16, 17. (ੳ) ਸੇਵਕਾਈ ਦੇ ਕੰਮ ਵਿਚ ਪੌਲੁਸ ਇੰਨਾ ਦਲੇਰ ਕਿਸ ਤਰ੍ਹਾਂ ਬਣਿਆ ਸੀ? (ਅ) ਜੇਕਰ ਸਾਡੇ ਲਈ ਮਸੀਹੀ ਸੇਵਕਾਈ ਦਾ ਕੋਈ ਪਹਿਲੂ ਔਖਾ ਹੋਵੇ, ਤਾਂ ਸਾਨੂੰ ਕਿਹੜੇ ਕਦਮ ਚੁੱਕਣੇ ਚਾਹੀਦੇ ਹਨ?

¹⁶ ਥੱਸਲੁਨੀਕੀਆਂ ਦੇ ਮਸੀਹੀਆਂ ਨੂੰ ਪੌਲੁਸ ਨੇ ਲਿਖਿਆ ਕਿ “ਭਾਵੇਂ ਅਸਾਂ ਅੱਗੇ ਫਿਲਿੱਪੈ ਵਿੱਚ ਜਿਹਾ ਤੁਸੀਂ ਜਾਣਦੇ ਹੋ ਦੁਖ ਅਤੇ ਅਪਜਸ ਝੱਲਿਆ ਤਾਂ ਵੀ ਪਰਮੇਸ਼ੁਰ ਦੀ ਖੁਸ਼ ਖਬਰੀ ਬਹੁਤ ਝਗੜੇ ਰਗੜੇ ਵਿੱਚ ਤੁਹਾਨੂੰ ਸੁਣਾਉਣ ਲਈ ਆਪਣੇ ਪਰਮੇਸ਼ੁਰ ਦੇ ਆਸਰੇ ਦਿਲੇਰ ਹੋਏ।” (1 ਥੱਸਲੁਨੀਕੀਆਂ 2:2) ਪੌਲੁਸ ਅਤੇ ਉਸ ਦੇ ਸਾਥੀਆਂ ਨੂੰ ਫ਼ਿਲਿੱਪੈ ਵਿਚ ਕਿਸ ਤਰ੍ਹਾਂ ‘ਅਪਜਸ ਝੱਲਣਾ’ ਪਿਆ ਸੀ? ਕੁਝ ਵਿਦਵਾਨਾਂ ਦੇ ਅਨੁਸਾਰ, ਜਿਸ ਯੂਨਾਨੀ ਸ਼ਬਦ ਨੂੰ ਪੌਲੁਸ ਨੇ ਵਰਤਿਆ ਸੀ ਉਸ ਤੋਂ ਨਿਰਾਦਰ ਭਰੇ, ਸ਼ਰਮਨਾਕ, ਜਾਂ ਜ਼ਾਲਮ ਸਲੂਕ ਦਾ ਸੰਕੇਤ ਮਿਲਦਾ ਹੈ। ਫ਼ਿਲਿੱਪੀ ਅਧਿਕਾਰੀਆਂ ਨੇ ਉਨ੍ਹਾਂ ਨੂੰ ਬੈਂਤਾਂ ਨਾਲ ਮਾਰਿਆ, ਕੈਦ ਵਿਚ ਸੁੱਟਿਆ, ਅਤੇ ਉਨ੍ਹਾਂ ਦੇ ਪੈਰੀਂ ਕਾਠ ਠੋਕੇ। (ਰਸੂਲਾਂ ਦੇ ਕਰਤੱਬ 16:16-24) ਇਸ ਦਰਦਨਾਕ ਅਨੁਭਵ ਨੇ ਪੌਲੁਸ ਉੱਤੇ ਕਿਸ ਤਰ੍ਹਾਂ ਦਾ ਅਸਰ ਪਾਇਆ? ਕੀ ਉਸ ਦੇ ਮਿਸ਼ਨਰੀ ਦੌਰੇ ਦੇ ਅਗਲੇ ਸ਼ਹਿਰ, ਥੱਸਲੁਨੀਕਾ, ਦੇ ਲੋਕਾਂ ਨੇ ਪੌਲੁਸ ਨੂੰ ਡਰ ਦੇ ਮਾਰੇ ਪਿਛਾਹਾਂ ਹਟਦੇ ਪਾਇਆ ਸੀ? ਨਹੀਂ, ਉਸ ਨੇ ‘ਦਿਲੇਰੀ’ ਦਿਖਾਈ ਸੀ। ਉਸ ਨੇ ਆਪਣੇ ਡਰ ਉੱਤੇ ਕਾਬੂ ਪਾ ਕੇ ਦਲੇਰੀ ਨਾਲ ਪ੍ਰਚਾਰ ਦੇ ਕੰਮ ਵਿਚ ਹਿੱਸਾ ਲਿਆ।

