Say 10 Salot

NENGNENG moy litrato. Saratan so 10 salot ya indapo nen Jehova ed Ehipto. Diad unonan litrato, imbasig nen Aaron so baston to ed Ilog Nilo. Tan nagmaliw ya dala so danum. Inaatey iray sira tan binmanget so ilog.

Insan, pinapaway nen Jehova iray patang ed Ilog Nilo. Linma rad amin a pasen—diad lutoan, kawali, katri, tan arum ni ra. Nen inatey iray patang, impanbubuntonan iratan na saray Ehipsio tan binmanget so kaliberliber.

Insan, impekpek nen Aaron so baston to ed dalin, tan nagmaliw ya ageyet so dabok. Ansakit so ketket na saraya. Satan so komatlon salot ed dalin na Ehipto.

Saray sinmublay ya salot et diad saray Ehipsio labat, agkaiba iray Israelita. Say komapat ya salot et angkakabaleg iran apangat ya linmoloob ed amin ya kaabungan na saray Ehipsio. Say komaliman salot et diad saray ayayep. Inaatey iray baka, karnero, tan kanding na saray Ehipsio.

Insan, angala si Moises tan Aaron na dapol tan insibwag dad dagem. Et apelpelsaan iray totoo tan ayayep. Satan so komanem ya salot.

Kayari to, inturo nen Moises so tawen, tan nampakarol tan nampauran na kristal si Jehova. Aman la so sankagrabian ya bagyo ed Ehipto.

Say komawalon salot et dakdakel ya duron. Agnin balot itan agawa nensaman. Sinimot day amin ya ag-aderal na uran a kristal.

Say komasiam a salot et bilunget. Taloy agew ya ambilbilunget so Ehipto, balet maliwawa diad kulaan na saray Israelita.

Say sampot, imbaga na Dios ed saray totoo to ya ipuranis day dala na kanding o karnero ed lusek na puerta ra. Insan dinmalan so anghel na Dios ed interon Ehipto. Diad saray abung ya apuranisay dala, agto pinatey iray wadman. Balet, diad saray abung ya ag-apuranisay dala, pinatey na anghel na Dios so panguloan ya anak tan ayep da. Satan so koma-10 ya salot.

Kayari na sayan salot, inabuloyan la nen Faraon iray Israelita ya onalis. Akaparaan la ray totoo na Dios, tan diad saman ya labi et binmuat la ra.