ਅਸੀਂ ਯਹੋਵਾਹ ਦੀ ਅਪਾਰ ਕਿਰਪਾ ਲਈ ਸ਼ੁਕਰਗੁਜ਼ਾਰ ਹਾਂ!

¹ ਮਨੁੱਖੀ ਇਤਿਹਾਸ ਦੇ ਸ਼ੁਰੂ ਤੋਂ ਹੀ ਯਹੋਵਾਹ ਨੇ ਆਪਣੇ ਭਗਤਾਂ ਉੱਤੇ ਵੱਡੀ ਕਿਰਪਾ ਕੀਤੀ ਹੈ। ਉਸ ਨੇ ਉਨ੍ਹਾਂ ਨੂੰ ਕਈ ਵਿਸ਼ੇਸ਼ ਸਨਮਾਨ ਦਿੱਤੇ, ਭਾਵੇਂ ਉਹ ਆਦਮੀ ਹੋਣ ਜਾਂ ਤੀਵੀਆਂ, ਨਿਆਣੇ ਹੋਣ ਜਾਂ ਸਿਆਣੇ, ਅਮੀਰ ਹੋਣ ਜਾਂ ਗ਼ਰੀਬ। (ਲੂਕਾ 1:41, 42; ਰਸੂ. 7:46; ਫ਼ਿਲਿ. 1:29) ਅੱਜ ਯਹੋਵਾਹ ਸਾਨੂੰ ਕਿਹੜੇ ਵਿਸ਼ੇਸ਼ ਸਨਮਾਨ ਦਿੰਦਾ ਹੈ?

² ਸਾਡਾ ਵਿਸ਼ੇਸ਼ ਸਨਮਾਨ: ਇਹ ਸਾਡਾ ਵਿਸ਼ੇਸ਼ ਸਨਮਾਨ ਹੀ ਹੈ ਕਿ ਯਹੋਵਾਹ ਆਪ ਸਾਨੂੰ ਸਿਖਾਉਂਦਾ ਹੈ। (ਮੱਤੀ 13:11, 15) ਸਾਨੂੰ ਸਭਾਵਾਂ ਵਿਚ ਟਿੱਪਣੀਆਂ ਕਰ ਕੇ ਯਹੋਵਾਹ ਦੀ ਉਸਤਤ ਕਰਨ ਦਾ ਸਨਮਾਨ ਮਿਲਿਆ ਹੈ। (ਜ਼ਬੂ. 35:18) ਇਸ ਲਈ ਅਸੀਂ ਬੜੇ ਚਾਅ ਨਾਲ ਟਿੱਪਣੀਆਂ ਦਿੰਦੇ ਹਾਂ। ਯਹੋਵਾਹ ਨੇ ਕਲੀਸਿਯਾ ਵਿਚ ਸਾਨੂੰ ਜ਼ਿੰਮੇਵਾਰੀਆਂ ਦੇ ਕੇ ਵੀ ਸਨਮਾਨਿਆ ਹੈ। ਸੋ ਅਸੀਂ ਇਨ੍ਹਾਂ ਨੂੰ ਪੂਰੇ ਦਿਲ ਨਾਲ ਨਿਭਾਉਂਦੇ ਹਾਂ। ਕੀ ਅਸੀਂ ਕਿੰਗਡਮ ਹਾਲ ਦੀ ਸਾਫ਼-ਸਫ਼ਾਈ ਅਤੇ ਰੱਖ-ਰਖਾਅ ਵਿਚ ਹੱਥ ਵਟਾਉਂਦੇ ਹਾਂ?

