3. ਅਤੀਤ ਵਿਚ ਕੀ ਵਾਪਰਿਆ ਸੀ ਜੋ ਪਤਰਸ ਕਹਿੰਦਾ ਹੈ ਕਿ ਫਿਰ ਤੋਂ ਵਾਪਰੇਗਾ?

³ ਪਤਰਸ ਆਪਣੇ ਭਰਾਵਾਂ ਨੂੰ ਅਗੰਮ ਵਾਕ ਉੱਤੇ ਧਿਆਨ ਦੇਣ ਲਈ ਪ੍ਰੇਰਿਤ ਕਰਨ ਤੋਂ ਬਾਅਦ ਕਹਿੰਦਾ ਹੈ: “ਪਰ [ਪ੍ਰਾਚੀਨ ਇਸਰਾਏਲ] ਵਿੱਚ ਝੂਠੇ ਨਬੀ ਵੀ ਉੱਠੇ ਜਿਵੇਂ ਤੁਹਾਡੇ ਵਿੱਚ ਭੀ ਝੂਠੇ ਗੁਰੂ ਹੋਣਗੇ।” (2 ਪਤਰਸ 1:14–2:1) ਪ੍ਰਾਚੀਨ ਸਮਿਆਂ ਵਿਚ ਪਰਮੇਸ਼ੁਰ ਦੇ ਲੋਕਾਂ ਨੂੰ ਸੱਚੀ ਭਵਿੱਖਬਾਣੀ ਹਾਸਲ ਹੋਈ, ਪਰੰਤੂ ਉਨ੍ਹਾਂ ਨੂੰ ਝੂਠੇ ਨਬੀਆਂ ਦੀਆਂ ਭ੍ਰਿਸ਼ਟ ਸਿੱਖਿਆਵਾਂ ਦਾ ਵੀ ਸਾਮ੍ਹਣਾ ਕਰਨਾ ਪਿਆ ਸੀ। (ਯਿਰਮਿਯਾਹ 6:13, 14; 28:1-3, 15) “ਯਰੂਸ਼ਲਮ ਦੇ ਨਬੀਆਂ ਵਿੱਚ ਮੈਂ ਇੱਕ ਡਰਾਉਣੀ ਗੱਲ ਵੇਖੀ,” ਯਿਰਮਿਯਾਹ ਨੇ ਲਿਖਿਆ, “ਓਹ ਜ਼ਨਾਹ ਕਰਦੇ ਅਤੇ ਮਕਰ ਨਾਲ ਚੱਲਦੇ ਹਨ।”—ਯਿਰਮਿਯਾਹ 23:14.

4. ਝੂਠੇ ਗੁਰੂ ਵਿਨਾਸ਼ ਦੇ ਯੋਗ ਕਿਉਂ ਹਨ?

⁴ ਇਸ ਦਾ ਵਰਣਨ ਕਰਦੇ ਹੋਏ ਕਿ ਝੂਠੇ ਗੁਰੂ ਮਸੀਹੀ ਕਲੀਸਿਯਾ ਵਿਚ ਕੀ ਕਰਨਗੇ, ਪਤਰਸ ਕਹਿੰਦਾ ਹੈ: “[ਉਹ] ਨਾਸ ਕਰਨ ਵਾਲੀਆਂ ਬਿੱਦਤਾਂ ਚੋਰੀ ਅੰਦਰ ਲਿਆਉਣਗੇ ਅਤੇ ਓਸ ਸੁਆਮੀ [ਯਿਸੂ ਮਸੀਹ] ਦਾ ਜਿਹ ਨੇ ਉਨ੍ਹਾਂ ਨੂੰ ਮੁੱਲ ਲਿਆ ਸੀ ਇਨਕਾਰ ਕਰ ਕੇ ਛੇਤੀ ਆਪਣਾ ਨਾਸ ਕਰਾਉਣਗੇ।” (2 ਪਤਰਸ 2:1; ਯਹੂਦਾਹ 4) ਪਹਿਲੀ ਸਦੀ ਦੀ ਸੰਪ੍ਰਦਾਇਕਤਾ ਦਾ ਅੰਤਲਾ ਨਤੀਜਾ, ਉਹ ਈਸਾਈ-ਜਗਤ ਹੈ ਜਿਸ ਨੂੰ ਅਸੀਂ ਅੱਜ ਜਾਣਦੇ ਹਾਂ। ਪਤਰਸ ਪ੍ਰਦਰਸ਼ਿਤ ਕਰਦਾ ਹੈ ਕਿ ਝੂਠੇ ਗੁਰੂ ਕਿਉਂ ਪੂਰੀ ਤਰ੍ਹਾਂ ਵਿਨਾਸ਼ ਦੇ ਯੋਗ ਹਨ: “ਬਹੁਤੇ ਉਨ੍ਹਾਂ ਦੇ ਲੁੱਚਪੁਣੇ ਦੇ ਮਗਰ ਲੱਗ ਤੁਰਨਗੇ ਅਤੇ ਉਨ੍ਹਾਂ ਦੇ ਕਾਰਨ ਸਚਿਆਈ ਦੇ ਮਾਰਗ ਦੀ ਬਦਨਾਮੀ ਕੀਤੀ ਜਾਵੇਗੀ।”—2 ਪਤਰਸ 2:2.

