ਸਮੇਂ ਦੇ ਬੀਤਣ ਨਾਲ ਧਰਤੀ ʼਤੇ ਬਹੁਤ ਸਾਰੇ ਲੋਕ ਹੋ ਗਏ। ਜ਼ਿਆਦਾਤਰ ਲੋਕ ਬੁਰੇ ਸਨ। ਇੱਥੋਂ ਤਕ ਕਿ ਸਵਰਗ ਵਿਚ ਵੀ ਕੁਝ ਦੂਤ ਬੁਰੇ ਬਣ ਗਏ। ਉਹ ਸਵਰਗ ਛੱਡ ਕੇ ਧਰਤੀ ʼਤੇ ਆ ਗਏ। ਕੀ ਤੁਹਾਨੂੰ ਪਤਾ ਕਿ ਉਹ ਧਰਤੀ ʼਤੇ ਕਿਉਂ ਆਏ? ਉਹ ਇਸ ਲਈ ਆਏ ਤਾਂਕਿ ਉਹ ਇਨਸਾਨਾਂ ਦੇ ਸਰੀਰ ਧਾਰ ਸਕਣ ਤੇ ਔਰਤਾਂ ਨਾਲ ਵਿਆਹ ਕਰਾ ਸਕਣ।

ਵਿਆਹ ਤੋਂ ਬਾਅਦ ਉਨ੍ਹਾਂ ਦੇ ਮੁੰਡੇ ਹੋਏ। ਵੱਡੇ ਹੋ ਕੇ ਇਹ ਗੁੰਡੇ ਬਣ ਗਏ ਜੋ ਬਹੁਤ ਤਾਕਤਵਰ ਸਨ। ਉਹ ਲੋਕਾਂ ਨੂੰ ਮਾਰਦੇ-ਕੁੱਟਦੇ ਸਨ। ਯਹੋਵਾਹ ਨੇ ਇਹ ਜ਼ਿਆਦਾ ਦੇਰ ਤਕ ਨਹੀਂ ਹੋਣ ਦੇਣਾ ਸੀ। ਇਸ ਲਈ ਉਸ ਨੇ ਜਲ-ਪਰਲੋ ਲਿਆ ਕੇ ਬੁਰੇ ਲੋਕਾਂ ਦਾ ਨਾਸ਼ ਕਰਨ ਦਾ ਫ਼ੈਸਲਾ ਕੀਤਾ।

ਪਰ ਇਕ ਆਦਮੀ ਇਨ੍ਹਾਂ ਨਾਲੋਂ ਬਿਲਕੁਲ ਅਲੱਗ ਸੀ। ਉਹ ਯਹੋਵਾਹ ਨੂੰ ਪਿਆਰ ਕਰਦਾ ਸੀ। ਉਸ ਦਾ ਨਾਂ ਨੂਹ ਸੀ। ਉਸ ਦੀ ਇਕ ਪਤਨੀ ਤੇ ਤਿੰਨ ਮੁੰਡੇ ਸਨ। ਉਨ੍ਹਾਂ ਦੇ ਨਾਂ ਸਨ, ਸ਼ੇਮ, ਹਾਮ ਤੇ ਯਾਫਥ ਅਤੇ ਤਿੰਨੇ ਵਿਆਹੇ ਸਨ। ਯਹੋਵਾਹ ਨੇ ਨੂਹ ਨੂੰ ਵੱਡੀ ਸਾਰੀ ਕਿਸ਼ਤੀ ਬਣਾਉਣ ਲਈ ਕਿਹਾ ਤਾਂਕਿ ਉਹ ਅਤੇ ਉਸ ਦਾ ਪਰਿਵਾਰ ਜਲ-ਪਰਲੋ ਵਿੱਚੋਂ ਬਚ ਸਕਣ। ਕਿਸ਼ਤੀ ਇਕ ਵੱਡੇ ਬਕਸੇ ਵਾਂਗ ਸੀ ਜੋ ਪਾਣੀ ʼਤੇ ਤੈਰ ਸਕਦੀ ਸੀ। ਯਹੋਵਾਹ ਨੇ ਨੂਹ ਨੂੰ ਕਿਹਾ ਕਿ ਉਹ ਬਹੁਤ ਸਾਰੇ ਜਾਨਵਰਾਂ ਨੂੰ ਕਿਸ਼ਤੀ ਅੰਦਰ ਲੈ ਕੇ ਜਾਵੇ ਤਾਂਕਿ ਉਹ ਵੀ ਬਚ ਸਕਣ।

ਨੂਹ ਨੇ ਜਲਦੀ ਹੀ ਕਿਸ਼ਤੀ ਬਣਾਉਣੀ ਸ਼ੁਰੂ ਕਰ ਦਿੱਤੀ। ਨੂਹ ਤੇ ਉਸ ਦੇ ਪਰਿਵਾਰ ਨੂੰ ਕਿਸ਼ਤੀ ਬਣਾਉਣ ਲਈ ਲਗਭਗ 50 ਸਾਲ ਲੱਗ ਗਏ। ਉਨ੍ਹਾਂ ਨੇ ਬਿਲਕੁਲ ਯਹੋਵਾਹ ਦੇ ਕਹੇ ਅਨੁਸਾਰ ਕਿਸ਼ਤੀ ਬਣਾਈ। ਨਾਲੇ ਨੂਹ ਨੇ ਲੋਕਾਂ ਨੂੰ ਜਲ-ਪਰਲੋ ਦੇ ਆਉਣ ਬਾਰੇ ਚੇਤਾਵਨੀ ਵੀ ਦਿੱਤੀ। ਪਰ ਕਿਸੇ ਨੇ ਉਸ ਦੀ ਗੱਲ ਨਹੀਂ ਸੁਣੀ।

ਹੁਣ ਕਿਸ਼ਤੀ ਵਿਚ ਜਾਣ ਦਾ ਸਮਾਂ ਆ ਗਿਆ ਸੀ। ਆਓ ਦੇਖੀਏ ਕਿ ਅੱਗੇ ਕੀ ਹੋਇਆ।

ਨੂਹ, ਉਸ ਦਾ ਪਰਿਵਾਰ ਅਤੇ ਜਾਨਵਰ ਕਿਸ਼ਤੀ ਵਿਚ ਚਲੇ ਗਏ। ਯਹੋਵਾਹ ਨੇ ਕਿਸ਼ਤੀ ਦਾ ਦਰਵਾਜ਼ਾ ਬੰਦ ਕਰ ਦਿੱਤਾ ਤੇ ਮੀਂਹ ਪੈਣਾ ਸ਼ੁਰੂ ਹੋ ਗਿਆ। ਇੰਨਾ ਮੀਂਹ ਪਿਆ ਕਿ ਕਿਸ਼ਤੀ ਤੈਰਨ ਲੱਗ ਪਈ। ਅਖ਼ੀਰ ਸਾਰੀ ਧਰਤੀ ʼਤੇ ਪਾਣੀ ਹੀ ਪਾਣੀ ਹੋ ਗਿਆ। ਕਿਸ਼ਤੀ ਤੋਂ ਬਾਹਰ ਸਾਰੇ ਲੋਕ ਮਾਰੇ ਗਏ। ਪਰ ਕਿਸ਼ਤੀ ਵਿਚ ਨੂਹ ਤੇ ਉਸ ਦਾ ਪਰਿਵਾਰ ਠੀਕ-ਠਾਕ ਸਨ। ਕੀ ਤੁਸੀਂ ਸੋਚ ਸਕਦੇ ਹੋ ਕਿ ਉਹ ਕਿੰਨੇ ਖ਼ੁਸ਼ ਹੋਏ ਹੋਣੇ ਕਿ ਉਨ੍ਹਾਂ ਨੇ ਯਹੋਵਾਹ ਦਾ ਕਹਿਣਾ ਮੰਨਿਆ?

40 ਦਿਨ ਤੇ 40 ਰਾਤਾਂ ਮੀਂਹ ਪਿਆ ਅਤੇ ਫਿਰ ਹਟ ਗਿਆ। ਹੌਲੀ-ਹੌਲੀ ਧਰਤੀ ਉੱਤੋਂ ਪਾਣੀ ਘੱਟ ਗਿਆ। ਕਿਸ਼ਤੀ ਪਹਾੜਾਂ ʼਤੇ ਜਾ ਟਿਕੀ। ਪਰ ਅਜੇ ਵੀ ਸਾਰੇ ਪਾਸੇ ਕਾਫ਼ੀ ਪਾਣੀ ਸੀ। ਇਸ ਲਈ ਨੂਹ ਤੇ ਉਸ ਦਾ ਪਰਿਵਾਰ ਉਸੇ ਵੇਲੇ ਕਿਸ਼ਤੀ ਵਿੱਚੋਂ ਬਾਹਰ ਨਹੀਂ ਨਿਕਲੇ।

ਹੌਲੀ-ਹੌਲੀ ਪਾਣੀ ਸੁੱਕਣ ਲੱਗ ਪਿਆ। ਨੂਹ ਤੇ ਉਸ ਦਾ ਪਰਿਵਾਰ ਇਕ ਸਾਲ ਤੋਂ ਜ਼ਿਆਦਾ ਸਮਾਂ ਕਿਸ਼ਤੀ ਵਿਚ ਰਹੇ। ਫਿਰ ਯਹੋਵਾਹ ਨੇ ਉਨ੍ਹਾਂ ਨੂੰ ਕਿਸ਼ਤੀ ਵਿੱਚੋਂ ਬਾਹਰ ਆਉਣ ਲਈ ਕਿਹਾ। ਉਹ ਯਹੋਵਾਹ ਦੇ ਬਹੁਤ ਜ਼ਿਆਦਾ ਧੰਨਵਾਦੀ ਸਨ ਕਿ ਉਸ ਨੇ ਉਨ੍ਹਾਂ ਨੂੰ ਬਚਾਇਆ। ਉਨ੍ਹਾਂ ਨੇ ਯਹੋਵਾਹ ਨੂੰ ਭੇਟ ਚੜ੍ਹਾ ਕੇ ਉਸ ਦਾ ਧੰਨਵਾਦ ਕੀਤਾ।

ਯਹੋਵਾਹ ਇਸ ਭੇਟ ਤੋਂ ਖ਼ੁਸ਼ ਸੀ। ਉਸ ਨੇ ਵਾਅਦਾ ਕੀਤਾ ਕਿ ਉਹ ਫਿਰ ਕਦੇ ਵੀ ਧਰਤੀ ʼਤੇ ਜਲ-ਪਰਲੋ ਲਿਆ ਕੇ ਸਭ ਕੁਝ ਨਾਸ਼ ਨਹੀਂ ਕਰੇਗਾ। ਇਸ ਦੀ ਨਿਸ਼ਾਨੀ ਵਜੋਂ ਉਸ ਨੇ ਪਹਿਲੀ ਵਾਰ ਆਕਾਸ਼ ਵਿਚ ਸਤਰੰਗੀ ਪੀਂਘ ਦਿਖਾਈ। ਕੀ ਤੁਸੀਂ ਕਦੇ ਸਤਰੰਗੀ ਪੀਂਘ ਦੇਖੀ ਹੈ?

ਫਿਰ ਯਹੋਵਾਹ ਨੇ ਨੂਹ ਤੇ ਉਸ ਦੇ ਪਰਿਵਾਰ ਨੂੰ ਕਿਹਾ ਕਿ ਉਹ ਧਰਤੀ ਨੂੰ ਆਪਣੇ ਬੱਚਿਆਂ ਨਾਲ ਭਰ ਦੇਣ।