10, 11. (ੳ) ਅੱਜ ਅਸੀਂ ਕਿਵੇਂ ਬਰਕਤਾਂ ਦੀ ਨਦੀ ਦਾ ਆਨੰਦ ਮਾਣ ਰਹੇ ਹਾਂ? (ਅ) ਆਖ਼ਰੀ ਦਿਨਾਂ ਦੌਰਾਨ ਵਧਦੀ ਲੋੜ ਅਨੁਸਾਰ ਯਹੋਵਾਹ ਬਰਕਤਾਂ ਦੀ ਨਦੀ ਨੂੰ ਹੋਰ ਤੇਜ਼ ਕਿਵੇਂ ਵਹਾ ਰਿਹਾ ਹੈ?

¹⁰ ਬਰਕਤਾਂ ਦੀ ਨਦੀ। ਯਹੋਵਾਹ ਦੇ ਮੰਦਰ ਤੋਂ ਵਹਿ ਰਹੀ ਨਦੀ ਅੱਜ ਸਾਨੂੰ ਕਿਹੜੀਆਂ ਬਰਕਤਾਂ ਯਾਦ ਕਰਾਉਂਦੀ ਹੈ? ਸਾਨੂੰ ਉਹ ਪ੍ਰਬੰਧ ਯਾਦ ਆਉਂਦੇ ਹਨ ਜਿਨ੍ਹਾਂ ਕਾਰਨ ਅਸੀਂ ਯਹੋਵਾਹ ਨਾਲ ਚੰਗਾ ਰਿਸ਼ਤਾ ਜੋੜ ਪਾਏ ਹਾਂ ਤੇ ਸਾਨੂੰ ਸੱਚਾਈ ਦੀ ਵਧੀਆ ਖ਼ੁਰਾਕ ਮਿਲ ਰਹੀ ਹੈ। ਉਸ ਦੇ ਪ੍ਰਬੰਧਾਂ ਵਿੱਚੋਂ ਸਭ ਤੋਂ ਖ਼ਾਸ ਹੈ, ਮਸੀਹ ਦੁਆਰਾ ਦਿੱਤੀ ਰਿਹਾਈ ਦੀ ਕੀਮਤ। ਇਸ ਦੇ ਆਧਾਰ ʼਤੇ ਸਾਨੂੰ ਪਾਪਾਂ ਦੀ ਮਾਫ਼ੀ ਮਿਲਦੀ ਹੈ ਅਤੇ ਅਸੀਂ ਯਹੋਵਾਹ ਦੀਆਂ ਨਜ਼ਰਾਂ ਵਿਚ ਸ਼ੁੱਧ ਠਹਿਰਦੇ ਹਾਂ। ਪਰਮੇਸ਼ੁਰ ਦੇ ਬਚਨ ਦੀਆਂ ਸੱਚਾਈਆਂ ਜੀਵਨ ਦੇਣ ਵਾਲੇ ਪਾਣੀ ਵਾਂਗ ਹਨ ਜੋ ਸਾਨੂੰ ਸ਼ੁੱਧ ਕਰਦੀਆਂ ਹਨ। (ਅਫ਼. 5:25-27) ਸਾਡੇ ਦਿਨਾਂ ਵਿਚ ਬਰਕਤਾਂ ਦੀ ਇਹ ਨਦੀ ਕਿਵੇਂ ਵਹਿ ਰਹੀ ਹੈ?

ਬਰਕਤਾਂ ਦੀ ਨਦੀ

ਪੁਰਾਣੇ ਜ਼ਮਾਨੇ ਵਿਚ: ਯਹੂਦੀਆਂ ਨੇ ਆਪਣੇ ਦੇਸ਼ ਵਾਪਸ ਆ ਕੇ ਮੰਦਰ ਵਿਚ ਸ਼ੁੱਧ ਭਗਤੀ ਬਹਾਲ ਕਰਨ ਵਿਚ ਜਦੋਂ ਪੂਰੀ ਵਾਹ ਲਾਈ, ਤਾਂ ਉਨ੍ਹਾਂ ਨੂੰ ਕਈ ਬਰਕਤਾਂ ਮਿਲੀਆਂ

ਅੱਜ ਦੇ ਜ਼ਮਾਨੇ ਵਿਚ: 1919 ਵਿਚ ਸ਼ੁੱਧ ਭਗਤੀ ਬਹਾਲ ਹੋਈ ਅਤੇ ਉਦੋਂ ਤੋਂ ਯਹੋਵਾਹ ਦੇ ਵਫ਼ਾਦਾਰ ਸੇਵਕਾਂ ਲਈ ਬਰਕਤਾਂ ਦਾ ਚਸ਼ਮਾ ਵਹਿਣ ਲੱਗਾ

ਭਵਿੱਖ ਵਿਚ: ਆਰਮਾਗੇਡਨ ਤੋਂ ਬਾਅਦ ਯਹੋਵਾਹ ਸਾਨੂੰ ਹੋਰ ਵੀ ਬਰਕਤਾਂ ਦੇਵੇਗਾ। ਉਹ ਸਾਨੂੰ ਮੁਕੰਮਲ ਬਣਾ ਦੇਵੇਗਾ ਤੇ ਨਵੀਆਂ ਸੱਚਾਈਆਂ ਸਿਖਾਵੇਗਾ