³ ਲੱਖਾਂ ਲੋਕ ਇਸ ਉਲਝਣ ਵਿਚ ਪਏ ਹੋਏ ਹਨ ਕਿ ਪਰਮੇਸ਼ੁਰ ਉਨ੍ਹਾਂ ਦੀਆਂ ਦੁਆਵਾਂ ਸੁਣਦਾ ਵੀ ਹੈ ਜਾਂ ਨਹੀਂ। ਪਰ ਅਸੀਂ ਕਿੰਨੇ ਖ਼ੁਸ਼ਨਸੀਬ ਹਾਂ ਕਿ ਪੂਰੇ ਜਹਾਨ ਦਾ ਮਾਲਕ ਯਹੋਵਾਹ ਸਾਡੀਆਂ ਪ੍ਰਾਰਥਨਾਵਾਂ ਸੁਣਦਾ ਹੈ। (ਕਹਾ. 15:29) ਜੀ ਹਾਂ, ਯਹੋਵਾਹ ਆਪ ਆਪਣੇ ਭਗਤਾਂ ਦੀਆਂ ਦੁਆਵਾਂ ਸੁਣਦਾ ਹੈ। (1 ਪਤ. 3:12) ਉਹ ਸਾਡੇ ਤੇ ਰੋਕ ਨਹੀਂ ਲਾਉਂਦਾ ਕਿ ਅਸੀਂ ਕਿੰਨੀ ਵਾਰੀ ਉਸ ਨੂੰ ਪ੍ਰਾਰਥਨਾ ਕਰ ਸਕਦੇ ਹਾਂ। ਯਹੋਵਾਹ ਦੇ ਭਗਤਾਂ ਦਾ ਇਹ ਵਿਸ਼ੇਸ਼ ਸਨਮਾਨ ਹੈ ਕਿ ਉਹ “ਹਰ ਸਮੇਂ” ਪ੍ਰਾਰਥਨਾ ਕਰ ਸਕਦੇ ਹਨ!—ਅਫ਼. 6:18.

⁴ “ਕੰਮ ਕਰਨ ਵਿੱਚ ਪਰਮੇਸ਼ੁਰ ਦੇ ਸਾਂਝੀ”: ਸਾਨੂੰ ਸਭ ਤੋਂ ਵੱਡਾ ਸਨਮਾਨ ਇਹ ਮਿਲਿਆ ਹੈ ਕਿ ਅਸੀਂ ਪਰਮੇਸ਼ੁਰ ਦੇ ਰਾਜ ਦੀ ਖ਼ੁਸ਼ ਖ਼ਬਰੀ ਸੁਣਾਉਣ ਦੇ ‘ਕੰਮ ਵਿਚ ਪਰਮੇਸ਼ੁਰ ਦੇ ਸਾਂਝੀ ਹਾਂ।’ (1 ਕੁਰਿੰ. 3:9) ਦੂਸਰਿਆਂ ਨੂੰ ਖ਼ੁਸ਼ ਖ਼ਬਰੀ ਸੁਣਾ ਕੇ ਸਾਨੂੰ ਗਹਿਰੀ ਸੰਤੁਸ਼ਟੀ ਤੇ ਤਾਜ਼ਗੀ ਮਿਲਦੀ ਹੈ। (ਯੂਹੰ. 4:34) ਆਪਣਾ ਮਕਸਦ ਪੂਰਾ ਕਰਨ ਲਈ ਯਹੋਵਾਹ ਨੂੰ ਇਨਸਾਨਾਂ ਨੂੰ ਵਰਤਣ ਦੀ ਲੋੜ ਨਹੀਂ ਹੈ। ਪਰ ਸਾਡੇ ਨਾਲ ਪਿਆਰ ਹੋਣ ਕਰਕੇ ਉਸ ਨੇ ਸਾਨੂੰ ਇਹ ਕੰਮ ਦੇ ਕੇ ਸਨਮਾਨਿਆ ਹੈ। (ਲੂਕਾ 19:39, 40) ਪਰ ਉਹ ਇਹ ਸਨਮਾਨ ਹਰ ਐਰੇ-ਗ਼ੈਰੇ ਨੂੰ ਨਹੀਂ ਦਿੰਦਾ। ਉਸ ਦੇ ਰਾਜ ਦਾ ਪ੍ਰਚਾਰ ਸਿਰਫ਼ ਉਹੋ ਲੋਕ ਕਰ ਸਕਦੇ ਹਨ ਜੋ ਉਸ ਦੇ ਉੱਚੇ-ਸੁੱਚੇ ਮਿਆਰਾਂ ਤੇ ਖਰੇ ਉੱਤਰਦੇ ਹਨ। (ਯਸਾ. 52:11) ਕੀ ਅਸੀਂ ਹਰ ਹਫ਼ਤੇ ਇਸ ਸੇਵਕਾਈ ਵਿਚ ਹਿੱਸਾ ਲੈ ਕੇ ਦਿਖਾਉਂਦੇ ਹਾਂ ਕਿ ਅਸੀਂ ਇਸ ਵਿਸ਼ੇਸ਼ ਸਨਮਾਨ ਦੀ ਕਦਰ ਕਰਦੇ ਹਾਂ?