ਝੂਠੀਆਂ ਸਿੱਖਿਆਵਾਂ ਨੂੰ ਆਰੰਭ ਕਰਨਾ

6. ਝੂਠੇ ਗੁਰੂਆਂ ਨੂੰ ਕੀ ਪ੍ਰੇਰਿਤ ਕਰਦਾ ਹੈ, ਅਤੇ ਜੋ ਉਹ ਚਾਹੁੰਦੇ ਹਨ ਉਸ ਨੂੰ ਉਹ ਕਿਵੇਂ ਭਾਲਦੇ ਹਨ?

⁶ ਬੁੱਧੀਮਤਾ ਨਾਲ ਅਸੀਂ ਧਿਆਨ ਦਿੰਦੇ ਹਾਂ ਕਿ ਝੂਠੇ ਗੁਰੂ ਆਪਣੀ ਭੈੜੀ ਸੋਚਣੀ ਕਿਵੇਂ ਆਰੰਭ ਕਰਦੇ ਹਨ। ਪਤਰਸ ਪਹਿਲਾਂ ਕਹਿੰਦਾ ਹੈ ਕਿ ਉਹ ਇਹ ਕੰਮ ਚੋਰੀ-ਚੋਰੀ, ਜਾਂ ਇਕ ਅਪ੍ਰਤੱਖ, ਚਲਾਕ ਤਰੀਕੇ ਨਾਲ ਕਰਦੇ ਹਨ। ਉਹ ਅੱਗੇ ਦੱਸਦਾ ਹੈ: “ਲੋਭ ਦੇ ਮਾਰੇ ਓਹ ਬਣਾਉਟ ਦੀਆਂ ਗੱਲਾਂ ਨਾਲ ਤੁਹਾਨੂੰ ਖੱਟੀ ਦਾ ਢੰਗ ਬਣਾ ਛੱਡਣਗੇ।” ਝੂਠੇ ਗੁਰੂਆਂ ਨੂੰ ਸੁਆਰਥੀ ਇੱਛਾਵਾਂ ਪ੍ਰੇਰਿਤ ਕਰਦੀਆਂ ਹਨ, ਜਿਵੇਂ ਦ ਜਰੂਸਲਮ ਬਾਈਬਲ ਦੇ ਤਰਜਮੇ ਵਿਚ ਜ਼ੋਰ ਦਿੱਤਾ ਗਿਆ ਹੈ: “ਉਹ ਕਪਟਪੂਰਣ ਗੱਲਾਂ ਨਾਲ ਤੁਹਾਨੂੰ ਆਪਣੇ ਲਈ ਖ਼ਰੀਦਣ ਲਈ ਬੇਚੈਨੀ ਨਾਲ ਕੋਸ਼ਿਸ਼ ਕਰਨਗੇ।” ਇਸੇ ਤਰ੍ਹਾਂ, ਜੇਮਜ਼ ਮੌਫ਼ਟ ਦਾ ਤਰਜਮਾ ਇੱਥੇ ਕਹਿੰਦਾ ਹੈ: “ਆਪਣੇ ਲਾਲਚ ਵਿਚ, ਉਹ ਮਕਰਭਰੀਆਂ ਦਲੀਲਬਾਜੀਆਂ ਨਾਲ ਤੁਹਾਨੂੰ ਲੁੱਟ ਲੈਣਗੇ।” (2 ਪਤਰਸ 2:1, 3) ਇਨ੍ਹਾਂ ਝੂਠੇ ਗੁਰੂਆਂ ਦੀਆਂ ਦਲੀਲਾਂ ਸ਼ਾਇਦ ਉਸ ਵਿਅਕਤੀ ਨੂੰ ਮੰਨਣਯੋਗ ਜਾਪਣ ਜਿਹੜਾ ਅਧਿਆਤਮਿਕ ਤੌਰ ਤੇ ਸਾਵਧਾਨ ਨਹੀਂ ਹੁੰਦਾ ਹੈ, ਪਰੰਤੂ ਉਨ੍ਹਾਂ ਦੇ ਸ਼ਬਦ ਲੋਕਾਂ ਨੂੰ ‘ਖ਼ਰੀਦਣ ਲਈ’ ਧਿਆਨ ਨਾਲ ਘੜੇ ਗਏ ਹਨ, ਅਤੇ ਧੋਖੇਬਾਜ਼ ਵਿਅਕਤੀਆਂ ਦੇ ਸੁਆਰਥੀ ਇਰਾਦਿਆਂ ਨੂੰ ਪੂਰਾ ਕਰਨ ਲਈ ਉਨ੍ਹਾਂ ਨੂੰ ਬਹਿਕਾਉਂਦੇ ਹਨ।