¹⁷ ਪੌਲੁਸ ਇੰਨਾ ਦਲੇਰ ਕਿਸ ਤਰ੍ਹਾਂ ਬਣਿਆ ਸੀ? ਕੀ ਇਹ ਉਸ ਦੀ ਆਪਣੀ ਸ਼ਕਤੀ ਨਾਲ ਸੀ? ਨਹੀਂ, ਉਸ ਨੇ ਕਿਹਾ ਕਿ ਉਹ “ਆਪਣੇ ਪਰਮੇਸ਼ੁਰ ਦੇ ਆਸਰੇ” ਦਲੇਰ ਹੋਇਆ ਸੀ। ਬਾਈਬਲ ਦੇ ਅਨੁਵਾਦਕਾਂ ਲਈ ਇਕ ਪੁਸਤਕ ਕਹਿੰਦੀ ਹੈ ਕਿ ਇਨ੍ਹਾਂ ਸ਼ਬਦਾਂ ਦਾ ਇਸ ਤਰ੍ਹਾਂ ਵਰਣਨ ਕੀਤਾ ਜਾ ਸਕਦਾ ਹੈ ਕਿ “ਪਰਮੇਸ਼ੁਰ ਨੇ ਉਨ੍ਹਾਂ ਦੇ ਦਿਲਾਂ ਵਿੱਚੋਂ ਡਰ ਕੱਢ ਦਿੱਤਾ ਸੀ।” ਇਸ ਲਈ ਜੇ ਤੁਹਾਨੂੰ ਆਪਣੀ ਪ੍ਰਚਾਰ ਦੀ ਸੇਵਕਾਈ ਵਿਚ ਡਰ ਲੱਗਦਾ ਹੋਵੇ ਜਾਂ ਉਸ ਦਾ ਕੋਈ ਖ਼ਾਸ ਪਹਿਲੂ ਤੁਹਾਨੂੰ ਔਖਾ ਲੱਗਦਾ ਹੋਵੇ, ਤਾਂ ਕਿਉਂ ਨਾ ਯਹੋਵਾਹ ਨੂੰ ਬੇਨਤੀ ਕਰੋ ਕਿ ਉਹ ਤੁਹਾਡੇ ਲਈ ਵੀ ਉਸੇ ਤਰ੍ਹਾਂ ਕਰੇ ਜਿਸ ਤਰ੍ਹਾਂ ਉਸ ਨੇ ਪੌਲੁਸ ਲਈ ਕੀਤਾ ਸੀ। ਉਸ ਤੋਂ ਮੰਗ ਕਰੋ ਕਿ ਉਹ ਤੁਹਾਡੇ ਦਿਲ ਵਿੱਚੋਂ ਡਰ ਕੱਢ ਦੇਵੇ ਅਤੇ ਤੁਹਾਨੂੰ ਵੀ ਇਸ ਕੰਮ ਲਈ ਦਲੇਰ ਬਣਾਵੇ। ਇਸ ਦੇ ਨਾਲ-ਨਾਲ, ਹੋਰ ਵੀ ਲਾਭਦਾਇਕ ਕਦਮ ਚੁੱਕੋ। ਮਿਸਾਲ ਲਈ, ਅਜਿਹੇ ਵਿਅਕਤੀ ਨਾਲ ਪ੍ਰਚਾਰ ਦੇ ਕੰਮ ਵਿਚ ਜਾਣ ਦਾ ਪ੍ਰਬੰਧ ਬਣਾਓ ਜੋ ਸੇਵਕਾਈ ਦੇ ਉਸ ਪਹਿਲੂ ਵਿਚ ਕਾਮਯਾਬ ਹੋਵੇ ਜੋ ਤੁਹਾਨੂੰ ਔਖਾ ਲੱਗਦਾ ਹੈ। ਇਸ ਵਿਚ ਸ਼ਾਇਦ ਬਿਜ਼ਨਿਸ ਖੇਤਰ, ਸੜਕਾਂ ਤੇ, ਟੈਲੀਫ਼ੋਨ ਤੇ, ਜਾਂ ਕਿਸੇ ਹੋਰ ਗ਼ੈਰ-ਰਸਮੀ ਤਰੀਕੇ ਵਿਚ ਗਵਾਹੀ ਦੇਣੀ ਸ਼ਾਮਲ ਹੋਵੇ। ਸ਼ਾਇਦ ਤੁਹਾਡਾ ਸਾਥੀ ਪਹਿਲਾਂ ਗੱਲ ਸ਼ੁਰੂ ਕਰ ਸਕਦਾ ਹੈ। ਜੇ ਇਸ ਤਰ੍ਹਾਂ ਹੈ ਤਾਂ ਧਿਆਨ ਨਾਲ ਸੁਣੋ ਅਤੇ ਸਿੱਖੋ। ਫਿਰ ਦਲੇਰ ਹੋ ਕਿ ਖ਼ੁਦ ਵਾਰੀ ਲਵੋ।

18. ਜੇ ਅਸੀਂ ਆਪਣੀ ਸੇਵਕਾਈ ਦਲੇਰੀ ਨਾਲ ਕਰੀਏ ਤਾਂ ਅਸੀਂ ਕਿਨ੍ਹਾਂ ਬਰਕਤਾਂ ਨੂੰ ਅਨੁਭਵ ਕਰਾਂਗੇ?

¹⁸ ਜ਼ਰਾ ਸੋਚੋ ਕਿ ਦਲੇਰੀ ਦਿਖਾਉਣ ਦੇ ਨਤੀਜੇ ਕੀ ਹੋ ਸਕਦੇ ਹਨ। ਜਦੋਂ ਤੁਸੀਂ ਇਸ ਤਰ੍ਹਾਂ ਕਰਨਾ ਜਾਰੀ ਰੱਖੋਗੇ ਅਤੇ ਹਿੰਮਤ ਨਾ ਹਾਰੋਗੇ ਤਾਂ ਸੰਭਵ ਹੈ ਕਿ ਦੂਸਰਿਆਂ ਨੂੰ ਸੱਚਾਈ ਦੱਸਣ ਵਿਚ ਤੁਹਾਡੇ ਵਧੀਆ ਅਨੁਭਵ ਹੋਣਗੇ, ਅਜਿਹੇ ਅਨੁਭਵ ਜੋ ਸ਼ਾਇਦ ਇਸ ਤਰ੍ਹਾਂ ਕਰਨ ਤੋਂ ਬਗੈਰ ਕਦੀ ਨਾ ਹੁੰਦੇ। (ਸਫ਼ਾ 25 ਦੇਖੋ।) ਇਹ ਜਾਣ ਕੇ ਤੁਹਾਨੂੰ ਸੰਤੁਸ਼ਟੀ ਹੋਵੇਗੀ ਕਿ ਅਜਿਹਾ ਔਖਾ ਕੰਮ ਕਰ ਕੇ ਤੁਸੀਂ ਯਹੋਵਾਹ ਨੂੰ ਖ਼ੁਸ਼ ਕੀਤਾ ਹੈ। ਤੁਸੀਂ ਆਪਣੇ ਡਰ ਉੱਤੇ ਕਾਬੂ ਪਾਉਣ ਵਿਚ ਉਸ ਦੀ ਬਰਕਤ ਅਤੇ ਮਦਦ ਅਨੁਭਵ ਕਰੋਗੇ। ਤੁਹਾਡੀ ਨਿਹਚਾ ਜ਼ਿਆਦਾ ਮਜ਼ਬੂਤ ਹੋਵੇਗੀ। ਸੱਚ-ਮੁੱਚ, ਤੁਸੀਂ ਦੂਸਰਿਆਂ ਦੀ ਨਿਹਚਾ ਨੂੰ ਵਧਾਉਣ ਵਿਚ ਮਿਹਨਤ ਕਰ ਕੇ ਆਪਣੀ ਨਿਹਚਾ ਵੀ ਵਧਾਉਂਦੇ ਹੋ।—ਯਹੂਦਾਹ 20, 21.