⁵ ਯਹੋਵਾਹ ਦੀਆਂ ਮਿਹਰਬਾਨੀਆਂ ਨਾਲ ਹੀ ਸਾਡੀ ਜ਼ਿੰਦਗੀ ਖ਼ੁਸ਼ਹਾਲ ਹੈ। (ਕਹਾ. 10:22) ਇਨ੍ਹਾਂ ਮਿਹਰਬਾਨੀਆਂ ਨੂੰ ਤੁੱਛ ਨਾ ਸਮਝੋ! ਯਹੋਵਾਹ ਦੀ ਸੇਵਾ ਕਰਨ ਦੇ ਆਪਣੇ ਵਿਸ਼ੇਸ਼ ਸਨਮਾਨ ਦੀ ਗਹਿਰੀ ਕਦਰ ਕਰ ਕੇ ਅਸੀਂ ਆਪਣੇ ਪਿਤਾ ਯਹੋਵਾਹ ਨੂੰ ਖ਼ੁਸ਼ ਕਰਦੇ ਹਾਂ ਜੋ ਸਾਨੂੰ “ਹਰੇਕ ਚੰਗਾ ਦਾਨ ਅਤੇ ਹਰੇਕ ਪੂਰਨ ਦਾਤ” ਦਿੰਦਾ ਹੈ।—ਯਾਕੂ. 1:17.

ਪੂਰਾ ਪਰਿਵਾਰ ਮਿਲ ਕੇ ਯਹੋਵਾਹ ਦੀ ਭਗਤੀ ਕਰੇ

¹ ਪੁਰਾਣੇ ਸਮਿਆਂ ਵਿਚ ਪਰਿਵਾਰ ਦੇ ਸਾਰੇ ਜੀਅ ਮਿਲ ਕੇ ਸਭ ਕੰਮ ਕਰਦੇ ਸਨ। ਉਹ ਘਰ ਦੇ ਕੰਮਾਂ ਵਿਚ ਹੱਥ ਵਟਾਉਂਦੇ ਸਨ ਅਤੇ ਇਕੱਠੇ ਯਹੋਵਾਹ ਦੀ ਭਗਤੀ ਕਰਦੇ ਸਨ। (ਲੇਵੀ. 10:12-14; ਬਿਵ. 31:12) ਪਰ ਇਹ ਰੀਤ ਅੱਜ-ਕੱਲ੍ਹ ਖ਼ਤਮ ਹੁੰਦੀ ਜਾ ਰਹੀ ਹੈ। ਲੇਕਿਨ ਅਸੀਂ ਜਾਣਦੇ ਹਾਂ ਕਿ ਪਰਿਵਾਰ ਦਾ ਮਿਲ ਕੇ ਕੰਮ ਕਰਨਾ ਬਹੁਤ ਜ਼ਰੂਰੀ ਹੈ, ਖ਼ਾਸਕਰ ਭਗਤੀ ਦੇ ਮਾਮਲੇ ਵਿਚ। ਯਹੋਵਾਹ ਪਰਮੇਸ਼ੁਰ ਨੇ ਪਰਿਵਾਰ ਦੀ ਸ਼ੁਰੂਆਤ ਕੀਤੀ ਸੀ। ਸੋ ਜਦੋਂ ਉਹ ਪੂਰੇ ਪਰਿਵਾਰ ਨੂੰ ਮਿਲ ਕੇ ਭਗਤੀ ਕਰਦਿਆਂ ਦੇਖਦਾ ਹੈ, ਤਾਂ ਉਸ ਦਾ ਜੀਅ ਖ਼ੁਸ਼ ਹੋ ਜਾਂਦਾ ਹੈ!

