Ugaw ya Manlilingkor ed Dios

GUAP-GUAPO yay ugaw awa? Say ngaran to et Samuel. Tan sayay lakin akatapew so lima tod si Samuel et say atagey a saserdote na Israel a si Eli. Si Samuel et inyakar nen tatay ton si Elkana tan nanay ton Hana ed kinen Eli.

Manga apat taon odino limay taon to ni labat ed saman. Balet sikatoy manayam la diad tabernakulo pian manlingkor ed si Jehova kaibay Eli tan arum nin saserdote. Akin et inabuloyan nen Elkana tan Hana si Samuel anta uga-ugaw ni? Nengnengen tayo.

Pigaran taon antis na saya, maer-ermen si Hana ta anggapoy anak to, tan labalabay toy nawalaan na anggan sakey. Kanian aminsan, sanen linmad tabernakulo si Hana, impikasi to: ‘O Jehova, agmo ak lilingwanan! No ikdan mo ak na sakey ya anak a laki, ipormisak ya iter kod sika pian manlingkor ed sika legay bilay to.’

Inebatan nen Jehova so pikakasi nen Hana, tan kayari na pigaran bulan et inyanak toy Samuel. Inad-aro nen Hana so anak to, tan binangatan to nipaakar ed si Jehova sanen melag ni. ‘No apakso lay Samuel, awiten kod tabernakulo pian diman manlingkor ed si Jehova,’ so imbaga tod si Elkana.

Atan so nanenengneng tayod litrato ya gagawaen di Hana tan Elkana. Tan lapud si Samuel et binangatan ya maong na atateng to, labalabay toy manlingkor ed tolda nen Jehova. Kada taon, oonlay Hana tan Elkana pian mandayew ed sayan espisyal a tolda, tan pian bisitaen so anak da. Tan tinaon ya igagawaan nen Hana na tsaleko odino kawes si Samuel.

Diad dakel a taon, siansian nanlingkor si Samuel ed tabernakulo nen Jehova, tan sikatoy labalabay nen Jehova tan na totoo. Balet saray anak nen Eli ya si Hopni tan Finehas et mauges. Susugsogan da met iray arum ya ag-unoren si Jehova. Dapat ekalen ira nen Eli ya saserdote, balet agto itan ginawa.

Anggano wala ray manggagawa na mauges diad tabernakulo, agtinmundan nanlingkor ed si Jehova so ugaw nin Samuel. Tan lapud daiset so mangaaro ed si Jehova, abayag ya ag-akitongtong si Jehova ed saray totoo. Nen ombabaleg lay Samuel, onyay agawa:

Legan ya nanaugip diad tabernakulo, walay arengel ton boses. Tan inmebat: ‘Wadia ak.’ Insan binmatik ed si Eli, tan imbaga to: ‘Wadia ak ta tinawag yo ak.’

Balet imbaga nen Eli: ‘Agta ka tinawag; pawil kad dukolan mo.’ Kanian pinmawil si Samuel ed dukolan to.

Insan wala lamet so tinmawag: ‘Samuel!’ Kanian binmangon si Samuel tan linmad kinen Eli. ‘Wadia ak ta tinawag yo ak,’ so kuan to. Balet imbaga nen Eli: ‘Anako, agta ka tinawag. Pawil kad dukolan mo.’ Kanian pinmawil si Samuel ed dukolan to.

Diad komatlon beses, wala lamet so tinmawag ed sikato, ‘Samuel!’ Kanian batik si Samuel ed si Eli. ‘Wadia ak ta tinawag yo ak amo,’ so kuan to. Atalosan la natan nen Eli ya si Jehova so manatawag. Kanian imbaga tod si Samuel: ‘Pawil kad dukolan mo, tan no tawagen to ka lamet, ibagam ed sikato, “Mansalita ka Jehova, ondedengel so lingkor mo.”’

Ontan so ginawa nen Samuel sanen tinmawag lamet si Jehova. Imbaga nen Jehova ed si Samuel ya dusaen To si Eli tan saray anak to. Ag-abayag, apatey si Hopni tan Finehas sanen akilaban irad saray Filisteo, tan nen naamtaan iya nen Eli, sikatoy abaktar, aputer so tenger to tan inatey met. On, agawa so imbaga nen Jehova.

Binmaleg si Samuel, tan sikato lay sampot ya ukom ed Israel. Sanen masiken la, kinerew na totoo: ‘Mamili ka na ari mi.’ Aglabay nen Samuel ya gawaen iya, ta say talagan ari da et si Jehova. Balet imbaga nen Jehova ya dengelen to ray totoo.