ਉਨ੍ਹਾਂ ਨੇ ਦਲੇਰੀ ਦਿਖਾਈ

ਪ੍ਰਚਾਰ ਦੇ ਕੰਮ ਵਿਚ ਦਲੇਰੀ ਦਿਖਾਉਣੀ ਹਮੇਸ਼ਾ ਸੌਖੀ ਨਹੀਂ ਹੁੰਦੀ। ਦਰਅਸਲ, ਪੌਲੁਸ ਰਸੂਲ ਨੇ ਕਿਹਾ ਕਿ ਇਕ ਵਾਰ ਉਸ ਨੇ “ਬਹੁਤ ਝਗੜੇ ਰਗੜੇ ਵਿੱਚ” ਖ਼ੁਸ਼ ਖ਼ਬਰੀ ਸੁਣਾਈ ਸੀ। (1 ਥੱਸਲੁਨੀਕੀਆਂ 2:2) ਕੀ ਪ੍ਰਚਾਰ ਕਰਨ ਵਿਚ ਅਜਿਹਾ ‘ਝਗੜਾ ਰਗੜਾ,’ ਜਾਂ ਸੰਘਰਸ਼ ਕਰਨਾ ਫ਼ਾਇਦੇਮੰਦ ਹੈ? ਇਸ ਦੀ ਕੋਈ ਗਾਰੰਟੀ ਨਹੀਂ ਹੈ ਕਿ ਤੁਹਾਡੇ ਅਨੁਭਵ ਅਨੋਖੇ ਹੋਣਗੇ ਪਰ ਜਦੋਂ ਦਲੇਰੀ ਦਿਖਾਈ ਜਾਂਦੀ ਹੈ, ਤਾਂ ਪਰਮੇਸ਼ੁਰ ਦੇ ਲੋਕ ਅਕਸਰ ਖ਼ੁਸ਼ ਹੁੰਦੇ ਹਨ। ਕੁਝ ਮਿਸਾਲਾਂ ਵੱਲ ਧਿਆਨ ਦਿਓ।

ਤਾਰਾ ਨਾਂ ਦੀ ਇਕ ਅੱਠਾਂ ਸਾਲਾਂ ਦੀ ਕੁੜੀ ਕਲਾਸ ਵਿਚ ਬੈਠੀ ਧਿਆਨ ਨਾਲ ਆਪਣੀ ਮਾਸਟਰਨੀ ਦੀ ਗੱਲ ਸੁਣ ਰਹੀ ਸੀ। ਗੱਲ ਦੂਸਰੇ ਵਿਸ਼ਵ ਯੁੱਧ ਬਾਰੇ ਚੱਲ ਰਹੀ ਸੀ ਅਤੇ ਮਾਸਟਰਨੀ ਬੱਚਿਆਂ ਨੂੰ ਦੱਸ ਰਹੀ ਸੀ ਕਿ ਨਜ਼ਰਬੰਦੀ-ਕੈਂਪਾਂ ਵਿਚ ਯਹੂਦੀ ਕੈਦੀਆਂ ਨੂੰ ਆਪਣੀ ਪਛਾਣ ਕਰਾਉਣ ਲਈ ਪੀਲੇ ਰੰਗ ਦੇ ਸਿਤਾਰੇ ਕੱਪੜਿਆਂ ਤੇ ਲਾਉਣੇ ਪੈਂਦੇ ਸਨ। ਤਾਰਾ ਨੇ ਆਪਣੇ ਮਨ ਵਿਚ ਸੋਚਿਆ ਕਿ ਉਸ ਨੂੰ ਕੁਝ ਕਹਿਣਾ ਚਾਹੀਦਾ ਹੈ ਕਿ ਨਹੀਂ। ਉਹ ਦੱਸਦੀ ਹੈ ਕਿ “ਮੈਂ ਖੁੱਲ੍ਹੀ ਅੱਖੀਂ ਪ੍ਰਾਰਥਨਾ ਕੀਤੀ।” ਫਿਰ ਉਸ ਨੇ ਆਪਣਾ ਹੱਥ ਖੜ੍ਹਾ ਕਰ ਕੇ ਕਿਹਾ ਕਿ ਯਹੋਵਾਹ ਦੇ ਗਵਾਹ ਵੀ ਉਨ੍ਹਾਂ ਕੈਂਪਾਂ ਵਿਚ ਸਨ, ਅਤੇ ਉਨ੍ਹਾਂ ਨੂੰ ਵੀ ਆਪਣੇ ਕੱਪੜਿਆਂ ਤੇ ਜਾਮਨੀ-ਰੰਗਾ ਤਿਕੋਣ ਲਾਉਣਾ ਪੈਂਦਾ ਸੀ। ਮਾਸਟਰਨੀ ਨੇ ਦਿਲਚਸਪੀ ਦਿਖਾਈ ਅਤੇ ਉਸ ਦਾ ਸ਼ੁਕਰੀਆ ਕੀਤਾ। ਤਾਰਾ ਦੀ ਟਿੱਪਣੀ ਦੇ ਕਾਰਨ ਉਸ ਨੂੰ ਮਾਸਟਰਨੀ ਨਾਲ ਹੋਰ ਚਰਚਾ ਕਰਨ ਦਾ ਮੌਕਾ ਵੀ ਮਿਲਿਆ। ਬਾਅਦ ਵਿਚ ਮਾਸਟਰਨੀ ਨੇ ਸਾਰੀ ਕਲਾਸ ਨੂੰ ਅੰਗ੍ਰੇਜ਼ੀ ਵਿਚ ਯਹੋਵਾਹ ਦੇ ਗਵਾਹ ਨਾਜ਼ੀ ਧਾਵੇ ਵਿਰੁੱਧ ਦ੍ਰਿੜ੍ਹ ਨਾਂ ਦਾ ਵਿਡਿਓ ਦਿਖਾਇਆ।

ਗਿਨੀ, ਪੱਛਮੀ ਅਫ਼ਰੀਕਾ ਵਿਚ, ਆਇਰੀਨ ਨਾਂ ਦੀ ਇਕ ਬਪਤਿਸਮਾ-ਰਹਿਤ ਪ੍ਰਕਾਸ਼ਕ ਆਪਣੀ ਸੇਵਕਾਈ ਵਿਚ ਤਰੱਕੀ ਕਰਨੀ ਚਾਹੁੰਦੀ ਸੀ। ਜਿਸ ਮਿਸ਼ਨਰੀ ਭੈਣ ਨੇ ਉਸ ਨਾਲ ਬਾਈਬਲ ਅਧਿਐਨ ਕੀਤਾ ਸੀ, ਉਸ ਨੇ ਉਸ ਨੂੰ ਪਹਿਰਾਬੁਰਜ ਅਤੇ ਜਾਗਰੂਕ ਬਣੋ! ਦੇ ਰਸਾਲੇ ਸਕੂਲੇ ਆਪਣੇ ਸਾਥੀਆਂ ਨੂੰ ਦੇਣ ਲਈ ਉਤਸ਼ਾਹਿਤ ਕੀਤਾ। ਆਇਰੀਨ ਇਸ ਤਰ੍ਹਾਂ ਕਰਨ ਤੋਂ ਹਿਚਕਿਚਾਉਂਦੀ ਸੀ ਕਿਉਂਕਿ ਉਸ ਦੇ ਸਕੂਲ ਦੇ ਸਾਥੀਆਂ ਨੇ ਅੱਗੇ ਕਦੀ ਸੱਚਾਈ ਵਿਚ ਦਿਲਚਸਪੀ ਨਹੀਂ ਦਿਖਾਈ ਸੀ। ਪਰ, ਮਿਸ਼ਨਰੀ ਭੈਣ ਦੇ ਹੌਸਲੇ ਕਾਰਨ ਉਸ ਨੇ ਫ਼ੈਸਲਾ ਕੀਤਾ ਕਿ ਉਹ ਪਹਿਲਾਂ ਉਸ ਵਿਦਿਆਰਥਣ ਨਾਲ ਗੱਲ ਕਰੇਗੀ ਜੋ ਸਭ ਤੋਂ ਜ਼ਿਆਦਾ ਵਿਰੋਧਤਾ ਕਰਨ ਵਾਲੀ ਲੱਗਦੀ ਸੀ। ਆਇਰੀਨ ਹੈਰਾਨ ਹੋਈ ਜਦੋਂ ਉਸ ਕੁੜੀ ਨੇ ਉਸ ਦੀ ਗੱਲ ਸੁਣੀ ਅਤੇ ਖ਼ੁਸ਼ੀ-ਖ਼ੁਸ਼ੀ ਰਸਾਲੇ ਲੈ ਲਏ। ਹੋਰ ਵਿਦਿਆਰਥੀਆਂ ਨੇ ਵੀ ਇਸ ਹੀ ਤਰ੍ਹਾਂ ਕੀਤਾ। ਆਇਰੀਨ ਨੇ ਉਸ ਮਹੀਨੇ ਵਿਚ ਪਿਛਲੇ ਪੰਜਾਂ ਮਹੀਨਿਆਂ ਨਾਲੋਂ ਜ਼ਿਆਦਾ ਰਸਾਲੇ ਵੰਡੇ।

ਤ੍ਰਿਨੀਦਾਦ ਵਿਚ ਇਕ ਬਜ਼ੁਰਗ, ਕਿਸੇ ਸਕੂਲ ਦੀ ਪ੍ਰਿੰਸੀਪਲਨੀ ਨੂੰ ਜਾਗਰੂਕ ਬਣੋ! ਰਸਾਲੇ ਦੀ ਸਿਖਲਾਈ ਦੀ ਮਹੱਤਤਾ ਬਾਰੇ ਦੱਸਣ ਲਈ ਬਹੁਤ ਝਿਜਕਦਾ ਸੀ। ਫਿਰ ਵੀ, ਉਸ ਨੇ ਦਲੇਰੀ ਦਿਖਾਈ। ਉਹ ਦੱਸਦਾ ਹੈ: “ਸਲੂਕ ਵਿਚ ਵੜਦੇ ਹੀ ਮੈਂ ਪ੍ਰਾਰਥਨਾ ਕੀਤੀ। ਮੈਨੂੰ ਯਕੀਨ ਹੀ ਨਹੀਂ ਆਇਆ ਜਦ ਪ੍ਰਿੰਸੀਪਲਨੀ ਨੇ ਬਹੁਤ ਹੀ ਚੰਗਾ ਰਵੱਈਆ ਦਿਖਾਇਆ।” ਉਸ ਨੇ ਅੰਗ੍ਰੇਜ਼ੀ ਵਿਚ “ਨੌਜਵਾਨਾਂ ਲਈ ਅੱਜ ਕੀ ਉਮੀਦ ਹੈ?” ਦੇ ਵਿਸ਼ੇ ਉੱਤੇ ਜਾਗਰੂਕ ਬਣੋ! ਦਾ ਰਸਾਲਾ ਲਿਆ ਅਤੇ ਉਹ ਇਸ ਨੂੰ ਕਲਾਸ ਵਿਚ ਸਿਖਲਾਈ ਦੇਣ ਲਈ ਇਸਤੇਮਾਲ ਕਰਨ ਲਈ ਵੀ ਰਾਜ਼ੀ ਹੋਈ। ਉਸ ਸਮੇਂ ਤੋਂ ਲੈ ਕੇ ਉਸ ਨੇ ਵੱਖ-ਵੱਖ ਵਿਸ਼ਿਆਂ ਉੱਤੇ 40 ਰਸਾਲੇ ਸਵੀਕਾਰ ਕੀਤੇ ਹਨ।