² ਮਿਲ ਕੇ ਪ੍ਰਚਾਰ ਕਰੋ: ਇਕੱਠੇ ਪ੍ਰਚਾਰ ਕਰਨ ਨਾਲ ਆਪਸ ਵਿਚ ਪਿਆਰ ਵਧਦਾ ਹੈ। ਇਸ ਲਈ, ਕਲੀਸਿਯਾ ਦੇ ਬਜ਼ੁਰਗ ਹੋਰਨਾਂ ਭੈਣਾਂ-ਭਰਾਵਾਂ ਨਾਲ ਪ੍ਰਚਾਰ ਕਰਨ ਤੋਂ ਇਲਾਵਾ ਸਮੇਂ-ਸਮੇਂ ਤੇ ਆਪਣੀ ਪਤਨੀ ਤੇ ਬੱਚਿਆਂ ਨਾਲ ਵੀ ਕੰਮ ਕਰਦੇ ਹਨ। (1 ਤਿਮੋ. 3:4, 5) ਸਫ਼ਰੀ ਨਿਗਾਹਬਾਨ ਬਹੁਤ ਮਸਰੂਫ ਹੁੰਦੇ ਹਨ, ਪਰ ਫਿਰ ਵੀ ਉਹ ਆਪਣੀਆਂ ਪਤਨੀਆਂ ਨਾਲ ਮਿਲ ਕੇ ਪ੍ਰਚਾਰ ਕਰਨ ਲਈ ਸਮਾਂ ਕੱਢਦੇ ਹਨ।

³ ਮਾਪੇ ਆਪਣੇ ਬੱਚਿਆਂ ਨਾਲ ਪ੍ਰਚਾਰ ਕਰ ਕੇ ਬਿਹਤਰ ਤਰੀਕੇ ਨਾਲ ਪ੍ਰਚਾਰ ਕਰਨ ਵਿਚ ਉਨ੍ਹਾਂ ਦੀ ਮਦਦ ਕਰਦੇ ਹਨ। ਬੱਚੇ ਨਾ ਕੇਵਲ ਆਪਣੇ ਮਾਤਾ-ਪਿਤਾ ਨੂੰ ਯਹੋਵਾਹ ਲਈ ਅਤੇ ਹੋਰਨਾਂ ਲੋਕਾਂ ਲਈ ਪਿਆਰ ਜ਼ਾਹਰ ਕਰਦਿਆਂ ਦੇਖਦੇ ਹਨ, ਸਗੋਂ ਉਹ ਇਹ ਵੀ ਦੇਖ ਸਕਦੇ ਹਨ ਕਿ ਉਨ੍ਹਾਂ ਦੇ ਮਾਤਾ-ਪਿਤਾ ਪ੍ਰਚਾਰ ਕਰ ਕੇ ਕਿੰਨੇ ਖ਼ੁਸ਼ ਹਨ! (ਬਿਵ. 6:5-7) ਬੱਚਿਆਂ ਦੇ ਵੱਡੇ ਹੋ ਜਾਣ ਤੇ ਵੀ ਮਾਪਿਆਂ ਲਈ ਉਨ੍ਹਾਂ ਨਾਲ ਮਿਲ ਕੇ ਪ੍ਰਚਾਰ ਕਰਨਾ ਜ਼ਰੂਰੀ ਹੈ। ਇਕ ਮਾਤਾ-ਪਿਤਾ ਅਜੇ ਵੀ ਆਪਣੇ ਤਿੰਨ ਮੁੰਡਿਆਂ ਨਾਲ ਮਿਲ ਕੇ ਪ੍ਰਚਾਰ ਕਰਦੇ ਹਨ ਭਾਵੇਂ ਤਿੰਨਾਂ ਦੀ ਉਮਰ ਹੁਣ 15 ਤੋਂ 21 ਸਾਲਾਂ ਦੇ ਵਿਚਕਾਰ ਹੈ। ਪਿਤਾ ਕਹਿੰਦਾ ਹੈ: “ਇਕੱਠੇ ਪ੍ਰਚਾਰ ਕਰਨ ਤੇ ਅਸੀਂ ਹਰ ਵਾਰ ਮੁੰਡਿਆਂ ਨੂੰ ਕੁਝ-ਨ-ਕੁਝ ਸਿਖਾਉਂਦੇ ਹਾਂ। ਅਸੀਂ ਉਨ੍ਹਾਂ ਲਈ ਪ੍ਰਚਾਰ ਦੇ ਕੰਮ ਨੂੰ ਮਜ਼ੇਦਾਰ ਤੇ ਉਤਸ਼ਾਹਜਨਕ ਬਣਾਉਣ ਦੀ ਕੋਸ਼ਿਸ਼ ਕਰਦੇ ਹਾਂ।”

