Jeremias
21 Naawat nen Jeremias so mensahe a nanlapud si Jehova sanen imbaki nen Arin Zedekias+ ed sikato si Pasur+ ya anak nen Malkias tan si Sofonias+ ya anak nen Maasias, a saserdote, pian oniay kerewen to: 2 “Ipangasim, mantepet kad si Jehova parad sikami, lapud miguerra ed sikami si Arin Nabucodonosor* na Babilonia.+ Agla pigan gawaen nen Jehova ed sikami so sakey ed saray makapakelaw a gawa to, pian onatras la so ari.”+
3 Oniay imbaga nen Jeremias ed sikara: “Oniay ibaga yod si Zedekias, 4 ‘Oniay inkuan nen Jehova a Dios na Israel: “Ipuliktar kod sikayo* iray armas ed guerra a walad mismon lima yo, ya uusaren yon pilaban ed ari na Babilonia+ tan ed saray Caldeo a mangukubkob ed sikayo diad paway na padir. Tan tiponen ko iratan ed pegley na sayan syudad. 5 Tan siak a mismo so milaban ed sikayo+ diad panamegley na akaunat a lima tan mabiskeg a taklay, tekep na pasnok tan sanok tan baleg a pambusol.+ 6 Kabilen ko iray manaayam ed sayan syudad, totoo tan ayayep. Ompatey ira lapud baleg a salot.”’*+
7 “‘“Tan kayari na satan,” so imbaga nen Jehova, “iyawat koy Arin Zedekias na Juda, saray ariripen to, tan saray totoo ed sayan syudad—saramay akaliktar ed salot, espada, tan eras—ed si Arin Nabucodonosor* na Babilonia, ed saray kakabusol da, tan ed saramay malabay a mamatey ed sikara.*+ Pateyen to rad panamegley na espada. Agto ra panermenan, tan agto ra abageyen odino kasian.”’+
8 “Tan ibagam ed sarayan totoo, ‘Oniay inkuan nen Jehova: “Iyan kod arapan yo so dalan na bilay tan say dalan na patey. 9 Ompatey ed espada, eras, tan salot iramay mansiansia ed sayan syudad. Balet mantultuloy a manbilay so siopaman ya ompaway tan onsuko ed saray Caldeo a mangubkob ed sikayo, tan nakayarian to so bilay* to bilang samsam.”’*+
10 “‘“Ta impulisay ko la iyan syudad tan sagmaken to so kadederal tan aliwan pankaabigan,”+ so imbaga nen Jehova. “Iyawat ko itan ed ari na Babilonia,+ tan poolan to.”+
11 “‘Sikayo ran walad sankaabungan na ari na Juda: Dengel yoy salita nen Jehova. 12 O sankaabungan nen David, oniay inkuan nen Jehova:
“Kinabuasan yon ipatnag so inkahustisya,
Tan iliktar yo imay tatakewan na managsaol,+
Pian say sanok ko et ag-ondalang a singa apoy+
Tan ondalang ya anggapoy makayarin mangerep
Lapud saray mauges a kagagawa yo.”’+
13 ‘Onsumpa ak ed sika, O sikan manaayam ed lawak,*
O bato ed patar a dalin,’ so imbaga nen Jehova.
‘Balet sikayon mangibabagay: “Siopay onlusob ed sikatayo?
Tan siopay onloob ed panaayaman tayo?”
14 Mikuentaan ak ed sikayo
Unong a manepeg ed saray kagagawa yo,’+ so imbaga nen Jehova.
‘Tan poolan ko so katakelan to,
Tan upoten na saya so amin a walad kaliberliber to.’”+