ਇਕ ਨੌਜਵਾਨ ਵਜੋਂ ਵੌਨ ਨੂੰ ਪ੍ਰਚਾਰ ਕਰਨਾ ਹਮੇਸ਼ਾ ਔਖਾ ਲੱਗਦਾ ਸੀ। “ਮੈਂ ਘਬਰਾ ਕੇ ਪਸੀਨਾ-ਪਸੀਨਾ ਹੋ ਜਾਂਦਾ ਸੀ ਅਤੇ ਮੈਂ ਕਾਹਲੀ-ਕਾਹਲੀ ਬੋਲਣ ਲੱਗ ਪੈਂਦਾ ਸੀ—ਮੈਂ ਆਪਣੇ ਆਪ ਨੂੰ ਰੋਕ ਨਹੀਂ ਸਕਦਾ ਸੀ।” ਇਸ ਦੇ ਬਾਵਜੂਦ, ਉਹ ਇਕ ਪਾਇਨੀਅਰ ਬਣਿਆ। ਪਰ ਫਿਰ ਵੀ ਉਸ ਲਈ ਦਲੇਰੀ ਨਾਲ ਗੱਲ ਕਰਨੀ ਔਖੀ ਸੀ। ਇਕ ਵਾਰ, ਉਸ ਨੇ ਪੂਰਾ ਦਿਨ ਨੌਕਰੀ ਲੱਭਣ ਵਿਚ ਗੁਜ਼ਾਰਿਆ ਪਰ ਕੋਈ ਨੌਕਰੀ ਨਾ ਮਿਲੀ, ਇਸ ਲਈ ਘਰ ਜਾਂਦੇ ਹੋਏ ਉਹ ਗੱਡੀ ਵਿਚ ਕਿਸੇ ਨੂੰ ਗਵਾਹੀ ਦੇਣੀ ਚਾਹੁੰਦਾ ਸੀ, “ਤਾਂਕਿ ਇਕ ਅਸਫ਼ਲ ਦਿਨ ਦਾ ਕੋਈ ਤਾਂ ਚੰਗਾ ਨਤੀਜਾ ਨਿਕਲੇ।” ਪਰ ਗੱਡੀ ਵਿਚ ਇਕ ਰੋਹਬਦਾਰ ਵਪਾਰੀ ਬੈਠਾ ਸੀ ਜਿਸ ਤੋਂ ਉਸ ਨੂੰ ਡਰ ਲੱਗਦਾ ਸੀ। ਅਖ਼ੀਰ ਵਿਚ, ਉਸ ਨੇ ਦਲੇਰ ਹੋ ਕੇ ਆਪਣੇ ਨਾਲ ਬੈਠੇ ਇਕ ਸਿਆਣੇ ਆਦਮੀ ਨਾਲ ਗੱਲ ਕਰਨੀ ਸ਼ੁਰੂ ਕੀਤੀ। ਉਸ ਨਾਲ ਕਾਫ਼ੀ ਲੰਬੀ ਗੱਲ-ਬਾਤ ਹੋਈ। ਵਪਾਰੀ ਨੇ ਕਿਹਾ ਕਿ “ਭਾਵੇਂ ਤੇਰੀ ਉਮਰ ਥੋੜ੍ਹੀ ਹੈ ਤੇਰੇ ਸਵਾਲ ਤਾਂ ਬਹੁਤ ਵਧੀਆ ਹਨ। ਕੀ ਤੂੰ ਇਕ ਧਰਮ-ਸ਼ਾਸਤਰੀ ਹੈ?” ਵੌਨ ਨੇ ਜਵਾਬ ਦਿੱਤਾ, “ਨਹੀਂ, ਮੈਂ ਯਹੋਵਾਹ ਦਾ ਇਕ ਗਵਾਹ ਹਾਂ।” “ਅੱਛਾ,” ਆਦਮੀ ਮੁਸਕਰਾਇਆ। “ਹੁਣ ਮੈਨੂੰ ਗੱਲ ਸਮਝ ਆਈ।”

ਇਹ ਸਾਰੇ ਅਤੇ ਹੋਰ ਬਹੁਤ ਸਾਰੇ ਗਵਾਹ, ਖ਼ੁਸ਼ ਹਨ ਕਿ ਉਹ ਪ੍ਰਚਾਰ ਕਰਨ ਵਿਚ ਦਲੇਰ ਹੋਏ। ਕੀ ਤੁਸੀਂ ਵੀ ਇਸ ਤਰ੍ਹਾਂ ਕਰੋਗੇ?