⁴ ਮਿਲ ਕੇ ਤਿਆਰੀ ਕਰੋ: ਕਈ ਪਰਿਵਾਰਾਂ ਦਾ ਤਜਰਬਾ ਰਿਹਾ ਹੈ ਕਿ ਪ੍ਰਚਾਰ ਦੇ ਕੰਮ ਲਈ ਇਕੱਠੇ ਤਿਆਰੀ ਕਰਨੀ ਫ਼ਾਇਦੇਮੰਦ ਹੈ। ਬੱਚਿਆਂ ਨੂੰ ਬਹੁਤ ਮਜ਼ਾ ਆਉਂਦਾ ਹੈ ਜਦੋਂ ਮਾਪੇ ਉਨ੍ਹਾਂ ਨਾਲ ਪ੍ਰਚਾਰ ਕਰਨ ਦੀ ਰੀਹਰਸਲ ਕਰਦੇ ਹਨ। ਕੁਝ ਮਾਪੇ ਪਰਿਵਾਰਕ ਅਧਿਐਨ ਖ਼ਤਮ ਕਰਨ ਤੋਂ ਬਾਅਦ ਰੀਹਰਸਲ ਕਰਦੇ ਹਨ।

⁵ ਜਦੋਂ ਅਸੀਂ ਆਪਣੇ ਘਰਦਿਆਂ ਨਾਲ ਮਿਲ ਕੇ ਜ਼ਰੂਰੀ ਤੇ ਮਜ਼ੇਦਾਰ ਕੰਮ ਕਰਦੇ ਹਾਂ, ਤਾਂ ਸਾਨੂੰ ਉਸ ਕੰਮ ਤੋਂ ਹੋਰ ਵੀ ਖ਼ੁਸ਼ੀ ਮਿਲਦੀ ਹੈ। ਜਦੋਂ ਪਰਿਵਾਰ ਮਿਲ ਕੇ ਘਰ-ਘਰ ਪ੍ਰਚਾਰ ਕਰਦਾ ਹੈ, ਪੁਨਰ-ਮੁਲਾਕਾਤਾਂ ਕਰਦਾ ਹੈ ਅਤੇ ਬਾਈਬਲ ਸਟੱਡੀਆਂ ਕਰਾਉਂਦਾ ਹੈ, ਤਾਂ ਇਸ ਨਾਲ ਸਾਰਿਆਂ ਨੂੰ ਖ਼ੁਸ਼ੀ ਮਿਲਦੀ ਹੈ। ਆਪਣੇ ਪਰਿਵਾਰ ਦੇ ਜੀਆਂ ਨਾਲ ਯਹੋਵਾਹ ਦੀ ਭਗਤੀ ਕਰ ਕੇ ਤੁਸੀਂ ਵੀ ਖ਼ੁਸ਼ੀ ਨਾਲ ਕਹਿ ਸਕੋਗੇ: “ਮੈਂ ਅਤੇ ਮੇਰਾ ਘਰਾਣਾ ਤਾਂ ਯਹੋਵਾਹ ਹੀ ਦੀ ਉਪਾਸਨਾ ਕਰਾਂਗੇ।”—ਯਹੋ. 24:15.