਯਸਾਯਾਹ 9:18-21 ਦੇ ਸ਼ਬਦ ਕਿਵੇਂ ਪੂਰੇ ਹੋਏ?

      16 ਇਕ ਝਾੜੀ ਤੋਂ ਦੂਜੀ ਝਾੜੀ ਤਕ ਫੈਲ ਜਾਣ ਵਾਲੀ ਲਾਟ ਦੀ ਤਰ੍ਹਾਂ, ਹਿੰਸਾ ਆਸਾਨੀ ਨਾਲ “ਬਣ ਦੀਆਂ ਝੰਗੀਆਂ” ਤਕ ਫੈਲ ਜਾਂਦੀ ਹੈ। ਹਿੰਸਾ ਬਣ ਦੀ ਭੱਖਦੀ ਅੱਗ ਵਰਗੀ ਚੀਜ਼ ਹੈ। ਬਾਈਬਲ ਉੱਤੇ ਟਿੱਪਣੀ ਕਰਨ ਵਾਲੇ ਹਿੰਸਾ ਦੀ ਹੱਦ ਬਾਰੇ ਕਹਿੰਦੇ ਹਨ ਕਿ “ਘਰੇਲੂ ਲੜਾਈ ਦੌਰਾਨ ਇਕ ਦੂਜੇ ਨੂੰ ਖ਼ਤਮ ਕਰਨ ਦਾ ਇਹ ਸਭ ਤੋਂ ਵਹਿਸ਼ੀ ਰੂਪ ਸੀ। ਉਨ੍ਹਾਂ ਨੇ ਕੋਈ ਕੋਮਲ ਭਾਵਨਾ ਨਹੀਂ ਦਿਖਾਈ ਸਗੋਂ ਇਕ ਦੂਜੇ ਨੂੰ ਖ਼ਤਮ ਕਰ ਦਿੱਤਾ, ਲੇਕਿਨ ਫਿਰ ਵੀ ਉਨ੍ਹਾਂ ਨੂੰ ਕੋਈ ਤਸੱਲੀ ਨਾ ਮਿਲੀ।” ਸ਼ਾਇਦ, ਇੱਥੇ ਇਫ਼ਰਾਈਮ ਅਤੇ ਮਨੱਸ਼ਹ ਦੇ ਨਾਂ ਇਸ ਕਰਕੇ ਲਏ ਗਏ ਹਨ ਕਿਉਂਕਿ ਉਹ ਉੱਤਰੀ ਰਾਜ ਦੇ ਮੁੱਖ ਗੋਤ ਸਨ। ਨਾਲੇ ਯੂਸੁਫ਼ ਦੇ ਦੋ ਪੁੱਤਰਾਂ ਦੀ ਸੰਤਾਨ ਹੋਣ ਕਰਕੇ ਦਸਾਂ ਗੋਤਾਂ ਵਿੱਚੋਂ ਇਨ੍ਹਾਂ ਦੋਹਾਂ ਦਾ ਆਪਸ ਵਿਚ ਸਭ ਤੋਂ ਨਜ਼ਦੀਕੀ ਰਿਸ਼ਤਾ ਸੀ। ਪਰ ਇਸ ਦੇ ਬਾਵਜੂਦ, ਉਨ੍ਹਾਂ ਨੇ ਭਰਾ-ਭਰਾ ਵਿਚਕਾਰ ਹਿੰਸਾ ਨੂੰ ਸਿਰਫ਼ ਉਦੋਂ ਰੋਕਿਆ ਜਦੋਂ ਉਨ੍ਹਾਂ ਨੇ ਦੱਖਣ ਵਿਚ ਯਹੂਦਾਹ ਨਾਲ ਲੜਾਈ ਕੀਤੀ।—2 ਇਤਹਾਸ 28:1-8.